ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

উত্তর প্রদেশকী মুখ্য মন্ত্রী শ্রী য়োগী আদিত্যনাথজী, কেন্দ্রগী মন্ত্রীমন্দলদা লৈরিবা ঐহাক্কী মরুপশিং, উপ মুখ্য মন্ত্রী কেশব প্রসাদ মৌরিয়া অমসুং শ্রী বৃজেস পাথকজী, উত্তর প্রদেশ সরকারগী মন্ত্রীশিং, এম.পি.শিং, এম.এল.এ.শিং অমসুং মফম অসিদা লাক্লুবা মশিং য়াম্লবা কানপুরগী ঐহাক্কী নুংশিরবা ইচিল-ইনাওশিং,

নুপীমচা অসিনা মফম অসিদা পেন্তিং অমা য়েক্লি, SPGগী মীওইশিংনা মসি লৌরকউ। কনাগুম্বা অমনা মফম অদুদা, কাচিন অদুদা লাই অমা য়েকখ্রে, মদুদা অদোমগী লৈফম ইবিয়ু, ঐনা চিথী অমা থাজরক্কে। কাচিন অদুদা নহা ওইরিবা নুপা অমা লৈ, মহাক্কী লৈফম ইহৌ ঐহাক্না অদোমদা চিথী অমা ইজরক্কনি। মসিদা লৈরিবা অঙাং অসিনা, মতম শাংনা মহাক্কী খুৎ অদু থাংগৎতুনা লৈরে, ঙসি নহাক্কী লেংজুম অদু নারক্লগনি, নহাক ৱারগনি। ঙসিদি কানপুর অসি নুংঙাইবগী পনখৈ য়ৌরে। মফমদুদা লৈরিবা ফোতোগ্রাফর খরা, মফমদুদা য়েংবিয়ু, SPGগী মীওইশিংনা অঙাং অদুবু মতেং পাংবিয়ু।

ভারত ইমানা য়াইফরে!

ভারত ইমানা য়াইফরে!

চাউখৎ-থৌরাংগী থৌরম অসি এপ্রিল 24দা কানপুরদা পাংথোক্নবা থৌরাং তৌরম্মি, অদুবু পহলগামগী এতেক অসিনা মরম ওইদুনা ঐহাক্কী কানপুর খোঙচৎ অসি তোকপা তাখি। পহলগামগী পাংদবা তেরোরিস্ত এতেক্তা, ঐখোয়গী কানপুরগী মচানুপা শুভম দ্বিবেদীসু অসিগুম্বা চাউখৎপা থৌওং অসিগী ভিক্তিম অমা ওইখি। ঐখোয় পুম্নমক্না ইচানুপী আইসনিয়াগী অৱাবা, নুংঙাইতবা অমসুং শাউনীংবা অদু ফাওবা ঙম্মী। ওপরেসন সিন্ধুরগী মওংদা ঐখোয়গী ইচে-ইচলশিং অমসুং ইচানুপীশিংগী অৱাবা অদু মালেম পুম্বনা উখ্রে। ঐখোয়না মাইল কয়া চংশিন্দুনা পাকিস্তানগী তেরোরিস্তশিংগী মফমশিং অমাং অতা থোকহনখি‌। অমসুং ঐখোয়গী লান্মীনা অসিগুম্বা থৌওং অমা পাংথোকখি, অসিগুম্বা থৌওং অমনা পাকিস্তানগী লান্মীবু লান অসি লেপহন্নবা হায়জহনখি অমসুং দিমান্দ তৌহনখি। নীংতম লানগী লমদম অসিদগী ঐহাক্না লান্মীগী থৌনা অদুদা হন্না হন্না ইকায় খুম্নবা উৎচরি। ঐহাক্না অমুক্কা হন্না হায়জনীংবদি, ওপরেসন সিন্দুরগী মতমদা নোনজখিবা য়েক্নবশিংনা ৱাখল শাগৎপপা তৌরোইদবনি, ওপরেসন সিন্দুর অসি লোইদ্রি। তেরোরিজমগা লান্থেংনবদা ভারতনা ময়েক শেংনা প্রিন্সিপল অহুমগী মতাংদা ৱারেপ লৌখ্রে। অহানবদা - ভারতনা তেরোরিস্ত এতেক খুদিংমক্তা মতিক চাবা পাউখুম পীগনি। মতম, পাউখুম পীনবগী পাম্বৈ অমসুং পাউখুম পীনবগী ফিভমশিং অসি ঐখোয়গী লান্মীশিংনা মশামক্না লেপকনি। অনিশুবদা, ভারতনা এতোম বোমগী অকিবা পীরকপদা অকিবা পোক্লোই অমসুং মদুদা য়ুম্ফম ওইদুনা ৱারেপ অমত্তা লৌরোই। অহুমশুবদা, ভারতনা তেররগী মাস্তর অমসুং তেরোরিস্তশিংবু মতেং পাংলিবা সরকারবু চপ মান্নবা মীৎয়েংগা লোয়ননা য়েংগনি। হেতর অমসুং নন-হেতর এক্তরশিংগী পাকিস্তানগী গেম অসি মখা তানা মথৌ তৌরোই। করিগুম্বা ঐহাক্না কানপুরিয়াদা মসিবু ময়েক শেংনা হায়রবদি, য়েক্নববু মহাক্না মফম অমা হেক্তদা লৈরবসু মফম অদুদগী তান্থোক্লগনি।

