புதுதில்லியில் இன்று தேசிய தடய அறிவியல் பல்கலைக்கழகம் ஏற்பாடு செய்திருந்த அகில இந்திய தடய அறிவியல் உச்சி மாநாடு 2025-ல் மத்திய உள்துறை அமைச்சரும், கூட்டுறவு அமைச்சருமான திரு அமித் ஷா தலைமை விருந்தினராகக் கலந்து கொண்டு உரையாற்றினார். மாநாட்டின் கருப்பொருள் 'புதிய குற்றவியல் சட்டங்களைத் திறம்பட செயல்படுத்துவதில் தடய அறிவியலின் பங்கு மற்றும் பயங்கரவாதத்தை எதிர்த்துப் போராடுதல்'. இந்த மாநாட்டில் தேசிய மனித உரிமைகள் ஆணையத்தின் தலைவர் நீதிபதி வி.ராமசுப்பிரமணியன், அட்டர்னி ஜெனரல் திரு ஆர் வெங்கடரமணி, மாநிலங்களவை உறுப்பினரும் இந்திய பார் கவுன்சில் தலைவருமான திரு மனன் குமார் மிஸ்ரா, மத்திய உள்துறை செயலாளர் திரு கோவிந்த் மோகன் உள்ளிட்டோர் கலந்துகொண்டனர்.

பாரத ரத்னா பாபாசாகேப் டாக்டர் பீம்ராவ் அம்பேத்கரின் பிறந்த நாளை முன்னிட்டு அவருக்கு அஞ்சலி செலுத்திய மத்திய உள்துறை அமைச்சர் திரு அமித் ஷா, இந்திய அரசியலமைப்பை இறுதி செய்ய பாபாசாகேப் பணியாற்றினார் என்று கூறினார். ஒவ்வொரு அம்சம் குறித்தும் ஆயிரக்கணக்கான மணி நேர தீவிர விவாதத்திற்குப் பிறகு அரசியலமைப்புச் சட்டத்தை இறுதி செய்வது என்பது ஒரு கடினமான பணியாக இருந்தது. ஆனால் பாபாசாகேப் நாட்டின் தேவைகளைக் கருத்தில் கொண்டும், பல ஆண்டுகளுக்கு அரசியலமைப்புச் சட்டத்தின் தேவையைப் பராமரிக்கும் எண்ணத்துடனும் அனைத்து அம்சங்களையும் உள்ளடக்கியே அரசியலமைப்புச் சட்டத்தை உருவாக்கினார். நமது அரசியல் சாசனம் வெறும் புத்தகம் மட்டுமல்ல என்று திரு அமித் ஷா கூறினார். இது ஒவ்வொரு குடிமகனின் உடல், சொத்து மற்றும் மரியாதையைப் பாதுகாப்பதற்கான ஒரு அமைப்பைக் கொண்டுள்ளது என்று அமைச்சர் மேலும் குறிப்பிட்டார்.

பிரதமர் திரு நரேந்திர மோடியின் தலைமையின் கீழ், நீதி அமைப்பை மக்களை மையமாகக் கொண்டதாகவும், அறிவியல்பூர்வமானதாகவும் மாற்ற நாங்கள் முயற்சி செய்து வருகிறோம் என்று திரு அமித் ஷா கூறினார். நீதி தேடுபவர்களுக்கு உரிய நேரத்தில் நீதி கிடைப்பதையும், நீதி கிடைத்த திருப்தி ஏற்படுவதையும் உறுதி செய்வதற்கான முயற்சிகள் மேற்கொள்ளப்பட்டு வருகின்றன. இதன் மூலம், பாதுகாப்பான, திறமையான இந்தியாவை உருவாக்குவதே எங்கள் நோக்கம். குற்றவியல் நீதி அமைப்பை வலுப்படுத்த, மூன்று புதிய குற்றவியல் சட்டங்களை இந்திய அரசு கொண்டு வந்துள்ளது என்று மத்திய உள்துறை அமைச்சர் கூறினார்.

