மத்திய தகவல் தொடர்பு அமைச்சரும் வடகிழக்கு பிராந்திய மேம்பாட்டு அமைச்சருமான திரு ஜோதிராதித்ய எம். சிந்தியா தலைமையில் வடகிழக்கு பிராந்தியத்தில் முதலீட்டை ஊக்குவிப்பதற்கான கூட்டம் தொழில்துறை தலைவர்களுடன் நடைபெற்றது.

முகேஷ் அம்பானி (ரிலையன்ஸ் இண்டஸ்ட்ரீஸ்), குமார் மங்கலம் பிர்லா (ஆதித்யா பிர்லா குழுமம்) மற்றும் என்.சந்திரசேகரன் (டாடா சன்ஸ்) உள்ளிட்ட முன்னணி தொழிலதிபர்களுடன் மத்திய அமைச்சர் புதன்கிழமை (ஏப்ரல் 30, 2025) மும்பையில் தொடர்ச்சியான சந்திப்புகளை நடத்தினார். தில்லியில் 2025 மே 23-24 தேதிகளில் திட்டமிடப்பட்டுள்ள முதலீட்டு உச்சிமாநாட்டிற்கு முன்னதாக நடைபெற்று வரும் சந்திப்புகளின் ஒரு பகுதியாக இந்த கூட்டம் இருந்தது.

நாட்டின் புதிய வளர்ச்சிக்கான உந்துசக்தியாக வடகிழக்குப் பிராந்தியத்தை நிலைநிறுத்துவதற்கான மத்திய அரசின் தொலைநோக்குப் பார்வையை மத்திய அமைச்சர் திரு ஜோதிராதித்ய சிந்தியா எடுத்துரைத்தார். "நாட்டின் வளர்ச்சிக் கேந்திரமாக எட்டு மாநிலங்களையும் ஒருங்கிணைந்த வகையில் மேம்படுத்துவதே ந்த முயற்சியின்  குறிக்கோள்" என்று அமைச்சர் கூறினார். இந்த மண்டலத்தில் நீடித்த வளர்ச்சியை விரைவுபடுத்துவதில் அரசு-தனியார் கூட்டுறவின் பங்கையும் அவர் சுட்டிக் காட்டினார்.

அனைத்து எட்டு வடகிழக்கு மாநிலங்களின் முதலமைச்சர்களுடன் உயர்மட்ட பணிக்குழுவை உருவாக்குதல், ஒவ்வொரு மாநிலத்திலும் முதலீட்டு ஊக்குவிப்பு முகமைகளை நிறுவுதல் உள்ளிட்ட வடகிழக்கு பிராந்திய மேம்பாட்டு அமைச்சகம் மேற்கொண்ட சில முக்கிய முயற்சிகளை அமைச்சர் தொழிலதிபர்களுடன் பகிர்ந்து கொண்டார்.

வடகிழக்குப் பிராந்திய மேம்பாட்டு அமைச்சகத்தின் புள்ளியியல் ஆலோசகர் திரு தர்ம்வீர் ஜா, எட்டு வடகிழக்கு மாநிலங்களிலும் உள்ள முக்கிய முதலீட்டு வாய்ப்புகளை எடுத்துரைத்தார்.

வேளாண் சார்ந்த தொழில்கள், ஜவுளி மற்றும் சுற்றுலா உள்ளிட்ட பிராந்தியம் சார்ந்த வளர்ச்சித் துறைகளை மையப்படுத்தி இந்தக் கலந்துரையாடல்கள் நடைபெற்றன.

*****

(Release ID: 2125648)

TS/IR/KPG/RJ