లబ్ధిదారు:  పెంపుడు జంతువులంటే ఉన్న ఇష్టం నన్ను వ్యాపారవేత్తగా మార్చిన తీరు గురించి ఈరోజు చెప్పాలనుకుంటున్నాను సర్.. నా వ్యాపారానికి కే-9 అని పేరు పెట్టుకున్నాను. పెంపుడు జంతువులకి అవసరమైన సామగ్రి, మందులే కాక, పెంపుడు జంతువులు కూడా మా వద్ద లభ్యమవుతాయి. ముద్రా రుణం అందిన తరువాత మా వ్యాపారాన్ని మరింత విస్తరించాం. జంతువులను పెంచుకుంటున్న వారు పనుల మీద ఇతర ప్రాంతాలకు వెళ్ళవలసిన సందర్భాల్లో, మా పెట్ బోర్డింగ్ సౌకర్యాన్ని వినియోగించుకోవచ్చు. పెట్స్ కి  వాటి సొంత ఇంట్లో లభించే ప్రేమపూరిత వాతావరణాన్నే అందిస్తాం. నాకు మూగజీవాల పట్ల గల ప్రేమ చాలా ప్రత్యేకమైంది సర్, నేను తిన్నా, తినకపోయినా, వాటికి మాత్రం సమయానికి ఆహారం అందేలా చూస్తాను..

ప్రధానమంత్రి: అయితే మీ ఇంట్లో అందరూ మీ తీరు పట్ల విసిగిపోయి ఉంటారే?

లబ్ధిదారు: నా కుక్కలు, నేను విడిగా ఇంకో చోట ఉంటాం సర్. మీకు అనేక కృతజ్ఞతలు సర్, మీ వల్లే నాలాంటి మూగజీవాల ప్రేమికులు, ఎన్జీవోలు ఎటువంటి ఆటంకాలు లేకుండా తమ పని చేసుకోగలుగుతున్నారు. జంతు ప్రేమికులు కానివారికి ఇక్కడ ప్రవేశం లేదు అని నా ఇంటి గేటు వద్ద రాసి ఉంటుంది సర్..

ప్రధానమంత్రి: ఇక్కడికి వచ్చి వెళ్ళాక మీకు పబ్లిసిటీ బాగా పెరుగుతుందా?

లబ్ధిదారు: అది సహజమే కదా సర్!

ప్రధానమంత్రి: మీరుంటున్న హాస్టల్ మీకు సరిపోదేమో?!

లబ్ధిదారు: నిజమే, గతంలో నేను నెలకి 20,000 రూపాయలు సంపాదించేటప్పుడు ఇబ్బంది పడేవాడిని..  ఇప్పుడు మాత్రం నెలకు 40,000 నుంచి 50,000 వరకూ సంపాదిస్తున్నాను. 

ప్రధానమంత్రి: అయితే మీరిప్పుడొక పని చేయాలి, ఈ బ్యాంక్ వారున్నారు కదా..

లబ్ధిదారు: చెప్పండి సర్.

ప్రధానమంత్రి: మీకు రుణం అందించిన ఆ బ్యాంకు వారిని పిలవండి, మీరు మొదలుపెట్టిన వ్యాపారం గురించి వారికి అన్ని వివరాలు చెప్పండి. “ఎందరో భయపడి వెనకడుగు వేసే పనిని మీరు చేశారు. నాపై నమ్మకం ఉంచి నాకు రుణం ఇచ్చారు. మీరిచ్చిన రుణం సొమ్ముని నేనే విధంగా వాడుతున్నానో చూడండి..” అని వారికి చెప్పండి.

లబ్ధిదారు: తప్పక సర్!

ప్రధానమంత్రి: మేము ఒక మంచి పనిని చేశాం అని వారు సంతృప్తి చెందుతారు.

లబ్ధిదారు: ప్రధానమంత్రి అంటే మితభాషి అనే భావన పటాపంచలైంది.. ఆయన మాతో కలిసిపోయి ఎంతో సరదాగా మాట్లాడారు. అది నాకెంతో నచ్చింది. మరో మాట.. ఆయన చాలా గొప్ప శ్రోత!

లబ్ధిదారు: కేరళ రాష్ట్రం నుంచి వచ్చిన ముద్రా రుణాల లబ్ధిదారుని నేను. నా పేరు గోపీ కృష్ణన్. ప్రధానమంత్రి ముద్రా యోజన నన్నొక విజయవంతమైన వ్యాపారవేత్తగా నిలబెట్టింది. గృహాలకీ, కార్యాలయాలకీ పునర్వినియోగ ఇంధన వ్యవస్థలను అందించే నా వ్యాపారం మూడు పువ్వులు ఆరు కాయలుగా వృద్ధి చెందుతోంది.. అనేక మందికి ఉపాధిని కూడా కల్పించింది!

ప్రధానమంత్రి: దుబాయ్ నుంచి వెనక్కి వచ్చేసినప్పుడు మీ ప్రణాళికలేంటి?

లబ్ధిదారు: నేను స్వదేశానికి వచ్చినప్పుడు ముద్రా రుణాల గురించి విన్నాను. దాంతో ఆ  కంపెనీకి రాజీనామా ఇచ్చేశాను.

ప్రధానమంత్రి: అంటే మీరక్కడ ఉండగానే మీకు ఈ విషయం తెలిసిందా?

లబ్ధిదారు: అవును, రాజీనామా సమర్పించాక ఇక్కడికొచ్చి ముద్రా రుణం కోసం దరఖాస్తు చేశాను. అప్పుడు ఈ వ్యాపారం మొదలుపెట్టాను. 

ప్రధానమంత్రి:  ఒక ఇంటిపై సూర్య ఘర్ బిగించేందుకు మీకెంత కాలం పడుతుంది?

లబ్ధిదారు: రెండ్రోజులు కంటే పట్టదు.

ప్రధానమంత్రి: ఒక ఇంటికి చేసే పని రెండ్రోజుల్లో పూర్తవుతుంది..

లబ్ధిదారు: మా పనితీరు అటువంటిది..

ప్రధానమంత్రి:  దుబాయ్ నుంచి తిరిగి వచ్చాక మీరు ఒత్తిడికి లోనయ్యారా? వ్యాపారంలో రాణిస్తానో లేదో, రుణం మొత్తాన్ని  తిరిగి చెల్లించలేకపోతే ఏం జరుగుతుందో, అమ్మా నాన్నా చీవాట్లు పెడతారేమోననే బెంగ మీకుండేదా?  

లబ్ధిదారు: అమ్మ కాస్త బెంగ పడిన మాట నిజమే. అయితే దేవుడి దయ వల్ల అన్ని విషయాలూ సర్దుకున్నాయి!

ప్రధానమంత్రి: పీఎం సూర్య ఘర్ పథకం ద్వారా ఉచిత కరెంటు పొందుతున్నవారి స్పందన ఎట్లా ఉంది? కేరళలో ఇళ్ళు తక్కువ ఎత్తులో ఉంటాయి కదా. పైగా అడపాదడపా కురిసే వర్షాలు, పొడవాటి చెట్ల వల్ల సూర్యుడి వెలుగు కాస్త తక్కువగానే ఉంటుంది కదా? మరి వీరంతా ఏమనుకుంటున్నారు?