মরুপশিং,

ওপরেসন সিন্দুরদা মালেমনা ভারতকী লমদমসিগী ওইবা খুৎলাইশিং অমসুং মেক ইন ইন্দিয়াগী শক্তিসু উবা ফংলে। ঐখোয়গী ইন্দিয়ন খুৎলাইশিং, ব্রহ্মোস মিসাইলশিংনা য়েক্নবশিংগী য়ুমদা চঙখ্রে অমসুং মাং-তাকহনখ্রে। মখোয়না পান্দম থম্লিবা মফম খুদিংদা বোমশিং পোখাইহনখি। ঐখোয়না মসিগী শক্তি অসি আত্মনির্ভর ভারতকী ৱারেপ অদুদগী ফংলি। মতম অমদা ভারতনা মশাগী লানগী মথৌ তাবশিং, ঙাকশেলগীদমক অতোপ্পা লৈবাকশিংদা মখা পোল্লি। ঐখোয়না হায়রিবা ফিভমশিং অসি হোংদোকপা হৌখি। ভারতনা মশাগী সেক্যুরিতীগী মথৌ তাবশিংদা মশা-মরোমদোম লেপচবা অসি ঐখোয়গী ইকোনোমীগীদমক্তা মরু ওইবতা নত্তনা লৈবাক অসিগী মশানা ইকাই খুম্নবগীদমক্তসু মরু ওই। মরম অদুনা, ঐখোয়না লৈবাক অসিবু মীপাল তাংবদগী নীংতম্বা ফংহন্নবা আত্মনির্ভর কেম্পেন অমা হৌদোক্লে অমসুং দিফেন্স সেক্তরদা আত্মনির্ভর ওইবদা অচৌবা থৌদাং লৌরিবা অসি উত্তর প্রদেশ পুম্নমক্কীদমক চাউথোকচনীংঙাইনি। কানপুরদা অরিবা ওর্দিনান্স ফেক্তরী অমা লৈবগুম্না, ঐখোয়না ওর্দইনান্স ফেক্তরী 7বু অচৌবা মোদর্ন কম্পনী অমদা ওন্থোক্লে। ঙসিদি, লৈবাক অসিগী খ্বাইদগী চাউবা দিফেন্স কোরিদোর অসি য়ু.পি.দা শাগৎলি। মসিগী কোরিদোর অসিগী কানপুর নোদ অসি দিফেন্স সেক্তরদা আত্মনির্ভর ভারতকী অচৌবা সেন্তর অমনি।

