|
സാംസ്‌കാരിക മന്ത്രാലയം
ഇന്ത്യയുടെ പൈതൃക സംരക്ഷണസഞ്ചാരം
ലോക പൈതൃക ദിനം 2025
Posted On:
17 APR 2025 4:23PM by PIB Thiruvananthpuram
"പൈതൃകമെന്നത് കേവലം ചരിത്രം മാത്രമല്ല. മാനവികതയുടെ സഞ്ചിത ജ്ഞാനം കൂടിയാണത്. ചരിത്രപ്രാധാന്യമുള്ള സ്ഥലങ്ങളിലേക്ക് കണ്ണോടിക്കുമ്പോൾ, നമ്മുടെ മനസ്സ് സമകാലിക ഭൗമ-രാഷ്ട്രീയ തലങ്ങളിൽ നിന്ന് ഉയരുന്നു".
~ പ്രധാനമന്ത്രി നരേന്ദ്ര മോദി
സംഗ്രഹം
- സാംസ്ക്കാരികവും പ്രകൃതിദത്തവുമായ പൈതൃകങ്ങളെ ആദരിക്കുന്നതിനും സംരക്ഷിക്കുന്നതിനുമായി എല്ലാ വർഷവും ഏപ്രിൽ 18 ലോക പൈതൃക ദിനമായി ആചരിക്കുന്നു.
- ഈ വർഷത്തെ പ്രമേയം "ദുരന്തങ്ങളിൽ നിന്നും സംഘർഷങ്ങളിൽ നിന്നും ഭീഷണി നേരിടുന്ന പൈതൃകം: 60 വർഷത്തെ ICOMOS പ്രവർത്തനങ്ങളിൽ നിന്നുള്ള പാഠങ്ങളും മുന്നൊരുക്കങ്ങളും" എന്നതാണ്.
- 1972 ൽ യുനെസ്കോ സൃഷ്ടിച്ച ഒരു അന്താരാഷ്ട്ര കരാറാണ് ലോക പൈതൃക കൺവെൻഷൻ.
- അതീവപ്രാധാന്യമുള്ള, സാംസ്ക്കാരിക, പ്രകൃതിദത്ത സ്ഥലങ്ങൾ സംരക്ഷിക്കുന്നതിനായി ലോകമെമ്പാടുമുള്ള രാജ്യങ്ങൾ ലോക പൈതൃക കൺവെൻഷൻ അംഗീകരിച്ചു.
- 2024 ഒക്ടോബർ വരെ, 196 രാജ്യങ്ങളിലായി 1,223 അംഗീകൃത ലോക പൈതൃക സ്ഥാനങ്ങളുണ്ട് (സാംസ്‌ക്കാരികം 952, പ്രകൃതിദത്തം 231, സാംസ്ക്കാരികവും പ്രകൃതിദത്തവും ചേർന്നത് 40).
ഇന്ത്യയിൽ 43 ലോക പൈതൃക സ്ഥാനങ്ങളുണ്ട്, 1983 ൽ ആദ്യം പട്ടികയിലുൾപ്പെടുത്തിയവയിൽ ആഗ്ര കോട്ട, താജ്മഹൽ, അജന്ത-എല്ലോറ ഗുഹകൾ എന്നിവ ഇതിൽ ഉൾപ്പെടുന്നു.
