મુંબઈના જિયો વર્લ્ડ સેન્ટર ખાતે ચાલી રહેલા વર્લ્ડ ઑડિયો વિઝ્યુઅલ અને એન્ટરટેઈનમેન્ટ સમિટ (WAVES) ખાતે આજે "ઓડિયો-વિઝ્યુઅલ પરફોર્મર્સ અને કન્ટેન્ટ ક્રિએટર્સ માટે IP અને કૉપિરાઇટની ભૂમિકા" શીર્ષકવાળી પેનલ ચર્ચા યોજાઈ હતી. આ સત્રમાં ડિજિટલ યુગમાં સર્જકોને સશક્ત બનાવવામાં બૌદ્ધિક સંપદા (IP) અધિકારોની ભૂમિકા પર ચર્ચા કરવા માટે વૈશ્વિક મનોરંજન, કાનૂની અને સર્જનાત્મક ઉદ્યોગોના પ્રભાવશાળી અવાજોને એકઠા કરવામાં આવ્યા હતા.

પેનલે વિકસતા કાનૂની લેન્ડસ્કેપને સંબોધિત કર્યો અને IP અધિકારોની મજબૂત જાગૃતિ અને રક્ષણની તાત્કાલિક જરૂરિયાત પર પ્રકાશ પાડ્યો, ખાસ કરીને એવા કલાકારો અને કન્ટેન્ટ ક્રિએટર્સ માટે જેમનું કાર્ય અનધિકૃત ઉપયોગ અને શોષણ માટે વધુને વધુ સંવેદનશીલ બની રહ્યું છે.

પીઢ વકીલ શ્રી અમિત દત્તાએ સત્રનું સંચાલન કર્યું હતું. જેમાં નિષ્ણાતો અને સર્જકોના એક માનનીય પેનલ વચ્ચે ગતિશીલ ચર્ચા થઈ હતી. પેનલમાં વિશ્વ બૌદ્ધિક સંપદા સંગઠન (WIPO)ના ડાયરેક્ટર જનરલ શ્રી ડેરેન ટેંગનો સમાવેશ થતો હતો. જેમણે નીતિ માળખા અને વિશ્વભરમાં કલાકારો માટે સુરક્ષાને મજબૂત બનાવવા માટે WIPOના પ્રયાસો પર વૈશ્વિક દ્રષ્ટિકોણ રજૂ કર્યો હતો. તેમણે કહ્યું કે છેલ્લા 5 દાયકામાં ભારતની IP યાત્રા અસાધારણ છે અને તેની સર્જનાત્મક અર્થવ્યવસ્થા ખૂબ જ વિકસી રહી છે. તેમણે કહ્યું કે વૈશ્વિક IP ઇકોસિસ્ટમને રૂપાંતરિત કરવાની જરૂર છે કારણ કે IP બધા દેશો માટે રોજગાર, વિકાસ અને નવીનતા માટે ઉત્પ્રેરક તરીકે કાર્ય કરે છે. WIPOના સર્જનાત્મક અર્થતંત્ર ડેટા મોડેલ વિશે વાત કરતા, તેમણે કહ્યું કે તે નીતિ નિર્માતાઓ, અર્થશાસ્ત્રીઓ અને તેના સભ્ય દેશોના સર્જકોને સર્જનાત્મક અર્થતંત્રને માપવા માટે વધુ સારા માપદંડ શોધવામાં મદદ કરી રહ્યું છે.

પ્રશંસનીય દિગ્દર્શક અને નાટ્યકાર ફિરોઝ અબ્બાસ ખાને થિયેટરમાં તેમના દાયકાઓથી ચાલતા અનુભવ અને મૂળ સર્જનાત્મક કાર્યોને સુરક્ષિત રાખવાના પડકારોમાંથી આંતરદૃષ્ટિ શેર કરી હતી. તેમણે કહ્યું કે IP માનવ ગૌરવ વિશે છે અને સમાજે પહેલા કલાકારોના કાર્યનું સન્માન કરવું જોઈએ.

જાણીતા ફિલ્મ અને ટેલિવિઝન નિર્માતા સ્ટીવ ક્રોનએ ઑડિયો-વિઝ્યુઅલ સ્ટોરીટેલિંગમાં રોકાણોને સુરક્ષિત રાખવા માટે કૉપિરાઇટના મહત્વ અને પ્રમાણિત વૈશ્વિક અમલીકરણ પદ્ધતિઓની જરૂરિયાત પર ભાર મૂક્યો. તેમણે કહ્યું કે કૉપિરાઇટ ફક્ત પૈસા વિશે નથી પરંતુ સર્જકોના કાર્યોને શોષણથી નિયંત્રિત કરવા વિશે છે.

અનુભવી પટકથા લેખક અંજુમ રાજાબલીએ સર્જનાત્મક પ્રક્રિયા અને લેખકો માટે વધુને વધુ જટિલ સામગ્રી અર્થતંત્રમાં તેમના અધિકારોને સમજવા અને દાવો કરવાની આવશ્યકતા વિશે વાત કરી હતી. તેમણે કહ્યું કે આજે ઍક્સેસ ખૂબ જ સરળ છે અને પ્રતિબંધો હોવા જોઈએ.

સમગ્ર સત્ર દરમિયાન, પેનલિસ્ટોએ કૉપિરાઇટ માલિકી, લાઇસન્સિંગ, નૈતિક અધિકારો, AI ની અસર અને ઝડપથી ડિજિટાઇઝ થતી દુનિયામાં ઍક્સેસ અને સુરક્ષા વચ્ચેના સંતુલનમાં ઊંડાણપૂર્વક ચર્ચા કરી હતી.

AP/IJ/GP/JD