মরুপশিং,

ত্রেদিস্নেল ইন্দস্ত্রীশিংনা মফম হোংলকপা মতম অমদা, হৌজিক দিফেন্স সেক্তরগী অচৌবা কম্পনীশিং মফম অসিদা লাক্লি। AK203 রাইফল পুথোকপা অসি অনকপদা লৈরিবা অমেথিদা হৌখ্রে। ওপরেসন সিন্দুরদা য়েক্নবশিংবু মীকপ থোকহনখিবা ব্রহ্মোস মিসাইলগী অনৌবা এদ্রেস অসি উত্তর প্রদেশনি। তুংলমচৎতা, কানপুর অমসুং য়ু.পি.না ভারতপু দিফেন্সকী অচৌবা এক্সপোর্তর অমা ওইহনবদা মাংজিল থানা চৎকনি। মফম অসিদা অনৌবা ফেক্তরীশিং লিংখৎকনি। মফম অসিদা অচৌবা ইনবেস্তমেন্ত লাক্কনি। মফম অসিদা লৈরিবা নহা লিশিং কয়াদা অফবা থবক ফংহল্লগনি।

মরুপশিং,

য়ু.পি. অমসুং কানপুরবু চাউখৎপগী অনৌবা অৱাংবা থাক্তা পুখৎপা অসি দবল ইঞ্জিন সরকার অসিগী অহানবা মরুওইবনি। মসি মফম অসিদা ইন্দস্ত্রীশিংবু পুক্নিং থৌগৎলকপা মতমদা, কানপুরগী অরিবা শক্তম অদু অমুক হন্না ফংবা মতমদা ওইথোকপা ঙমগনি। অদুবু ইচিল-ইনাওশিং, মমাংগী সরকারশিংনা মোদর্ন ইন্দস্ত্রীশিংগী মথৌ তাবশিং অসিবু মীৎয়েং চংখিদে। কানপুরদগী ইন্দস্ত্রীশিং মাইগ্রেৎ তৌরকখি। ইমুং-মনুংদা য়ুম্ফম ওইবা লৈঙাকশিংনা মখোয়গী মমিৎ উইশিন্দুনা লৈখি। মসিগী মহৈনা কানপুর খক্তমক নত্তনা য়ু.পি. পুম্নমক শোত্থনা লৈখি।

ইচিল-ইনাওশিং,

রাজ্য অসিগী ইন্দস্ত্রীএল প্রোগ্রেসকীদমক খ্বাইদগী মরুওইবা কন্দিসন অনি লৈ, অহানবদা- ইনর্জী সেক্তরদা মশা-মরোমদোম লেপচবা হায়বদি পাৱর সপ্লাই অমসুং অনিশুবদা- ইনফ্রাস্ত্রকচর অমসুং কন্নেক্তিবিতী। ঙসি মফম অসিদা মেগাৱাৎ 660গী পানকী পাৱর প্লান্ত, মেগাৱাৎ 660গী নেবেলি পাৱর প্লান্ত, মেগাৱাৎ 1320গী জৱাহরপুর পাৱর প্লান্ত, মেগাৱাৎ 660গী ওবারাসি পাৱর প্লান্ত, মেগাৱাৎ 660গী খুর্জা পাৱর প্লান্ত শঙ্গাখ্রে। মসিনা য়ু.পি.গী ইনর্জীগী মথৌ তাবশিং ফংহন্নবা অচৌবা খোংথাং অমনি। হায়রিবা পাৱর প্লান্তশিং অসিগী মতুংদা, য়ু.পি.দা ইলেক্ত্রিসিতী ফংহনবগী চাং অসি মখা তানা হেনগৎলগনি। মসিনা মফম অসিগী ইন্দস্ত্রীশিংদসু খুমাং চাউশিলহল্লগনি। ঙসি লুপা করোর লিশিং 47 হেন্না চঙগদবা চাউখৎ-থৌরাংগী থবক কয়া অমসু শঙ্গাখ্রে অমসুং উরেপ উয়ুংসু তমখ্রে। মফম অসিদা, অহল ওইরবা মীওইশিংদা লেম্না লায়েংনবা আয়ুশ্মান ভায়া ভন্দানা কার্দশিংসু পীরি। অতোপ্পা স্কিমশিংগী বেনিফিসরীশিংদসু মতেং পাংলি। স্কিমশিং অসি, চাউখৎ-থৌরাংগী থবকশিং অসিনা কানপুর অমসুং য়ু.পি.গী চাউখৎ-থৌরাংগীদমক ঐখোয়গী ফিরেপ অদু উৎলি।