தடய அறிவியல் இல்லாமல், சரியான நேரத்தில் நீதி வழங்குவதும், தண்டனை விகிதத்தை அதிகரிப்பதும் சாத்தியமில்லை என்று திரு அமித் ஷா கூறினார். குற்றச் சம்பவங்கள் தொடர்பான ஒட்டுமொத்த காட்சியும் இன்று மாறிவிட்டது என்று அவர் கூறினார். இப்போது குற்றவாளிகள் தொழில்நுட்பம்,  தகவல் தொடர்பு போன்ற பல்வேறு வழிகளைப் பயன்படுத்துகின்றனர். இதன் காரணமாக குற்றம் இப்போது எல்லைகள் அயற்றதாகிவிட்டன. முன்பெல்லாம் ஒரு மாவட்டத்தின், மாநிலத்தின் அல்லது நாட்டின் ஒரு சிறிய பகுதியில் குற்றங்கள் நடந்தன, ஆனால் இப்போது குற்றங்கள் எல்லை கடந்ததாகிவிட்டன. நவீன குற்றங்கள் இப்போது நகரம், மாநிலம், தேசிய மற்றும் சர்வதேச எல்லைகளைக் கடந்து நிகழ்கின்றன. இத்தகைய சூழ்நிலையில், தடய அறிவியலின் முக்கியத்துவம்  அதிகரித்துள்ளது. பிரதமர் மோடி குஜராத் முதல்வராக இருந்தபோது, 2009 ஆம் ஆண்டில்  அவரால் விதைக்கப்பட்ட குஜராத் தடய அறிவியல் பல்கலைக்கழகத்தின் விதை, இப்போது தேசிய தடய அறிவியல் பல்கலைக்கழகம் என்ற வடிவத்தில் ஒரு ஆலமரமாக வளர்ந்துள்ளது என்று திரு ஷா கூறினார். அக்டோபர் 1, 2020 அன்று தேசிய தடய அறிவியல் பல்கலைக்கழகம் நிறுவப்பட்டபோது, திரு நரேந்திர மோடி பிரதமராகவும், தாம் நாட்டின் உள்துறை அமைச்சராகவும் இருப்பது தமக்கு மகிழ்ச்சி அளித்தது என்று அவர் கூறினார்.

பிரதமர் மோடியின் தொலைநோக்குப் பார்வை கொண்ட தலைமை நாட்டின் குற்றவியல் நீதி அமைப்பில் குறிப்பிடத்தக்க மாற்றத்தைக் கொண்டு வந்துள்ளது என்று மத்திய உள்துறை அமைச்சர் கூறினார். குற்றம் சாட்டப்பட்டவரோ அல்லது புகார்தாரரோ அநீதிக்கு உட்படுத்தப்படாத ஒரு அமைப்பு நிறுவப்பட்டுள்ளது என்று அவர் வலியுறுத்தினார். இந்த சமநிலையை உறுதிப்படுத்த, குற்றவியல் நீதி செயல்முறையில் தடய அறிவியலை ஒருங்கிணைப்பது அவசியம். தடய அறிவியல் பல்கலைக்கழகத்தை நிறுவ 2009 மற்றும் 2020 ஆம் ஆண்டுகளில் எடுக்கப்பட்ட நடவடிக்கைகள் திறமையான நிபுணர்களை உருவாக்குவது மட்டுமல்லாமல், பல்வேறு துறைகளில் ஆராய்ச்சிக்கும் வழிவகுக்கிறது என்று திரு ஷா எடுத்துரைத்தார். சிக்கலான வழக்குகளில் தடயவியல் பகுப்பாய்வுக்கான நம்பகமான நிறுவனமாக பல்கலைக்கழகம் மாறியுள்ளது என்றும், நாட்டின் தடயவியல் ஆய்வகங்களை நவீன தொழில்நுட்பத்துடன் தயார்படுத்துவதற்கான மையமாகவும் உருவாகியுள்ளது என்றும் அவர் குறிப்பிட்டார். பட்டம், டிப்ளோமா, பிஎச்டி மற்றும் உயர் ஆராய்ச்சி படிப்புகள் உட்பட பல்கலைக்கழகம் பரந்த அளவிலான திட்டங்களை வழங்குகிறது என்று அவர் மேலும் கூறினார். கூடுதலாக, இது பல உள்நாட்டு தொழில்நுட்பங்களை உருவாக்கி ஏற்றுக்கொண்டுள்ளது மற்றும் நாடு முழுவதும் உள்ள காவல் படைகளுக்கு இந்த கண்டுபிடிப்புகளை வழங்க கருவித்தொகுப்புகளையும் உருவாக்கியுள்ளது.

