કેન્દ્રીય વાણિજ્ય અને ઉદ્યોગ મંત્રી શ્રી પિયુષ ગોયલ 3 થી 5 એપ્રિલ, 2025 દરમિયાન ભારત મંડપમ ખાતે યોજાનારા સ્ટાર્ટઅપ મહાકુંભની બીજી આવૃત્તિનું ઉદઘાટન કરશે. આ કાર્યક્રમનો ઉદ્દેશ ભારતના આર્થિક વિકાસમાં વધુ યોગદાન આપવાનો અને ભારતની વિકસતી ગાથાને દુનિયા સમક્ષ પ્રદર્શિત કરવાનો છે. ઉદઘાટન પ્રસંગે વાણિજ્ય અને ઉદ્યોગ મંત્રાલય તથા ઇલેક્ટ્રોનિક્સ અને ઇન્ફોર્મેશન ટેકનોલોજી મંત્રાલયનાં રાજ્ય મંત્રી શ્રી જિતિન પ્રસાદ વિશેષ સંબોધન કરશે.

આ ઇવેન્ટના બેજોડ સ્કેલ અને સહભાગીઓની વિવિધતા ઉદ્યોગસાહસિકો, રોકાણકારો અને વિચારશીલ નેતાઓને એકસાથે આવવા, વિચારોની આપ-લે કરવા અને કાયમી જોડાણો બનાવવા માટે એક અમૂલ્ય પ્લેટફોર્મ પ્રદાન કરશે. નવીનતા અને સહયોગને પ્રોત્સાહન આપવા પર મજબૂત ધ્યાન કેન્દ્રિત કરવાની સાથે, સ્ટાર્ટઅપ મહાકુંભ ઉદ્યોગસાહસિકતાની સફળતાના આગામી લહેર માટે પાયો નાખશે. આ વર્ષની આવૃત્તિ દરમિયાન આદિજાતિ ઉદ્યોગસાહસિકો પણ આઈઆઈએમ કલકત્તા, આઈઆઈએમ કાશીપુર અને આઈઆઈટી ભિલાઈમાં ઇન્ક્યુબેટેડ સહિત 45+ સ્ટાર્ટઅપ્સની ભાગીદારી સાથે સ્ટેજ પર ઉતરવાના છે.

આ કાર્યક્રમની થીમ સમજાવતાં ડીપીઆઇઆઇટીના જોઇન્ટ સેક્રેટરી શ્રી સંજીવે જણાવ્યું હતું કે, "સ્ટાર્ટઅપ મહાકુંભ એ ભારતીય જિલ્લાઓ અને વિશ્વના સ્ટાર્ટઅપ અને ઇન્ડસ્ટ્રી 'મહારથીઓ'નું સાચું 'સંગમ' હશે - જિલે સે જગત તક. ભારતનાં અનેક જિલ્લાઓ અને 50 દેશોનાં પ્રતિનિધિત્વ સાથે આ કાર્યક્રમ જોડાવા અને જોડાણ કરવાની શ્રેષ્ઠ તક પ્રદાન કરશે. એક છેડે આપણી પાસે ડિસ્પ્લેમાં ભારતમાં બનેલી ફ્લાઇંગ ટેક્સી હશે, જ્યારે બીજા છેડે આપણી પાસે કોરિયા જેવા દેશો છે, જે 11 સ્ટાર્ટઅપ્સનું પેવેલિયન ઊભું કરશે અને નેપાળ સૌથી મોટું પેવેલિયન ઊભું કરશે, જેમાંની એક સ્ટાર્ટઅપમાં ટકાઉ હાઇબ્રિડ પ્રોપલ્શન રોકેટ એન્જિન દ્વારા સંચાલિત 2-તબક્કાના રોકેટનું પ્રદર્શન કરવામાં આવશે. હું ખરેખર ઉત્સાહિત છું અને આગામી ત્રણ દિવસમાં કેટલાક અદભુત વિચારો અને સમૃદ્ધ ચર્ચાઓ માટે આતુર છું."

ફ્લેગશિપ સ્ટાર્ટઅપ ઇવેન્ટની પ્રથમ આવૃત્તિએ 48,581 થી વધુ વ્યવસાયિક મુલાકાતીઓને આકર્ષ્યા હતા, જેમાં 26+ રાજ્યો અને 14+ દેશોના શ્રેષ્ઠ સ્ટાર્ટઅપ્સ, સૂનિકોર્ન અને યુનિકોર્ન સહિત 1306 પ્રદર્શકો સામેલ હતા. તેણે 300થી વધુ ઇન્ક્યુબેટર્સ અને એક્સિલેટર અને 200થી વધુ અગ્રણી એન્જલ ઇન્વેસ્ટર્સ, વીસી અને ફેમિલી ઓફિસનું પણ આયોજન કર્યું હતું.

સ્ટાર્ટઅપ મહાકુંભ ભારતની સંપૂર્ણ સ્ટાર્ટઅપ ઇકોસિસ્ટમને એકસાથે લાવે છે, જેમાં ઉદ્યોગસાહસિકો, રોકાણકારો, ઇન્ક્યુબેટર્સ અને એક્સિલરેટર્સ અને કેટલાક ક્ષેત્રોના ઉદ્યોગ અગ્રણીઓ સામેલ છે. આ કાર્યક્રમનું નેતૃત્વ ફિક્કી, એસોચેમ, આઇવીસીએ અને બુટસ્ટ્રેપ એડવાઇઝરી એન્ડ ફાઉન્ડેશન દ્વારા કરવામાં આવ્યું. અને સિડબી, જીઇએમ, ઇસીજીસી, મેઇટી અને ડીપીઆઇઆઇટી સ્ટાર્ટઅપ ઇન્ડિયા દ્વારા સમર્થિત છે.

વધુ માહિતી માટે, www.startupmahakumbh.org મુલાકાત લો .

AP/IJ/GP/JD