ଚଳିତବର୍ଷ ଏପ୍ରିଲ ୨୨ ତାରିଖରେ ସାଉଦି ଆରବ ଗସ୍ତ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଜେଦାହ ରୟାଲ ପ୍ୟାଲେସରେ ପ୍ରଧାନମନ୍ତ୍ରୀ ମୋଦୀଙ୍କୁ ଭବ୍ୟ ସ୍ୱାଗତ କରିଥିଲେ ସାଉଦି କ୍ରାଉନ ପ୍ରିନ୍ସ ତଥା ପ୍ରଧାନମନ୍ତ୍ରୀ ମହମ୍ମଦ ବିନ ସଲମାନ ।

ବିଭିନ୍ନ ଦ୍ୱିପାକ୍ଷିକ ପ୍ରସଙ୍ଗ ଉପରେ ଆଲୋଚନା କରିବା ସହ ପ୍ରଧାନମନ୍ତ୍ରୀ ମୋଦୀ ଦ୍ୱିତୀୟ ଷ୍ଟ୍ରାଟେଜିକ ପାର୍ଟନରସିପ କାଉନସିଲ (ଏସପିସି)ରେ ଯୋଗ ଦେଇଛନ୍ତି । ତେବେ ଜମ୍ମୁ ଓ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣକୁ ସାଉଦି ପ୍ରିନ୍ସ ତଥା ପ୍ରଧାନମନ୍ତ୍ରୀ ସଲମାନ କଡା ଭାଷାରେ ନିନ୍ଦା କରିଛନ୍ତି । ଏହି ବୈଠକରେ ଆତଙ୍କବାଦକୁ ମୂଳପୋଛ କରିବାକୁ ଦୁଇ ଦେଶର ନେତା ରାଜି ହୋଇଛନ୍ତି ।

ନୂଆଦିଲ୍ଲୀରେ ସେପ୍ଟେମ୍ବର ୨୦୨୩ରେ ଏସପିସିର ବୈଠକ ପରଠାରୁ ହୋଇଥିବା ଅଗ୍ରଗତି ନେଇ ଦୁଇ ନେତା ସମୀକ୍ଷା କରିଥିଲେ ।  ପୂର୍ବରୁ ଦୁଇ ଦେଶ ଭିତରେ ମନ୍ତ୍ରୀସ୍ତରୀୟ ଆଲୋଚନା ସହ ଉଚ୍ଚସ୍ତରୀୟ ବୈଠକ ସଫଳତାର ସହ ସରିଥିବା କୁହାଯାଇଛି । ଊର୍ଜା, ପ୍ରତିରକ୍ଷା, ବାଣିଜ୍ୟ, ପ୍ରଯୁକ୍ତି ବିଦ୍ୟା, ସଂସ୍କୃତି ପରି ବିଭିନ୍ନ କ୍ଷେତ୍ରରେ ଏହାରି ଭିତରେ ଦୁଇ ଦେଶ ଭିତରେ ଦ୍ୱିପାକ୍ଷିକ ସମ୍ପର୍କ ବୃଦ୍ଧି ପାଇଥିବା ସୂଚନା ଦିଆଯାଇଛି । ସାଉଦିରେ ଭାରତୀୟ ସମୁଦାୟଙ୍କ ଅଗ୍ରଗତି ପାଇଁ ସମ୍ପୃକ୍ତ ସରକାର ଅନେକ ପଦକ୍ଷେପ ନେଇଥିବାରୁ ପ୍ରଧାନମନ୍ତ୍ରୀ ମୋଦୀ ତାଙ୍କ ପ୍ରତିପକ୍ଷଙ୍କୁ କୃତଜ୍ଞତା ଜ୍ଞାପନ କରିଥିଲେ । ସେହିପରି ଭାରତୀୟ ହଜ ତୀର୍ଥଯାତ୍ରୀଙ୍କ ପାଇଁ ସାଉଦି ସରକାରଙ୍କ ସହଯୋଗକୁ ମଧ୍ୟ ପ୍ରଧାନମନ୍ତ୍ରୀ ଭୂୟସୀ ପ୍ରଶଂସା କରିଥିଲେ ।