ആമുഖം
നമ്മുടെ പൈതൃകം കേവലം ശിലകൾ, ലിഖിതങ്ങൾ, അവശിഷ്ടങ്ങൾ എന്നിവയാൽ നിർമ്മിതമല്ല. ഒരു ക്ഷേത്രമതിലിന്റെ ഓരോ മന്ത്രണത്തിലും, പുരാതന കോട്ടകളിലെ ഓരോ കൊത്തുപണികളിലും, തലമുറകളിലൂടെ കൈമാറ്റം ചെയ്യപ്പെട്ട ഓരോ നാടോടി ഗാനങ്ങളിലും അത് ജീവിക്കുന്നു. നമ്മൾ ആരായിരുന്നു, എന്തിനു വേണ്ടി നിലകൊണ്ടു, എങ്ങനെ അതിജീവിച്ചു എന്നതിന്റെ കഥകൾ ഇത് വിശദീകരിക്കുന്നു. കാലാതിവർത്തിയായ ഈ നിധികൾ അഭിനന്ദിക്കപ്പെടാൻ മാത്രമല്ല, സംരക്ഷിക്കപ്പെടാനും ഉള്ളതാണെന്ന് ലോക പൈതൃക ദിനം ഹൃദയസ്പർശിയാം വിധം ഓർമ്മപ്പെടുത്തുന്നു. ഈ വർഷത്തെ പ്രമേയം:"ദുരന്തങ്ങളിൽ നിന്നും സംഘർഷങ്ങളിൽ നിന്നും ഭീഷണി നേരിടുന്ന പൈതൃകം: 60 വർഷത്തെ ICOMOS പ്രവർത്തനങ്ങളിൽ നിന്നുള്ള പാഠങ്ങളും മുന്നൊരുക്കങ്ങളും" എന്നത് നമ്മുടെ ഭൂതകാലത്തെ സംരക്ഷിക്കുന്നത് നമ്മുടെ ഭാവിയുടെ സംരക്ഷണത്തിൽ പ്രധാനമാണെന്ന് ഓർമ്മിപ്പിക്കുന്നു.
ലോക പൈതൃക ദിനത്തിന് പിന്നിലെ ചരിത്രം
എല്ലാ വർഷവും ഏപ്രിൽ 18 ന് ലോക പൈതൃക ദിനമായി ആഘോഷിക്കുന്നു. ഇതിനെ സ്മാരകങ്ങളുടെയും സ്ഥലങ്ങളുടെയും അന്താരാഷ്ട്ര ദിനം എന്നും വിശേഷിപ്പിക്കുന്നു. മനുഷ്യന്റെ പൈതൃകത്തെ ബഹുമാനിക്കുകയും സംരക്ഷിക്കുകയും ചെയ്യുക എന്നതാണ് ദിനാചരണത്തിലൂടെ ഉദ്ദേശിക്കുന്നത്. പൈതൃകത്തെ സംരക്ഷിക്കാൻ അക്ഷീണം പ്രവർത്തിക്കുന്ന വ്യക്തികളെയും സംഘങ്ങളെയും ഇത് അഭിനന്ദിക്കുന്നു. 1982 ൽ ICOMOS (ഇന്റർനാഷണൽ കൗൺസിൽ ഓൺ മോണുമെന്റ്സ് ആൻഡ് സൈറ്റ്‌സ്) ആണ് ഈ ദിനം ആരംഭിച്ചത്. പിന്നീട്, 1983 ൽ യുനെസ്കോ അതിനെ ഔദ്യോഗികമായി അംഗീകരിച്ചു. എല്ലാ വർഷവും, ICOMOS ഈ ദിവസത്തിനായി ഒരു പ്രത്യേക പ്രമേയം മുന്നോട്ടു വയ്ക്കാറുണ്ട്. ഈ പ്രമേയത്തെ മുൻനിർത്തി, പൈതൃകത്തെ ആഘോഷിക്കുന്നതിനും സംരക്ഷിക്കുന്നതിനുമായി വ്യക്തികളും സംഘങ്ങളും ലോകമെമ്പാടും പരിപാടികളും പ്രവർത്തനങ്ങളും സംഘടിപ്പിക്കുന്നു.
