వేలాది ఎంట్రీలు, ప్రాంతీయ స్థాయిలో నెలలపాటు జరిగిన పోటీల అనంతరం.. వేవ్స్ యానిమీ, మాంగా కాంటెస్ట్ (వామ్) నేషనల్ ఫినాలేకు దేశవ్యాప్తంగా 11 నగరాల నుంచి తుది పోటీదారులు ఎంపికయ్యారు. ముంబయిలోని జియో వరల్డ్ కన్వెన్షన్ సెంటర్‌లో మే 1 నుంచి 4 వరకు నిర్వహించనున్న ప్రపంచ దృశ్య, శ్రవణ వినోద సదస్సు (వేవ్స్)- 2025లో భాగంగా ఈ పోటీని నిర్వహిస్తున్నారు.

మీడియా- ఎంటర్‌టైన్మెంట్ అసోసియేషన్ ఆఫ్ ఇండియా (ఎంఈఏఐ) సహకారంతో కేంద్ర సమాచార, ప్రసార మంత్రిత్వ శాఖ వామ్ పోటీలు నిర్వహిస్తోంది. యానిమీ, మాంగా, వెబ్‌టూన్స్, కాస్‌ప్లేలో ఒరిజినల్ ఇండియన్ ఐపీల ఆవిష్కరణ, ప్రోత్సహించే ఉద్దేశంతో నిర్వహిస్తున్న భారత తొలి జాతీయ కార్యక్రమమిది. తుది దశకు అర్హత సాధించిన ఈ సృజనాత్మక ఆవిష్కరణలు, వాటి ఆవిష్కర్తలకు ప్రతిష్ఠాత్మకంగా నిర్వహిస్తున్న వేవ్స్-2025 అద్భుతమైన గుర్తింపునిస్తుంది. అంతర్జాతీయ స్థాయిలో సంబంధిత రంగంలో నేతృత్వ స్థానంలో ఉన్నవారు, ఆవిష్కర్తలు, స్టూడియోలు, క్రియేటర్లను ఒక్కచోట చేర్చి దేశ సృజన రంగ ఆర్థిక వ్యవస్థను వేవ్స్ పెంపొందిస్తుంది. ‘క్రియేట్ ఇన్ ఇండియా, క్రియేట్ ఫర్ వరల్డ్’ లక్ష్యంతో నిర్వహిస్తున్న వేవ్స్.. భారీ లక్ష్యాలను నిర్దేశించుకునేలా, అంతర్జాతీయ స్థాయిలో ప్రేక్షకులకు చేరువయ్యేలా భారతీయ క్రియేటర్లను ప్రోత్సహించడం లక్ష్యంగా పెట్టుకుంది. ఏవీజీసీ-ఎక్స్ఆర్ రంగం- యానిమేషన్, విజువల్ ఎఫెక్ట్స్, గేమింగ్, కామిక్స్, ఎక్స్‌టెండెడ్ రియాల్టీలకు సంబంధించి దేశంలో అతి పెద్ద వేదిక వేవ్స్. క్రియేట్ ఇన్ ఇండియా చాలెంజ్ (సీఐసీ) వేవ్స్‌కు ప్రధాన కేంద్రంగా ఉంది. లక్ష నమోదులతో ఈ చాలెంజ్ సీజన్ 1 చరిత్ర సృష్టించింది. వాటిలో 1,100 అంతర్జాతీయ స్థాయి నమోదులు కూడా ఉన్నాయి. సమగ్ర ప్రక్రియ అనంతరం.. 32 ప్రత్యేక పోటీల నుంచి 750 మందికి పైగా తుది పోటీదారులు ఎంపికయ్యారు.

అంతర్జాతీయ యానిమీ బ్రాండ్ ‘క్రంచీరోల్’ వామ్‌-2025 టైటిల్ స్పాన్సర్‌గా చేరడం దేశంలోని వర్ధమాన క్రియేటర్లను విశేషంగా ప్రోత్సహించే అంశం. ఇది యానిమీపై అభిమానుల ఆదరణను మరింత పెంచుతుంది. వామ్- 2025 విజేతలను ప్రోత్సహించి, సాధికారులను చేయడం కోసం ‘క్రియేటర్ డెవలప్‌మెంట్ గ్రాంట్’ను క్రంచీబాల్ ప్రవేశపెట్టింది. యానిమీ, మాంగా, వెబ్‌టూన్ రంగాల్లో వర్ధమాన కళాకారులు, కథకులకు చేయూతనివ్వడం ఈ గ్రాంట్ లక్ష్యం. అంతర్జాతీయ స్థాయిలో ప్రేక్షకుల కోసం అసలైన మేధో సంపత్తిని వారు రూపొందించగలరు.