లబ్ధిదారు: సూర్య ఘర్ పలకలను బిగించిన తరువాత వీళ్లు కట్టాల్సిన విద్యుత్ బిల్లుల్లో గణనీయమైన తగ్గింపు కనిపిస్తోంది. గతంలో సగటున ఒక్కొక్కరూ నెలకు 3000 రూపాయల బిల్లు కడితే, ఇప్పుడు 240-250 రూపాయలు కడుతున్నారు.  

ప్రధానమంత్రి: ఇప్పుడు మీ నెల సంపాదన ఎంత? మీ ఖాతాలో ఎంత సొమ్ము నిలువ చేయగలిగారు?

లబ్ధిదారు: నాకు.. సుమారు...

ప్రధానమంత్రి: తటపటాయించవద్దు మిత్రమా. ఆదాయపు పన్ను వారు మీ వద్దకు వస్తారేమోనని భయపడకండి..

లబ్ధిదారు: నాకు నెలకి రూ. 2.5 లక్షల ఆదాయం ఉంటోంది..

ప్రధానమంత్రి: ఆర్థికమంత్రి నా పక్కనే ఉన్నారు.. మీ ఇంటికి ఇన్ కంటాక్స్ వాళ్లను పంపవద్దని నేను మంత్రిగారికి చెబుతాను..

లబ్ధిదారు: రెండున్నర లక్షల రూపాయలకు పైబడిన నెలసరి ఆదాయం లభిస్తోంది సర్!

లబ్ధిదారు: కలలనేవి మనకు నిద్రలో కనిపించేవి కావు. మనకు నిద్ర పట్టకుండా చేసేవే కలలు. సమస్యలుంటాయి. సవాళ్ళుంటాయి... అయితే కష్టపడే వారికే విజయం లభిస్తుంది.

లబ్ధిదారు: నేను ‘హౌస్ ఆఫ్ పుచ్కా’ను ప్రారంభించాను. ఇంట్లో ఈ వంటకాలను తయారు చేసినప్పుడు చక్కటి రుచితో కుదిరేవి.. దాంతో మిత్రులందరూ నన్ను కెఫే రంగంలోకి దిగమని ప్రోత్సహించారు. రీసర్చ్ మొదలుపెట్టిన నాకు. ఈ వ్యాపారంలో మంచి లాభాలే అందుతాయని అర్థమయ్యింది. ఆహార దినుసుల ధరలను నియంత్రించగలిగితే, విజయవంతమైన వ్యాపారాన్ని నడపవచ్చునని తెలుసుకున్నాను.

ప్రధానమంత్రి: కొంతమంది యువత, ఒక తరం ఆలోచనల గురించి చెబుతాను – వీరు చదువు పూర్తయ్యాక ఉద్యోగాలు సంపాదించుకుని సెటిల్ అవుదామని భావిస్తారు. అమ్మో, వ్యాపారాలు మాకొద్దు అనుకుంటారు.. మీరు దీనికి భిన్నం, రిస్క్ తీసుకునే సామర్థ్యం కలవారు.

లబ్ధిదారు: నిజమే సర్..

ప్రధానమంత్రి: అయితే మీకు రాయ్ పూర్ మిత్రులు, వ్యాపార రంగ, విద్యార్థి మిత్రులు ఉండి ఉంటారు కద! వారంతా ఏమనుకుంటున్నారు? ఉద్యోగం – వ్యాపారం, వీటికి సంబంధించి మీ మధ్య ఎటువంటి చర్చ జరుగుతుంది? ఇది చెయ్యాలా లేక అది చెయ్యాలా అని మధనపడతారా? వీరంతా కూడా తమ అభిప్రాయాలను ఎదుటివారితో పంచుకోవాలని భావిస్తారా?  

లబ్ధిదారు: సర్, ఇప్పుడు నా వయసు 23 ఏళ్ళు. రిస్క్ తీసుకునేందుకు తగిన సామర్థ్యం, అవకాశం ఉన్న నాకు ఇదే తగిన సమయం. అయితే నిధులు ఎక్కడి నుంచి అందుతాయోనని ఎక్కువ శాతం యువత దిగులు పడుతుంటారు. వారికి ప్రభత్వ పథకాల గురించి అవగాహన ఉండటం లేదు. వారికి నేను చేసే సూచన ఒకటే. శోధించి సాధించండి. ముద్రా రుణాలు, పీఎం ఈజీపీ వంటి అనేక పథకాలు ఉన్నాయి. పూచీకత్తు లేకుండా రుణాలు మంజూరు చేసే ప్రభుత్వ పథకాలు అనేకం అందుబాటులో ఉన్నాయి. మీలో అటువంటి సత్తా ఉంటే, ఉద్యోగాలకు ఉద్వాసన చెప్పి వ్యాపార రంగంలోకి రండి.. మీ అభివృద్ధికి ఆకాశమే హద్దు!  

