প্রধান মন্ত্রী শ্রী নরেন্দ্র মোদী এপ্রিল ২২,২০২৫ দা সাউদি অরাবিয়াদা চৎখ্রে। প্রধান মন্ত্রী জেদাহদা সাউদি অরাবিয়াগী প্রিন্স মোহমদ বিন সলমান, ক্রাউন প্রিন্স অমসুং প্রধান মন্ত্রীনা কোনুংদা তরাম্না ওকখি অমসুং চৎনবীগী মতুংইন্না তরাম্না ওকখি।

প্রধান মন্ত্রীনা সাউদি অরাবিয়াগী প্রিন্স মোহমদ বিন সলমান, ক্রাউন প্রিন্স অমসুং প্রধান মন্ত্রীগা ৱারি শানখি অমসুং ইন্দিয়া-সাউদি অরাবিয়া স্ত্রাতেজিক পার্তনরশিপ কাউন্সিলগী অনিশুবা মীফম পুন্না ময়াই তাংবল লৌমিন্নদুনা পাংথোকখ্রে।  পাহালগমদা তেরোরিস্তশিংনা চৎথরকখিবা মীহাৎপগী থৌদোক অদু ক্রাউন প্রিন্সনা কন্না য়ানিংদবা ফোঙদোকখি অমসুং লৈখিদ্রবশিংগী মফমদা অৱাবা ফোঙদোকখি। অঙম্বা পাম্বৈ শীজিন্নদুনা তেরোরিজম থেংননা লুচিংবা অনিনা ৱারেপ লৌখি। 

ন্যু দিল্লিদা সেপ্তেম্বর ২০২৩ দা মখোয় উনখিবা অদুগী মতুংদা কাউন্সিলগী ওইরক্লিবা ফিবম লুচিংবশিংনা হন্না য়েংশিনখি। লৈবাক অনি থবক তৌমিন্নবা হেনগৎলকপা অমসুং তোঙান তোঙানবা মিনিস্ত্রিশিং অৱাংবা থাক্কী খোঙচৎশিং পাংথোক্তুনা লৈবাক অনিমক্ত থাজনবা অমসুং অমনা অমবু মশক খঙবা হেনগৎলকপদা লুচিংবশিংনা থাগৎপা ফোঙদোকখি। ইনর্জি, দিফেন্স, ললোন-ইতিক, শেন থাদবা, তেক্নোলোজি, নাৎ অমসুং মীগা মীগা লৈনবা মরীশিংদা মতেং পাংন্নবা লুচিংবশিংনা খন্নখি। সাউদি অরাবিয়াদা লৈরিবা ভারতমচাশিং য়াইফনবা থবক পায়খৎপগীদমক প্রধান মন্ত্রীনা সাউদি অরাবিয়াগী নিংথৌ থাগৎপা ফোঙদোকখি। হজ লাইখুরুম্বা লাকপা ভারতমচাশিংদা সাউদি সরকারনা মতেং পাংবগীদমক প্রধান মন্ত্রীনা থাগৎপা ফোঙদোকখি।

শেন থাদনবা অৱাংবা থাক্কী তাক্স ফোর্সতা খন্ন-নৈনবা খুমাংচাউশিনবদা লুচিংবা অনিমক্না থাগৎপা ফোঙদোকখি। ইনর্জি, পেত্রোকেমিকেলশিং, ইনফ্রাস্ত্রকচর, তেক্নোলোজি, ফিনতেক, দিজিতেল ইনফ্রাস্ত্রকচর, তেলিকম্মুনিকেসনশিং, ফার্মাস্যুতিকেলশিং, মেনুফেকচরিং অমসুং হকশেল য়াওনা হিরম কয়াদা সাউদি অরাবিয়ানা ভারত্ত য়ু.এস দোল্লার বিল্লিয়ন ১০০ থাদনবা মমাঙদা থাজবা পীখিবা অদুগী তাক্স ফোর্সনা য়ানবা পুরকপদা মখোয়না তরাম্না ওকখি। হিরম অসিদা, ভারত্ত ওইল রিফাইনরি অনি লিংখৎনবা মতেং পাংন্নবা য়ানবা পুরকখিবা অমসুং তেক্স লৌবগী ৱাফমশিংদা খুমাংচাউশিনবদা লুচিংবশিংনা তরাম্না ওকখি। পেমেন্ত গেৎৱেশিং শম্ননবা অমসুং লৈবাক অনিগী করেন্সিশিংদা ললোন-ইতিক পাংথোকপা য়ানবা থবক পায়খৎতুনা লৈবাক অনিগী শেন-থুমগী মরীশিং মখা তানা ফগৎনবা ৱাফম প্রধান মন্ত্রীনা পুখৎখি।

