U Myntri Rangbahduh ka ri u Narendra Modi u la ai jingkren sha ka ri lyngba ka videoconference mynta ka sngi. Ha ka jingkren jong u, u la ong ba ka ri ka la sakhi ïa ka jingkhlain bad ka jingpyrkhat jngai jong ka India ha kine ki sngi ba la dep. U la ai khublei ia ki shipai ba shlur jong ka ri, ki tnad wad bniah, bad ki stad saian ia uwei pa uwei u nongshong shnong jong ka ri India. U Myntri Rangbah duh u la kdew sha ka jingshlur ba shyrkhei ba la pyni da ki shipai ba shlur jong ka India ha kaba pynurlong ia ki jingthmu jong ka Operation Sindoor, da kaba ithuh ia ka jingshlur, ka jinglah ban ialeh pyrshah, bad ka mynsiem bym lah ban pyndem. U la aiti ia kane ka jingshlur bym lah ban ianujor ia kawei pa kawei ka kmie, ka para, bad ka khun kynthei jong ka ri.

Da kaba pynrem jur ïa ka jingthombor jong ki lehnoh ha Pahalgam ha ka 22 tarik u Iaiong, da kaba ong ba ka la pynkyndit ïa ka ri bad ïa ka pyrthei, u Modi u la ong ba kane ka kam ka dei ka jingpyni kaba shyrkhei ïa ka kam lehnoh, ha kaba ki riew paidbah kiba lui lui kiba dang sngewbha ïa ki shuti jong ki, ki la shah pynïap beiñ hadien ba la kylli jingkylli ïa ki hakhmat ki khun ki kti shaphang ka niam jong ki. U la ban jur ba kane kam dei tang ka jingleh bein hynrei ka dei ruh ka jingpyrshang kaba sniew ban pynpra ia ka jingiatylli jong ka ri. Haba pynpaw ïa ka jingsngewsih kaba jur jong u shimet halor katei ka jingthombor, u la pynpaw kumno ka ri baroh kawei—man uwei pa uwei u nongshong shnong, man ka shnong ka thaw, man la ka bynta jong ka imlang sahlang, bad man la ka seng saiñ pyrthei—ki la ïeng tylli ha kaba dawa ïa ka jingleh kaba tyngeh pyrshah ïa ki kam lehnoh. U la ong ba ka sorkar ka la ailad pura ia ki shipai ban pynduh jait ia ki lehnoh. U la maham ia baroh ki seng lehnoh, da kaba pynbna ba mynta ki sngewthuh pura ia ka jingma kaba lah ban mih na ka jingpyrshang ban ktah ia ka burom jong ki kynthei jong ka jaitbynriew.

“Ka Operation Sindoor kam dei tang ka kyrteng hynrei ka dei ka jingpynpaw ia ka jingsngew jong ki million ngut ki nong India”, la ban jur u Myntri Rangbahduh, da kaba ong ba kane ka dei ka jingkular kaba skhem na ka bynta ka hok, kawei kaba ka pyrthei ka la sakhi ba la pyndep ha ka 6-7 tarik u Jymmang. U Myntri Rangbahduh u la ong ba ki shipai India ki la pyntreikam ïa ki jingther kiba thikna ha ki jaka rieh bad ki jaka ai jinghikai jong ki lehnoh ha Pakistan, kaba la wanrah ia ka jingshah pynjulor kaba jur. U la ong ba ki lehnoh kim shym la pyrkhat ba ka India kan shim ia kum kane ka sienjam kaba shlur, hynrei haba ka ri ka ieng tylli ha ka nongrim jong ka jingpyrkhat nyngkong ia ka bha ka miat jong ka ri, la shim ia ki rai kiba skhem bad la ioh ia ki jingseisoh kiba heh. U la pynpaw ba ka jingsiat namding bad drone jong ka India ïa ki jaka lehnoh ha Pakistan ka la pynthut ym tang ïa ki jingtei jong ki hynrei wat ïa ka mynsiem jong ki ruh. U Myntri Rangbahduh u la ong ba ki jaka kum ka Bahawalpur bad Muridke ki la treikam la slem bah kum ki jaka pdeng jong ki kam lehnoh ha ka pyrthei, ha kaba ka don ka jingiadei jong ki bad ki kam pyntriem ba khraw ha kylleng ka pyrthei, kynthup ia ki kam lehnoh 9/11 jong ka US, ki jingpynbthei bomb ha London Tube, bad ki kam lehnoh ha India da ki phew snem. U la ong ba namar ba ki lehnoh ki la nud ban ktah ia ka burom jong ki kynthei India, ka India ka la pynduh noh ia ka jaka treikam jong ki lehnoh. Ka jingtreikam ka la wanrah ïa ka jingpynduhjait ïa palat 100 ngut ki lehnoh kiba shyrkhei, kynthup ïa ki riew pawkhmat kiba don jingthmu pyrshah ïa ka India da ki phew snem, u la bynrap, da kaba ong ba ïa kito kiba thmu ban byrngem pyrshah ïa ka India ki la iakynduh mardor ia ka jubab kaba khlain.

