U Myntri Rangbahduh ka ri Narendra Modi u la plie paidbah ïa ka WAVES 2025, ka World Audio Visual and Entertainment Summit kaba nyngkong eh jong ka India ha Jio World Centre, Mumbai mynta ka sngi. Haba ai jingkren sha ki paidbah ha kane ka sngi, u la ai khublei ia baroh ha ka sngi rakhe ia ka Maharashtra day bad ka sngi ioh jylla lade ka Gujarat kaba la rakhe mynta ka sngi. Da kaba pdiang ïa ka jingdon lang jong baroh ki riew pawkhmat jong ka pyrthei, ki nongmihkhmat, bad ki nongïalam na ka kam saindur, u Myntri Rangbah duh u la pynpaw ïa ka jingdonkam jong ka jingïalang, da kaba ban jur ba palat 100 tylli ki ri jong ki nongsain dur, ki nongthaw jingmut, ki nongbei tyngka, bad ki nongthaw polisi ki la ïawan lang ban buh ïa ka nongrim na ka bynta ka sap ka phong bad ka jingsaindur ba don kylleng ka pyrthei. “Ka WAVES kam dei tang ka kyntien lyngkot hynrei kaba pyni ïa ka deiriti, ka jingsaindur, bad ka jingpyniasoh ha ka pyrthei baroh kawei”, u la ong, da kaba pynpaw shuh shuh ba ka jingïalang ka pyni ïa ka pyrthei kaba iar jong ki phlim, ki jingrwai, gaming, animation, bad ka jingïathuhkhana, kaba ai ka rynsan kylleng ka pyrthei na ka bynta ki nongdro bad ki nongsaindur ban pynïasoh bad ïatreilang. U Myntri Rangbah duh u la ai khublei ïa baroh ki nongïashim bynta ha kane ka sngi ba kongsan bad u la pdiang burom ïa ki nongshah khot sngewbha ba pawkhmat na ka ri India bad nabar ri ruh.

Haba kren shaphang ka histori ba riewspah jong ka India ha ka kam cinema ha ka WAVES Summit, u Modi u la ong ba ha ka 3 tarik Jymmang, 1913, la pyllait paidbah ïa ka phlim kaba nyngkong eh jong ka India, kaba kyrteng ka Raja Harishchandra, ba la direct da u nongshna phlim Dadasaheb Phalke. U la pynkynmaw ba la rakhe ia ka lyngkhuh sngi kha jong u Phalke tang shisngi hashuwa. U la pynpaw ka jingktah ka kam shna phlim jong ka India ha ka spah snem ba la dep, da kaba pynpaw ba ka la lah ban rah ia ka jinglong tynrai ka deiriti jong ka India sha man la ki kyndong kynshrt jong ka pyrthei. U la kren shaphang ka jingpawnam u Raj Kapoor ha Russia, ka jingioh jingithuh kylleng ka pyrthei ia u Satyajit Ray ha Cannes, bad ka jingjop ka RRR ia ka khusnam Oscar, da kaba ban jur kumno ki nongshna phlim na India ki iai bteng ban pynwandur ia ki jingiathuhkhana ha ka pyrthei. U la ai jingiaroh ruh ia ka jingtbit shna phlim jong u Guru Dutt, ia ki jingpyrkhat ha ka imlang sahlang jong u Ritwik Ghatak, u riewstad ha ka liang ka jingrwai jong u A.R. Rahman, bad ka jingiathuhkhana jong u S.S. Rajamouli, kaba pynpaw ba uwei pa uwei na kine ki barikor ki la pynim ia ka deiriti jong ka India na ka bynta ki million ngut ha kylleng ka pyrthei. U Modi u la ong ruh ba la pynkup burom ïa ki riew pawkhmat jong ka kam shna phlim jong ka India lyngba ki postage stamp , ka jingpyndon burom ia ki jingnoh synñiang jong ki sha ka kam.