காலனித்துவ கால சட்டங்களிலிருந்து நாட்டை விடுவிக்க பிரதமர் திரு நரேந்திர மோடியின் உத்தரவைத் தொடர்ந்து, புதிய குற்றவியல் சட்டங்களை இறுதி செய்வதற்கான பணிகள் 2019 மற்றும் 2024 க்கு இடையில் மேற்கொள்ளப்பட்டன என்று திரு அமித் ஷா கூறினார். இந்தக் காலகட்டத்தில் மேற்கொண்ட விரிவான விவாதங்கள் காலாவதியான சட்டங்கள் இந்தியாவின் குற்றவியல் நீதி அமைப்புக்கு எந்த அளவிற்கு தீங்கு விளைவிக்கின்றன என்பதை வெளிப்படுத்தின என்று அவர் குறிப்பிட்டார். மாறிவரும் காலத்திற்கு ஏற்ப சட்டங்கள் புதுப்பிக்கப்படாவிட்டால், அவை வழக்கற்றுப் போய்விடும் அல்லது பொருத்தமற்றதாகிவிடும் என்று அவர் தெரிவித்தார். பழைய குற்றவியல் சட்டங்களின் அசல் நோக்கம் இந்திய குடிமக்களுக்கு நீதி வழங்குவது அல்ல, ஆனால் பிரிட்டிஷ் ஆட்சியை நிலைநிறுத்துவதாகும் என்று அவர் மேலும் கூறினார். இதற்கு நேர்மாறாக, பிரதமர் மோடியின் தலைமையில் அறிமுகப்படுத்தப்பட்ட மூன்று புதிய குற்றவியல் சட்டங்கள் இந்திய குடிமக்களின் பாதுகாப்பு மற்றும் நீதிக்காக இந்தியர்களால் வடிவமைக்கப்பட்டவை. இது 21 ஆம் நூற்றாண்டின் மிக முக்கியமான சட்டச் சீர்திருத்தத்தை பிரதிபலிக்கிறது என்று திரு ஷா கூறினார். புதிய சட்டங்கள் நவீன தொழில்நுட்பத்தைப் பயன்படுத்துவதற்கான சட்ட அடித்தளத்தை வழங்குகின்றன என்றும், தற்போதைய தொழில்நுட்பங்கள் மட்டுமல்லாமல், அடுத்த 100 ஆண்டுகளுக்கான தொழில்நுட்ப முன்னேற்றங்களை எதிர்பார்த்து முன்னோக்கிய அணுகுமுறையுடன் வடிவமைக்கப்பட்டுள்ளன என்றும் அவர் மேலும் விளக்கினார்.

புதிய சட்டங்கள் மின்னணு ஆவணங்கள் மற்றும் இ-சம்மன்களை முறையாக வரையறுக்கப்பட்டு உள்ளன என்று மத்திய உள்துறை அமைச்சர் கூறினார். சட்டமானது மின்-ஆவணங்களை அங்கீகரிக்கும் வரை பயன்படுத்தப்படும் தொழில்நுட்ப முறை பொருத்தமற்றது என்றும், இதேபோல், மக்கள் மின்-அழைப்பாணைகளை ஏற்றுக்கொண்டவுடன், விநியோக முறை இனி முக்கியமல்ல என்றும் அவர் விளக்கினார். குற்றவியல் நீதி செயல்முறையின் ஒவ்வொரு கட்டத்திலும் – குற்றம் நடந்த இடத்திலிருந்து விசாரணை வரை தொழில்நுட்பம் ஒருங்கிணைக்கப்பட்டுள்ளது என்றும் அவர் கூறினார். ஏழு ஆண்டுகளுக்கும் மேலான தண்டனை விதிக்கக்கூடிய அனைத்து குற்றங்களுக்கும் தடயவியல் விசாரணை கட்டாயமாக்கப்பட்டுள்ளது. இந்த மாற்றங்கள் வரும் பத்தாண்டுகளில் உலகிலேயே அதிக தண்டனை விகிதத்தை இந்தியா அடைய வழிவகுக்கும் என்று அவர் நம்பிக்கை தெரிவித்தார்.

