U Myntri Rangbah duh ka ri u Narendra Modi u la ai jingkren hynnin ka sngi ha Lok Sabha halor ka jingpynkut kaba jop ia ka Mahakumbh ha Prayagraj, Uttar Pradesh. U la ai khublei ia ki nongshong shnong jong ka ri, kiba ka sienjam jong ki ka la pynthikna ka jingjop kaba khraw jong ka Mahakumbh. Haba pynpaw ia ka jingnoh synniang lang jong ki briew bad ki kynhun bapher bapher ban pynlong ia ka Mahakumbh kaba jop, u la ithuh bad ai khublei ia ka jingtrei shitom jong ka sorkar, ka imlang sahlang, bad baroh ki briew kiba don bynta. U Modi u la pynpaw ka jingsngewnguh ïa ki riewngeit na kylleng ka ri, da kaba kdew kyrpang ïa ki briew jong ka Uttar Pradesh bad khamtam ïa ki nongshong shnong jong ka Prayagraj, na ka bynta ka jingkyrshan bad jingïashim bynta jong ki.

Haba pynpaw ia ki sienjam ba khraw ba donkam na ka bynta ka jingpynlong ia ka Mahakumbh, da kaba ianujor ia ka bad ka jingpyrshang jong u Bhagirath ban wanrah ia ka wah Ganga sha ka Pyrthei, u Modi u la kren shaphang ka jingpynksan jong u ia ka jingdonkam jong ka "Sabka Prayas" ha ka jingai jingkren jong u na Red Fort. U la ong ba ka Mahakumbh ka pyni ia ka jingkhraw jong ka India sha ka pyrthei. “Ka Mahakumbh ka dei ka jingpynpaw jong ka jingkut jingmut lang, ka jingaiti lut jong ki briew, ba la ioh mynsiem na ka jingngeit skhem jong ki”, u la bynrap.

U Myntri Rangbah duh u la kren shaphang ka jingwan ka jingsngew kaba khlain jong ka ri kaba la sakhi ha ka por jong ka Mahakumbh, da kaba pynpaw kumno kane ka jingsngewthuh ka pynkhih ia ka ri sha ki jingkut jingmut kiba thymmai bad ai mynsiem ban pynurlong ia ki. U la ban jur ba ka Mahakumbh ka la pynbeit ia ki jingartatien jong ki katto katne ha kaba iadei bad ki jinglah kot bor jong ka ri.

Haba pynpaw ïa ka jingiaid lynti ba wanrah jingkylla jong ka ri, da kaba pyni ïa ka jingïasyriem hapdeng ka jinglehniam Ram Mandir Pran Pratishtha ha Ayodhya ha u snem ba la dep bad ka Mahakumbh mynta u snem, u Modi u la ong ba kine ki jingjia ki pynskhem ïa ka jingpynkhreh jong ka ri na ka bynta ka spah snem ban wan. U la ban jur ba ka jingsngewthuh lang jong ka ri ka pyni ia ka jinglah kaba khraw jong ka. U la ong ba ki por kiba kongsan ha ka histori jong ka ri, kumba long ha ka histori jong u briew, ki long kum ki nuksa na ka bynta ki pateng ban wan. U Modi u la pynleit jingmut halor ki mawmer jong ka histori jong ka India kiba la khyllie im ia ka ri bad ai ïa ka lynti kaba thymmai, da kaba kdew ïa ka jingmihpat ba kynja mynsiem ha ka por jong ka jingïakhih Swadeshi, ka jingkren ba pawnam jong u Swami Vivekananda ha Chicago, bad ki por ba kongsan ha ka jingïakhun laitluid ka India, kum ka jingïakhun laitluid jong ka snem 1857, ka jinglenlade u Bhagat Singh na ka bynta ka ri,  ka jingkhot "Delhi Chalo" jong u Netaji Subhas Chandra Bose, bad ka Dandi March jong u Mahatma Gandhi. “Ka Prayagraj Mahakumbh ka dei kajuh u mawmer ba kongsan, kaba long ka dak jong ka jingkyndit bynriew ka ri”, u la bynrap.

Haba pynpaw ïa ka mynsiem shitrhem ba la sakhi ha ka Mahakumbh ha India, kaba la neh haduh jan shi bnai shiteng, u Myntri Rangbah duh u la pynpaw kumno da ki klur ngut ki riewngeit, kiba la kyntait ia ka jingpyrkhat shaphng ka jinsuk ne ka jingshitom, ki la ïashim bynta da ka jingngeit skhem, kaba pyni ïa ka bor ba khraw jong ka ri. Haba kdew ïa ka jingleit jong u dang shen sha Mauritius, ha kaba u la rah ïa ka um kyntang na Triveni, Prayagraj, ba la shim ha ka por jong ka Mahakumbh, u Myntri Rangbah duh u la kdew ïa ka jinglong jingman kaba jylliew jong ka jingmane bad ka jingrakhe haba la ai ïa ka um kyntang ha Ganga Talao jong ka Mauritius. U la ban jur ba kane ka pyni ia ka mynsiem kaba pdiang, rakhe, bad ban pynneh pynsah ia ki riti dustur, ka deiriti, bad ki jinglong jong ka ri India.