എന്താണ് ലോക പൈതൃക കൺവെൻഷൻ
ഐക്യരാഷ്ട്രസഭയുടെ വിദ്യാഭ്യാസ, ശാസ്ത്ര, സാംസ്ക്കാരിക മേഖലകളെ പ്രതിനിധീകരിക്കുന്ന സംഘടനയായ യുനെസ്കോ, ലോകമെമ്പാടുമുള്ള പ്രധാനപ്പെട്ട സാംസ്ക്കാരിക, പ്രകൃതിദത്ത പൈതൃകങ്ങൾ സംരക്ഷിക്കുന്നതിനും പരിപാലിക്കുന്നതിനുമായി പ്രവർത്തിച്ചു പോരുന്നു. ഈ പ്രവർത്തനങ്ങളെ സഹായിക്കുന്നതിനായി, യുനെസ്കോയിലെ അംഗരാജ്യങ്ങൾ 1972 ൽ ലോക പൈതൃക കൺവെൻഷൻ അംഗീകരിച്ചു. ലോക പൈതൃക പട്ടികയിൽ ചേർക്കാൻ കഴിയുന്ന സവിശേഷ സ്ഥലങ്ങൾ കണ്ടെത്തുന്നതിനും പരിപാലിക്കുന്നതിനും രാജ്യങ്ങൾ എന്തൊക്കെ ചെയ്യണമെന്ന് ഈ കരാർ വിശദീകരിക്കുന്നു. 1977 നവംബറിൽ ഇന്ത്യ ഈ കൺവെൻഷന്റെ ഭാഗമായി. ഇന്ന്, ലോക പൈതൃക പട്ടികയിൽ മുഴുവൻ മനുഷ്യരാശിയെ സംബന്ധിച്ചും മൂല്യവത്തായി കണക്കാക്കപ്പെടുന്ന 1,223 സ്ഥലങ്ങൾ ഉൾപ്പെടുന്നു. ഇതിൽ സാംസ്ക്കാരിക പ്രാധാന്യമുള്ള 952 സ്ഥലങ്ങൾ, പ്രകൃതിദത്ത പ്രാധാന്യമുള്ള 231 സ്ഥലങ്ങൾ, സാംസ്ക്കാരികവും പ്രകൃതിദത്തവുമായ പ്രാധാന്യമുള്ള 40 സ്ഥലങ്ങൾ എന്നിവ ഉൾപ്പെടുന്നു. 2024 ഒക്ടോബർ വരെ, 196 രാജ്യങ്ങൾ ലോക പൈതൃക കൺവെൻഷനിൽ അംഗമായി.
ലോക പൈതൃക സ്ഥാനങ്ങൾ: ഭാവിയുടെ സംരക്ഷണം
ഭൂമിയിലെ എല്ലാ മനുഷ്യർക്കും മൂല്യവത്തും സവിശേഷ പ്രാധാന്യവുമുള്ള സ്ഥലങ്ങളാണ് ലോക പൈതൃക സ്ഥാനങ്ങൾ. അവ സാംസ്ക്കാരികമോ, പ്രകൃതിദത്തമോ, ഇത് രണ്ടുമോ ആകാം. യുനെസ്കോ നേതൃത്വം നൽകുന്ന ഒരു അന്താരാഷ്ട്ര കരാറിന് കീഴിലാണ് അവ സംരക്ഷിക്കപ്പെടുന്നത്. സാംസ്ക്കാരികമായും, ചരിത്രപരമായും, ശാസ്ത്രീയമായും പ്രാധാന്യമുള്ള സ്ഥലങ്ങൾക്ക് യുനെസ്കോ ലോക പൈതൃക പദവി നൽകുന്നു.
വർഷങ്ങളായി, ലോക പൈതൃക പട്ടികയിൽ ഇന്ത്യ അതിന്റെ സാന്നിധ്യം ക്രമാനുഗതമായി വികസിപ്പിച്ചു വരുന്നു. 2024 ജൂലൈയിൽ, "മൊയ്‌ദാംസ്: അഹോം രാജവംശത്തിന്റെ കുന്നിൻപുറ ശ്മശാന സമ്പ്രദായം" എന്ന ലിഖിതം ആസാമിന്റെ സാംസ്ക്കാരിക സമ്പത്തായി ആലേഖനം ചെയ്തുകൊണ്ട് അഭിമാനകരമായ ഒരു കൂട്ടിച്ചേർക്കൽ നടത്തുകയുണ്ടായി. ഇതോടെ, ഇന്ത്യയിൽ ഇപ്പോൾ ലോക പൈതൃക പട്ടികയിൽ ഉൾപ്പെട്ട 43 സ്ഥലങ്ങളും യുനെസ്കോയുടെ താൽക്കാലിക പട്ടികയിൽ ഉൾപ്പെട്ട 62 സ്ഥലങ്ങളും ഉണ്ട്. 1983 ൽ ആഗ്ര കോട്ടയും തുടർന്ന് താജ്മഹലും അജന്ത-എല്ലോറ ഗുഹകളും പട്ടികപ്പെടുത്തിയതോടെയാണ് രാജ്യത്തിന്റെ ഈ ദിശയിലെ പ്രയാണം ആരംഭിച്ചത്. ഈ സ്ഥലങ്ങൾ ചരിത്രത്തിന്റെ പ്രതീകങ്ങളായി മാത്രമല്ല, വരും തലമുറകൾക്കുള്ള പഠന കേന്ദ്രങ്ങളെയും സംരക്ഷിക്കപ്പെടുന്നു.