মরুপশিং,

ঙসিদি, কেন্দ্র অমসুং রাজ্য সরকারনা মোদর্ন অমসুং দিবেলপ তৌরবা উত্তর প্রদেশ অমা শেমগৎনবা হোৎনরি। মসিগী মহৈ ওইনা, অচৌবা মেত্রো শহরশিংদা লৈরিবা ইনফ্রাস্ত্রকচর, ফেসিলিতীশিং অমসুং রিসোর্সশিং অসি হৌজিক কানপুরদসু উবা ফংলে। চহি খরগী মমাংদা, ঐখোয়গী সরকারনা কানপুরদা অহানবা মেত্রো পীখি। ঙসি, কানপুর মেত্রোগী ওরেঞ্জ লাইন অসি কানপুর সেন্ত্রেল য়ৌরে। অহানবদা ইলিভেতেদ অমসুং হৌজিকনা অন্দরগ্রাউন্দ, মখল খুদিংমক্কী মেত্রো নেৎৱার্কনা কানপুরগী মরুওইবা মফমশিং শম্নহল্লি। কানপুর মেত্রোগী পাকথোক চাউথোকহনবা অসি মহৌশাগা মান্নবা প্রোজেক্ত নত্তে। কানপুর মেত্রো অসি অচুম্বা ৱাখল্লোন, অচেৎপা অপাম্বা অমসুং অফবা ৱাখল্লোন লৈবা সরকার অমা লৈরবদি লৈবাক অমসুং রাজ্যগী চাউখৎ থৌরাংগীদমক মতৌ করম্না অচেৎপা থৌরাং লৌখৎকদগে হায়বগী খুদম্নি। মমাংদা কানপুরগী মরমদা মীয়াম্না করি হায়নরম্মী হায়বদু নীংশিংবিয়ু। চুন্নীগঞ্জ, বদা চৌরাহা, নায়াগঞ্জ, কানপুর সেন্ত্রেল, অসিগুম্বা মী কুংনা তাবা মফমশিং, মফম কয়াদা লম্বী পীকপগী খুদোংচাদবা, মোদর্ন ইনফ্রাস্ত্রকচর অমসুং প্লান্নিং লৈতবা, মীশিংনা হায়নরম্মি মদুদি মফম অসিদা মেত্রোগুম্বা থবক করম্না পাংথোকপা ঙমগনি? মফমসিদা অচৌবা অহোংবা অমা কদায়দা ওইথোক্কনি? কানপুর অমসুং য়ু.পি.গী অতোপ্পা মরুওইবা শহরশিং অসি চাউখৎপগী লমজেলগী ৱাংমদা লৈরম্মি। মসিনা মরম ওইদুনা, ত্রাফিককী সমস্যা অসি হেন্না লুরমখি, শহরগী খোঙজেল তপ্না তপ্না তপথরকখি, য়ু.পি.গী ওইথোকপা য়াবা ময়াম লৈরম্বা শহরশিং অসি চাউখৎপগী লমজেলদা শোত্থনা লৈখি। অদুবু, ঙসিদি কানপুর অসিমক, য়ু.পি. অসিমকনা চাউখৎপগী লম্বীদা অনৌবা রেকোর্দশিং থম্মি। কানপুরগী মীয়াম্না মেত্রো সর্বিসকী কান্নবা কয়া ফংলগনি হায়বদু অদোম্না উবা ফংলে। কানপুর অসি ললোন-ইতিক্কী অচৌবা মফম অমনি। মেত্রোগী মতেংনা ঐখোয়গী ললোন-ইতিক তৌবা মীওইশিং অমসুং কস্তমরশিং অনিমক্না নবীন মার্কেৎ অমসুং বদা চৌরাহাদা চৎপদা লাইথোকহল্লগনি। কানপুরদা লাকপা অমসুং চৎপা মীওইশিং, IITগী মহৈরোইশিং, মীচম প্রজা, মখোয় পুম্নমক্না সেন্ত্রেল রেলৱে স্তেসন য়ৌবদা মতম য়াম্না কনবা ঙমগনি। শহরগী খোঙজেলনা শহরগী খুমাং চাউশিল্লকপা ওইহল্লি হায়বসি ঐখোয়না খঙই। মসিগী খুদোংচাবশিং অসি, মসিগী কন্নেক্তিবিতী অসি, মোদর্ন ত্রান্সপোর্ত ফেসিলিতীশিং অসি ঙসিদি য়ু.পি.গী মোদর্ন দিবেলপমেন্তকী অনৌবা মশক অমা ওইরক্লি।