లబ్ధిదారు: ఇంటి పైకప్పునకు చేరుకోవాలనుకొనే వారి కోసం మెట్లు ఉంటే ఉండనీయండి, ఆకాశాన్ని అందుకోవాలనుకుంటున్నాం మేం. మా దారిని మేమే ఏర్పరుచుకోవాల్సి ఉంటుంది. నేను ఎండీని, నా పేరు ముదస్సిర్ నఖ్ష్‌బందీ... బారాముల్లా కాశ్మీర్‌లో బేక్ మై కేక్‌ యజమానిని నేను. విజయవంతమైన ఈ బిజినెస్‌తో, నేను ఉద్యోగాన్ని కోరుకొనే స్థాయి నుంచి ఉద్యోగాన్ని ఇచ్చే స్థాయికి చేరుకొన్నాను. మేం బారాముల్లాలోని మారుమూల ప్రాంతాలకు చెందిన 42 మందికి స్థిరమైన నౌకరీలను ఇవ్వగలిగాం.  
ప్రధానమంత్రి: మీరు చాలా వేగంగా ముందుకువెళ్తున్నారు. బ్యాంకు మీకు రుణాన్ని ఇవ్వక మునుపు మీ స్థితి ఏమిటో చెప్పండి?
లబ్ధిదారు: సర్, మొత్తంమీద, అది 2021 నాటి సంగతి. అంతకు ముందు, నేను లక్షల్లోనో, కోట్లల్లోనో లేను... కేవలం వేలల్లో ఉన్నాను.
ప్రధానమంత్రి: మీరు మీ బిజినెస్‌లో యూపీఐని కూడా ఉపయోగిస్తున్నారా?
లబ్ధిదారు: సర్,  సాయంత్రం నగదును సరిచూసేటప్పుడు మేం నేను చాలా నిరుత్సాహపడుతున్నా. ఎందుకంటే 90 శాతం లావాదేవీలు యూపీఐ ద్వారానే పూర్తి అవుతున్నాయి. మరి మా చేతిలో 10 శాతం నగదు మాత్రమే ఉంటోంది.
లబ్ధిదారు: నిజానికి, ఆయన ఎంతో అణకువతో నడుచుకొన్నట్టు నాకనిపించింది. మరి ఆయన మన దేశానికి ప్రధానమంత్రి అన్న భావనే నాకు కలగలేదు... మాతో ఎవరో ఉన్నారు. మాకు మార్గదర్శనం చేస్తున్నారు అనే తోచింది.. అంతటి వినమ్రతను ఆయన చూపించారు.
ప్రధానమంత్రి: సురేశ్, ఈ సమాచారం ఎక్కడ నుంచి రాబట్టారు మీరు? ఇంతకు ముందు మీరు ఏం చేసేవారు? కుటుంబంలో మీరు ఇప్పటికే ఏం పని చేస్తున్నారు?
లబ్ధిదారు: సర్, నేను అప్పటికే ఒక ఉద్యోగంలో ఉన్నా.  
ప్రధానమంత్రి: ఎక్కడ?
లబ్ధిదారు: వాపీలో. మరి అప్పుడు 2022వ సంవత్సరం... నాకనిపించింది ఉద్యోగంతో గొప్పగా సాధించేదేమీ ఉండదని... ఈ కారణంగా నేను నా సొంత వ్యాపారాన్ని మొదలుపెట్టాలనుకున్నాను.
ప్రధానమంత్రి: మీరు రోజూ మీ బతుకుదెరువు కోసం రైల్లో వాపీ వెళ్లివచ్చేవారా... రైల్లో స్నేహాలు అద్భుతంగా ఉంటాయి. అందుకని ఈ...
లబ్ధిదారు: సర్, నేను సిల్వాసాలో ఉంటాను. వాపీలో పనిచేస్తాను... ఇప్పుడు నేను సిల్వాసాలోనే పనిచేస్తున్నాను.
ప్రధానమంత్రి: నాకు తెలుసు ఈ మిట్ట-పల్లాల ముఠాల గురించి. అయితే వాళ్లు అడుగుతూ ఉండి ఉంటారు... మీరు ఇంతలా సంపాదించడం ఎలా మొదలుపెట్టారు, మీరు ఏం చేస్తున్నారు అని.  వారిలో ఎవరైనా ముద్రా రుణం తీసుకోవడంతోపాటు ఎక్కడికైనా వెళ్లే ఉద్దేశంలో ఉన్నారా?
లబ్ధిదారు: అవును సర్. ఇటీవల నేను ఇక్కడికి వస్తుంటే, నా దోస్తుల్లో ఒకరు కూడా నాతో ఇదే విషయం ప్రస్తావించారు. వీలయితే దయచేసి నాకు ముద్రా రుణం విషయంలో కొంత మార్గదర్శనం చేయండీ అని.
ప్రధానమంత్రి: ముందుగా, మీరంతా నా ఇంటికి వచ్చినందుకు మీకు నేను ధన్యవాదాలు తెలియజేస్తున్నాను. అతిథులు మన ఇంటికి వచ్చినప్పుడు వారి పాద ధూళి ఇంట్లో పడ్డప్పుడు, ఆ ఇల్లు పవిత్రం అవుతుందని మన ధర్మగ్రంథాల్లో రాశారు. అందుకని, నేను మీకు మనసారా స్వాగతం పలుకుతున్నాను. మీ అందరికీ ఏదో ఒక అనుభవం తప్పక ఉండే ఉంటుంది. మీలో కొందరికి మీ పనిని చేసే సమయంలో ఎంతో భావనాత్మకమైన అనుభూతులు కలిగి ఉండి ఉండవచ్చు. ఎవరికైనా ఏదైనా చెప్పాలనిపిస్తే గనక నేను వినాలనుకుంటున్నాను.
లబ్ధిదారు: సర్, ముందుగా నేను మీతో చెప్పాలనుకుంటున్నది మీరు మన్ ‌కీ బాత్ లో మాట్లాడడంతోపాటు... వింటున్నారు. కాబట్టి, రాయ్‌బరేలీలో ఓ చిన్న గ్రామానికి చెందిన మహిళా వ్యాపారి మీ ఎదుట నిలిచింది. మీ సహకారంతో, మద్దతుతో ఎంఎస్ఎంఈలకు ఎంతగానో ప్రయోజనం కలుగుతోందనేదానికిదే ఒక నిదర్శనం. ఇక్కడికి రావడం నాకు చాలా భావోద్వేగాన్ని కలిగించే సమయం... మేం మీకు మాటిస్తున్నాం... మేమంతా కలిసి భారత్‌ను వికసిత్ భారత్‌ను చేస్తాం... ఎంఎస్ఎంఈలను మేం ప్రభుత్వం నుంచి లైసెన్సులు పొందడంలో గాని, లేదా ఆర్థిక సాయాన్ని పొందడంలో గాని మేం ఇబ్బందుల్ని ఎదుర్కొన్నప్పుడల్లా వాటిని మీరు పిల్లలను సాకినట్లు సాకుతున్నారు.  
ప్రధానమంత్రి: ఎన్నికలలో పోటీ చేయాలని మీరనుకుంటున్నారా?
లబ్ధిదారు: లేదు-లేదు సర్, నేను మీతో చెప్పింది ఇదీ. ఆఁ-ఆఁ ఎందుకంటే నాకనిపించేది ఇదివరకు కూడా నేను ఈ సమస్యను ఎదుర్కొన్నానని. ఎప్పుడు అప్పోసొప్పో తీసుకోవాలని వెళ్లినా నాకు దొరికేది కాదు.  
ప్రధానమంత్రి: చెప్పండి, మీరేం చేస్తుంటారు?