U Modi u la ong ba ki jingther kiba thikna bad ba tyngeh jong ka India ki la wanrah ka jingkut lad ia ka Pakistan, kaba la pynlong ïa ka ban shah pynduh jingkyrmen. Ha kane ka jingkulmar jingmut, ka Pakistan ka la shim ia ki lad khlem da pyrkhat ha ka jaka ban ïadon bynta ha ka jingïakhun pyrshah ïa ki kam lehnoh ha ka pyrthei—ka la pynlong ïa ki jingther ia ki skul, ki kolej, ki gurudwara, ki temple, bad ki ïing jong ki riew paidbah jong ka ri India, da kaba thmu ruh ïa ki jaka treikam jong ki shipai, u la bynrap. U la pynpaw kumno kane ka rai ka la pynpaw ïa ki jingtlot jong ka Pakistan, namar ki drone bad ki namding jong ka ki la pulom hakhmat ki kor ïada suiñbneng kiba la tbit bha jong ka India, kiba la pynduhjait ïa ki ha suiñbneng. U la ong ba katba ka Pakistan ka dang pynkhreh ban ther ïa ki khappud jong ka India, ka India ka la ther jur ha ki jaka pdeng jong ka Pakistan. Ki drone bad ki namding jong ka India ki la pynbthei ia ki jaka ba la thew, kiba la pynjulor jur ïa ki ktem liengsuiñ jong ka Pakistan watla ka ju sngew sarong bha shaphang kine. Hapoh ki lai sngi ba nyngkong jong ka jingther jong ka India, ka Pakistan ka la mad ïa ka jingjulor kaba kam shym la mutdur. Hadien ki sienjam jingïaleh pyrshah ba tyngeh jong ka India, ka Pakistan ka la sdang ban wad ki lad ki lynti ban pynduna ïa ka jingeh, da kaba kyrpad ïa ka pyrthei ban pynbeit ia ki jingïakynad kiba nang kiew. U la pynpaw ba, hadien ba ki la mad ïa ki jingduhnong kiba khraw, ki shipai jong ka Pakistan ki la ïakren bad u DGMO jong ka India ha ka janmiet jong ka 10 tarik u Jymang. Ha kata ka por, ka India ka la dep ban pynpra ïa ki jingtei ba heh jong ki lehnoh, ka la pynduhjait ïa ki lehnoh ba kongsan, bad ka la pynkylla ïa ki jaka lehnoh jong ka Pakistan sha ki jaka ba la jot rathai. U Modi u la ong ba ka Pakistan, ha ka jingkyrpad jong ka, ka la pynthikna ba kan sangeh noh ïa baroh ki kam lehnoh bad ki kam thombor shipai pyrshah ïa ka India. Namar kane ka jingkular, ka India ka la bishar bniah ïa ka jinglong jingman bad ka la rai ban pynsangeh noh shipor ïa ki kam pyrshah jong ka pyrshah ïa ki jaka jong ki lehnoh bad ki shipai jong ka Pakistan. U la ong biang ba kane ka jingpynsangeh kam dei ka jingpynkut—ka India kan dang bteng ban bishar bniah ïa man la ka sienjam jong ka Pakistan ha ki sngi ban wan, ban pynthikna ba ki kam jong ka ha ki por ban wan kin ïahap bad ki jingkular jong ka.

U Myntri Rangbahduh u la ban jur ba ki shipai jong ka India—ki shipai ryngkew, ki shipai suin, ki shipai duriaw, ka kynhun shipai Border Security Force (BSF), bad kiwei kiwei ki kynhun iada ri—ki long kiba la pynkhreh bha, ban pynthikna ia ka jingshngain jong ka ri ha man la ka por. “Ka Operation Sindoor mynta ka dei ka polisi ba la seng jong ka India ha ka jingïakhun pyrshah ïa ki kam lehnoh, kaba pyni ïa ka jingkylla kaba khraw ha ka rukom treikam jong ka India”, u la pynbna, da kaba ong ba kane ka jingtreikam ka la buh ïa ka kyrdan kaba thymmai, ka rukom treikam kaba thymmai ha ki lad ïakhun pyrshah ïa ki kam lehnoh. U Myntri Rangbahduh u la kdew ia lai tylli ki nongrim ba kongsan jong ka jinghikai ia ka jingshngain jong ka India; kaba nyngkong ka Jingpynphai kylla kaba kongsan, haba Kano kano ka jingthombor ki lehnoh ia ka ri India kin iakynduh ia ka jubab kaba khlain bad kaba skhem. Ka India kan pynphai kylla ha la ki jong ki kyndon, da kaba buh thong ia ki ktem lehnoh. Kaba ar ka long ym don jingpdiang ia ka jingbyrngem shaphang ki kam nuclear; Ka India kan nym pdiang ia ki jingbyrngem shaphang ki kam nuclear. Kano kano ka jaka rieh tngen jong ki lehnoh kaba treikam hapoh kane ka jingpynrem kan iakynduh ia ki jingshah thombor kiba thikna bad kiba kut jingmut. Ka nongrim kaba lai ka long ka jingbym don jingïapher hapdeng ki nongkyrshan ïa ki kam lehnoh bad ki lehnoh; Ka India kan ym peit shuh ia ki nongialam lehnoh bad ki sorkar kiba iada ia ki kum kine ki kynhun. U la kdew ba ha ka por jong ka Operation Sindoor, ka pyrthei sa shisien ka la sakhi ïa ka jingshisha kaba pynkulmar jingmut jong ka Pakistan—ki heh shipai jong ka Pakistan ki leit sha ki jingleit ontep ïa ki lehnoh ba la pynduh jait, kaba pynshisha ïa ka jingïadon bynta kaba jylliew jong ka Pakistan ha ki kam lehnoh ba la kyrshan da ka sorkar. U Myntri Rangbahduh u la pynthikna biang ba ka India kan dang bteng ban shim ïa ki sienjam kiba tyngeh ban ïada ïa ki nongshong shnong jong ka na kino kino ki jingma.