U Modi u la kren shaphang ka jingbteng ba ryntih jong ki riti dustur ha ki pateng bynriew, da kaba pynpaw kumno ki samla jong ka juk ba mynta jong ka ri India ki ïashim bynta shitrhem ha ka Mahakumbh bad kiwei kiwei ki tamasa da ka jingaiti lut. U la ban jur ba ki samla mynta ki pdiang ïa ki riti dustur, ka jingngeit, bad ki jingngeit jong ki da ka jingsngew sarong, kaba pyni ïa ka jingïadei kaba khlaiñ bad ka pateng deiriti jong ka ri India.

“Haba ka imlang sahlang ka sngew sarong ïa ka pateng jong ka, ka wanrah ïa ki por kiba khraw bad kiba ai mynsiem, kumba la sakhi ha ka Mahakumbh”, la ong u Modi, da kaba ban jur ba kum kane ka jingsngew sarong ka kyntiew ïa ka jingïatylli bad pynkhlain ïa ka jingngeit skhem ban kot sha ki thong ba kongsan jong ka ri. U la pynpaw ba ka jingïadei bad ki riti dustur, ka jingngeit, bad ka pateng ka long ka bor ba kordor na ka bynta ka ri India kaba mynta, kaba pyni ïa ka jingkhlain jong ka ri bad ka jingriewspah ha ka deiriti.

Da kaba ban jur ba ka Mahakumbh ka la wanrah shibun ki jingmih kiba kordor, ha kaba ka mynsiem jong ka jingïatylli ka long ka jingainguh ba kyntang tam jong ka, u Myntri Rangbah duh u la pynpaw kumno ki briew na man ki thaiñ bad ki dong jong ka ri ki la ïawan lang ha Prayagraj, da kaba buh sharud ïa ki jinglong shimet bad pdiang ïa ka mynsiem ba ïatylli jong ka "ngi" halor ka "Nga."U la ban jur ba ki briew na ki jylla bapher bapher ki la long shi bynta jong ka Triveni kaba kyntang, kaba pynkhlain ia ka jingieid ri bad ka jingiatylli. U la ong ba haba ki briew kiba kren ïa ki jait ktien bad ki ktien bapher bapher ki rwai ïa ka jingrwai "Har Har Gange" ha ka Sangam, ka pyni ïa ka tynrai jong ka "Ek Bharat, Shreshtha Bharat" bad pynkhraw ïa ka mynsiem jong ka jinglong kawei. U Modi u la iohi ba ka Mahakumbh ka pyni ia ka jingbym don ka jingiapher hapdeng kiba rit bad kiba khraw, kaba pyni ia ka bor ba khraw jong ka India. U la ong ba ka jingiatylli kaba la mih hapoh ka ri ka long kaba jylliew haduh katta katta ba ka jop ia baroh ki jingpyrshang kiba pyniakhlad. U la pynpaw ba kane ka jingïatylli ka long ka kabu kaba khraw ia ki briew jong ka ri bad ka bor ba kyrpang ha ka pyrthei kaba ïakynduh ïa ka jingïapait. U la pynpaw biang ba "ka jingiatylli ha ka jingpher" ka dei ka dak jong ka ri India, ka jingsngew kaba ju sngew bad mad, kumba la pyni nuksa da ka jingkhraw jong ka Prayagraj Mahakumbh. U la kyntu ia ka ri ban nang pynriewspah ia kane ka jinglong ba kyrpang jong ka jingiatylli ha ka jingpher.

Haba kren shaphang ki jingai mynsiem kiba bun na ka Mahakumbh, u Modi u la pynpaw ïa ka jingïaid lynti kaba heh jong ki wah ha ka ri, kiba bun na ki, ki ïakynduh ïa ki jingeh. U la ban jur ia ka jingdonkam ban pyniar ia ka rukom lehniam ia ki wah, ba la ioh mynsiem na ka Mahakumbh, da kaba bynrap ba kum kine ki sienjam kin iarap ia ka pateng kaba mynta ban sngewthuh ia ka jingdonkam jong ka um, ban kyntiew ia ka jingkhuid jong ki wah, bad ban pynthikna ka jingiada ia ki wah.

U Myntri Rangbah duh u la pynkut da kaba pynpaw ka jingsngewskhem ba ki jingai mynsiem na ka Mahakumbh kin long kum ka lad kaba khlain ban pynurlong ia ki jingthmu jong ka ri. U la ai khublei ia iwei pa iwei ba don bynta ban pynlong ia ka Mahakumbh bad u la ai khublei ia baroh ki riewngeit ha kylleng ka ri bad u la kitbok kitrwiang ia ka iing dorbar thawain.

***