“U Myntri Rangbahduh Narendra Modi u la pynkylla ïa ka polisi jong ka India pyrshah ïa ki kam lehnoh kaba ong ba kano kano ka jinghiar thma ia ka khyndew ka shyiap jong ka India yn niew kum ka kam thma,” la ong u Raksha Mantri Rajnath Singh haba ai jingkren sha ki shipai ba shlur jong ka Indian Army ha Badami Bagh Cantt, Srinagar ha ka 15 tarik Jymmang, 2025. U Raksha Mantri u la ban jur ba ka India ka buh hakhmat eh ia ka shongsuk shongsain bad kam ju kyrshan ia ka thma, hynrei haba la thombor ia ka bor synshar jong ka, ka long kaba donkam ban jubab. Lada ka Pakistan ka dang bteng ban kyrshan ia ki kam lehnoh, kan mad ka jingeh kaba khraw, u la ong.

U Rajnath Singh u la khot ia ka Operation Sindoor kum ka sienjam kaba khraw tam kaba la shim da ka India pyrshah ia ki kam lehnoh ha ka histori, bad ka dak jong ka jingkut jingmut jong ka ri ban leh da kaba tyngeh ban pynduh ia ka jingma. “Ka Operation Sindoor ka dei ka jingkut jingmut kaba la pyni da ka India kaba ym dei tang ka jingpyni ia ka kam iada ri, hynrei ban shim ia ki rai kiba shlur ha kano kano ka por ba donkam. Ka la long ka jingangnud jong uwei pa uwei u shipai ba ngin poi sha man la ki jaka rieh jong ki lehnoh bad ban pynduh pyndam ia ki. Ki lehnoh ki la pyniap ia ki nong India katkum ka niam jong ki, ngi la pyniap ia ki namar ki kam jong ki. Kadei ka dharma jong ngi ban pynduh jait ia ki. Ki shipai jong ngi ki la leh ia kaba dei ia ka jingbitar jong ki bad ki la siew kylliang ia ka Pahalgam da ka jingshlur & jingstad kaba khraw”, u la ong.

U Myntri Kam iada ri u la bynrap ba ka Operation Sindoor ka la phah ia ka khubor kaba jam bad kaba shai sha ki seng lehnoh kiba rieh ha Pakistan bad ki kynrad jong ki ba kim don jingshngain hangno hangno ruh. “Ki shipai jong ngi ki la pyni sha ka pyrthei ba ka jingthmu jong ki ka long kaba thikna bad ia ka kam ban khein la iehnoh ha ki nongshun”, u la ong.

U Rajnath Singh u la bynrap ba ïa ka jingkut jingmut ba khlem artatien jong ka India pyrshah ïa ki kam lehnoh lah ban peit bniah na ka jingshisha ba kam shym la shah pynthut ha ka jingbyrngem nuclear jong ka Pakistan, da kaba kdew ba ka pyrthei ka la sakhi haduh katno ka jingbym kitkhlieh ka Islamabad ka la pynmih ïa ki jingbyrngem nuclear ïa ka New Delhi bunsien. “Nga buh ïa kane ka jingkylli hakhmat ka pyrthei: Hato ki tiar nuclear ki long kiba shngaiñ ha ka kti jong kum kane ka ri kaba khlem jingkitkhlieh bad kaba leh thok? Ia ki tiar nuclear jong ka Pakistan dei ban shim hapoh ka jingpeit jong ka International Atomic Energy Agency (IAEA),” u la ong.

U Rajnath Singh u la pynpaw ba lyngba ka jingjia ha Pahalgam, la pyrshang ban pynpra ïa ka jingïatylli ha ka imlang sahlang jong ka ri India, bad ki shipai ki la jubab ïa kane ka jingthombor da kaba siat ïa ka mynsiem jong u nongshun. U la pynkynmaw ïa ka jingpynbna jong ka Pakistan kumba 21 snem mynshwa hakhmat u Myntri Rangbahduh ha katei ka por (L)) Atal Bihari Vajpayee ba yn nym kyrshan shuh ïa ki kam lehnoh na ka khyndew ka shyiap jong ka. U Myntri Iada ri u la ong ba ka Pakistan ka la thok ia ka India, bad ka dei ban sangeh noh ban ai jaka rieh ia ki seng pyrshah ia ka India bad ki seng lehnoh & ban ym ailad ia ki jaka jong ka ban pyndonkam pyrshah ia ka India, u la ong.