ഇന്ത്യയുടെ സമ്പന്നമായസാംസ്ക്കാരിക പൈതൃകം പ്രോത്സാഹിപ്പിക്കുന്നതിനുള്ള സർക്കാർ സംരംഭങ്ങൾ
ഇന്ത്യ അതിന്റെ വിപുലമായ സാംസ്ക്കാരിക, പ്രകൃതിദത്ത പൈതൃകങ്ങൾ സംരക്ഷിക്കുന്നതിനും പുനഃസ്ഥാപിക്കുന്നതിനും പ്രചരിപ്പിക്കുന്നതിനും ഒട്ടേറെ അർത്ഥവത്തായ നടപടികൾ സ്വീകരിച്ചിട്ടുണ്ട്. രാജ്യത്തിന്റെ കാലാതീതമായ പാരമ്പര്യങ്ങളും ചരിത്ര നിധികളും സംരക്ഷിക്കുന്നതിനുള്ള സർക്കാരിന്റെ പ്രതിബദ്ധതയാണ് ഈ സംരംഭങ്ങളിലൂടെ പ്രതിഫലിക്കുന്നത്.
പുരാവസ്തുക്കളുടെ വീണ്ടെടുക്കൽ:
സാംസ്ക്കാരിക സമ്പത്തിന്റെ സംരക്ഷണത്തിന് ആർക്കിയോളജിക്കൽ സർവേ ഓഫ് ഇന്ത്യ പ്രതിജ്ഞാബദ്ധമാണ്. 1976 മുതൽ 2024 വരെ വിദേശ രാജ്യങ്ങളിൽ നിന്ന് സർക്കാർ 655 പുരാവസ്തുക്കൾ തിരികെയെത്തിച്ചു. 2014 മുതലുള്ള കാലയളവിൽ മാത്രം 642 പുരാവസ്തുക്കൾ തിരികെയെത്തിച്ചു.
ഒരു പൈതൃകം ദത്തെടുക്കുക:
"ഒരു പൈതൃകം ദത്തെടുക്കുക" എന്ന പരിപാടി 2017-ൽ ആരംഭിക്കുകയും 2023-ൽ "ഒരു പൈതൃകം ദത്തെടുക്കുക 2.0" എന്ന പേരിൽ നവീകരിക്കുകയും ചെയ്തു. സ്വകാര്യ, പൊതു സ്ഥാപനങ്ങൾക്ക് അവരുടെ സാമൂഹിക പ്രതിബദ്ധതാ (CSR) ഫണ്ടുകൾ ഉപയോഗിച്ച് സംരക്ഷിത സ്മാരകങ്ങളിലെ സൗകര്യങ്ങൾ വികസിപ്പിക്കാൻ പദ്ധതി അനുവാദം നൽകുന്നു. നാളിതുവരെ, ഈ പദ്ധതിയുടെ കീഴിൽ വിവിധ സംസ്ഥാനങ്ങളിലായി ആർക്കിയോളജിക്കൽ സർവേ ഓഫ് ഇന്ത്യയും ബന്ധപ്പെട്ട പങ്കാളികളും തമ്മിൽ 21 ധാരണാപത്രങ്ങളിൽ ഒപ്പുവച്ചു.
ലോക പൈതൃക സമിതിയുടെ 46-ാമത് യോഗം:
സാംസ്ക്കാരിക മന്ത്രാലയത്തിന് കീഴിലുള്ള, ആർക്കിയോളജിക്കൽ സർവേ ഓഫ് ഇന്ത്യ, 2024 ജൂലൈ 21 മുതൽ 31 വരെ ഡൽഹിയിൽ ലോക പൈതൃക സമിതിയുടെ 46-ാമത് യോഗം വിജയകരമായി സംഘടിപ്പിച്ചു. പ്രധാനമന്ത്രി ഉദ്ഘാടനം ചെയ്ത യോഗത്തിൽ 140-ലധികം രാജ്യങ്ങളിൽ നിന്നുള്ള 2900 അന്താരാഷ്ട്ര, ദേശീയ പ്രതിനിധികൾ പങ്കെടുത്തു. പൈതൃക സംരക്ഷണത്തിനുള്ള ഇന്ത്യയുടെ ആഗോള പങ്കാളിത്തത്തിൽ സുപ്രധാന ചുവടുവയ്‌പ്പെന്ന നിലയിൽ സാംസ്ക്കാരിക പൈതൃകങ്ങൾ, പ്രകൃതിദത്ത പൈതൃകങ്ങൾ, ഇവ രണ്ടും ചേർന്ന പൈതൃകങ്ങൾ എന്നിവ സംരക്ഷിക്കുന്നതിനെക്കുറിച്ച് ചർച്ച ചെയ്യാനും സഹകരിക്കാനും പ്രതിനിധികൾ ഒത്തുകൂടി.