நாட்டில் தண்டனை விகிதம் தற்போது 54 சதவீதமாக உள்ளது என்று திரு அமித் ஷா கூறினார். புதிய சட்டங்களில் பயங்கரவாதம் வரையறுக்கப்பட்டுள்ளது என்று அவர் கூறினார். குரல் பதிவுகள் மற்றும் டிஜிட்டல் குரல் அஞ்சலுக்கும் இடம் வழங்கப்பட்டுள்ளது. ஆடியோ, வீடியோ பதிவுகள், தடயவியல் ஆதாரங்களின் வீடியோகிராபி மற்றும் விசாரணையில் டிஜிட்டல் பதிவுகளுக்கு சட்ட அடிப்படையை வழங்க புதிய சட்டத்தில் ஏற்பாடுகள் செய்யப்பட்டுள்ளன. காவல்துறை, வழக்குத் தொடுத்தல் மற்றும் நீதித்துறை அமைப்புக்கு கால வரம்புகளை நிர்ணயிப்பதன் மூலம் குறிப்பிட்ட காலத்திற்குள் நீதியை உறுதி செய்வதற்கான ஏற்பாடுகள் செய்யப்பட்டுள்ளன. அதன் முடிவுகளும் வரத் தொடங்கியுள்ளன என்று அவர் கூறினார். சில வழக்குகளில், பாலியல் வன்புணர்ச்சி செய்தவர் 23 நாட்களில் தண்டிக்கப்பட்டார், 100 நாட்களுக்குள் மூன்று கொலை வழக்கு தீர்க்கப்பட்டு குற்றவாளி தண்டிக்கப்பட்டார். சோதனையில் தொழில்நுட்ப சான்றுகள் அங்கீகரிக்கப்பட்டதால்தான் இது சாத்தியமானது என்று மத்திய உள்துறை அமைச்சர் கூறினார். நாடு முழுவதும்  டிஜிட்டல் மயமாக்க முயற்சிகள் மேற்கொள்ளப்பட்டு வருவதாகவும் அவர் தெரிவித்தார்.

இன்று நாட்டில் 100 சதவீத காவல் நிலையங்கள் குற்றம் மற்றும் குற்றவியல் கண்காணிப்பு நெட்வொர்க் மற்றும் அமைப்பு (சி.சி.டி.என்.எஸ்) மூலம் கணினிமயமாக்கப்பட்டுள்ளன என்று மத்திய உள்துறை அமைச்சர் கூறினார். சுமார் 14 கோடியே 19 லட்சம் எஃப்.ஐ.ஆர் மற்றும் அவை தொடர்பான ஆவணங்கள் மரபார்ந்த தரவுகளுடன் ஆன்லைனில் கிடைக்கின்றன. 22 ஆயிரம் நீதிமன்றங்களில் மின்னணு நீதிமன்ற வசதிகள் செய்யப்பட்டுள்ளன. 2 கோடியே 19 லட்சம் தரவுகள் இ-சிறைச்சாலை மூலம் கிடைக்கிறது. 1 கோடியே 93 லட்சம் வழக்குகளின் விபரங்கள் இணையதளம் மூலம் கிடைக்கின்றன. மின்னணு தடயவியல் மூலம் 39 லட்சம் தடயவியல் சான்றுகள் இணையதளம் மூலம் கிடைக்கின்றன. இதன் மூலம் 16 லட்சம் எச்சரிக்கைகள் விடுக்கப்பட்டுள்ளன என்றார். குற்றம் சாட்டப்பட்ட 1 கோடியே 53 லட்சம் பேரின் கைரேகைகள் தேசிய தானியங்கி கைரேகை அடையாள அமைப்பில் உள்ளன. இந்தக் கைரேகைகள் ஒவ்வொரு காவல் நிலையத்திலும் பகிரப்பட்டுள்ளன. ஆட்கடத்தல் குற்றவாளிகளின் தேசிய தரவுத்தளமும் கிடைக்கிறது. இந்தத் தரவு இப்போது தனித்தனியாக உள்ளது, ஆனால் அடுத்த சில ஆண்டுகளில், உள்துறை அமைச்சகம் இந்தத் தரவை செயற்கை நுண்ணறிவைப் பயன்படுத்தி விசாரணை குழுக்களிடம் ஒப்படைக்கும் என்று திரு ஷா மேலும் கூறினார். அப்போது குற்றங்களைத் தடுப்பதற்கான உத்தியை வகுப்பது மிகவும் எளிதாகிவிடும் என்றும், குற்றங்களைக் கட்டுப்படுத்துவதிலும் இது மிகவும் பயனளிக்கும் என்றும் அவர் கூறினார்.