క్రియేటర్ డెవలప్ మెంట్ గ్రాంట్ వివరాలిలా ఉన్నాయి.:

• మాంగా (విద్యార్థి కేటగిరీ) — రూ. 25,000

• మాంగా (ప్రొఫెషనల్ కేటగిరీ) — రూ. 25,000

• వెబ్‌టూన్ (విద్యార్థి కేటగిరీ) — రూ. 25,000

• వెబ్ టూన్ (ప్రొఫెషనల్ కేటగిరీ) — రూ. 25,000

• యానిమీ (విద్యార్థి కేటగిరీ) — రూ. 50,000

• యానిమీ (ప్రొఫెషనల్ కేటగిరీ) — రూ. 50,000

అంతేకాకుండా.. వామ్-2025 తుదిపోటీల్లో విజేతగా నిలిచిన భారత బృందానికి క్రంచీరోల్ చేయూతను అందించనుంది. టోక్యోలో అంతర్జాతీయ స్థాయిలో ప్రధానమైన యానిమీ ప్రదర్శన యానిమీ జపాన్- 2026లో వారు దేశానికి ప్రాతినిధ్యం వహించనున్నారు. అసలైన భారతీయ సృజనాత్మక ప్రతిభను అంతర్జాతీయ వేదికపై చాటడానికి ఇది సహాయపడుతుంది. క్రంచీరోల్, ఎల్ఎల్‌సీ అన్నది అమెరికా కేంద్రంగా ఉన్న సోనీ ఎంటర్టైన్మెంట్, జపాన్‌కు చెందిన అనిప్లెక్స్ మధ్య జాయింట్ వెంచర్. ఇది స్వతంత్రంగా వ్యవహరిస్తుంది. ఇది సోనీ మ్యూజిక్ ఎంటర్టయిన్మెంట్ (జపాన్) (విలీన) అనుబంధ సంస్థ. రెండూ టోక్యోకు చెందిన సోనీ గ్రూప్ అనుబంధ సంస్థలు.

వేవ్స్ గురించి

మీడియా, వినోద రంగాల్లో కీలకమైన కార్యక్రమమైన తొలి ప్రపంచ దృశ్య, శ్రవణ వినోద సదస్సు (వేవ్స్)ను ముంబయిలో మే 1 నుంచి 4 వరకు కేంద్ర ప్రభుత్వం నిర్వహించనుంది.

మీరు సంబంధిత రంగంలో నిపుణులైనా, పెట్టుబడిదారులైనా, సృజనకారులైనా, ఆవిష్కర్తలైనా... అనుసంధానం, భాగస్వామ్యం, ఆవిష్కరణలతో మీడియా, వినోద రంగంలో ప్రతిభను చాటుకునేందుకు అత్యున్నత అంతర్జాతీయ వేదికగా ఈ సదస్సు నిలుస్తుంది.

భారతీయ సృజన శక్తిని వేవ్స్ విస్తృతంగా చాటబోతోంది. కంటెంట్ సృజన, మేధో సంపత్తి, సాంకేతిక ఆవిష్కరణల నిలయంగా దేశ స్థానాన్ని మరింత సుస్థిరం చేయనున్నది. సమాచార ప్రసారం, ముద్రణ మాధ్యమాలు, టీవీ, రేడియో, సినిమా, యానిమేషన్, విజువల్ ఎఫెక్ట్స్, గేమింగ్, కామిక్స్, సంగీతం, ప్రకటనలు, డిజిటల్ మీడియా, సోషల్ మీడియా వేదికలు, ఉత్పాదక కృత్రిమ మేధ, అగ్మెంటెడ్ రియాలిటీ (ఏఆర్), వర్చువల్ రియాలిటీ (వీఆర్), ఎక్స్‌టెండెడ్ రియాలిటీ (ఎక్స్ఆర్) వంటి పరిశ్రమలు, రంగాలపై దృష్టి సారించారు.

ఏవైనా సందేహాలున్నాయా? జవాబుల కోసం ఇక్కడ చూడండి.

పీఐబీ వేవ్స్ బృందం ఎప్పటికప్పుడు అందించే తాజా ప్రకటనలను చదవండి.

రండి, మాతో కలసి ప్రయాణించండి! ఇప్పుడే వేవ్స్ కు రిజిస్టర్ చేసుకోండి. 

***