Da kaba ban jur ïa ka jingdonkam jong ka jinglah ban saindur ka India bad ka jingïatreilang ha ka pyrthei, u Myntri Rangbah duh u la ong ba ha kine ki snem, u la ïatreilang bad ki riew shemphang naduh ka gaming, ka put ka tem, ka jingshna phlim, bad ka jingak, da kaba ïakren ïa ki jingmut bad ki jingshemphang kiba la pynjylliew ïa ka jingsngewthuh jong u shaphang ki kam saindur. U la pynpaw ïa ka jingthmu kaba kyrpang kaba la shim ha ka sngi rakhe ïa ka lyngkhuh sngi kha ba 150 snem jong u Mahatma Gandhi, ha kaba ki nongrwai na ki 150 tylli ki ri ki la ïawan lang ban rwai ‘Vaishnav Jan To’, ka jingrwai ba la thoh da u Narsinh Mehta la jan 500-600 snem mynshwa. U la pynpaw ba kane ka jingpyrshang saindur ha ka pyrthei ka la wanrah ïa ka jingktah kaba khraw, kaba la pynïasoh lang ïa ka pyrthei ha ka jingïatylli. U la ong shuh shuh ba katto katne ngut ki riew shimet kiba la don ha katei ka jingialang ki la noh synniang sha ka sienjam Gandhi One Fifty da kaba shna ia ki video message kiba lyngkot, kiba kyntiew ia ki jingmut jingpyrkhat jong u Gandhi. U la ong ba ka bor saindur jong ka India, ryngkat bad ka jingiatreilang bad kiwei kiwei ki ri, ka la dep ban pyni ia ka jinglah jong ka, bad kata ka jingthmu mynta ka la paw kum ka WAVES.

U Modi u la ïaroh ïa ka jingjop kaba khraw jong ka bynta ba nyngkong jong ka WAVES Summit, da kaba ong ba naduh ka khyllipmat ba nyngkong, kane ka jingïalang ka la khring ia ka jingphaikhmat na kylleng ka pyrthei bad ka “sawa da ka jingthmu.” U la ai khublei ïa ka jingaiti bad jingpyrshang jong ka Advisory Board jong ka jingïalang bah, da kaba ban jur ïa ka bynta jong ki ban pynlong ïa ka WAVES kum ka jingïalang kaba kongsan ha ka kam saindur. U la pynpaw ia ka sienjam kaba heh jong ka Creators Challenge bad ka Creatosphere, kaba la iohi ia ka jingiashim bynta na kumba 100,000 ngut ki riew shemphang ha ka kam saindur na 60 tylli ki ri. U la ong ba na ki 32 tylli ki jingïakop, la jied 800 ngut ki nongïashim bynta kiba la poi sha ka phainal, da kaba ithuh ïa ka sap jong ki bad ai khublei ïa ki halor ka jingjop jong ki. U la ai mynsiem ïa ki nongïashim bynta ba la poi sha ka phinal, da kaba pynpaw ba mynta ki la ïoh ïa ka lad ban buh ïa la ka jong ka dak ha ka rynsan saindur ha ka pyrthei.

U Myntri Rangbah duh u la pynpaw ka jingkmen ïa ki jingsaindur ba la pyni ha ka Bharat Pavilion ha ka WAVES Summit. U la ong ba la lah ban ioh ia ka jingsaindur ba kongsan, bad u khmih lynti ban sakhi hi dalade ia kine ki jingthaw. U Myntri Rangbah duh u la pynpaw ia ka sienjam jong ka WAVES Bazaar, da kaba kdew ia ka jinglah jong ka ban pynshlur ia ki nongsaindur thymmai bad ban pyniasoh ia ki bad ki iew kiba dang mih. U la iaroh ia ka jingmut ban pyniasoh ia ki nongthied bad ki nongdie ha ka kam saindur, da kaba pynpaw ba kum kine ki sienjam ki pynkhlain ia ka ioh ka kot ba thymmai bad ai lad ba thymmai ia ki barikor.