ദേശീയ പ്രാധാന്യമുള്ള സ്മാരകങ്ങളുമായി ബദ്ധപ്പെട്ട നിർമ്മാണം :
ഇന്ത്യയിൽ ദേശീയ പ്രാധാന്യമുള്ളതായി പ്രഖ്യാപിച്ച 3,697 പുരാതന സ്മാരകങ്ങളും പുരാവസ്തു സ്ഥാനങ്ങളുമുണ്ട്. അവയുടെ സംരക്ഷണവും പരിപാലനവും ആർക്കിയോളജിക്കൽ സർവേ ഓഫ് ഇന്ത്യ (ASI) ഉത്തരവാദിത്തമാണ്. പാതകൾ, അറിയിപ്പ് ബോർഡുകൾ, ബെഞ്ചുകൾ, ഭിന്നശേഷിക്കാർക്കുള്ള സൗകര്യങ്ങൾ, ശബ്ദ, വെളിച്ച പ്രദർശനങ്ങൾ, സുവനീർ ഷോപ്പുകൾ തുടങ്ങിയ അടിസ്ഥാന സൗകര്യങ്ങൾ ഉറപ്പാക്കുന്നു.
പൈതൃക സ്ഥലങ്ങളുടെ പുനരുജ്ജീവനവും പുനർവികസനവും:
സംരക്ഷണ, വികസന പദ്ധതികളിലൂടെ ഇന്ത്യ സുപ്രധാന പൈതൃക സ്ഥാനങ്ങളെ പുനരുജ്ജീവിപ്പിച്ചു. വാരണാസിയിലെ കാശി വിശ്വനാഥ ഇടനാഴി, ഉജ്ജൈനിലെ മഹാകാൽ ലോക്, ഗുവാഹത്തിയിലെ മാ കാമാഖ്യ ഇടനാഴി എന്നിവ തീർത്ഥാടന അനുഭവങ്ങൾ മെച്ചപ്പെടുത്തുകയും വിനോദസഞ്ചാരത്തെ ഉത്തേജിപ്പിക്കുകയും ചെയ്യുന്നു. ചാർധാം റോഡ് പദ്ധതി പുണ്യസ്ഥലങ്ങളിലേക്കുള്ള ഗതാഗതം മെച്ചപ്പെടുത്തുന്നു. കൂടാതെ, സോമനാഥിലെയും കർതാർപൂർ ഇടനാഴിയിലെയും പദ്ധതികൾ സാംസ്ക്കാരിക പൈതൃക സംരക്ഷണവും ഭക്തർക്ക് സുഗമമായ പ്രവേശനവും ഉറപ്പാക്കുന്നു.
കണ്ടിരിക്കേണ്ട സ്ഥലങ്ങൾ സംബന്ധിച്ച പോർട്ടൽ:
"ആവശ്യം കണ്ടിരിക്കേണ്ട ഇന്ത്യയിലെ സ്മാരകങ്ങളും പുരാവസ്തു കേന്ദ്രങ്ങളും" പ്രദർശിപ്പിക്കുന്നതിനായി ആർക്കിയോളജിക്കൽ സർവേ ഓഫ് ഇന്ത്യ (ASI) ഒരു പോർട്ടൽ ആരംഭിച്ചു. യുനെസ്കോയുടെ ലോക പൈതൃക സ്ഥാനങ്ങളും താൽക്കാലിക പട്ടികയിലുൾപ്പെട്ട സ്ഥലങ്ങളും അടക്കം നൂറോളം പ്രമുഖ സ്ഥലങ്ങളെ പ്രാധാന്യത്തോടെ എടുത്തുകാണിക്കുന്നു. ചരിത്രം, പ്രവേശന വിശദാംശങ്ങൾ, സൗകര്യങ്ങൾ, മനോഹരവും വിശാലവുമായ കാഴ്ചകൾ തുടങ്ങിയ അവശ്യ വിവരങ്ങൾ പോർട്ടൽ നൽകുന്നു. ആഗോള സന്ദർശകർക്കായി ഈ സ്ഥലങ്ങളെ പ്രോത്സാഹിപ്പിക്കുക എന്നതാണ് പോർട്ടലിന്റെ ലക്ഷ്യം. asimustsee.nic.in സന്ദർശിക്കുക.