Da kaba pynskhem ba ka India ka la jop ia ka Pakistan ha ka madan thma, bad ka Operation Sindoor ka la pynioh ia ka dur kaba thymmai ha ka jingtbit ki shipai jong ka ri, u Modi u la pynpaw ia ka jinglah jong ka India ha ki thma ha ri shyiap bad ha ki lumbah katba u dang pynskhem ruh ia ka jinglong ba kham halor ha ka thma jong ka juk thymmai. U la ban jur ba ha ka por jong kane ka jingtreikam, la pynshisha ïa ka jingtreikam jong ki tiar ïada ri ba la shna ha India. U la ong ba ka pyrthei mynta ka sakhi ïa ka jingwan jong ki tiar ïada ba la shna ha India kum ka bor kaba shyrkhei ha ka thma jong ka spah snem kaba 21.

Da kaba pynpaw ba ka jingïatylli ka dei ka bor kaba khraw tam jong ka India ha kaba ïakhun pyrshah ïa baroh ki jait kam lehnoh, u Myntri Rangbahduh u la pynskhem biang ba watla kane ka juk kam dei ka juk jong ka thma, hynrei kam lah ruh ban long ka juk jong ki kam lehnoh. “Ka jingbym pdiang satia ia ki kam lehnoh ka dei ka jingkular ia ka pyrthei kaba kham bha bad kaba shngain”, u la pynbna.

U Modi u la pynskhem ba ki shipai bad ka sorkar jong ka Pakistan ki la iai pynroi ïa ki kam lehnoh, da kaba maham ba kum kine ki kam kin wanrah ka jinghiar ia ka Pakistan hi ha kaba kut. U la pynbna ba lada ka Pakistan ka kwah ban lait na kane, ka dei ban pynpra noh ïa ki jingdon jingem jong ki kam lehnoh jong ka—ym don da kumwei pat ka lynti sha ka jingsuk. U la pynskhem biang ia ka nongrim ba skhem jong ka India, da kaba ong ba ka kam pyntriem bad ki jingiakren kim lah ban iadon lang, ka kam pyntriem bad ka khaii pateng kim lah ban iaid ryngkat, bad ka snam bad ka um kim lah ban iatuid lang. Ha ka jingai jingkren sha ka pyrthei, u la pynpaw biang ïa ka polisi ba la slem bha jong ka India ba kino kino ki jingïakren bad ka Pakistan kin long tang halor ki kam lehnoh bad kino kino ki jingïakren bad ka Pakistan kan long halor ka Kashmir (PoK) ba la synshar da ka Pakistan.

Ha ka sngi Buddha Purnima, u Myntri Rangbah duh u la kren halor ki jinghikai jong u Blei Buddha, da kaba ban jur ba ka lynti sha ka jingsuk ka dei ban long kaba la ïalam da ka bor. U la ban jur ba ka longbriew manbriew ka dei ban kiew shaphrang sha ka jingsuk bad jingseisoh, da kaba pynthikna ba uwei pa uwei u nong India un lah ban im da ka burom bad ban pynurlong ïa ka jingangnud jong ka Viksit Bharat. U Myntri Rangbahduh u la pynskhem ba khnang ba ka India kan pynneh ia ka jingsuk, ka dei ban long kaba khlain, bad haba donkam, ia kata ka bor dei ban pyndonkam. U la pynpaw ba ki jingjia ba dang shen ki la pyni ia ka jingkut jingmut jong ka India ban iada ia ki nongrim jong ka. Haba pynkut ia ka jingkren jong u, u la ai khublei sa shisien ia ka jingshlur jong ki shipai India bad pynpaw ia ka jingburom kaba khraw ia ka jingshlur bad ka jingiatylli jong ki paidbah ka ri India.

***