U Myntri Khynnah jong ka sorkar pdeng ba dei khmih ia ka Tnad Rural Development and Communications Chandrasekhar Pemmasani u la kyntu ïa ki jylla ban pyndep ïa ka jingpynïasoh ïa ki Aadhaar number bad ki Records of Rights (RoRs) — ka jingpynkylla ka ban ïarap ban pynïasoh ïa ka jinglong trai jaka bad ka jingithuh digital ba kyrpang, ban pynduh ïa ka jingleh thok, bad ban pynthikna ka jingpoi ki jingmyntoi ba la buh thong kum ka Agristack, ka PM-KISAN bad ka crop insurance. Ha ka jingplie ïa ka National Workshop kaba ar sngi halor ka Survey/Re-survey hapoh ka Digital India Land Records Modernization Programme (DILRMP) mynta ka sngi ha Guntur ha Andhra Pradesh, u Myntri u la ong ba ki jingpynkylla kum ka jingjurip biang, ka jingpynkylla digital, ka jingpyniaid ia ki ophis khlem da pyndonkam shuh da ki kot ki sla, ka jingpynïaid ïa ki mukotduma bad ka jingpyniasoh Aadhaar – kan wanrah ka rukom pyniaid ia ki kam kiba iadei bad ka khyndew kaba bniah bad kaba shai.  Da kaba pynpaw ba ki jingjurip kiba biang ki plie ia ka lad ba iadei bad ka ioh ka kot jong ka jaka haba ki jingtip ki iadei bad ka jingshisha, ki bank ki lah ban ai ram da ka jingshaniah, ki nongkhaii ki lah ban bei tyngka da kaba thikna bad ki nongrep ki lah ban ioh ia ka jingkyrshan ha ka rep ka riang.

Haba pynpaw ba ka Sorkar Pdeng ka angnud ban pyndep ïa ka kam kaba la sahteng la slem bha ban ai ïa ki kot ki sla kiba shai, kiba batai bniah bad kiba iahap bad ki jinglong jingman mynta, u Myntri u la ong ba ïa ka Digital India Land Records Modernization Program (DILRMP) la sdang ban pynkylla ïa ka rukom peit ia ki kam kiba iadei bad ka khyndew ka shyiap lyngba ka jingpynkylla digital, ka jingpynïasoh bad ka jingpynthymmai ryngkat bad ka teknoloji. “Lada ngi kwah ïa ki surok bah kiba stet, ki smart city, ka ïing kaba shngain, bad ka rep ka riang kaba neh, ngi dei ban sdang naduh tynrai”, la ong u Myntri.

Watla ka la don ka jingkiew shaphrang hapoh ka DILRMP, hynrei kawei ka bynta kaba kongsan kaba dang sahteng – haduh mynta la pyndep ia ka jingjurip bad ka jingjurip biang tang ha saw percent ki shnong namar kane ka kam ka dei ka kam kaba heh, kaba iadon bynta bad ka teknoloji bad kaba iadei bad ki kam paidbah, u la ong.

U Chandrasekhar u la ong ba ka khyndew kam dei tang ka jingdon jingem ha ka ri India. Ka long ka dak jong ka jinglong, ka jingshngain bad ka burom. Na ka bynta jan 90 percent ki nongshong shnong jong ngi, ka khyndew bad ki mar ki mata ki pyni ia ka jingdon jingem kaba kordor tam jong ki. Hynrei ki kot ki sla kiba iadei bad ka khyndew ki bym thikna ne kiba la rim ki la long slem bah ka daw tynrai jong ki jingïakynad kiba la saphriang kylleng, ka jingpynslem ha ka roi ka par bad ka jingbym ai ïa ka hok. Ki jingkhein jingdiah jong ngi ki pyni ia ka jingshisha — palat 66% na ki mukotduma ha ki iingbishar kiba kham hapoh ki iadei bad ki jingiajia jaka bad ki jingdon jingem. Wat ha ka Supreme court, shi bynta na ka saw bynta jong ki jingïakynad kiba dang sahteng ki dei kiba ïadei bad ki jingiakajia jaka. Namarkata kane ka dei ka jingeh ia ka jingmut hi jong ka jingpynroi kaba kynthup lang, u la ong.

Da kaba pynpaw ba ïa ki jingjurip jong ngi kiba kham mynshuwa la pynlong palat 100 snem mynshuwa — hapdeng ka snem 1880 bad 1915 — da kaba pyndonkam da ki tiar kum ki kynjri bad ki diengpyngkiang, u Myntri u la ong ha kiba bun ki bynta jong ka ri, khamtam ha ki jylla ka thain shatei lammihngi bad ki Union Territory, ki jingjurip ba mynshuwa ia ka khyndew kim shym la pyndep wat tang shisien ruh. Ki jylla kiba la pyrshang ban jurip ki la lap ba ka rukom treikam ka kynthup ka kam kaba bun bha na ka bynta ka jingpynshisha ïa ka jingshisha ha ki jaka bapher bapher, ka jingpynmih ïa ka map, ka jingpynbeit ïa ki jingpyrshah, bad ka jingpynbna ba khatduh, u la ong.