Haba pyrkhat halor ka jingïadei kaba jylliew hapdeng ka jingsaindur bad ka jingshemphang jong u briew, da kaba ong ba ka jingïaid lynti jong u khynnah ka sdang na ka jingrwai jong ka kmie, ka jingpynrung nyngkong jong ki ïa ka sur bad ka jingrwai, u Modi u la ong kumba ka kmie ka shna ïa ki jingangnud na ka bynta la u khun, ki riew shemphang ha ka kam saindur ki pynwandur ia ki jingangnud jong ka juk. U la pynpaw ba ka jinglong tynrai jong ka WAVES ka shong ha ka jingwanrah lang ia ki briew kiba iohi jngai kiba ai mynsiem ia ki pateng lyngba ka jingsaindur jong ki

Haba pynskhem biang ïa ka jingngeit jong u ha ka jingïatreilang, da kaba ong ba ka jingaiti lut jong ki barikor, ki nongsaindur, bad ki nongïalam ha ka kam kan kyntiew ïa ka WAVES sha ki kyrdan kiba thymmai ha ki snem ban wan, u Modi u la kyntu ïa ki paralok jong u ha ka kam ban bteng ïa kajuh ka kyrdan jong ka jingkyrshan bad jingialam lynti kaba la pynlong ïa ka jingïalang kaba nyngkong kaba jop. U la ong ba bun ki kam kin dang wan bad u la pyntip ba yn sa pynmih ïa ki WAVES Awards ha ki por ban wan, da kaba pynskhem ïalade kum ki khusnam kiba donburom tam ha ka liang ka jingsaindur bad ka jingthaw. U la ban jur ia ka jingdonkam jong ka jingaiti kaba neh, da kaba pynpaw ba ka thong ka long ban jop ia ka mynsiem ong ki briew ha kylleng ka pyrthei bad ban ai mynsiem ia ki pateng lyngba ka jingthaw jingmut.

Haba pynpaw ïa ka jingkiew stet jong ka India ha ka liang ka ioh ka kot, da kaba ong ba ka ri ka don ha ka lynti ban long ka ri kaba lai ha ka jingheh tam ka ioh ka kot ha ka pyrthei, u Myntri Rangbah duh u la ong ba ka India ka bat ïa ka kyrdan ba nyngkong ha ka jingpdiang ïa ka Fintech ha ka pyrthei, ka dei ka nongshna mobile kaba ar ha ka pyrthei, bad ka don ïa ka startup kaba lai ha ka jingheh tam ha pyrthei. U la ban jur ba ka jingïaid lynti jong ka India ban long ka ri kaba la kiew shaphrang  ka dang sdang bad ka dang don shibun kiei kiei ban ai. “Ka India kam dei tang ka jaka jong shi billion ngut ki briew hynrei ka don ruh shi billion tylli ki khana”, u la bynrap. Haba phai sha ka histori ba riewspah jong ka India, u la pynkynmaw ba ar hajar snem mynshwa, ka Natya Shastra jong ka Bharata Muni ka la pynksan ïa ka bor jong ka jingsaindur ha kaba pynwan dur ïa ki jingsngew bad ki jingshemphang jong u briew. U la ong ba ha ki spah snem mynshuwa, ka Abhijnana-Shakuntalam jong u Kalidasa ka la wanrah ia ka lynti kaba thymmai ha ka drama tynrai. U Myntri Rangbahduh u la pynpaw ia ki tynrai ba jylliew ha ka deiriti jong ka ri India, da kaba ong ba man la ka surok ka don la ka khana, man la u lum u kit ia ka jingrwai, bad man la ka wah ka rwai ia ka sur. U la ong ba ki hynriew lak tylli ki shnong jong ka India kawei pa kawei ka don la ka jong ka riti dustur bad ka rukom ïathuhkhana kaba kyrpang, ha kaba ki jaidbynriew ki pynneh pynsah ïa ki histori jong ki lyngba ki khanatang. U la pynpaw ia ka jingiahap ki jingrwai India, da kaba kdew ba la ka long ki jingrwai bhajan, ki ghazal, ki jingrwai ba rim, ne ki sur ba mynta, man la ka sur ka kit ia ka jingiathuhkhana, bad man la ka jingsawa ka bat ia ka mynsiem.