U Myntri Kam iada ri u la bynrap ba ka Pakistan ka la poi ha ka kyrdan ba ka la pan ram na ka International Monetary Fund (IMF), katba ka India pat ka hap ha ka kyrdan jong kito ki ri kiba ai pisa sha ka IMF khnang ba kin lah ban iarap ia ki ri kiba duk.

U Rajnath Singh u la pynskhem biang ba ym dei ban leh ïa kino kino ki kam bym don nongrim na shiliang pud, kaba long ka nongrim jong ka jingïasngewthuh jingmut kaba don hapdeng kine ki ar tylli ki ri. U la pynpaw biang ïa ki jingmut jong u Myntri Rangbahduh Modi ba ki kam lehnoh & ki jingïakren kim lah ban ïaid lang, bad lada ki don ki jingïakren kan long tang halor ki kam lehnoh bad ka PoK.

U Myntri Kam iada ri u la aiburom ia ki paidbah ba lui lui kiba la shah pyniap ha ka jingthombor ki lehnoh ha Pahalgam, bad ia ki shipai kiba la aiti ialade ha ka jingshakri ia ka ri ha ka por jong ka Operation Sindoor. U la iaroh ia ka jingshlur jong ki shipai kiba la mynsaw bad kitbok kitrwiang ba kin ioh kloi ia ka jingkoit jingkhiah.

U Rajnath Singh u la pynpaw ka jingsngewnguh ïa ki shipai kiba shlur kiba la pynpra ïa ki post & bunker jong ka Pakistan ba don sha shiliang pud, kaba la phah ïa ka khubor kaba shai sha ki nongshun. “Nga wan shane mynta ka sngi ryngkat bad ka khubor na ki paidbah jong ka ka ri: ‘Ngi sngew sarong ia ki Shipai jong ngi’,” u la bynrap.

Katba u Myntri Iada ri u la ïaroh ïa ka jingshlur bad ka jingaiti lut jong ki shipai, u la pynpaw biang ïa ka jingkular jong ka Sorkar ban bteng ban pynbiang ïa ki shipai da ki tiar ïaleh & ki jaka treikam ba bit ba biang bad ki jingdon jingem katkum ka juk mynta. "Ka Sorkar jong ngi ka la pynthikna ba ki shipai jong ngi ki long kiba la pynkhreh na ka bynta man la ka jingjia. Bun ki tiar thymmai kum ki suloi ba mynta, ki tiar ïada na ki missile, bad ki drone dang shna stet ha ka ri India hi. La pynthikna ïa ki lad jingiasoh ha kylleng ka LoC bad LAC kumba ym pat ju long mynno mynno ruh. Ka jingaiti lut bad ka jinglong ba la pynkhreh kaba ki shipai jong ngi ki shakri ïa ka ri, ka sorkar ka pyrshang ban shakri ïa phi,” u la ong.

U Rajnath Singh u la bynrap ba ka Sorkar bad ki briew ka ri ki ieng skhem bad ki Shipai ha man la ka sienjam, ha man la ka jinglong jingman. U la pynpaw ka jingngeit skhem ba lyngba ka jingiatreilang jong ki shipai, ka India kan sa pynduh jait shen ia ki kam lehnoh ha kane ka thain, khnang ba yn nym don mano mano ruh kiba nud ban peit sniew ia ka bor synshar lade jong ka ri.

U Lieutenant Governor jong ka Jammu & Kashmir Manoj Singh, u Myntri Rangbah ka J&K Omar Abdullah, Chief of the Army Staff General Upendra Dwivedi bad kiwei ki ophisar jong ka Indian Army ki la iadonlang ha kane ka jingialang

***