లబ్ధిదారు: బేకరీ అండీ... బేకరీ.
ప్రధానమంత్రి: బేకరీనా?
లబ్ధిదారు: అవును సర్.
ప్రధానమంత్రి: మీరిప్పుడు ఎంత డబ్బు సంపాయిస్తున్నారంటారు?
లబ్ధిదారు: సర్, నా నెలవారీ టర్నోవరు రెండున్నర లక్షల రూపాయల్నుంచి మూడు లక్షల రూపాయల వరకూ ఉంది.
ప్రధానమంత్రి: సరే, మీరు ఎంతమందికి ఉపాధి కల్పిస్తున్నారు?
లబ్ధిదారు: సర్, మాది ఏడెనిమిది మందితో కూడిన ఓ బృందం.
ప్రధానమంత్రి: మంచిది.
లబ్ధిదారు: అవును సర్.
లబ్ధిదారు: సర్ నా పేరు లవ్‌కుశ్ మెహ్రా. నేను మధ్య ప్రదేశ్ లోని భోపాల్‌కు చెందిన వాడిని. ఇంతకు ముందు నేను ఒక ఉద్యోగంలో ఉండేవాణ్ని సర్. అప్పట్లో నేను ఎవరికో పనులు చేసిపెడుతూ ఉండేవాణ్ని. అంటే నేను సేవకునిగా ఉన్నాను సర్. మీరు ముద్రా రుణాన్ని ఇచ్చి మా నుంచి హామీని పొందారు సర్.  మరి మేం ఇవాళ యజమానులుగా మారిపోయాం సర్. నేను, నిజానికి ఒక ఎంబీఏని. నాకేమో ఫార్మాస్యూటికల్ పరిశ్రమను గురించి అసలేం తెలియదు.  నేను నా పనిని 2021లో మొదలుపెట్టాను. ముందుగా బ్యాంకులను సంప్రదించాను. వాళ్లు ముద్రా రుణం కోసం 5 లక్షల రూపాయల సీసీ పరిమితిని సూచించారు. అయితే సర్, నేను మొట్టమొదటిసారిగా అంత పెద్ద మొత్తంలో రుణం తీసుకుంటున్నాను కదా, దానిని తిరిగి తీర్చగలనా అని భయపడ్డాను. అందుకని, నేను ఆ సొమ్ములో నుంచి మూడు నుంచి మూడున్నర లక్షల రూపాయలు మాత్రమే ఖర్చుపెట్టేవాణ్ని. సర్, నా ముద్రా రుణం 5 లక్షల నుంచి తొమ్మిదిన్నర లక్షలకు పెరిగింది. మొదటి సంవత్సరంలో నా టర్నోవరు 12 లక్షల రూపాయలు. అది కాస్తా పెరుగుతూ పెరుగుతూ ఇప్పుడు 50 లక్షలు కన్నా ఎక్కువే ఉందండి.
ప్రధానమంత్రి: జీవించడానికిది కూడా ఒక మార్గమని అనుకునే వేరే నేస్తాలూ మీకు ఉండి ఉంటారనుకుంటాను.
లబ్ధిదారు: అవును సర్.
ప్రధానమంత్రి: ఏది ఏమైనా, ముద్రా యోజనను తెచ్చింది మోదీని పొగడటానికి కాదు. ముద్రా యోజన నా దేశ యువతీయువకులకు వారి సొంత కాళ్ల మీద నిలబడగలమన్న ధైర్యాన్నిస్తుంది. వారిలో ఉత్సాహం ఉరుముతుంది. నేను బతుకుదెరువును సంపాదించుకోవడానికి ఎందుకు చెట్టూపుట్టా తిరగాలి. నేనే పది మందికి ఉపాధి చూపిస్తానని వాళ్లనుకుంటారు.  
లబ్ధిదారు: అవును సర్.
ప్రధానమంత్రి: ఈ మూడ్‌ను ఏర్పరచుకోవాల్సింది మీరే. మీ చుట్టుపక్కల ఉన్న వాళ్లకు కూడా ఇలాంటి అనుభవమే ఎదురైందా?
లబ్ధిదారు: అవును సర్. మా ఊరు బఛ్‌వానీ. ఇది భోపాల్ నుంచి సుమారు 100 కిలోమీటర్ల దూరంలో ఉంది. కనీసం ఇద్దరు, ముగ్గురు ఆన్‌లైన్ డిజిటల్ షాపులు పెట్టుకున్నారు. కొంతమంది ఫోటో స్టూడియోలు పెట్టుకోవడానికి ఒక లక్షా, రెండు లక్షల రూపాయల రుణాలు తీసుకున్నారు. నేను కూడా వారికి సాయం చేశాను సర్. నా దోస్తులు కూడా సాయపడ్డారు సర్.
ప్రధానమంత్రి: ఎందుకంటే... నేనిప్పుడు మీ నుంచి ఆశిస్తున్నదల్లా- మీరు ఇతరులకు ఉపాధి కల్పించడమేగాక ఎలాంటి హామీ లేకుండా ఆర్థిక సహాయం లభిస్తుందని వారికి చెప్పడమే. కాబట్టి, ఇంకా ఇంట్లో కూర్చుని ఆలోచించడం ఎందుకు? వెళ్లండి... బ్యాంకుల వెంట పడండి!

లబ్ధిదారు: ఈ ముద్ర రుణ సాయం వల్లనే ఇటీవల రూ.34 లక్షలతో ఇల్లు కొనుక్కున్నాను.

ప్రధానమంత్రి: అద్భుతం!

లబ్ధిదారు: నేనింతకుముందు 60-70 వేల నెల జీతంతో ఉద్యోగం చేసేవాణ్ని. ఇప్పుడు నెలకు 1.5 లక్షల రూపాయలకుపైగా సంపాదిస్తున్నాను.

ప్రధానమంత్రి: మంచిది... మీకు విశేష అభినందనలు.

లబ్ధిదారు: ఇదంతా మీ చలవతోనే సర్‌... మీకు ఎనలేని కృతజ్ఞతలు.

ప్రధానమంత్రి: అలాక్కాదు సోదరా... అది మీ కఠోర కృషి ఫలితం.

లబ్ధిదారు: మోదీగారితో సంభాషించినపుడు మాకు ప్రధానమంత్రితో మాట్లాడుతున్నట్లు అస్సలు అనిపించలేదు. మా ఇంట్లో ఒకరు... మా కుటుంబ పెద్ద మాతో ముచ్చటిస్తున్న భావన కలిగింది. ముద్ర రుణ పథకం సాయంతో మేమెలా విజయం సాధించామో ఆయనకు పూర్తిగా వివరించాం. ఈ రుణం గురించి మరింత మందికి అవగాహన కల్పించేలా ఆయన మమ్మల్ని ప్రేరేపించిన తీరు చూసిన ఎవరైనా, ఈ పథకం తోడ్పాటుతో సొంత వ్యాపారం ప్రారంభించి, సాధికారత సాధించగలరు.

లబ్ధిదారు: సర్‌... నేను గుజరాత్‌లోని భావ్‌నగర్‌ నుంచి వచ్చాను.

ప్రధానమంత్రి: మీరు చాలా చిన్నవారిలా కనిపిస్తున్నారు!

లబ్ధిదారు: అవును సర్‌...

ప్రధానమంత్రి: ఈ మొత్తం బృందంలో..?

లబ్ధిదారు: నేను చివరి సంవత్సరంలో ఉన్నాను సర్‌. 4 నెలలుగా....

ప్రధానమంత్రి: చదువుకుంటూనే సంపాదిస్తున్నారా?

లబ్ధిదారు: అవును సర్‌...

ప్రధానమంత్రి: శభాష్‌!

లబ్ధిదారు: ఆదిత్య టెక్ ల్యాబ్ పేరిట నా సొంత వ్యాపార సంస్థను ప్రారంభించాను. ఇందులో 3డి ప్రింటింగ్‌, రివర్స్ ఇంజనీరింగ్, రాపిడ్ ప్రోటోటైపింగ్ సహా కొన్ని రోబోటిక్స్ సంబంధిత పనులు కూడా చేస్తుంటాను. నేనిప్పుడు చివరి సంవత్సరం మెకాట్రానిక్స్ విద్యార్థిని. కాబట్టి, ఆటోమేషన్ తదితరాలపై నాకు అమితాసక్తి. ముద్ర రుణం సాయంతో నా ఆసక్తిని సాకారం చేసుకోగలిగాను. ఇప్పుడు నా వయసు 21 సంవత్సరాలు... మొదట్లో ఈ రుణం పొందడం చాలా క్లిష్టమైన ప్రక్రియ అని విన్నాను. అందువల్ల ఈ ఏడాదిలో నాకు రుణం లభించదని భావించాను. అసలు చదువు పూర్తికాని వాడిని నమ్మి రుణం ఎలా ఇస్తారన్నది నా సందేహం. ఒకటిరెండేళ్లు ఏదైనా ఉద్యోగంలో అనుభవం సంపాదిస్తే తర్వాత రుణం లభిస్తుందని అందరూ సలహా ఇచ్చారు. కానీ, మా భావ్‌నగర్‌లో సౌరాష్ట్ర గ్రామీణ బ్యాంకు ఉంది... నేను వారిని సంప్రదించి, నా ఆలోచనను వారికి వెల్లడించాను. నేనేం చేయాలనుకుంటున్నానో చక్కగా వివరించాను. దీనిపై వారు స్పందిస్తూ- మీకు కిషోర్ కేటగిరీ కింద రూ.50,000 నుంచి రూ.5 లక్షలదాకా ముద్ర రుణం పొందే వీలుందని చెప్పారు. అప్పుడు నేను రూ.2 లక్షల రుణం తీసుకుని, 4 నెలల కిందట ఈ వ్యాపారానికి శ్రీకారం చుట్టాను. సోమవారం నుంచి శుక్రవారం వరకు కాలేజీకి వెళ్తాను. వారాంతాల్లో భావ్‌నగర్‌లో ఉంటూ నా పెండింగ్ పని పూర్తి చేస్తుంటాను. ఇలా నేనిప్పుడు నెలకు రూ.30-35 వేలదాకా సంపాదిస్తున్నాను సర్.