பிரதமர் மோடியின் தொலைநோக்கு பார்வை காரணமாக, நாங்கள் 2020-ம் ஆண்டிலேயே தேசிய தடய அறிவியல் பல்கலைக்கழகத்தை நிறுவியுள்ளோம், அதே நேரத்தில் 2024-ம் ஆண்டில் மூன்று புதிய குற்றவியல் சட்டங்கள் நடைமுறைக்கு வந்தன என்று மத்திய உள்துறை அமைச்சர் கூறினார். தேசிய தடய அறிவியல் பல்கலைக்கழகத்தின் ஏழு வளாகங்கள் நாட்டின் பல்வேறு மாநிலங்களில் அமைக்கப்பட்டுள்ளன என்று அவர் கூறினார். அடுத்த 9 மாதங்களில் மேலும் 6 வளாகங்கள் நிறுவப்படும். இவை தவிர, மேலும் 10 வளாகங்களை நிறுவ முன்மொழியப்பட்டுள்ளது. தேசிய தடய அறிவியல் பல்கலைக்கழக வளாகம் இல்லாத மாநிலமே நாட்டில் இருக்காது என்று திரு அமித் ஷா கூறினார். ஒவ்வொரு பல்கலைக்கழக வளாகத்திற்கும் ஒரு பாடத்தை வழங்குவதன் மூலம் உலகின் சிறந்த கற்பித்தல் அலகாக மாற்ற நாங்கள் பணியாற்றுவோம். பல்கலைக்கழக மாணவர்கள் ஆராய்ச்சி மற்றும் மேம்பாட்டில் உதவுவார்கள், இதனால் அவர்கள் ஆராய்ச்சியில் உயரத்தை அடைவார்கள் மற்றும் ஒதுக்கப்பட்ட பாடத்தில் வளாகத்தை சிறந்ததாக மாற்றுவார்கள். இந்த வளாகங்கள் நிறைவடைந்த பிறகு, ஒவ்வொரு ஆண்டும் 36 ஆயிரம் டிப்ளமோ மற்றும் பட்டம் பெற்ற இளைஞர்கள் இந்த வளாகங்களிலிருந்து வெளியேறி, நமது குற்றவியல் நீதி அமைப்பை வலுப்படுத்துவார்கள் என்று உள்துறை அமைச்சர் கூறினார்.

