કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે આજે આસામના દેરગાંવમાં લચિત બર્ફૂકન પોલીસ એકેડેમીનું ઉદઘાટન કર્યું હતું. આ પ્રસંગે આસામના મુખ્યમંત્રી ડૉ. હિમંતા બિસ્વા સરમા, કેન્દ્રીય મંત્રી શ્રી સર્બાનંદ સોનોવાલ અને અન્ય અનેક મહાનુભાવો ઉપસ્થિત રહ્યા હતા.

કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે પોતાના સંબોધનમાં જણાવ્યું હતું કે, આગામી 5 વર્ષમાં લચિત બર્ફૂકન પોલીસ એકેડેમી દેશભરની તમામ પોલીસ એકેડેમીમાં પ્રથમ ક્રમે આવશે. તેમણે ઉલ્લેખ કર્યો હતો કે, આસામના બહાદુર યોદ્ધા અને દંતકથા સમાન લચિત બર્ફૂકને આસામને મુઘલો સામે વિજય અપાવ્યો હતો. તેમણે વધુમાં જણાવ્યું હતું કે, લચિત બર્ફૂકનની બહાદુરીની ગાથા એક સમયે આસામ પૂરતી મર્યાદિત રાખવામાં આવતી હતી, પરંતુ મોદી સરકારના પ્રયત્નોને કારણે આજે તેમની જીવનકથાનો 23 ભાષાઓમાં અનુવાદ થયો છે અને તે બાળકો માટે દેશભરના પુસ્તકાલયોમાં ઉપલબ્ધ છે. શ્રી શાહે એ બાબતની ખાતરી કરવા બદલ આસામ સરકારની પ્રશંસા કરી હતી કે, સમગ્ર દેશ આસામના આ મહાન પુત્ર વિશે શીખે અને તેમાંથી પ્રેરણા મેળવે. તેમણે ઉમેર્યું હતું કે, આજે લચિત બર્ફૂકન પોલીસ એકેડેમી સ્વરૂપે વાવવામાં આવેલું બીજ એક દિવસ વડનાં વૃક્ષમાં પરિવર્તિત થશે અને સમગ્ર દેશમાં પોલીસ વ્યવસ્થાનું કામ કરશે. તે માત્ર આસામ માટે જ નહીં, પરંતુ સમગ્ર પૂર્વોત્તર માટે એક સર્વોચ્ચ પોલીસ એકેડેમી હશે. જે તીર્થસ્થાનોમાં કાશીની જેમ જ હશે. આ સ્થળ આ ક્ષેત્રમાં શાંતિ માટે એક નવી શરૂઆત હશે

શ્રી અમિત શાહે જણાવ્યું હતું કે, લચિત બર્ફૂકન અકાદમીનો પ્રથમ તબક્કો રૂ. 167 કરોડનાં ખર્ચે પૂર્ણ થયો છે અને આ ત્રણેય તબક્કા માટે કુલ રૂ. 1050 કરોડનો ખર્ચ થશે. તેમણે જણાવ્યું હતું કે, આ એકેડેમી અનેક અત્યાધુનિક સુવિધાઓથી સજ્જ છે અને સમગ્ર દેશની શ્રેષ્ઠ પોલીસ એકેડેમી બનશે. તેમણે વધુમાં જણાવ્યું હતું કે, અગાઉ આસામની પોલીસને તાલીમ માટે અન્ય રાજ્યોમાં જવું પડતું હતું. પરંતુ છેલ્લા 8 વર્ષમાં, રાજ્યના શાસનમાં, એવું પરિવર્તન આવ્યું છે કે હવે, ગોવા અને મણિપુરના 2,000 પોલીસ કર્મચારીઓએ આ પોલીસ એકેડેમીમાં તાલીમ મેળવી છે.