ప్రధానమంత్రి: అవునా!

లబ్ధిదారు: అవును సర్‌.

ప్రధానమంత్రి: మీ ల్యాబ్‌లో ఎంతమంది పనిచేస్తారు?

లబ్ధిదారు: ప్రస్తుతం నేనొక్కణ్నే సర్‌.

ప్రధానమంత్రి: మీరు వారానికి రెండు రోజులు మాత్రమే పనిచేస్తారు...

లబ్ధిదారు: అవును సర్‌... నేను మరో చోటనుంచి పనిచేస్తాను. ఇంటిదగ్గర మా తల్లిదండ్రులు నాకు వీలున్నప్పుడల్లా సాయం చేస్తుంటారు. నాకు ముద్ర పథకం ద్వారా చేయూత లభించింది. అయితే, మనలో ఆత్మవిశ్వాసం మెండుగా ఉండాలన్నది నా అభిప్రాయం సర్‌... ప్రధానంగా మీకు నా కృతజ్ఞతలు.

లబ్ధిదారు: సర్‌... మేమిప్పుడు మనాలిలో సొంత వ్యాపారం చేస్తున్నాం! మా పెళ్లికిముందు నా భర్త కూరగాయల మార్కెట్లో పనిచేసేవాడు.. నేను అత్తగారింటికి వెళ్లాక కొంతకాలానికి- ఎవరి కోసమో పని చేయడంకన్నా మనమే ఓ దుకాణం పెట్టుకుందామని చెప్పాను. ఆయన కూడా అంగీకరించడంతో సొంతంగా కూరగాయల దుకాణం తెరిచాం. మా వ్యాపారం క్రమంగా పెరగడంతో బియ్యం, పిండి వంటి ఇతర వస్తువులు కూడా విక్రయించాల్సిందిగా మా ఖాతాదారులు కోరేవారు. వారిలో పంజాబ్ నేషనల్ బ్యాంక్ సిబ్బంది కూడా ఉన్నారు. ఓ సందర్భంలో వారు మా దుకాణానికి వచ్చినపుడు, వారి బ్యాంకులో మాకు రుణం దొరుకుతుందా? అని అడిగాం. వారు మొదట తిరస్కరించారు.ఇదంతా 2012-13 నాటి సంగతి. అప్పుడు నేనిలా అన్నాను...

ప్రధానమంత్రి: (మధ్యలో జోక్యం చేసుకుంటూ) మీరు 2012-13 నాటి సంగతి చెబుతున్నారు... ఎవరైనా జర్నలిస్టు ఇది వింటే మీరు పాత ప్రభుత్వాన్ని నిందిస్తున్నారని రాస్తారు.

లబ్ధిదారు: (తిరిగి మాట్లాడుతూ) రుణం కోసం తాకట్టు పెట్టడానికి ఆస్తి ఏదైనా ఉందా అని వారు అడిగారు. అలాంటిదేమీ లేదని నేను చెప్పాను. అయితే, 2015-16లో ఈ ముద్ర రుణం గురించి నాకు తెలిసి, వారిని సంప్రదిస్తే- ఈ పథకం గురించి చెప్పి, ఇప్పుడు మీకు రుణం కావాలా? అని వారే అడిగారు. నేను కావాలనడంతో- మమ్మల్ని ఎలాంటి పత్రాలు, హామీలు  అడగకుండానే మొదట రూ.2.5 లక్షలు ఇచ్చారు. ఆ రుణాన్ని రెండున్నరేళ్లలో తీర్చేయడంతో రెండో దఫా రూ.5 లక్షలు ఇచ్చారు. ఆ తర్వాత నేను రేషన్ దుకాణం తెరిచాను. ఆ రెండు దుకాణాలు నిర్వహించడం నాకు సునాయాసంగా మారింది. సర్‌... నా వ్యాపారం వృద్ధి చెందడం ప్రారంభమైంది. అంటే- అంతకుముందు ఏడాదికి రూ.2.5 లక్షలు సంపాదిస్తుండగా, నేనివాళ రూ.10-15 లక్షలు ఆర్జిస్తున్నాను.

ప్రధానమంత్రి: శభాష్‌!

లబ్ధిదారు: (సంభాషణ కొనసాగిస్తూ) నేను తీసుకున్న రూ.5 లక్షల రుణం కూడా సకాలంలో చెల్లించడం వల్ల మూడోసారి వారు నాకు రూ.10 లక్షలు ఇచ్చారు. దాన్ని కూడా రెండున్నరేళ్లలో తిరిగి చెల్లించేశాను. అటుపైన 2024 నవంబరులో నాలుగోసారి రూ.15 లక్షలు ఇచ్చారు. సర్‌... మా కార్యకలాపాలు బాగా విస్తరిస్తున్నాయి. మాకు ఇలాంటి ప్రధానమంత్రి, ఆయన నుంచి నిరంతర మద్దతు లభిస్తున్నపుడు మేమూ ఆయనకు మద్దతిస్తాం. మేము ఎలాంటి పొరపాటు దొర్లకుండా చూసుకున్నాం కాబట్టి, మా భవిష్యత్తుకు ఇప్పుడు ఢోకాలేదు. కానీ, కొందరు రుణం తిరిగి చెల్లించకుండా తమ భవితను పాడుచేసుకున్నారు. బ్యాంకు వారు ఇప్పుడు రూ.20 లక్షలు రుణం ఇస్తామంటున్నారు. కానీ, మాకిక రుణం అవసరం లేదని చెప్పాను. అయినప్పటికీ మీ ఖాతాలో రూ.15 లక్షలు ఉంటుంది. అవసరమైతే ఆ సొమ్ము తీసుకోవచ్చు... అప్పుడు మాత్రమే వడ్డీ పడుతుంది. ఒకవేళ తీసుకోకపోతే వడ్డీ చెల్లించే అవసరం ఉండదని చెప్పారు. ఏదేమైనా... మీరు తెచ్చిన ఈ పథకం నాకెంతో నచ్చింది సర్‌!

లబ్ధిదారు: సర్‌... మాది ఆంధ్రప్రదేశ్‌. నాకు హిందీ రాదు... తెలుగులోనే మాట్లాడగలను.

ప్రధానమంత్రి: మరేం పర్వాలేదు! తెలుగులోనే మాట్లాడండి.