ஏழு ஆண்டுகளுக்கும் மேலாக தண்டனை விதிக்கப்படும் ஒவ்வொரு குற்றச் சம்பவத்தையும் பார்வையிட 30,000 பயிற்சி பெற்ற நிபுணர்கள் தேவை என்று திரு அமித் ஷா கூறினார். ஒவ்வொரு ஆண்டும், சுமார் 36,000 மாணவர்கள் தேசிய தடய அறிவியல் பல்கலைக்கழகத்தில் பட்டம் பெறுவார்கள், அவர்களில் பலர் தனியார் தடயவியல் ஆய்வகங்களிலும் பணியாற்றுவார்கள் என்று அவர் குறிப்பிட்டார். தனியார் மற்றும் அரசு தடய அறிவியல் ஆய்வகங்களுக்கு இடையிலான ஒப்பந்தத்தில் உள்துறை அமைச்சகம் செயல்பட்டு வருவதாகவும், அரசு ஆய்வகங்களில் பெறப்பட்ட சில மாதிரிகளை தனியார் ஆய்வகங்களால் பகுப்பாய்வு செய்ய அனுமதிக்கிறது என்றும் அவர் மேலும் குறிப்பிட்டார். ட்ரோன் தடயவியல், ஸ்மார்ட் சிட்டி தடயவியல், கடல் தடயவியல் மற்றும் பெருநிறுவன தடயவியல் உள்ளிட்ட பல வளர்ந்து வரும் துறைகளில் என்.எஃப்.எஸ்.யு முன்னேறி வருவதாக அவர் கூறினார். என்.எஃப்.எஸ்.யு.வின் வளர்ந்து வரும் சர்வதேச இருப்பையும் திரு ஷா எடுத்துரைத்தார், சுமார் 240 வெளிநாட்டு மாணவர்கள் தற்போது சேர்ந்துள்ளனர், மேலும் வரும் ஆண்டுகளில் பல்கலைக்கழகம் உலகளவில் தொடர்ந்து விரிவடையும் என்றார்.

வழக்கமான குற்றவாளிகள், சூழ்நிலைகளால் குற்றங்களை நோக்கி உந்தப்படுபவர்கள் மற்றும் தேவைக்கு மீறி குற்றங்களைச் செய்தவர்கள் என்று குற்றவாளிகளை வகைப்படுத்த வேண்டியதன் அவசியத்தை மத்திய உள்துறை அமைச்சர் வலியுறுத்தினார். சிறைச்சாலைகளில் உள்ள அத்தகைய நபர்களுக்கு உளவியல் ஆலோசனை வழங்குவதன் முக்கியத்துவத்தை அவர் வலியுறுத்தினார், அவர்கள் பொறுப்புள்ள குடிமக்களாக மாறுவதை ஊக்குவிக்கும் நோக்கத்துடன். பிரதமர் திரு. மோடியின் தலைமையின் கீழ், அடுத்த இரண்டு ஆண்டுகளுக்குள் கைதிகள் மறுவாழ்வுக்காக வலுவான தடய அறிவியல் அடிப்படையிலான அமைப்பை இந்தியா உருவாக்க முடியும் என்று அவர் நம்பிக்கை தெரிவித்தார். குற்றவியல் நடத்தை முறைகளை பகுப்பாய்வு செய்வதன் மூலம் குற்றங்களைக் கட்டுப்படுத்துவதில் முக்கிய பங்கு வகிக்கும் செயல்முறை செயல்பாட்டு அமைப்பு நிறுவப்பட்டுள்ளது என்றும் திரு ஷா கூறினார்.

தடய அறிவியலை திறம்படப் பயன்படுத்துவதன் மூலம் நாடு பல்வேறு சவால்களை எதிர்கொள்கிறது என்பதை திரு அமித் ஷா ஒப்புக் கொண்டார். அறிவியல் தீர்வுகள் மூலம் குற்றங்களற்ற சமுதாயத்தை உருவாக்க உள்துறை அமைச்சகம் மற்றும் தடய அறிவியல் பல்கலைக்கழகம் இடையே நெருங்கிய ஒத்துழைப்பு தேவை என்று அவர் அழைப்பு விடுத்தார். இந்த மாநாட்டின் போது, ஹேக்கத்தானில் சிறப்பாக செயல்பட்டதற்காகவும், இந்தி மொழியின் பயன்பாட்டை ஊக்குவிப்பதற்கான அவர்களின் முயற்சிகளுக்காகவும் இளைஞர்கள் அங்கீகரிக்கப்பட்டனர் என்று மத்திய உள்துறை அமைச்சர் கூறினார்.

----

(Release ID: 2121618)

TS/PKV/KPG/DL