মরুপশিং,

ঙসিদি ঐখোয়গী য়ু.পি.না মোদর্ন ইনফ্রাস্ত্রকচর অমসুং কন্নেক্তিবিতীগী লমদা মাংলোমদা চংশিল্লি। য়ু.পি.না মাগী অকাইবা লম্বীশিং অমসুং পোৎহোলশিংগীদমক খঙনরম্বা অদু হৌজিক এক্সপ্রেসৱেজশিংগী নেৎৱার্ককীদমক খঙনরে। নুমিদাংগী মতুংদা মীশিংনা মপান্দা থোক্নদবা য়ু.পি.দা, হৌজিক্তি মীশিংনা নোংমদা পুং 2400 হাইৱেদা চৎলি। য়ু.পি.না মতৌ করম্না হোংলকখিবগে হায়বসি কানপুরগী মীয়ামদগী হেন্না কনানা হেন্না খঙবা ঙমগনি? নুমিৎ খরনিগী মতুংদা, কানপুর লখনৌ এক্সপ্রেসৱেদগী লখনৌ ফাওবগী খোঙচৎ অসি মিনিত 40-45 খক্তদা ওইরগনি। ইচানুপী অসিনা মফম অসিদা মতম শাংনা লেপ্লি, মহাক্না ফোতো নম্বদা ৱারম্লগনি, SPGগী মীওইশিংনা মফম অদুদগী ফোতো অদু নম্বিয়ু। থাগৎচরি ইচানুপী, অদোম্না য়াম্না ফজবা অমসুং অঙকপা ফোতো নম্মি। নুপীমচা অসিবু য়েংবিয়ু, মহাক্না ৱারম্লগনি, নহাক্না নহাক্কী মিং অমসুং এদ্রেস ইখ্রবরা, ইচানুপী? ঐগী ওফিসকী মীওইশিংনা লাক্কনি, মখোয়না মদু খুদক্তা লৌগনি, মসি ঐঙোন্দা য়ৌরগনি, ইচিল-ইনাও, য়াম্না থাগৎচরি।

মরুপশিং,

লখনৌদগী পুর্বঞ্চল এক্সপ্রেসৱেগা হকথেংননা শম্নগনি। কানপুর-লখনৌ এক্সপ্রেসৱেসু গঙ্গা এক্সপ্রেসৱেগা শম্নহনগনি। মসিনা নোংপোক অমসুং নোংচুপ অনিমক্তা চৎপদা অরাপ্পা অমসুং মতম কনবা ঙমগনি।