ഇന്ത്യയിലെ സാംസ്ക്കാരിക പൈതൃകങ്ങളുടെ ഡിജിറ്റൈസേഷൻ:
2007 ൽ സ്ഥാപിതമായ നാഷണൽ മിഷൻ ഓൺ മോണുമെന്റ്സ് ആൻഡ് ആന്റിക്വിറ്റീസ് (NMMA), ഇന്ത്യയുടെ പൈതൃകവും പുരാവസ്തുക്കളും ഡിജിറ്റൈസ് ചെയ്യുന്നതിനും രേഖപ്പെടുത്തി സൂക്ഷിക്കുന്നതിനുമായി പ്രവർത്തിക്കുന്നു. ഇതുവരെ, 12.3 ലക്ഷത്തിലധികം പുരാവസ്തുക്കളും 11,406 പൈതൃക സ്ഥലങ്ങളും രേഖപ്പെടുത്തിയിട്ടുണ്ട്. 2024–25 വർഷത്തേക്ക്, ദൗത്യത്തിന് ₹20 ലക്ഷം അനുവദിച്ചു. ഡിജിറ്റൽ സാങ്കേതികവിദ്യ ഉപയോഗിച്ച് ഇന്ത്യയുടെ സാംസ്ക്കാരിക പൈതൃകം സങ്കീർണ്ണമായ ഉപകരണങ്ങളിലൂടെയും ഗവേഷണ പിന്തുണയിലൂടെയും സംരക്ഷിക്കാനും അവതരിപ്പിക്കാനും ഇന്ത്യൻ ഹെറിറ്റേജ് ഇൻ ഡിജിറ്റൽ സ്പേസ് (IHDS) സംരംഭം ലക്ഷ്യമിടുന്നു.
ശ്രേഷ്ഠ ഭാഷകളുടെ സ്ഥിതി:
2024 ഒക്ടോബർ 3 ന്, അസമീസ്, മറാത്തി, പാലി, പ്രാകൃത്, ബംഗാളി എന്നിവയ്ക്ക് സർക്കാർ ശ്രേഷ്ഠ ഭാഷാ പദവി നൽകി. ഇതോടെ ഇന്ത്യൻ ശ്രേഷ്ഠ ഭാഷകളുടെ എണ്ണം 11 ആയി ഉയർന്നു. വൈവിധ്യവും പുരാതനവുമായ ഭാഷാ പൈതൃകം സംരക്ഷിക്കുന്നതിനുള്ള ഇന്ത്യയുടെ ശക്തമായ പ്രതിബദ്ധതയെ ഈ നീക്കം പ്രതിഫലിപ്പിക്കുന്നു.
ഇന്ത്യയിലെ ആദ്യത്തെ ആർക്കിയോളജിക്കൽ എക്സ്പീരിയൻഷ്യൽ മ്യൂസിയം:
വാദ്നഗറിലെ ആർക്കിയോളജിക്കൽ എക്സ്പീരിയൻഷ്യൽ മ്യൂസിയം 2025 ജനുവരി 16 ന് കേന്ദ്രമന്ത്രി അമിത് ഷാ ഉദ്ഘാടനം ചെയ്തു. ₹298 കോടി ചെലവിൽ നിർമ്മിച്ച ഈ മ്യൂസിയം 12,500 ചതുരശ്ര മീറ്റർ വിസ്തൃതിയുള്ളതാണ്. സെറാമിക്സ്, നാണയങ്ങൾ, ഉപകരണങ്ങൾ, അസ്ഥികൂട അവശിഷ്ടങ്ങൾ എന്നിവയുൾപ്പെടെ 5,000-ത്തിലധികം പുരാവസ്തുക്കൾ ഉൾപ്പെടെ വാദ്നഗറിന്റെ 2,500 വർഷം പഴക്കമുള്ള ചരിത്രം ഇവിടെ പ്രദർശിപ്പിച്ചിരിക്കുന്നു. സമകാലിക പുരാവസ്തു പര്യവേക്ഷണങ്ങളുടെ ആഴത്തിലുള്ള അനുഭവം പ്രദാനം ചെയ്യുന്ന ഒമ്പത് ഗാലറികളും 4,000 ചതുരശ്ര മീറ്റർ വിസ്തീർണ്ണമുള്ള ഖനന സ്ഥലവും ഇതിൽ ഉൾപ്പെടുന്നു.