U Modi u la kren shaphang ka pateng jong ka India ha ka liang ka jingsaindur bad ka jinglong mynsiem kaba la don tynrai ha ka WAVES Summit, da kaba pynpaw ia ka jingmut jong u Naad Brahma, ka sur ba kynja blei. U la ong ba ki khanatang jong ka ri India ki ju pynpaw ïa ka jinglong blei lyngba ka jingrwai bad ka jingshad, da kaba kdew ïa ka Damru jong u Blei Shiva kum ka sur ba nyngkong eh jong ka pyrthei, ka Veena jong ka Blei Saraswati kum ka jingsawa jong ka jingstad, ka bisli jong u Blei Krishna kum ka khubor bymjukut jong ka jingieid, bad ka Shankha jong u Blei Vishnu kum ka jingkhot ia ka bor kaba bha. U la ban jur ba ka jingpyni ia ka deiriti kaba itynnad ha katei ka jingialang bah ka pynpaw ruh ia kane ka pateng kaba riewspah. Da kaba pynbna ba “kane ka dei ka por kaba biang,” u Modi u la pynkynmaw biang ïa ka jingthmu jong ka India Ban Shaw ha ka India, Shna na ka bynta ka Pyrthei, da kaba pynskhem ba ka riti dustur ïathuhkhana jong ka ri ka ai ïa ka spah kaba kordor kaba la neh da ki hajar snem. U la pynpaw ba ki khana jong ka India ki long ki bym don por, kiba pynlong jban pyrkhat, bad kiba ïadei bad ka pyrthei, kiba kynthup ym tang ïa ki phang pdeng jong ka deiriti hynrei wat ïa ka science, kam ïalehkai, ka jingshlur. U la ong ba ka jinglong ka jingiathuh khana jong ka India ka pynïasoh lang ïa ka science bad ki khana ba shu thaw, bad ka jinglong shlur bad ka jingpynwandur thymmai, kaba wanrah ia ka jinglong jingman kaba iar bad kaba pher. U la kyntu ia ka rynsan WAVES ban shim ia ka jingkitkhlieh ban iasam ia ki khanatang ba phylla jong ka India bad ka pyrthei, ban wanrah ia ki sha ki pateng ban wan lyngba ki rukom ba thymmai bad kiba sngewtynnad.

Da kaba pyniadei hapdeng ki khusnam Padma jong ki paidbah bad ka jingthmu kaba don ha lyndet jong ka WAVES Summit, da kaba ong ba baroh ar tylli ki sienjam ki thmu ban ithuh bad kyntiew ia ki sap na man la ki kyndong kynshrot jong ka ri India, u Myntri Rangbahduh u la ong ba katba ki khusnam Padma ki la sdang katto katne snem hadien ka jinglaitluid, ki la pynkylla dur shisha haba ka India ka la pdiang ia ka Padma jong ki paidbah, da kaba ithuh ia ki briew kiba shakri ia ka ri na ki jaka kiba jngai. Kane ka jingkylla, u la ban jur, ka la pynkylla ia ki khusnam na ka jinglehkmen sha ka jingrakhe jong ka ri. Kumjuh ruh, u Myntri Rangbahduh u la ong ba ka WAVES kan long kum ka rynsan ha ka pyrthei na ka bynta ka sap saindur kaba khraw jong ka India ha ki phlim, ki jingrwai, ka animation, bad gaming, kaba pynthikna ba ki barikor na man la ki bynta jong ka ri ki ioh ïa ka jingithuh ha ka rynsan jong ka pyrthei.