లబ్ధిదారు: అలాగా సర్!! నాకు 2009లో వివాహమయ్యాక 2019 వరకు గృహిణిగానే ఉన్నాను. ఆ తర్వాత జనపనార సంచుల తయారీపై కెనరా బ్యాంకు ఏర్పాటు చేసిన ప్రాంతీయ కేంద్రంలో 13 రోజులు శిక్షణ పొందాను. అటుపైన ముద్ర పథకం కింద బ్యాంకు వారు రూ.2 లక్షల రుణం ఇచ్చారు. ఆ సొమ్ముతో 2019 నవంబరులో సొంత వ్యాపారం ప్రారంభించాను. కెనరా బ్యాంకు ఎలాంటి పూచీకత్తు లేకుండా నన్ను నమ్మి రూ.2 లక్షల రుణం మంజూరు చేసింది. రుణం కోసం నేను ఎవరి సాయమూ తీసుకోలేదు. అలాగే హామీతో నిమిత్తం లేకుండానే రుణం దొరికింది. దాన్ని సకాలంలో తిరిగి చెల్లించాక 2022లో కెనరా బ్యాంకు మరో రూ.9.5 లక్షలు మంజూరు చేసింది. ఇప్పుడు మా దగ్గర 15 మంది పనిచేస్తున్నారు.

ప్రధానమంత్రి: అంటే- మీరు రూ.2 లక్షలతో మొదలుపెట్టి, ఇప్పుడు రూ.9.5 లక్షల స్థాయిని అందుకున్నారన్న మాట!

లబ్ధిదారు: అవును సర్‌..

ప్రధానమంత్రి: మీ దగ్గర ఎంతమంది పనిచేస్తున్నారని చెప్పారు...

లబ్ధిదారు: 15 మంది సర్‌...

ప్రధానమంత్రి: 15 మందా!

లబ్ధిదారు: అందరూ గృహిణులే సర్‌... అందునా ఆర్‌సిటి (గ్రామీణ స్వయం ఉపాధి కేంద్రం)లో శిక్షణ పొందినవారే. ఒకప్పుడు వారిలో ఒకరినైనా, నేనిప్పుడు శిక్షకురాలుగా పని చేస్తున్నాను. ఈ అవకాశం లభించినందుకు ఎంతో కృతజ్ఞురాలిని. ధన్యవాదాలు.. ధన్యవాదాలు... అనేకానేక ధన్యవాదాలు సర్‌!

ప్రధానమంత్రి: మీక్కూడా ధన్యవాదాలు.. ధన్యవాదాలు... అనేకానేక ధన్యవాదాలు.

లబ్ధిదారు: సర్‌... నా పేరు పూనమ్‌ కుమారి. మాది చాలాచాలా పేద కుటుంబం.

ప్రధానమంత్రి: మీరు ఢిల్లీకి మొదటిసారి వచ్చారా?

లబ్ధిదారు: అవును సర్‌...

ప్రధానమంత్రి: మంచిది...

లబ్ధిదారు: అంతేకాకుండా విమాన ప్రయాణం కూడా నాకిదే మొదటిసారి సర్‌.

ప్రధానమంత్రి: అలాగా...

లబ్ధిదారు: మా కుటుంబం కటిక పేదరికంలో ఉండేది. ఒక పూట తింటే, మళ్లీ ఆకలి తీరదెప్పుడా అని ఎదురుచూడాల్సిన దుస్థితి. కానీ, మాది వ్యవసాయ కుటుంబం.. కాబట్టే నేను ధైర్యం కూడగట్టుకునే ప్రయత్నం చేశాను.

ప్రధానమంత్రి: మీరు సంపూర్ణ ఆరోగ్యంతో జీవించగలరు.

లబ్ధిదారు: మాది రైతు కుటుంబం కాబట్టి, ఎన్నో సమస్యలు వెంటాడేవి. అలాంటి పరిస్థితుల మధ్య మనమే రుణం తీసుకుని సొంత వ్యాపారం ఎందుకు ప్రారంభించకూడదంటూ నా భర్తతో అన్నాను. ఆయన నాతో ఏకీభవించి, నీ సూచన బాగుంది... మనం కచ్చితంగా సొంత వ్యాపారం పెడదామని చెప్పాడు. తన మిత్రులతో ఈ ఆలోచనను పంచుకున్నపుడు వారు ముద్ర రుణం గురించి సమాచారం ఇచ్చారు. వారి సలహా మేరకు మేము ఎస్‌బిఐ బ్యాంకు వారిని సంప్రదించాం. ఎలాంటి హామీ, పత్రాలు వంటివి లేకుండా రుణం ఇస్తామని వారు చెప్పారు. ఆ తర్వాత మాకు రూ.8 లక్షల రుణం మంజూరు చేయడంతో మా వ్యాపారం మొదలుపెట్టాం. మేమీ రుణం తీసుకున్నది 2024లో కాగా, ఇప్పుడు మా వ్యాపారం బాగా సాగుతోంది సర్‌.

ప్రధానమంత్రి: మీరు చేసే వ్యాపారం ఏమిటి?

లబ్ధిదారు: సర్‌... విత్తనాల వ్యాపారం చేస్తాం. నా భర్త ఎంతో సాయం చేస్తారు.. మార్కెటింగ్‌ పనిలో అధికశాతం ఆయనే చూసుకుంటారు. మేమొక వ్యక్తికి పని కూడా ఇచ్చాం.

ప్రధానమంత్రి: మంచిది...

లబ్ధిదారు: సర్‌... మా వ్యాపారం చాలా చక్కగా సాగుతోంది... త్వరలోనూ రుణం మొత్తం తిరిగి చెల్లించగలమన్న నమ్మకం నాకుంది.

ప్రధానమంత్రి: మీరిప్పుడు నెలకు ఎంత సంపాదిస్తున్నారు?

లబ్ధిదారు: సర్‌... ప్రస్తుతం రూ.60,000దాకా ఉంటుంది.

ప్రధానమంత్రి: అలాగా... 60వేల రూపాయలా... అయితే, మీ కుటుంబం ఆమోదించిందా?

లబ్ధిదారు: నిస్సందేహంగా సర్‌... నిస్సందేహంగా... మీరు తెచ్చిన ఈ పథకం వల్ల ఇవాళ నా కాళ్లపై నేను నిలబడ్డాను.

ప్రధానమంత్రి: మంచిది... మీరెంతో మంచిమార్గం ఎంచుకున్నారు.

లబ్ధిదారు: థ్యాంక్యూ సర్‌... మీతో నా మనోభావం పంచుకోవాలని ఉబలాటపడ్డాను. మోదీ గారితో మాట్లాడేందుకు రాగలననే నిజం నేనింకా నమ్మలేకపోతున్నాను. ఢిల్లీకి వచ్చాకగానీ నాకు విశ్వాసం కలగలేదు. అందుకే, మీకు నా కృతజ్ఞతలు. నువ్వు ఢిల్లీ వెళ్తున్నావని నా భర్త కూడా చెప్పారు.

ప్రధానమంత్రి: దేశంలో సమస్యలు ఎదుర్కొంటున్న ప్రతి పౌరుడూ పరిష్కారంపై ఆత్మవిశ్వాసంతో ఉండేలా చూడాలన్నదే నా లక్ష్యం. జీవితంలో కష్టాలు సహజం... కానీ,  అవకాశం లభించినపుడు వాటిని అధిగమించి ముందడుగు వేయాలి. ముద్ర పథకం చేసింది ఇదే.