 

লৈবাক অনি চৎথোক-চৎশিনগী থবকশিং হেন্না ফগৎনবা লৈবাক অনিনা পায়খৎলিবা ইন্দিয়া-মিদল ইস্ত য়ুরোপ ইকোনোমিক কোরিদোরগী ফিবম লুচিংবা অনিনা খন্নখি। নাকল অনিমক্না দরকার ওইবা লমদম লমদম অমসুং মালেমগী ওইবা থৌদোক-ৱাথোকশিংগী মতাংদা লুচিংবা অনিমক্না মখোয়গী ওইবা ৱাখল্লোনশিং ফোঙদোক্নখি।

কাউন্সিলগী মখাদা লৈবা মিনিস্তরিয়েল কম্মিতি অনি হায়বদি (১) কম্মিতি ওন পোলিতিকেল, সেকুরিতি, সোসিএল এন্দ কলচরেল কোওপরেসন অমসুং মসিগী কম্মিতিশিং অমসুং (২) কম্মিতি ওন ইকোনোমি এন্দ ইনভেস্তমেন্তস অমসুং মসিগী জোইন্ত ৱার্কিং গ্রুপশিংগী থবকশিংদা লুচিংবা অনিনা অপেনবা ফোঙদোকখি।

অনৌবা মিনিস্তরিয়েল কম্মিতি অনি লিংখৎতুনা স্ত্রাতেজিক পার্তনরশিপ কাউন্সিল পাকথোক-চাউথোকহনবদা লুচিংবা অনিনা তরাম্না ওকখ্রে। ঙাক-শেনগী লমদা মতেং পাংনবা হেনগৎহন্নবা দিফেন্স কোওপরেসনগী মিনিস্তরিয়েল কম্মিতি লিংখৎপদা লুচিংবা অনিনা য়াবা পীরে। চহি খর অসিদা নাকল অনিগী মরক্ত নাৎকী মতেং পাংনবা হেনগৎলক্লিবা অসি য়েংলগা, তুরিজম অমসুং কলচরেল কোওপরেসনগী মিনিস্তরিয়েল কম্মিতি অমা লিংখৎপদশু মখোয়না অয়াবা পীরে। মীফম মতুংদা, অনিশুবা স্ত্রাতেজিক পার্তনরশিপ কাউন্সিলগী অকুপ্পা ৱারোলশিং লুচিংবা অনিনা খুয়েক পীনখ্রে।

খোঙচৎ অসিদা স্পেস, হকশেল, শান্নবা (এন্তি-দোপ্পিং) অমসুং পোস্তকী মতেং পাংনবগী মতাংদা এম.ও.য়ু অমসুং য়ানচে মরি খুৎয়েক পীনবদা লুচিংবশিংনা তরাম্না ওকখ্রে।

স্ত্রাতেজিক পার্তনরশিপ কাউন্সিলগী অহুমশুবা মীফমগীদমক ভারত্ত লাক্নবা প্রধান মন্ত্রীনা প্রিন্স মোহমদ বিন সলমানদা চেবাউ পীখ্রে।

****