وزیر اعظم جناب نریندر مودی نے 22 اپریل 2025 کو سعودی عرب کا سرکاری دورہ کیا ۔سعودی عرب کے ولی عہد اور وزیر اعظم شہزادہ محمد بن سلمان نے جدہ کے شاہی محل میں وزیر اعظم کا استقبال کیا اور ان کا رسمی خیر مقدم کیا ۔

وزیر اعظم اور سعودی عرب کے ولی عہد اور وزیر اعظم شہزادہ محمد بن سلمان نے باضابطہ بات چیت کی اور ہندوستان-سعودی عرب اسٹریٹجک پارٹنرشپ کونسل (ایس پی سی) کے دوسرے اجلاس کی مشترکہ صدارت کی ۔عزت مآب ولی عہد شہزادہ نے پہلگام میں ہوئے خوفناک دہشت گردانہ حملے کی شدید مذمت کی اور بے گناہ جانیں گنوانے والوں سے گہری تعزیت کا اظہار کیا ۔دونوں لیڈروں نے دہشت گردی سے بھرپور طریقے سے نمٹنے کا عزم کیا ۔

رہنماؤں نے نئی دہلی میں ستمبر 2023 میں اپنی گذشتہ میٹنگ کے بعد سے کونسل کے تحت پیش رفت کا جائزہ لیا ۔رہنماؤں نے دو طرفہ تعلقات میں گرمجوشی اور مختلف وزارتوں میں اعلی سطح کے کئی دوروں کو سراہا جنہوں نے دونوں فریقوں میں اعتماد اور باہمی افہام و تفہیم پیدا کی ہے ۔دونوں رہنماؤں نے توانائی ، دفاع ، تجارت ، سرمایہ کاری ، ٹیکنالوجی ، ثقافت اور عوام سے عوام کے تعلقات کے شعبوں میں تعاون پر تبادلہ خیال کیا ۔وزیر اعظم نے سعودی عرب میں ہندوستانی برادری کی حمایت اور فلاح و بہبود کے لیے عزت مآب ولی عہد کا شکریہ ادا کیا ۔انہوں نے ہندوستانی عازمین حج کے لیے سعودی حکومت کی طرف سے فراہم کردہ تعاون کو بھی سراہا ۔

دونوں رہنماؤں نے سرمایہ کاری سے متعلق اعلی سطحی ٹاسک فورس میں بات چیت میں پیش رفت کو سراہا ۔انہوں نے متعدد شعبوں میں ٹاسک فورس کی طرف سے حاصل کردہ افہام و تفہیم کا خیرمقدم کیا ، جو سعودی عرب کے توانائی ، پیٹروکیمیکلز ، انفراسٹرکچر ، ٹیکنالوجی ، فنٹیک ، ڈیجیٹل انفراسٹرکچر ، ٹیلی مواصلات ، دواسازی ، مینوفیکچرنگ اور صحت سمیت متعدد شعبوں میں ہندوستان میں 100 بلین امریکی ڈالر کی سرمایہ کاری کے پہلے عزم پر مبنی ہے ۔اس تناظر میں ، انہوں نے خاص طور پر ہندوستان میں تیل کی دو ریفائنریوں کے قیام کے ساتھ ساتھ ٹیکس کے معاملات پر حاصل ہونے والی پیش رفت پر تعاون کے معاہدے کا خیرمقدم کیا ۔وزیر اعظم نے تجویز پیش کی کہ اقتصادی تعلقات کو مزید مستحکم کرنے کے لیے دونوں ممالک ادائیگی کے گیٹ وے کو جوڑنے اور مقامی کرنسیوں میں تجارتی تصفیے کے لیے کام کر سکتے ہیں ۔

دونوں لیڈروں نے انڈیا-مڈل ایسٹ یورپ اکنامک کوریڈور(آئی ایم ای ای سی) میں پیش رفت خاص طور پر دونوں فریقوں کی طرف سے کیے جانے والے دو طرفہ رابطے کے اقدامات  پر تبادلہ خیال کیا ۔دونوں رہنماؤں نے باہمی دلچسپی کے علاقائی اور عالمی موضوعات ومسائل پر بھی تبادلہ خیال کیا۔

دونوں رہنماؤں نے کونسل کے تحت دو وزارتی کمیٹیوں کے کام کے نتائج پر اطمینان کا اظہار کیا ، یعنی: (ا) کمیٹی برائے سیاسی ، سلامتی ، سماجی اور ثقافتی تعاون اور اس کی ذیلی کمیٹیاں ، اور (ب) کمیٹی برائے معیشت اور سرمایہ کاری اور اس کے مشترکہ ورکنگ گروپ ۔

دونوں رہنماؤں نے دو نئی وزارتی کمیٹیوں کے قیام کے ساتھ اسٹریٹجک پارٹنرشپ کونسل کی توسیع کا خیرمقدم کیا ۔اس تناظر میں ، دفاعی شراکت داری کو گہرا کرنے کی عکاسی کرنے کے لیے ، رہنماؤں نے دفاعی تعاون سے متعلق وزارتی کمیٹی کے قیام پر اتفاق کیا ۔حالیہ برسوں میں دونوں فریقوں کے درمیان ثقافتی تعاون میں بڑھتی ہوئی رفتار کو تسلیم کرتے ہوئے ، انہوں نے سیاحت اور ثقافتی تعاون پر ایک وزارتی کمیٹی قائم کرنے پر بھی اتفاق کیا ۔ملاقات کے بعد ، دوسری ایس پی سی کے نکات پر دونوں رہنماؤں نے دستخط کیے ۔

رہنماؤں نے دورے کے موقع پر خلا ، صحت ، کھیل (اینٹی ڈوپنگ) اور پوسٹل تعاون کے شعبوں میں 4 دو طرفہ مفاہمت ناموں اور معاہدوں پر دستخط کرنے کا خیرمقدم کیا ۔[نتائج کی فہرست]

وزیر اعظم نے اسٹریٹجک پارٹنرشپ کونسل کے تیسرے اجلاس میں شرکت کے لیے شہزادہ محمد بن سلمان کو ہندوستان آنے کی دعوت دی۔

********

ش ح۔م ش۔م ش

U-151