કેન્દ્રીય ગૃહ મંત્રીએ જણાવ્યું હતું કે, પ્રધાનમંત્રી શ્રી નરેન્દ્ર મોદીનાં નેતૃત્વમાં આસામ હવે વિકાસનાં માર્ગે અગ્રેસર છે. તેમણે ઉલ્લેખ કર્યો હતો કે, છેલ્લાં 10 વર્ષમાં પ્રધાનમંત્રી મોદીનાં નેતૃત્વમાં કેટલીક શાંતિ સમજૂતીઓ પર હસ્તાક્ષર થયાં છેઃ વર્ષ 2020માં આસામ-બોડોલેન્ડ સમજૂતી, વર્ષ 2021માં કાર્બી આંગલોંગ સમજૂતી, વર્ષ 2022માં આદિવાસી શાંતિ સમજૂતી અને વર્ષ 2023માં ઉલ્ફા, આસામ-મેઘાલય અને આસામ-અરુણાચલ સમજૂતીઓ. શ્રી શાહે જણાવ્યું હતું કે, મોદી સરકારે કરેલી આ શાંતિ સમજૂતીઓનાં પરિણામ સ્વરૂપે 10,000થી વધારે યુવાનોએ તેમનાં શસ્ત્રો હેઠાં મૂકીને મુખ્ય ધારામાં સામેલ થયાં છે. તેમણે ઉમેર્યું હતું કે, એક સમયે આંદોલનો, વિદ્રોહ અને બંદૂકની લડાઇ માટે જાણીતા આસામમાં રૂ.27,000 કરોડનો સેમીકન્ડક્ટર ઉદ્યોગ સ્થાપવાના પ્રયાસો ચાલી રહ્યા છે.

શ્રી અમિત શાહે જણાવ્યું હતું કે, તાજેતરમાં આસામમાં એડવાન્ટેજ આસામ 2.0 નામની ઇન્વેસ્ટમેન્ટ એન્ડ ઇન્ફ્રાસ્ટ્રક્ચર કોન્ફરન્સ યોજાઈ હતી. જેમાં રૂ. 5.18 લાખ કરોડનાં મૂલ્યનાં સમજૂતીકરાર (એમઓયુ) થયાં હતાં અને એમાંનાં મોટા ભાગનાં સમજૂતીકરારોનો અમલ જમીની સ્તરે જ થશે. તેમણે વધુમાં જણાવ્યું હતું કે મોદી સરકાર આસામના વિકાસ માટે ₹3 લાખ કરોડના ઇન્ફ્રાસ્ટ્રક્ચર પ્રોજેક્ટ્સ લાવી રહી છે. તેમણે ભારપૂર્વક જણાવ્યું હતું કે, કુલ રૂ. 8 લાખ કરોડનાં આ પ્રોજેક્ટ આસામનાં યુવાનો માટે મોટી સંખ્યામાં રોજગારીની તકોનું સર્જન કરશે.

કેન્દ્રીય ગૃહ અને સહકારિતા મંત્રીએ જણાવ્યું હતું કે પાછલી સરકારના શાસનના 10 વર્ષ દરમિયાન આસામને ₹1.27 લાખ કરોડની હસ્તાંતરણ ગ્રાન્ટ અને ગ્રાન્ટ-ઇન-એઇડ મળી હતી. જે પ્રધાનમંત્રી મોદીના 10 વર્ષમાં ચાર ગણી વધારીને ₹4.95 લાખ કરોડ કરવામાં આવી છે. તેમણે વધુમાં જણાવ્યું હતું કે અગાઉની સરકારોએ આસામને ઘણાં વર્ષો સુધી રમખાણોની આગમાં ધકેલી દીધું હતું, અનુદાન આપ્યું ન હતું, યોગ્ય શિક્ષણ પ્રણાલીઓ સ્થાપિત કરવામાં નિષ્ફળ રહી હતી, માળખાગત સુવિધાઓનું નિર્માણ કર્યું ન હતું અને શાંતિને પ્રબળ થવા દીધી ન હતી. શ્રી શાહે જણાવ્યું હતું કે, પ્રધાનમંત્રી મોદીનાં 10 વર્ષનાં કાર્યકાળ દરમિયાન માળખાગત સુવિધા વિકસાવવામાં આવી છે, શાંતિ જળવાઈ રહી છે અને વિવિધ ઉદ્યોગોની સ્થાપના થઈ છે. તેમણે મોદી સરકાર દ્વારા હાથ ધરવામાં આવેલા અનેક પ્રોજેક્ટનો ઉલ્લેખ કર્યો હતો, જેમાં 200 કિલોમીટરથી વધુ લાંબો અને 10,000 કરોડ રૂપિયાનો ભારત માલા પ્રોજેક્ટ, રૂ. 3,000 કરોડનો ધુબરી-ફૂલવારી પુલ, રૂ. 3,400 કરોડના ખર્ચે 3,700 કિલોમીટર સુધીના ગ્રામીણ માર્ગો અને સિલચર-ચુરાઇબારી કોરિડોરને ચાર માર્ગીય બનાવવાનો સમાવેશ થાય છે. વધુમાં, તેમણે માજુલી ટાપુ પર ₹1,000 કરોડના નવા પાળા અને રસ્તા પર થઈ રહેલા કામ પર પ્રકાશ પાડ્યો હતો. તેમણે વધુમાં જણાવ્યું હતું કે બ્રહ્મપુત્રા નદી પર છ લેનનો પુલ નિર્માણાધીન છે અને તેના પર રૂ.382 કરોડના ખર્ચે નેશનલ હાઇવે 715-કે માજુલી અને જોરહાટને જોડે છે. તેમણે ગોપીનાથજીના નામ પરથી રૂ. 1,100 કરોડના ખર્ચે એક એરપોર્ટનું વિસ્તરણ, રૂ. 9,000 કરોડના રેલવે પ્રોજેક્ટ્સનું ઉદઘાટન, રૂ. 1,000 કરોડના એઇમ્સ પ્રોજેક્ટનું ઉદઘાટન અને તમુલપુર, કોકરાઝાર, નલબારી અને ધુબરીમાં મેડિકલ કોલેજોની સ્થાપના તેમજ  પ્રધાનમંત્રી મોદીના નેતૃત્વ હેઠળના અન્ય ઘણા ઇન્ફ્રાસ્ટ્રક્ચર પ્રોજેક્ટ્સનો પણ ઉલ્લેખ કર્યો હતો.