లబ్ధిదారు: అవును సర్‌...

ప్రధానమంత్రి: దేశంలో నిశ్శబ్ద విప్లవం సంభవిస్తున్న తీరును అర్థం చేసుకోగల వారు చాలా స్వల్పం. వాస్తవానికి ఇదెంతో పెద్ద నిశ్శబ్ద విప్లవం.

లబ్ధిదారు: సర్‌... ముద్ర పథకంపై అందరికీ అవగాహన కల్పించేందుకు నేను కృషి చేస్తాను.

ప్రధానమంత్రి: అవును... దీని గురించి అందరికీ తెలియడం అవసరం.

లబ్ధిదారు: అవును సర్‌... తప్పక తెలియాలి.

ప్రధానమంత్రి: చూడండి, మా చిన్నప్పుడు వ్యవసాయం ఉత్తమమైనది.. వ్యాపారం దానికంటే తక్కువ.. ఉద్యోగం అన్నింటికంటే చిన్నది అని వినేవాళ్లం. ఉద్యోగం చివరిది అనే భావన ఉండేది. క్రమక్రమంగా సమాజం ఆలోచన ఎంతగా మారిపోయిందంటే…  ఉద్యోగమే ముఖ్యం, ఎక్కడో ఉద్యోగం సంపాదించి స్థిరపడాలని అనుకుంటున్నారు. జీవితం స్థిరమైనదిగా మారుతోంది. వ్యాపారం విషయంలో ఆలోచన అలాగే ఉంది. వ్యవసాయానికి చివరి ప్రాధాన్యత ఇచ్చే స్థాయికి ప్రజలు చేరుకున్నారు. అంతే కాదు ఒక రైతుకు ముగ్గురు కొడుకులు ఉంటే ఏం చేస్తాడు? ఒకరిని పొలం చూసుకోమని, మరొకరిని వెళ్లి జీవనం సాగించమని చెబుతాడు. మధ్యస్థ ప్రాధాన్యత ఉన్న వ్యాపారం అనేది ఇప్పుడు చర్చనీయాంశం. నేడు భారత యువతలో ఉన్న ఔత్సాహిక పారిశ్రామికవేత్తలుగా ఎదిగే నైపుణ్యాలకు తోడుగా వారికి కొంత సహాయం అందిస్తే గొప్ప ఫలితాలు వస్తాయి. ముద్ర యోజనలో ఏ ప్రభుత్వానికైనా ఇది కనువిప్పు లాంటిది.
ఈ పథకాన్ని ఉపయోగించుకునేందుకు ఎక్కువ మంది మహిళలు ముందుకు వచ్చారు. రుణాల కోసం దరఖాస్తు చేసుకున్న, రుణాలు పొందిన, అదే విధంగా రుణాన్ని వేగంగా తిరిగి చెల్లించే వారిలో కూడా మహిళలే ఎక్కువగా ఉన్నారు. అంటే ఇది కొత్త అంశం. అభివృద్ధి చెందిన భారత్‌కు ఉన్న అవకాశాలు ఈ శక్తిలో కనిపిస్తోంది. దీనివల్ల మనం ఒక వాతావరణాన్ని సృష్టించాలని నేను నమ్ముతున్నాను. విజయవంతమైన మీలాంటి వాళ్లకు ఏ రాజకీయ నాయుకుడి నుంచి ఎటువంటి సిఫార్సు లేఖ అవసరం లేదని ఇప్పుడు మీకు తెలుసు. మీరు ఏ ఎమ్మెల్యే, ఎంపీ ఇంటికి వెళ్లాల్సిన, మీరు ఎవరికీ ఒక్క రూపాయి కూడా ఇవ్వాల్సిన అవసరం రాలేదని నేను భావిస్తున్నాను.  తనఖా లేకుండా రుణం పొందటం, వచ్చిన తర్వాత దాన్ని సక్రమంగా ఉపయోగించుకోవడం మీ జీవితంలో క్రమశిక్షణను తీసుకొస్తుంది. అలాకాకుండా కొందరు డబ్బులు తీసుకున్నాం కదా.. వేరే నగరానికి వెళ్తాం, బ్యాంకు వాళ్లు వెతుకుతూనే ఉంటారు అని అనుకోవచ్చు. జీవితాన్ని సరైన తీరితో మలుచుకునేందుకు ఇది ఒక అవకాశాన్ని ఇస్తుంది. నా దేశంలోని ఎక్కువ మంది యువకులు ఈ రంగానికి రావాలని నేను కోరుకుంటున్నాను.

33 లక్షల కోట్ల రూపాయలు దేశ ప్రజలకు ఎలాంటి తనఖా లేకుండా అందాయి. ఇది ధనవంతుల ప్రభుత్వమని మీరు వార్తాపత్రికలో చదివి ఉంటారు. సంపన్నులందరినీ ఇచ్చిన మొత్తం కలిపితే కూడా 33 లక్షల కోట్లు ఉండవు. 33 లక్షల కోట్ల రూపాయలను నా దేశంలోని సామాన్యులకు, దేశంలో మీలాంటి ప్రతిభావంతులైన యువతీ యువకులకు అందించాం. వీరంతా ఒకరికి, ఇద్దరికి, 10 మందికి, 40-50 మందికి ఉపాధి కల్పించారు. అంటే ఆర్థిక వ్యవస్థలో  ఉపాధి కల్పించే ఈ బృహత్తర పనిని ఇది చేస్తోంది. దానివల్ల ఉత్పత్తి కూడా పెరుగుతుంది. సామాన్యుల సంపాదన పెరిగితే గతంలో ఏడాదికి ఒక చొక్కా కొనుక్కునే అతను ఇప్పుడు రెండు చొక్కాలు కొనుక్కోవాలని భావిస్తాడు. పూర్వం ప్రజలు తమ పిల్లలకు చెప్పటానికి సంకోచించేవారు. ఇప్పుడు వారికి నేర్పిద్దాం. కాబట్టి అటువంటి ప్రతి విషయం సామాజిక జీవితంలో గొప్ప ప్రయోజనాన్ని కలిగిస్తుంది. 

