Hapoh ka jingïalam jong u Myntri kam pohïing jong ka sorkar pdeng u Amit Shah, ka Tnad kam pohïing (MHA) ka la shim ïa ka rai kaba kongsan ban ai kyrdan— kaba long kawei ka kyrdan kaba kham halor —ïa ki shipai kiba hapoh ka kyrdan ophisar ha ki Central Armed Police Forces (CAPF) bad Assam Rifles (AR) ha ka sngi ba kin shongthait.

Kane ka rai ba kongsan, kaba la shim hapoh ka jingïalam jong u Myntri Rangbahduh ka ri u Narendra Modi, ka thmu ban kyntiew ïa ka jingburom ïalade, ka jingsarong, bad ka jingsngew jong ki shipai kiba shongthait na ka kyrdan Constable sha ka Sub-Inspector. Hapoh kane ka skhim, ki shipai naduh u Constable haduh Sub-Inspector ha ki CAPF bad Assam Rifles kiba shongthait hadien ba ki la shakri slem bad trei shitom yn ai ia ka kyrdan burom kaba shi kyrdan halor ka kyrdan kaba ki don ha ka sngi ba khatduh jong ka jingshakri jong ki, khlem kano kano ka jingmyntoi pisa ne bai bam tymmen.

Ki kyndon kiba iadei bad ka jingioh ia kane ka jingpynkup burom, bad kumno yn ioh ia kane ka kyrdan ki long kumne harum:

Mano ba lah ban ioh

1. Ki shipai ki dei ban pyndep ia baroh ki kyndon ban kiew kyrdan ha ka por ba ki shongthait
2. Ki shipai ki dei ban don ia ka rekod jingshakri kaba bha bad kaba khuid
3. Ka jingbishar bniah ia ka APAR (Ka kaiphod jingbishar bniah ia ka jingtreikam man la u snem) jong ki shipai na ka bynta ki 5 snem ba la dep ka dei ban long kaba ‘Bha’.
4. Ki shipai kim dei ban ioh kano kano ka jingpynshitom kaba jur ha kine ki 5 snem ba la dep
5. Ym dei ban don kano kano ka jingartatien shaphang ka jinglong jong u shipai ha kaba iadei bad ka burom bad ka akor jong u.
6. Ka jingmynjur na ka tnad tohkit bad jingpeitngor (DE/Vigilance) ka long kaba donkam

Ki kyndon

1. Ia ka kyrdan burom yn ai katkum ka jingai jingmut jong u ophisar ba dei peit.
2. Ia ka kyrdan burom yn ai ha ka sngi ba ki shipai kin shongthait.
3. Ym lah ban pdiang ia ki jingmyntoi pisa ne bai bam tymmen ryngkat bad ka kyrdan burom.
4. Ia ka kyrdan burom yn ai tang ha kaba ka kyrdan ban ai ka don hapoh ka kyrdan kaba ki shipai ki don.
5. Ka jingai ia ka kyrdan burom kan ym ktah ia ka kyrdan long heh jong ki shipai.

Ïa ki shipai kiba dei jong ki Central Armed Police Forces (CAPF) bad Assam Rifles (AR) yn ai kyrdan burom kumne harum

*****