ঙসি ৭৮শুবা ৱার্ল্দ হেল্থ এশেমব্লিদা ভারতনা ৱা ঙাংখ্রে, “হকশেলগীদমক মালেম অমা” হায়বা পান্দমগী মখাদা মীওই খুদিংমক্ত হকশেলগী খুদোংচাবা ফংহন্নবা লৈবাক অসিগী থাজবা অমুক হন্না ফোঙদোকখ্রে। ভারতকী মহুৎশিল্লিবা, য়ুনিয়ন হেল্থ সেক্রেতরি শ্রীমতি পুন্যা সালিলা শ্রীভাস্তবানা নৌনা খল্লবা কম্মিতি চিয়ারশিং থাগৎপা ফোঙদোকখি অমসুং মালেমগী লৈবাকশিংগা ৱারি শানবা অমসুং পুন্না থবক তৌমিন্নবগী খুদোংচাবা ফংবদা তরাম্না ওকখি।

খুদিংমক কোনশিন্নবা অমসুং মীওই খুদিংমক কান্নবা ফংহন্নবা ভারতনা পায়খৎলিবা থবকশিংগী মতাংদা, য়ুনিয়ন হেল্থ সেক্রেতরিনা হায়খি অয়ুস্মান ভারতকী মখাদা মশক থোকপা অওনবা কয়া পুরক্লে, মসিনা অপুনবা অনা-লায়েংগী খুদোংচাবা ফংবা অঙকপা ফংনা হেনগৎহল্লে। অয়ুস্মান ভারতনা অনা-লায়েংগী খুদোংচাবা ফংবা হেনগৎহল্লে, ইনফ্রাস্ত্রকচর ফগৎলে, অৱাংবা থাক্কী লায়েংশিংগীদমক শেন্থং পীরে অমসুং হকশেলগী লমদা দিজিতেল শীজিন্নবা য়াংখৎহল্লে- মীওই খুদিংমক অনা-লায়েংগী খুদোংচাবা ফংহন্নবা লম্বী শেম্লে।

মহাক্না হায়খি মীরোনবীশিংগী হকশেল, য়াইফ-য়ুম্বাল, অঙাং শিবা অমসুং অঙাং শিনা পোকপা হন্থহন্নবা ভারতনা পায়খৎলিবা থবকশিং য়ুনাইতেদ নেসন্স পোপুলেসন ফন্দ অমসুং য়ু.এন ইন্তর-এজেন্সি গ্রুপ য়াওনা মালেমগী লুপশিংনা মশক খঙলে। ৱার্ল্দ হেল্থ ওর্গনাইজেসন্না হন্দক ভারত ত্রাকোমা লৈত্রে হায়না লাউথোক্লে অমসুং তি.বি, লেপ্রোসি, লিমফেতিক ফিলারিয়ারিস, মিজল, রুবেল্লা অমসুং কালা-অজারগুম্বা লায়নাশিং মুৎথৎনবা লৈবাক অসিনা থবক পায়খৎলে।

মহাক্না হায়খি মদুদি অচৌবা থৌশিল অমদা, ভারতনা অয়ুস্মান ভারত প্রধান মন্ত্রী জন অরোগ্যা য়োজনাগী মখাদা, শেন-থুমগী ফিবম থিদনা চহি ৭০ গী মথক্ত লৈরিবা অহলশিংদা লেম্না লায়েংবগী খুদোংচাবা ফংহল্লে। তুংগী অনা-লায়েংগী শীনফমগী মীওইশিং ত্রেনিং পীনবা ঐখোয়না হৌখিবা চহি ১০ অসিদা মেদিকেল কলেজ ৩৮৭ দগী ৭৮০ দা হেনগৎহল্লে।

য়ুনিয়ন হেল্থ সেক্রেতরিনা হায়খি লৈবাক অমগী মনিংতম্বা অমসুং তৌবা ঙম্বশিং ইকায়খুম্নবগা লোয়ননা মালেমগী ওইনা মতেং পাংনবা হেনগৎহন্নবা আইনগী অমসুং শোইদনা চৎনগদবা ঙাক্লৌ অমগীদমক ভারতনা য়াম্না কন্না শৌগৎলি। লাইচৎ অসিদা য়ানখিবা অদুনা মীওই খুদিংমক্ত মেদিকেলগী থবকশিং, মতম চানা অমসুং অরোনবা লৈতবা দেতা অমসুং পেথোজেন ফংহনগদবনি; অমসুং মরুওইনা মালেমগী খা থংবা লৈবাকশিংগীদমক তেক্নোলোজি ফংহনবা অমসুং কেপাসিতি হেনগৎহনবা পুক্নিং থৌগৎকদবনি।

পেন্দামিক ত্রিতি খুমাঙচাউশিন্নবা পুরৱারি ওইনা চঙশিনবগীদমক ৱার্ল্দ হেল্থ ওর্গনাইজেসন অমসুং মেম্বর লৈবাকশিং থাগৎলদুনা মহাক্কী ৱারোল লোইশিনখি অমসুং কনাগুম্বা অমতা চিৎথহৌদনবা থাজবা অমা পীবগা লোয়ননা তুংদা লাক্কদবা হকশেলগী শিংনবশিং থেংনবগী মরুওইবা অদু তকশিনখি।

*****