ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏପି୍ରଲ ୬ ତାରିଖରେ ତାମିଲନାଡ଼ୁ ଗସ୍ତରେ ଯିବେ । ରାମନବମୀ ଅବସରରେ ମଧ୍ୟାହ୍ନ ପ୍ରାୟ ୧୨ଟାରେ ସେ ନୂତନ ପମ୍ବନ ରେଳ ପୋଲକୁ ଉଦଘାଟନ କରିବେ । ଏହା ଦେଶର ପ୍ରଥମ ଭର୍ଟିକଲ ଲିଫ୍ଟ ସମୁଦ୍ର ପୋଲ । ପୋଲ ପାଖରୁ ପ୍ରଧାନମନ୍ତ୍ରୀ ଏକ ଟ୍ରେନ ଓ ଜାହାଜ ଚଳାଚଳର ଶୁଭାରମ୍ଭ କରିବା ସହ ପୋଲ ପରିଚାଳନାର ପ୍ରତ୍ୟକ୍ଷ ଅନୁଭୂତି ନେବେ ।

ମଧ୍ୟାହ୍ନ ପ୍ରାୟ ୧୨ଟା ୪୫ ମିନିଟରେ ପ୍ରଧାନମନ୍ତ୍ରୀ ରାମେଶ୍ୱରମ୍ ଠାରେ ରାମନାଥସ୍ୱାମୀ ମନ୍ଦିରରେ ଦର୍ଶନ ଏବଂ ପୂଜା କରିବେ । ରାମେଶ୍ୱରମ୍ ଠାରେ ଅପରାହ୍ଣ ପ୍ରାୟ ୧ଟା ୩୦ରେ ସେ ତାମିଲନାଡ଼ୁରେ ୮,୩୦୦ କୋଟି ଟଙ୍କାର ବିଭିନ୍ନ ରେଳ ଓ ସଡ଼କ ପ୍ରକଳ୍ପକୁ ଦେଶ ଉଦେ୍ଦଶ୍ୟରେ ଲୋକାର୍ପିତ କିମ୍ବା ଶିଳାନ୍ୟାସ କରିବେ । ଏହି ଅବସରରେ ଉପସ୍ଥିତ ସମାବେଶକୁ ମଧ୍ୟ ସେ ଉଦବୋଧନ କରିବେ ।

ପ୍ରଧାନମନ୍ତ୍ରୀ ନୂତନ ପମ୍ବନ ରେଳ ପୋଲକୁ ଉଦଘାଟନ କରିବା ସହ ରାମେଶ୍ୱରମ୍-ତମ୍ବାରାମ ନୂତନ ରେଳ ସେବାର ଶୁଭାରମ୍ଭ କରିବେ । ଏହି ପୋଲ ଗଭୀର ସାଂସ୍କୃତିକ ଗୁରୁତ୍ୱତା ବହନ କରେ । ରାମାୟଣର ତଥ୍ୟ ଅନୁସାରେ ରାମେଶ୍ୱରମ୍ ନିକଟ ଧନୁଷ୍କୋଡ଼ିଠାରେ ରାମସେତୁ ନିର୍ମାଣ ଆରମ୍ଭ ହୋଇଥିଲା ।

ରାମେଶ୍ୱରମକୁ ମୂଳ ଭୂଖଣ୍ଡ ସହ ସଂଯୋଗ କରୁଥିବା ଏହି ପୋଲ ବୈଶ୍ୱିକ ସ୍ତରରେ ଭାରତୀୟ ଇଞ୍ଜିନିୟରିଂର ଏକ ଗୁରୁତ୍ୱପୂର୍ଣ୍ଣ ଛାପ ବହନ କରୁଛି । ୭୦୦ କୋଟି ଟଙ୍କା ଖର୍ଚ୍ଚରେ ଏହା ନିର୍ମିତ ହୋଇଛି । ଏହାର ଦୈର୍ଘ୍ୟ ୨.୦୮ କିଲୋମିଟର ଏବଂ ଏଥିରେ ୯୯ଟି ସ୍ପାନ (ଖୁମ୍ବ) ରହିଛି । ଏଥିରେ ୭୨.୫ ମିଟର ଭର୍ଟିକଲ ଲିଫ୍ଟ ସ୍ପାନ ରହିଛି ଯାହାକି ୧୭ ମିଟର ପର୍ଯ୍ୟନ୍ତ ଉଚ୍ଚକୁ ଉଠିପାରେ । ଫଳରେ ବିନା ବାଧାରେ ରେଳ ଚଳାଚଳ ସମୟରେ ମଧ୍ୟ ଜାହାଜ ଚଳାଚଳ ଜାରି ରହିପାରିବ । ଷ୍ଟେନଲେସ୍ ଷ୍ଟିଲ, ଉଚ୍ଚ ମାନର ସୁରକ୍ଷିତ ରଙ୍ଗ, ସମ୍ପୂର୍ଣ୍ଣ ୱେଲ୍ଡିଙ୍ଗ ସଂଯୋଗ ଦ୍ୱାରା ନିର୍ମିତ ହୋଇଥିବାରୁ ଏହି ପୋଲର ସ୍ଥାୟିତ୍ୱ ବୃଦ୍ଧି ପାଇବା ସହ ରକ୍ଷଣାବେକ୍ଷଣ ଖର୍ଚ୍ଚ ମଧ୍ୟ ସ୍ୱଳ୍ପ ରହିବ । ଏଥିରେ ସ୍ୱତନ୍ତ୍ର ପଲିସିଲୋକ୍ସାନ କୋଟିଂ ଦିଆଯାଇଥିବାରୁ ଏଥିରେ କଳଙ୍କି ଲାଗିବ ନାହିଁ ଏବଂ ସାମୁଦ୍ରିକ ଲୁଣି ପରିବେଶ ସତ୍ତ୍ୱେ ଏହାର ସ୍ଥାୟିତ୍ୱ ଜାୟ ରହିବ ।