মরুপশিং,

হৌজিক ফাওবদা, কানপুরগী মীয়াম্না ফারুকহবাদ অনৱার্গঞ্জ সেক্সনদা সিঙ্গল লাইন লৈবনা মরম ওইদুনা খুদোংচাদবা মায়োক্নদুনা লাক্লি। রেলৱে ক্রোসিং অমা নৎত্রগা অনি নত্তনা 18দা অদোম্না খুদোংচাদবা মায়োক্নখি। করিগুম্বা মতমদা মসিগী গেৎ অসি থিংখি, করিগুম্বা মতমদা মসিগী গেৎ অদু থিংখি। অদোম্না মতম শাংনা মসিগী প্রোব্লেম অসিদগী কোকহন্নবা হায়দুনা লাক্লি। হৌজিক মফম অসিদা লুপা করোর লিশিং অমা চঙদুনা এলিভেতেদ রেল কোরিদোর অমা শাগনি। মসিনা মফম অসিদা ত্রাফিক ফগৎহল্লগনি, খোঙজেল হেনগৎহল্লগনি অমসুং পোলুসনসু হন্থহল্লগনি অমসুং খ্বাইদগী মরুওইরিবদি কানপুরগী মীয়ামগী মতম কনবা ঙম্লগনি।

মরুপশিং,

কানপুর সেন্ত্রেল রেলৱে স্তেসনসু অপগ্রেদ তৌদুনা মালেমগী থাক্কী ওইবা মওং-মতৌ অমা পীরি। অতেনবা মতমগী মনুংদা, কানপুর সেন্ত্রেল রেলৱে স্তেসন অসিসু এয়রপোর্তগুম্না মোদর্ন ৱার্ল্দ ক্লাস ওইনা উরগনি। ঐখোয়গী সরকারনা য়ু.পি.গী রেলৱে স্তেসন 150 হেন্না অমৃত ভারত রেলৱে স্তেসন ওইনা শেমগৎলি। য়ু.পি.না লৈবাক অসিদা ইন্তর্নেস্নেল এয়রপোর্ত খ্বাইদগী য়াম্না লৈবা রাজ্য অমা ওইখ্রে। হায়ৱে, রেলৱেজ অমসুং এয়রৱেজ, য়ু.পি.না হীরম খুদিংমক্তা খোঙজেল য়াংনা খুমাং চাউশিল্লি।

মরুপশিং,

ঐখোয়না য়ু.পি.বু ইন্দস্ত্রীএল ওইথোকপা য়াবা রাজ্য অমা ওইহল্লসি। চহি অসিগী বজেৎ অসিদা, ঐখোয়না মেক ইন ইন্দিয়াগীদমক মিসন মেনুফেকচরিং লাউথোকখ্রে। মসিগী মখাদা, লোকেল ইন্দস্ত্রীশিং অমসুং পোত্থোক পুথোকপা হেনগৎহনগনি। কানপুরগুম্বা শহরশিং অসিদগী চাউনা কান্নবা ফংগনি। অদোম্না খংবগুম্না, কানপুরগী ইন্দস্ত্রীয়েল কেপাসিতীদা খ্বাইদগী চাউবা কন্ত্রিব্যুসন অসি মাগী MSMEশিং অমসুং অপীকপা ইন্দস্ত্রীশিংদগীনি। ঙসি ঐখোয়না মফমসিদা লৈরিবা অপীকপা ইন্দস্ত্রীশিংগী অপাম্বা মপুং ফাহনবা হোৎনরি।