ഹുമയൂൺസ് ടോംബ് വേൾഡ് ഹെറിറ്റേജ് സൈറ്റ് മ്യൂസിയം:
ന്യൂഡൽഹിയിലെ യുനെസ്കോയുടെ ലോക പൈതൃക സ്ഥലമായ ഹുമയൂൺസ് ടോംബിൽ 2024 ജൂലൈ 29-ന് 100,000 ചതുരശ്ര അടി വിസ്തീർണ്ണമുള്ള അത്യാധുനിക മ്യൂസിയം ഉദ്ഘാടനം ചെയ്തു. ഈ സ്ഥലത്തിന്റെ സമ്പന്നമായ ചരിത്രം, വാസ്തുവിദ്യ, പരിപാലനം എന്നിവ മ്യൂസിയം പ്രദർശിപ്പിക്കുന്നു. സന്ദർശകർക്ക് ആഴത്തിലുള്ള സാംസ്ക്കാരിക അനുഭവം പ്രദാനം ചെയ്യുന്നു.
MOWCAP രജിസ്റ്ററിലെ ഇന്ത്യൻ സാഹിത്യങ്ങൾ:
ചരിത്ര നേട്ടത്തിൽ, ഇന്ത്യയുടെ മൂന്ന് സാഹിത്യ നിധികൾ: രാമചരിതമാനസ്, പഞ്ചതന്ത്രം, സഹൃദയലോക-ലോകാന എന്നിവ 2024 ലെ മെമ്മോറി ഓഫ് ദി വേൾഡ് കമ്മിറ്റി ഫോർ ഏഷ്യ ആൻഡ് ദി പസഫിക് (MOWCAP) റീജിയണൽ രജിസ്റ്ററിൽ ഉൾപ്പെടുത്തിയിട്ടുണ്ട്. 2024 മെയ് 8-ന് മംഗോളിയയിൽ പ്രഖ്യാപിക്കപ്പെട്ട ഈ അംഗീകാരം ഇന്ത്യയുടെ സമ്പന്നമായ സാഹിത്യ-സാംസ്ക്കാരിക പൈതൃകത്തിന്റെ ആഗോള പ്രാധാന്യം അടിവരയിടുന്നു.
ഉപസംഹാരം
പൈതൃക സംരക്ഷണം ഒരു കൂട്ടുത്തരവാദിത്തമാണെന്ന് ലോക പൈതൃക ദിനം നമ്മെ ഓർമ്മിപ്പിക്കുന്നു. പുരാതന സ്മാരകങ്ങൾ മുതൽ കാലാതീതമായ സാഹിത്യം വരെയുള്ള സാംസ്ക്കാരികവും പ്രകൃതിദത്തവുമായ പൈതൃകങ്ങളെ, ശക്തമായ ദേശീയ ഉദ്യമങ്ങളിലൂടെയും ആഗോള സഹകരണത്തിലൂടെയും സംരക്ഷിക്കുന്നത് ഇന്ത്യ നിർബാധം തുടരുകയാണ്. നമ്മുടെ സമ്പന്നമായ പൈതൃകം വരും തലമുറകളെ പ്രചോദിപ്പിക്കുകയും പഠിപ്പിക്കുകയും ഒന്നിപ്പിക്കുകയും ചെയ്യുന്നുവെന്ന് ഈ ഉദ്യമങ്ങൾ ഉറപ്പാക്കുന്നു.
സൂചനകൾ
******
(Release ID: 2123350)
|