ପ୍ରଧାନମନ୍ତ୍ରୀ ତାମିଲନାଡ଼ୁରେ ୮,୩୦୦ କୋଟି ଟଙ୍କାର ବିଭିନ୍ନ ରେଳ ଓ ସଡ଼କ ପ୍ରକଳ୍ପକୁ ଦେଶ ଉଦେ୍ଦଶ୍ୟରେ ଲୋକାର୍ପିତ କିମ୍ବା ଶିଳାନ୍ୟାସ କରିବେ । ଏହି ପ୍ରକଳ୍ପ ଗୁଡ଼ିକ ମଧ୍ୟରେ ରହିଛି, ଏନଏଚ-୪୦ର ୨୮ କି.ମି ବିଶିଷ୍ଟ ୱାଲାଜାପେଟ-ରାଣୀପେଟ ସେକ୍ସନକୁ ଚାରି ଲେନ୍ ପାଇଁ ଶିଳାନ୍ୟାସ, ଏନଏଚ-୩୩୨ର ୨୯ କିଲୋମିଟର ଲମ୍ବର ଭିଲୁପ୍ପୁରମ-ପୁଡୁଚେରୀ ସେକ୍ସନ ୪ ଲେନ୍ ସଡ଼କ, ଏନଏଚ-୩୨ରେ ୫୭ କିମି ଦୈର୍ଘ୍ୟର ପୁଣ୍ଡିୟାଙ୍କୁପ୍ପାମ-ସଟ୍ଟନାଥପୁରମ୍ ସେକ୍ସନର ୪ ଲେନ୍ ସଡ଼କ, ଏନଏଚ-୩୬ରେ ୪୮ କିମି ଦୈର୍ଘ୍ୟ ଚୋଲାପୁରମ-ତାଞ୍ଜାଭୁର ଚାରି ଲେନ୍ ସଡ଼କର ଲୋକାର୍ପଣ । ଏହି ରାଜପଥ ଗୁଡ଼ିକ ଅନେକ ତୀର୍ଥକ୍ଷେତ୍ର ଓ ପର୍ଯ୍ୟଟନ କ୍ଷେତ୍ରକୁ ସଂଯୋଗ କରିବା ସହ ସହର ଗୁଡ଼ିକ ମଧ୍ୟରେ ଦୂରତା ହ୍ରାସ କରିବ । ଏହା ମେଡିକାଲ କଲେଜ ଆଣ୍ଡ ହସପିଟାଲ ଏବଂ ବନ୍ଦର ସହ ସଂଯୋଗକୁ ସହଜ କରିବା ସହ ସ୍ଥାନୀୟ ଚାଷୀମାନଙ୍କୁ ସେମାନଙ୍କ କୃଷିଜାତ ଉତ୍ପାଦକୁ ଆଖପାଖ ବଜାରରେ ପହଞ୍ଚାଇବା ଦିଗରେ ସଶକ୍ତ କରିବ । ଏହା ସ୍ଥାନୀୟ ଚମଡ଼ା ଓ ଅନ୍ୟାନ୍ୟ କ୍ଷୁଦ୍ର ଉଦ୍ୟୋଗ ଗୁଡ଼ିକର ଆର୍ଥିକ ବିକାଶକୁ ବଢ଼ାଇବା ଦିଗରେ ସହାୟକ ହୋଇପାରିବ ।

SR