Haba pynpaw ïa ka rukom tynrai jong ka India ban pdiang ïa ki jingmut bad ki deiriti bapher bapher, da kaba kdew ïa kawei ka kyntien Sanskrit, u Modi u la ban jur ba ka jingplie ïa ka riti dustur jong ka ri India ka la pdiang sngewbha ïa ki jaitbynriew kum ki Parsi bad ki Jiw, kiba la roi ha ka ri bad kiba la kylla long ka bynta ba kongsan jong ka deiriti jong ka. U la kubur ia ka jingdon jong ki myntri bad ki nongmihkhmat na ki ri bapher bapher, da kaba ong ba man la ka ri ka don la ki jong ki jingjop bad ki jingnoh synniang. U la ong ba ka bor jong ka India ka shong ha kaba burom bad rakhe ïa ki jingjop ha ka kam saindur ha ka pyrthei, kaba pynskhem ïa ka jingangnud jong ka ri ha ka jingïatreilang ha ka liang ka jingsaindur. U la ban jur ba da kaba shna ïa ki prokram kiba pynpaw ïa ki jingjop jong ki deiriti bad ki ri bapher bapher, ka WAVES ka lah ban pynkhlain ïa ka jingthmu jong ka jingïadei ha ka pyrthei.

U Myntri Rangbahduh u la khot sngewbha ia ki nongsaindur kylleng ka pyrthei, da kaba pynthikna ïa ki ba ka jingïadei bad ki khana jong ka India kan pynpaw ïa ki jingïathuhkhana kiba ïadei bha bad la ki jong ki deiriti. U la ban jur ba ka riti dustur iathuh khana jong ka India kaba riewspah ka kit ïa ki phang pdeng bad ki jingsngew kiba palat ïa ki pud, kaba pynlong ïa ka jingïadei kaba tynrai bad kaba don jingmut. U la ong ba ki barikor bad ki nongsaindur kylleng ka pyrthei kiba wad bniah ïa ki khanatang jong ka ri India kin mad ïa ka jingïadei kaba tynrai bad ka pateng jong ka ri. U la ong ba kane ka jingïatreilang ha ka deiriti kan pynlong ïa ka jingthmu jong ka Create in India kaba kham pynhun bad kaba lah ban ïoh da ka pyrthei.

“Kane ka dei ka jingsdang jong ka Orange Economy ha India, Ka jingshna prokram, ka jingsaindur bad ka Deiriti - ki lai tylli ki rishot jong ka Orange Economy”, la ong u Modi, da kaba ong ba ki phlim jong ka India mynta ki la poi sha ki nongpeitkai ha palat 100 tylli ki ri, ha kaba ki nongpeitkai ha ka pyrthei ki nang wad ban sngewthuh ïa ka jingkiew jong ka kam shna phlim jong ka India. U la pynpaw ia ka jingkiew ki nongpeitkai nabar ri kiba peit ia ki prokram jong ka India ryngkat bad ki jingthoh ba la buh, kaba pyni ia ka jingiadei kaba kham jylliew bad ki khana jong ka ri India. U Modi u la kdew ruh ba ka kam OTT jong ka India ka la sakhi ïa ka jingkiew kaba shiphew shah ha kine ki snem ba la dep, da kaba pynpaw ba watla ki jingheh jong ki screen ki lah ban nang rit, hynrei ka lad ka nang heh, bad ki screen kiba rit ki pynpoi ïa ki khubor kiba heh. U la iohi ba ki jingbam jong ka India ki nang kylla long ki jingbam ba la sngewtynnad ha ka pyrthei bad u la pynpaw ia ka jingshaniah ba shen ka put ka tem jong ka India kan sa ioh ia ka jingithuh kaba kum kata ha ka pyrthei baroh kawei.