“Bun ki Jylla kim shym la pynlong ïa ki jingphiah katkum ka map, lane ki buh ïa ki jingthoh shaphang ka jaka kiba ïahap bad ki jingpynkylla ha ka jingthoh, kaba pynlong ïa ki map ba mynta ban long kiba la rim noh. Ka jingshem jong ngi ka pyni ba khlem ka mon saiñ hima sima bad ka jingïatreilang kaba khlaiñ; ki jingjurip ki duh bor bad ki sah khlem pyndep. Dei na kata ka daw ba ka Sorkar India ka la rai ban shim ïa ka kam kaba la pynïaid na kawei ka jaka ka ban wanrah ïa ki kot ki sla kiba iadei bad ki jaka sha ka spah snem kaba 21”, la ong u Shri Chandrasekhar.

Haba batai shuh shuh shaphang ka prokram ba la kyrshan da ka sorkar pdeng, u Myntri u la ong ba kan long kaba la pynïaid da ka Technology - kaba pyndonkam ïa ki jingpeit bniah na suiñ lyngba ki drone bad ki liengsuiñ, tang 10 percent na ka jinglut haba ianujor bad ki rukom tynrai. Kan pyndonkam ruh ia ka AI, GIS bad ki tiar kiba thikna bha. Kan long ka jingiatreilang bad ki jylla kiba wanrah ia ka jingpynshisha katba ka sorkar pdeng ka pynbiang ia ka polisi, ka jingbei tyngka, bad ka jingkyrshan ha ka teknoloji. Ïa kane ka prokram yn pyntreikam ha ki san bynta, kaba sdang naduh 3 lak sq.km jong ki jaka rep ha ki jaka nongkyndong, ha ka samoi kaba 2 snem ryngkat ka jingpynlut pisa kaba T.3,000 klur na ka bynta ka Phase I.

U Myntri u la pyntip ba ka Sorkar Pdeng ka dang shimkhia ruh ïa ka NAKSHA — ka sienjam ba nyngkong eh na ka bynta ka Urban and Peri-Urban Land Records. Palat 150 tylli ki bor pyniaid kam ha ki jaka sor ki dei kiba la dep kynthup. Ka dor jong ki jaka ha sor ka long kaba heh, ki jingkhaii ki long kiba man ka por, bad ki jingkiew kiba heh ki nang kiew. Kine ki ialam shuh shuh sha ki jingiakajia bad ki jingpynbeit bym thikna. Namarkata, ki jingthoh kiba thikna ki long kiba kongsan bha na ka bynta ka jingpynkhreh ia ki jaka sor, ki iing kiba duna dor, bad ka khajna na ki jaka sor”, la ong u Pemmasani.

Da kaba pynpaw ba ka tnad of Land Resources (DoLR) ka pynshlur ïa ki jylla ban pynlong ïa ki rukom pynrung kyrteng jong ki bad ka Revenue Court Case Management system (RCCMS) online bad kaba lait na ka jingpyndonkam da ki kot ki sla, ban shim ïa ki rukom treikam kiba iaid hi dalade, bad ban plié lad ban ïoh bynta ki briew bad ki ophisar na kane kano ka jaka, u Myntri u la ong ba kan ïarap ban buddien bad pyndep ia ki mukotduma kiba iadei bad ki jaka puta, wanrah ka jingkitkhlieh bad pynduna ïa ka jingsahteng.

U Myntri u la ong ba ki jingjurip kiba thikna ki iarap ia kiba don ha ka jingma napdeng jong ngi. Na ka bynta ki nongrep barit baria bad kiba kham duna ka ioh ka kot, ki jaitbynriew riewlum, bad ki longkmie ha ki jaka nongkyndong, ki kot jaka kiba shai kim dei ki jingdon jingem ki bym kongsan hynrei ki long ka jingiada kiba donkam pyrshah ia ka jingshah lehbein. To ngin iaid shakhmat kum ki Team Land Records — ka sorkar pdeng bad ki Jylla ryngkat — ban pyndep ia kane ka kam kaba la sahteng la slem na ka bynta ki briew jong ka ri. To ngin tei ia ka ri ha kaba ka khyndew ka shyiap kam dei shuh ka tynrai jong ka jingkulmar bad jingialeh, hynrei ka tynrai jong ka jingshaniah, ka jingshngain, bad ka jingseisoh. Ka jingiaid lynti na ka Bhu-vivad sha Bhu-vishwas ka sdang na ngi — bad ka por ban iaid ia kata ka lynti ka long mynta, u la bynrap.

Kiwei kiba la iadonlang ha kane ka jingialang kilong u Anagani Satya Prasad, Myntri ka tnad Revenue, Registration & Stamps, Sorkar Andhra Pradesh, ka G. Jaya Lakshmi, Special Chief Secretary bad Chief Commissioner jong ka Land Administration, Manoj Joshi, Secretary bad u Kunal Satyarthi, Joint Secretary, Tnad Land Resources, Sorkar India, ki ophisar na ka sorkar pdeng bad sorkar jylla, bad ki riewshemphang.

*****