ఇప్పుడు ఈ పథకం అమల్లోకి వచ్చి పదేళ్లు అవుతోంది. సాధారణంగా ప్రభుత్వం నిర్ణయం తీసుకోవడం, మీడియా సమావేశం పెట్టి ఇలా చేస్తామని ప్రకటించడం సహజం. ఆ తర్వాత కొందరిని పిలిచి జ్యోతి వెలిగించి చప్పట్లు కొట్టి శీర్షికలు వచ్చేలా వార్తాపత్రికల గురించి ఆందోళన చెందుతుంటారు. తర్వాత ఎవరు దాని గురించి అడగరు. ఈ ప్రభుత్వం 10 సంవత్సరాల తర్వాత ఒక పథకం గురించి పరిశీలన చేస్తోంది. ఇది మంచిదేనా అని ప్రజలను అడుగుతున్నాం. ఇంత పురోగతి జరిగిందని మేం చెబుతున్నాం. కానీ ఏం జరిగిందో మీరు మాకు చెప్పండి. ఈ రోజు నేను మిమ్మల్ని అడుగుతున్నట్లుగా రాబోయే రోజుల్లో దేశవ్యాప్తంగా ఉన్న నా సహోద్యోగులందరూ ప్రజలను అడగబోతున్నారు. వారిని కలిసి సమాచారాన్ని తీసుకోబోతున్నారు. దీనివల్ల ఈ పథకంలో ఏదైనా మార్పు తీసుకురావాల్సిన అవసరం ఉంటే, కొంత మెరుగుదల చేయవలసి వస్తే.. మేం కూడా ఆ దిశగా ముందుకు సాగబోతున్నాం. కానీ మా కృషిని చూడండి. ఇప్పుడు దీన్ని 50000 నుంచి 5 లక్షలకు పెంచుతున్నాం. అయితే మన ప్రభుత్వ విశ్వాసం చూడండి.  సోదరా 5 లక్షల కంటే ఎక్కువ ఇవ్వొద్దు, ఒకవేళ మునిగితే ఏం చేస్తాం? అప్పుడు అందరూ మోదీ జట్టుపట్టుకొని లాగుతారని గతంలో ప్రభుత్వం కూడా భావించింది. కానీ నా దేశ ప్రజలు నా నమ్మకాన్ని వమ్ము చేయలేదు. మీరు నా దేశ ప్రజలపై నా నమ్మకాన్ని బలపరిచారు.

అందుకే దీన్ని 50 వేల నుంచి 20 లక్షలకు పెంచే ధైర్యం వచ్చింది. ఈ నిర్ణయం చిన్నదేమీ కాదు. ఈ పథకం విజయం, ప్రజలపై నమ్మకం.. ఈ రెండు ఇందులో కనిపించినప్పుడు ఈ నిర్ణయం తీసుకున్నాం. మీ అందరికీ నా అభినందనలు. నేను మీ నుంచి కోరుకునేది ఏంటంటే.. మీరు 5-10 మందికి ఉపాధి కల్పించినట్లే, ముద్ర యోజన ద్వారా స్వంత పని చేయాలని -10 మందిని ప్రేరేపించి, వారికి ధైర్యాన్నివ్వండి. తద్వారా వారికి ఆత్మవిశ్వాసం లభిస్తుంది. దేశంలో 52 కోట్ల రుణాలు అందాయి. మొదట 2.5 లక్షలు, ఆ తర్వాత 9 లక్షలు తీసుకున్నానని.. అందువల్ల రెండు రుణాలు ఉన్నాయని సురేష్ చెప్పారు. దీనిబట్టి మొత్తం 52 కోట్ల మంది లబ్దిదారులు ఉండకపోవచ్చు. కానీ 52 కోట్ల రుణాలు అనేది చాలా పెద్ద సంఖ్య. ప్రపంచంలోని ఏ దేశంలోనూ దీని గురించి ఎవరూ ఆలోచించలేరు. అందుకే మన యువతరాన్ని సొంతంగా ఏదైనా ప్రారంభించేలా సిద్ధం చేయాలని, దానివల్ల చాలా ప్రయోజనాలు ఉంటాయని చెబుతున్నాను. నేను గుజరాత్‌లో ఉన్నప్పుడు గరీబ్ కళ్యాణ్ మేళా అనే కార్యక్రమం ఉన్న విషయం నాకు గుర్తుంది. కానీ అందులో పిల్లలు.. నేను ఇప్పుడు పేదవాడిలా ఉండాలనుకోవటం లేదు లాంటి వీధి నాటకాలు వేసేవారు. ప్రజలను ప్రేరేపించడానికి ఇలాంటి నాటకం ఉండేది.

ఆ తర్వాత కొందరు వేదికపైకి వచ్చి తమ రేషన్ కార్డులను ప్రభుత్వానికి ఇచ్చి పేదరికం నుంచి బయటపడ్డామని, ఇప్పుడు మాకు ఎలాంటి సౌకర్యాలు అవసరం లేదని చెప్పేవారు. వారి పరిస్థితిని ఎలా మార్చుకున్నారన్నది మాట్లాడేవారు. నేను వల్సాద్ జిల్లాలో ఉన్నప్పుడు 8-10 మందితో కూడిన బృందం వచ్చి వారికి పేద వాళ్లకు ఉద్దేశించిన ప్రభుత్వ ప్రయోజనాలన్నింటినీ ప్రభుత్వానికి ఇచ్చేశారు. అప్పుడు వారు తమ అనుభవాన్ని చెప్పారు. అదేంటంటే.. వారు గిరిజన ప్రజలు. గిరిజనుల మధ్య సాయంత్రం భజనలు చేయడం, పాడటం భగత్ పని. కాబట్టి వారు ఒకటి లేదా రెండు లక్షల రూపాయల రుణం పొందారు. ఆ సమయంలో ముద్ర యోజన వంటివి లేవు. అక్కడ మా ప్రభుత్వం పథకం ఉండేది. వారిలో కొందరు సంగీత వాయిద్యాలను కొనుగోలు చేసి, వారు కొంత శిక్షణ పొందారు. వీళ్లు 10-12 మందితో ఒక బ్యాండ్ సంస్థను ఏర్పాటు చేశారు. ఆపై పెళ్లిళ్లలో వాయించటం మొదలుపెట్టారు. ఆ తర్వాత సొంతంగా మంచి యూనిఫాంలు తయారు చేసుకున్నారు. క్రమక్రమంగా వాళ్లంతా బాగా ప్రాచుర్యం పొంది వారంతా మంచి స్థాయిలో వచ్చారు. అందరూ 50-60 వేలు సంపాదించడం ప్రారంభించారు.

అంటే ఒక చిన్న విషయం కూడా ఇంత పెద్ద మార్పు తెస్తుంది. ఇలాంటి సంఘటనలు ఎన్నో నా కళ్లతో చూశాను. అక్కడే నాకు ప్రేరణ లభిస్తుంది. మీ నుంచి నాకు ప్రేరణ లభిస్తుంది.  సోదరా చూడండి.. దేశంలో ఇలాంటి శక్తి ఒకరిలోనే కాదు చాలా మందిలో ఉంటుంది. ఇలాంటిదే చేద్దాం. దేశ ప్రజలను కలుపుకుని దేశాన్ని నిర్మించొచ్చు. వారి ఆశలు, ఆకాంక్షలు, వారి పరిస్థితులను అధ్యయనం చేయడం ద్వారా ఇది సాధ్యమైంది. ఈ ముద్ర యోజన వీటిలో ఒకటి. మీరు ఈ విజయాన్ని కొత్త శిఖరాలకు తీసుకెళ్తారని, ఎక్కువ మంది ప్రయోజనం పొందుతారని నమ్మతున్నాను. ఇది మీకు సమాజం ఇచ్చింది, మీరు కూడా సమాజానికి ఇవ్వాలి కానీ ఇప్పుడు సరదాగా ఉందాం అని అనుకోవద్దు. మనం కూడా సమాజం కోసం ఏదైనా చేయాలి, దాని వల్ల మనస్సుకు సంతృప్తి లభిస్తుంది. 

ధన్యవాదాలు
గమనిక: ముద్ర యోజన లబ్ధిదారులతో ప్రధాన‌మంత్రి సంభాషణలో ఒక లబ్ధిదారుడు తెలుగులో మాట్లాడారు.