શ્રી અમિત શાહે જણાવ્યું હતું કે, મોદી સરકાર અને આસામ સરકારે ગરીબો માટે અનેક કલ્યાણકારી કાર્યક્રમો હાથ ધર્યા છે. તેમણે જણાવ્યું હતું કે, પ્રથમ વખત 58 લાખ ઘરોને નળથી પાણી પ્રદાન કરવામાં આવ્યું હતું. 1.8 કરોડ લોકોને રૂ. 5 લાખ સુધીની નિઃશુલ્ક સારવાર પ્રદાન કરવામાં આવી હતી. 43 લાખ ઘરોમાં શૌચાલયો બનાવવામાં આવ્યાં હતાં. 2.32 કરોડ ગરીબોને દર મહિને વ્યક્તિદીઠ 5 કિલોગ્રામ મફત ચોખા આપવામાં આવ્યાં હતાં તથા મોદી સરકાર અને આસામ સરકારે પણ 51 લાખ ગેસ સિલિન્ડર અને 21 લાખ મકાનો પૂરાં પાડ્યાં હતાં.

કેન્દ્રીય ગૃહમંત્રીએ કહ્યું કે મોદી સરકારે આસામમાં શાંતિ લાવવાના પ્રયાસો તો કર્યા જ છે પરંતુ તેને સફળતાપૂર્વક સ્થાપિત કરી દીધા છે. તેમણે જણાવ્યું હતું કે, મોદી સરકારે માળખાગત સુવિધાઓનું નિર્માણ કર્યું છે અને હવે મુખ્યમંત્રી ડો.હિમંત બિસ્વા સરમાના નેતૃત્વમાં રાજ્યમાં 5 લાખ કરોડ રૂપિયાનું રોકાણ આવી રહ્યું છે. જે આસામના યુવાનો માટે સુવર્ણ ભવિષ્યનો પાયો નાખશે. તેમણે વધુમાં જણાવ્યું હતું કે, આસામમાં દોષિત ઠેરવવાનો રેશિયો 5 ટકાથી વધીને 25 ટકા થયો છે. તેમણે ભારપૂર્વક જણાવ્યું હતું કે, અગાઉ લોકો એફઆઈઆર દાખલ કરવા માગતા ન હતા. કારણ કે પોલીસને માત્ર આતંકવાદીઓ સામેની લડાઈ તરીકે જ જોવામાં આવતી હતી, પણ આજે પોલીસ નાગરિકોના અધિકારોનું રક્ષણ કરવા અને પ્રધાનમંત્રી શ્રી નરેન્દ્ર મોદી દ્વારા દાખલ કરવામાં આવેલા ત્રણ નવા ફોજદારી કાયદાઓને અસરકારક રીતે લાગુ કરવા પર ધ્યાન કેન્દ્રિત કરી રહી છે.