Da kaba ban jur ïa ka lad kaba khraw ha ka ïoh ka kot ba iadei bad ka kam saindur jong ka Indiar, u la ong ba ha ki snem ban wan, ka jingnoh synñiang jong ka sha ka GDP jong ka ri kan nang kiew bha, u Myntri Rangbah duh u la ong, “Ka India ka dang mih kum ka jaka pdeng jong ka pyrthei na ka bynta ka jingpynmih phlim, ki jingpynmih prokram digital, gaming, ki kam ba iadei ka riam ka beit, bad ka put ka tem”. U la kdew ïa ki lad ki lynti kiba don jingkyrmen ban kiew ha ka kam live concert bad ka lad kaba khraw ha ka ïew animation ha kylleng ka pyrthei, kaba mynta ka don palat $430 nillion bad la antad ba kan kiew ar shah ha ki phew snem ban wan. U Myntri Rangbah duh u la pynpaw ba kane ka ai ka lad kaba kongsan na ka bynta ka kam animation bad graphics jong ka India, bad kyntu ïa ki nongshim bynta ban pyndonkam ïa kane ka jingpynheh na ka bynta ban poi sha ki rynsan kiba kham heh

Haba khot ïa ki samla nongsaindur jong ka India ban pynïaid shakhmat ïa ka Orange Economy jong ka ri, da kaba pdiang ba ka jingsngewtynnat bad ka jingtrei shitom jong ki ka pynwan dur ïa ka kam ba thymmai jong ka jingsaindur, u Modi u la ban jur ba la ki dei ki nongtem na Guwahati, ki nongshna podcast na Kochi, ki nongsaindur ia ki jingïalehkai ha Bengaluru, lane ki nongshna phlim ha Punjab, ki jingnohsynniang jong ki ki aibor ia ka jingkiew ka kam saindur jong ka India. U la pynthikna ba ka sorkar ka ieng skhem ha lyndet ki riew shemphang, ka kyrshan ia ki lyngba ki sienjam kum ka Skill India, Startup Support, ki polisi na ka bynta ka kam AVGC, bad ki rynsan kum ka WAVES. U la ong ba la pyrshang katba lah ban tei ïa ka jinglong jingman ha kaba ïa ka jingpynwandur bad jingmutdur la kheiñ kor, ban kyntiew ïa ki jingangnud ba thymmai bad ban ai bor ïa ki briew ban pynurlong ïa kita ki jingangnud. U Modi u la pynpaw ba ka WAVES kan long kum ka rynsan kaba kongsan ha kaba ka Creativity ka ïakynduh ïa ka Coding, ka Software ka ïasoh bad ka jingïathuhkhana, bad ka Art ka ïasoh bad ka Augmented Reality. U la kyntu ia ki samla nongsaindur ban pyndonkam hok ia kane ka kabu, ban thrang ia kaba khraw, bad ban aiti ia la ka jong ka jingpyrshang ban pynurlong ia ki jingthmu jong ki.

U Myntri Rangbah duh u la pynpaw ïa ka jingshaniah kaba khlem artatien ha ki nongpynmih prokram jong ka India, da kaba pynpaw ba ka jingthaw jong ki kaba laitluid ka pynkylla dur biang ïa ka jinglong ka kam saindur ha ka pyrthei. U la ban jur ba ka mynsiem samla jong ki nongsaindur jong ka India kam tip ia ki jingkhang, ki pud ki sam, ne ki jingartatien, kaba ailad ia ka jingpynwandur thymmai ban kiew shaphrang. U la ong ba lyngba ki jingïakren shimet jong u bad ki samla nongsaindur, ki nongïalehkai, bad ki barikor ha ka kam digital, u la sakhi hi dalade ïa ka bor bad ka sap kaba mih na ka jinglong jingman ka kam saindur jong ka India. U la kubur ba ka jingbun ki samla jong ka India ka pynlong ïa ki rukom shna jingshna kiba thymmai, naduh ki reel, ki podcast, bad ki game haduh ka kam shna animation, start-up, bad ki rukom AR-VR. U Myntri Rangbah duh u la pynskhem ba ka WAVES ka dei ka rynsan ba la shna kyrpang na ka bynta kane ka pateng—kawei kaba pynlah ïa ki samla ban pyrkhat biang bad sngewthuh thymmai ïa ka jingkylla ha ka kam saindur bad wanrah ia ka bor bad ka jingseisoh jong ki kam jong ki.