মরুপশিং,

মতম খরগী মমাং ফাওবদা, ঐখোয়গী MSMEশিং অসি মীয়াম্না পাকথোক চাউথোকপা ঙম্নবা মওং অমদা ৱাহন্থোক পীখি। ঐখোয়না অরিবা ৱাহন্থোকশিং অদু হোংদোক্লে। ঐখোয়না অপীকপা ইন্দস্ত্রীশিংগী তর্নওভর অমসুং স্কেল লিমিৎশিং হেনগৎহনখি। মসিগী বজেৎ অসিদা সরকারনা MSMEশিংগী স্কোপ অমুক হন্না পাকথোক চাউথোকহনখ্রে অমসুং মখোয়দা হেন্না কোমথোকহল্লে। মমাংদা, MSMEশিংসু ক্রেদিৎকী অচৌবা খুদোংচাদবা মায়োক্নখি। হৌখিবা চহি 10 অসিদা ঐখোয়না ক্রেদিৎকী সমস্যা অসি মুত্থৎনবা মথং-মনাও নাইনা অচৌবা ৱারেপ কয়া লৌখ্রে। ঙসিদি, নহারোলশিংনা মশাগী ইন্দস্ত্রী হৌবা পাম্লবদি, মুদ্রা স্কিমগী খুত্থাংদা মখোয়না খুদক্তা কেপিতেল ফংলি। অপীকপা অমসুং ময়াই ওইবা ইন্দস্ত্রীশিংদা শেন্মিৎলোনগী মপাঙ্গল কনখৎহন্নবা ঐখোয়না ক্রেদিৎ গেরেন্তী স্কিম অমা হৌদোক্লে। চহি অসিগী বজেৎ অসিদা, MSMEগী লোনগী গরেন্তী অসি লুপা করোর 20দা হেনগৎহনখ্রে। MSMEশিংদা লুপা লাখ 5 ফাওবগী ওইবা ক্রেদিৎ কার্দশিংসু পীরি। ঐখোয়না অনৌবা ইন্দস্ত্রীশিং, মরু ওইনা MSMEশিংগীদমক মফম অসিদা খুদোংচাবা অমা শেমগৎলি। মসিগীদমক্তা, থৌওংশিং অসি লাইথোকহল্লি। কানপুরগী ত্রেদিস্নেল লেদর অমসুং হোসরী ইন্দস্ত্রীশিং অসি 'ৱান দিস্ত্রিক্ত, ৱান প্রদক্ত'গুম্বা স্কিমশিংগী খুত্থাংদা মপাঙ্গল কনখৎহল্লি। ঐখোয়গী হোৎনরিবশিং অসিনা কানপুর খক্তা নত্তনা য়ু.পি.গী জিলা পুম্নমক কান্নবা ফংগনি।

মরুপশিং,

ঙসিদি, উত্তর প্রদেশতা শেল থাদনবগীদমক্তা মমাংদা অমুক্তা ওইখিদ্রিবা অমসুং সেক্যুর ওইবা অকোয়রোন অমা শেমগৎলে। লায়রবশিংগী য়াইফনবা স্কিমশিং অসি ত্রান্সপরেন্সীগা লোয়ননা পায়খৎলি। গবর্নমেন্তনা মিদ্দল ক্লাসকী মঙলানশিং মপুং ফাহন্নবগীদমক মখোয়গা লোয়ননা লেপ্লি। হায়রিবা বজেৎ অসিদা ঐখোয়না লুপা লাখ 12 ফাওবগী ইনকম অসি তেক্স ফ্রী ওইহল্লে। মসিনা মিদ্দল ক্লাসকী ইমুং করোর কয়াদা অনৌবা থাজবা অমা পীরে, মখোয়দা অনৌবা শক্তি ফংহল্লে। সেবা অমসুং চাউখৎ-থৌরাংগী ৱারেপ অসিগা লোয়ননা ঐখোয়না চপ মান্নবা মওংদা খোঙজেল য়াংনা মাংলোমদা চংশিল্লগনি। লৈবাক অসিবু অমসুং য়ু.পি.বু অনৌবা অৱাংবা থাক্তা পুখৎনবগীদমক ঐখোয়না কন্না হোৎনবদা করিগুম্বা অমত্তা লেপহল্লোই। ঐহাক্না কানপুরগী ঐহাক্কী ইচিল-ইনাও পুম্নমকপু কানপুরগী মঙাল লৈবা তুংলমচৎকীদমক য়াইফ-পাউজেল পীজরি।

হন্না-হন্না থাগৎচরি!

***