ପୁଞ୍ଜି ନିବେଶ କ୍ଷେତ୍ରରେ ଗଠିତ ହୋଇଥିବା ଉଚ୍ଚସ୍ତରୀୟ ଟାସ୍କ ଫୋର୍ସର ଅଗ୍ରଗତିକୁ ଦୁଇ ନେତା ଉଚ୍ଚ ପ୍ରଶଂସା କରିଛନ୍ତି । ବିଭିନ୍ନ କ୍ଷେତ୍ରରେ ଭାରତରେ ପ୍ରାୟ ଶହେ ବିଲିୟନ ଆମେରିକୀୟ ଡଲାର ପୁଞ୍ଜି ନିବେଶ କରିବା ପାଇଁ ସାଉଦି ଦେଇଥିବା ପ୍ରତିଶ୍ରୁତି ଅନୁସାରେ କାମ ଜାରି ରହିଥିବା ନେଇ ଦୁଇ ନେତା ଖୁସି ପ୍ରକଟ କରିଥିଲେ । ଊର୍ଜା, ଫାର୍ମାସିଟ୍ୟୁକାଲ, ପେଟ୍ରୋକେମିକାଲ୍ସ, ଟେଲି କମ୍ୟୁନିକେସନ, ସ୍ୱାସ୍ଥ୍ୟ ପରି ଅନେକ କ୍ଷେତ୍ରରେ ଭାରତରେ ସାଉଦି ଆରବ ପୁଞ୍ଜି ନିବେଶ କରିଛି । ଏହି ପରିପ୍ରେକ୍ଷୀରେ ଭାରତବର୍ଷରେ ଦୁଇଟି ରିଫାଇନାରୀ ନିର୍ମାଣ କରିବାକୁ ହୋଇଥିବା ଚୁକ୍ତିନାମାକୁ ଦୁଇ ନେତା ସ୍ୱାଗତ କରିଥିଲେ । ତେବେ ଏନେଇ ଟ୍ୟାକ୍ସ କାରବାର ଉପରେ ବି ଅଗ୍ରଗତି ହୋଇଥିବା କୁହାଯାଇଛି । ଅର୍ଥନୈତିକ ଅଭିବୃଦ୍ଧି ପାଇଁ ପ୍ରଚଳିତ କରେନ୍ସି ମାଧ୍ୟମରେ କାରବାର କରିବାକୁ ଏହି ଅବସରରେ ପ୍ରଧାନମନ୍ତ୍ରୀ ମୋଦୀ ପ୍ରସ୍ତାବ ଦେଇଥିଲେ ।

ଭାରତ-ମଧ୍ୟ ପ୍ରାଚ୍ୟ ୟୁରୋପ ଇକୋନୋମିକ କରିଡର (ଆଇଏମଇଇସି) ସମ୍ପର୍କରେ ଦୁଇ ନେତା ବିସ୍ତୃତ ଭାବେ ବି ଆଲୋଚନା କରିଛନ୍ତି । ଆଂଚଳିକ ଓ ବୈଶ୍ୱିକ ପ୍ରସଙ୍ଗ ଉପରେ ବି ଦୁଇ ନେତା ବିଶଦ ଭାବେ ଆଲୋଚନା କରିଥିବା ସୂଚନା ମିଳିଛି ।

ଷ୍ଟ୍ରାଟେଜିକ ପାର୍ଟନରସିପ କାଉନସିଲର ଦୁଇ ସବ କମିଟିର ଅଗ୍ରଗତି ନେଇ ଦୁଇ ନେତା ଖୁସି ପ୍ରକଟ କରିଛନ୍ତି । ରାଜନୀତି, ନିରାପତା, ସାମାଜିକ ଓ ସାଂସ୍କୃତିକ ସହଯୋଗ ନେଇ ଗଠିତ କମିଟି ଓ ଅର୍ଥନୀତି-ପୁଞ୍ଜିନିବେଶ କମିଟି ଏବଂ ଯୁଗ୍ମ ଟାସ୍କ ଫୋର୍ସର କାର୍ଯ୍ୟକାରିତା ନେଇ ଦୁଇ ନେତା ଖୁବ ଆଶାବାଦୀ ରହିଥିବା କହିଛନ୍ତି ।

ଷ୍ଟ୍ରାଟେଜିକ ପାର୍ଟନରସିପ କାଉନସିଲ ଅଧୀନରେ ଆଉ ଦୁଇ ସବ କମିଟି ଗଠନ କରାଯାଇଥିବା ସୂଚନା ଦିଆଯାଇଛି । ଗଠିତ ହୋଇଥିବା ପ୍ରତିରକ୍ଷା ସହଯୋଗ ମନ୍ତ୍ରୀସ୍ତରୀୟ କମିଟି ଏବଂ ପର୍ଯ୍ୟଟନ ଓ ସାଂସ୍କୃତିକ ସହଯୋଗ ମନ୍ତ୍ରୀସ୍ତରୀୟ କମିଟି ଦୁଇ ଦେଶ ଭିତରେ ରହିଥିବା ସମ୍ପର୍କକୁ ଆହୁରି ମଜବୁତ କରିବ ବୋଲି ଦୁଇ ନେତା ଖୁବ ଆଶାବାଦୀ ରହିଥିବା କହିଛନ୍ତି ।

ମହାକାଶ, ସ୍ୱାସ୍ଥ୍ୟ, କ୍ରୀଡା ଓ ପୋଷ୍ଟାଲ ପରି ବିଭିନ୍ନ କ୍ଷେତ୍ରରେ ଦୁଇ ଦେଶ ଭିତରେ ଚାରିଟି ରାଜିନାମା ସ୍ୱାକ୍ଷରିତ ହୋଇଛି । ଆଗାମୀ ଦିନରେ ଭାରତରେ ହେବାକୁ ଥିବା ଷ୍ଟ୍ରାଟେଜିକ ପାର୍ଟନରସିପ କାଉନସିଲର ତୃତୀୟ ବୈଠକରେ ଯୋଗ ଦେବାକୁ ସାଉଦି କ୍ରାଉନ ପ୍ରିନ୍ସ ମହମ୍ମଦ ବିନ ସଲମାନଙ୍କୁ ଏହି ଅବସରରେ ପ୍ରଧାନମନ୍ତ୍ରୀ ମୋଦୀ ଆମନ୍ତ୍ରଣ ଜଣାଇଛନ୍ତି ।

PBD