Haba pynpaw ïa ka jingdonkam jong ka jingkitkhlieh ba thymmai ha ka spah snem kaba 21 kaba la pynïaid da ka teknoloji, u Modi u la ban jur ba katba ka teknoloji ka nang ktah ïa ka jingim jong u briew, donkam ïa ki jingpyrshang ba kham bun ban pynneh pynsah ïa ka jingsngewrit bad ka jingriewspah ha ka deiriti. U la ong ba ka jingsaindur ka bat ia ka bor ban kyntiew ia ka jingsngewlem jong u briew bad ban pynjylliew ia ka jingsngewthuh ha ka imlang sahlang. U la pynskhem ba ka thong kam dei ban thaw ïa ki robot hynrei ban kyntiew ïa ki briew kiba don ka jingsngewthuh kaba kham heh, ka jingsngewthuh kaba jylliew, bad ka jingriewspah ha ka jingmut jingpyrkhat—ki jinglong ki bym lah ban mih tang na ka jingbun palat ki jingtip ne ka jingsted jong ka teknoloji. U Modi u la ban jur ia ka jingdonkam jong ka jingsaindur, ka put ka tem, ka shad, bad ka jingiathuhkhana, da kaba kdew ba kine ki rukom ki la pynim ia ki jingsngew jong u briew la bun hajar snem. U la kyntu ia ki nongsaindur ban pynkhlain ia kine ki riti dustur bad ban tei ia ka lawei kaba kham jingsngew. U la kren ruh shaphang ka jingdonkam ban ïada ïa ki samla na ki jingmut kiba pynïapher bad kiba buh jingma, da kaba pynpaw ba ka WAVES ka lah ban long kum ka rynsan kaba kongsan ban pynneh ïa ka jinglong ba janai jong ka deiriti bad ban pynrung ïa ki jinglong kiba bha. U la maham ba ka jingbym shimkhia ia kane ka jingkitkhlieh ka lah ban wanrah ia ka jingma kaba khraw ia ki pateng ban wan.

Da kaba ban jur ia ka jingktah kaba pynkylla ia ka teknoloji ha ka kam saindur, u Myntri Rangbah duh u la pynpaw ia ka jingdonkam jong ka jingiatreilang ha ka pyrthei ban pyndonkam ia ka lad kaba pura jong ka. U la ong ba ka WAVES kan long kum ka jingkieng kaba pynïasoh ïa ki nongsaindur na India bad ki nongiathuh khana ha ka pyrthei, ki nongpynwandur bad ki nongïohi jngai ha ka pyrthei, bad pynkylla ïa ki nongïalehkai sha ki nongjop ha ka pyrthei. U la khot sngewbha ïa ki nongbei tyngka bad ki nongsaindur nabar ri ban pdiang ïa ka India kum ka jaka na ka bynta ki kam saindur jong ki bad ban peit ia ki jinglong jingman ha ka ri ha kaba iadei bad ka kam saindur. Haba kren sha ki nongsaindur ha ka pyrthei, u Myntri Rangbah duh u la kyntu ïa ki ban don ka jingthrang kaba khraw bad ban ïathuh ïa ka khana jong ki. U la pynshlur ia ki nongbei tyngka ban bei tyngka ym tang ha ki rynsan, hynrei ha ki briew, bad u la khot ia ki samla jong ka India ban iasam ia ki khana kiba shi billion ki bym pat lah ban iathuh bad ka pyrthei. U la pynkut da kaba ai khublei kitbok kitrwiang ia baroh ki nongiashim bynta ha ka WAVES Summit kaba nyngkong eh.

U Lat ka jylla Maharashtra C. P. Radhakrishnan, u Myntri Rangbah ka jylla Maharashtra, Devendra Fadnavis, ki Myntri sorkar pdeng, u Ashwini Vaishnaw, Dr. L. Murugan ki la iadonlang nalor kiwei kiwei ki kynrem ki lyndan ha kane ka jingialang.

Ka Nongrim

Ka WAVES 2025 ka dei ka jingïalang kaba saw sngi kaba don ka phang “Ka jingpynïasoh ïa ki nongsaindur, ka jingpynïasoh ïa ki ri” ka la pynkhreh ban buh ïa ka India kum ka jaka pdeng jong ka pyrthei na ka bynta ki kam media, ki jingpynbyrngia, bad ka jingsaindur digital da kaba pynïasoh lang ïa ki nongsaindur, ki startup, ki nongïalam ha ka kam, bad ki nongthaw polisi na kylleng ka pyrthei.

Ha ka jingïahap bad ka jingthmu jong u Myntri Rangbah duh ban pyndonkam ïa ka jingstad, ka teknoloji, bad ka sap ban saindur ïa ka lawei kaba phyrnai, ka WAVES kan pynïasoh lang ïa ki phlim, ki OTT, gaming, ki comic, digital media, ka AI, ka AVGC-XR, ka jingpynbna, bad ka teknoloji ba dang mih, kaba pynlong ïa ka kum ka jingpyni kaba bniah ïa ka jingtbit jong ka India ha ki kam media bad ki jingpynbyrngia. Ka WAVES ka thmu ban plie ïa ka ïew kaba shongdor $50 billion shuwa u snem 2029, ban pynïar ïa ka jingïaid lynti jong ka India ha ka ïoh ka kot jong ka kam pynbyrngia ha ka pyrthei.

Ha ka WAVES 2025, ka India ka pynlong ruh ïa ka j Global Media Dialogue (GMD) ha ka sien kaba nyngkong, da ka jingïashim bynta jong ki myntri na ki 25 tylli ki ri, kaba pyni ïa ka jingïadei jong ka ri bad ki kam media bad ka jingpynbyrngia ha ka pyrthei. Ha kane ka Summit yn don ruh ka WAVES Bazaar, ka e-market ha ka pyrthei kaba don palat 6,100 ngut ki nongthied, 5,200 ngut ki nongdie, bad 2,100 tylli ki projek. Ka thmu ban pyniasoh ia ki nongthied bad ki nongdie ha ka thain bad ha ka pyrthei, ban pynthikna ia ka jingiadei kaba jylliew bad ki lad kamai.

U Myntri Rangbahduh u la leit jngoh ïa ka Creatosphere bad ïakren bad ki nongsaindur, ba la jied na ki 32 tylli ki Create in India Challenges ba la sdang la jan shisnem mynshwa, kaba la khring palat shi lak ngut ki jingpynrung kyrteng. U la leit ban jngoh ruh ia ka Bharat Pavilion.

Ka WAVES 2025 kan sakhi ïa ka jingïashim bynta na palat 90 tylli ki ri, palat 10,000 ngut ki delegate, 1,000 ngut ki nongsaindur, palat 300 tylli ki kompeni, bad palat 350 ki startup. Ha kane ka jingialang kan don 42 tylli ki jingialang plenary, 39 tylli ki breakout session, bad 32 tylli ki masterclass kiba kynthup ia ki bynta bapher bapher kynthup ia ka jingpynbna paidbah, ka AVGC-XR, ki phlim, bad digital media.

***