ঙসি য়ুনিয়ন হোম অমসুং কোওপরেসন মিনিস্তর শ্রী অমিত সাহনা চীফ গেস্ত ওইনা ন্যু দিল্লিদা ষ্টুদেন্ত এক্সপেরিয়েন্স ইন ইন্তর-ষ্টেৎ লিভিং (সৈল) না শীনবা নোর্থ-ইস্ত ষ্টুদেন্তস এন্দ য়ুথ পর্লিয়াম্তদা শরুক য়াখ্রে।

থৌরম অদুদা য়ুনিয়ন হোম অমসুং কোওপরেসন মিনিস্তর শ্রী অমিত সাহনা হায়খি ইনাকখুল্লবা নাৎ অমসুং চৎনবী লৈবা অৱাং-নোংপোক অসি ভারতকী নাৎকী মমল নাইদ্রবা মনি-মুক্ত অমনি। লমদম অসিগী খুদোংবশিং অসিনা মরুওইনা তুরিজমগী হিরম য়াওনা মালেমগী পুক্নিং চিংশিল্লে। ভারত্ত আই.ক্বিউ খ্বাইদগী ৱাংনা লৈবগীদমক অৱাং-নোংপোক্কী নহারোল থাগৎপা ফোঙদোকচরি অমসুং লমদম অসি থবক য়াম্না কন্না শুবা ত্রাইব খরগী লৈফমশু ওইরি। অৱাং-নোংপোক লমদমদা ত্রাইবেল কাংবু ২২০, ত্রাইব ১৬০, দাইলেক্ত অমসুং লোল ২০০, অঙকপা কুহ্মৈ ৫০ অমসুং মালেমদা মমিং লৈরবা জগোয় মখল ৩০ হেন্না লৈরি।

য়ুনিয়ন হোম মিনিস্তরনা হায়খি মদুদি অঙকপা গুন কয়া লৈজরবশু, লালহৌবগী ইরাংনা মরম ওইদুনা অৱাং-নোংপোক লমদম চাউখৎপগী লমদা মনিংদা লৈহৌখি। হিংশা, বন্দশিং, দ্রগশিং, ব্লোকেদশিং অমসুং মচোই তাবদগী অৱাং-নোংপোক লমদম অমসুং লৈবাক অসিগী অতৈগী মরক্ত মচেৎ তাহনবা খক নত্তনা লমদম অসিগী রাজ্যশিংগী মরক্ত তোখাই তাহল্লে। মসিগী ফল ওইনা, চাউখৎ-থৌরাংগী লমদা চহি ৪০ থেংথরে অমসুং মসিগী মরুওইবা মরম তেরোরিজম অমসুং তোখাই তাবগী ৱাখল্লোন্না ওইহনবনি।

য়ুনিয়ন হোম মিনিস্তরনা হায়খি মহাক্কী দলনা সরকার পায়রকপা মতমদা অৱাং-নোংপোক লমদম মরুওইনা লৌখি। অতল জিনা লুচিংবা সরকারনা লমদম অসি চাউখৎনবা তোখাইবা মিনিস্ত্রি অমা লিংখৎখি। প্রধান মন্ত্রী শ্রী নরেন্দ্র মোদীনা অৱাং নোংপোক অসি কেন্দ্র সরকারগী থৌরম খুদিংমক্কী ময়াইদা থম্লে। ২০২৭ ফাওবগী মনুংদা, অৱাং-নোংপোক্ত রাজ্যশিংগী কোনুংশিং ত্রেন, এয়র অমসুং লম্বীনা শম্নরগনি, মোদী সরকারগী মখাদা, অৱাং-নোংপোক্কী অরাপ্পা হন্থহনবগা খক নত্তনা, থম্মোয়শিংগী মরক্ত লৈনরবা অরাপ্পশু হন্থহল্লে। মোদী সরকারনা লালহৌ লুপশিংগা মথং মথং ৱারি শানরে, মখোয়গী খুদোংচাবশিং খঙলে অমসুং য়ানচেশিংগী মখাদা মখোয় মহৌশাগী পুন্সিদা পুরক্নবা থবক পায়খৎলে।

য়ুনিয়ন হোম মিনিস্তরনা হায়খি মদুদি হৌজিক অৱাং-নোংপোক লমদম শান্তি লৈরে। ২০০৪ দগী ২০১৪ গী মরক্ত অৱাং-নোংপোক লমদমদা হিংশাগী থৌদোক ১১,০০০ রোম থোকখি, অদুগা ২০১৪ দগী ২০২৪ গী মনুংদা মশিং চাদা ৭০ হন্থদুনা থৌদোক ৩,৪২৮ থোকখি। সেকুরিতি ফোর্সশিং শিবা চাদা ৭০ হন্থরে অমসুং মীচম শিবা চাদা ৮৯ হন্থরে। য়ানচে ১২ খুৎয়েক পীনদুনা অৱাং নোংপোক্ত শান্তি পুরক্নবা লম্বী মোদী সরকারনা শেম্লে, মসিদা নহারোল ১০,৫০০ হেন্না চঙজরক্লে অমসুং জাতিগী ঈচেলদা তিল্লরে। এক ভারত শ্রেস্থা ভারত থৌরাংগী মখাদা সরকারনা লম লমগী লোলশিং, নাৎশিং, চৎনবীশিং, কলাশিং অমসুং জগোয়শিং ইকায়খুম্নরে অমসুং ঙাক-শেল্লে।

শ্রী অমিত সাহনা হায়খি মদুদি চাউখৎনবগীদমক শান্তি লৈবা অসি তঙাইফদবা ওইবনা, শান্তি লৈতনা অৱাং-নোংপোক লমদম চাউখৎপা ওইথোক্লোই। অৱাং-নোংপোক লমদমদা শান্তি পুরক্নবা মোদী সরকারনা মীৎয়েং চঙলে। মোদী সরকারগী মখাদা অৱাং-নোংপোক লমদমনা স্পেস তেক্নোলোজিগী কান্নবশিং মপুংফানা ফংলে, নোর্থ ইস্তর্ন স্পেস এপ্লিকেসন্স সেন্তরগী মখাদা স্কিম ১১০ রোম পায়খৎলে। অৱাং-নোংপোক লমদমদা পাৎ ৩০০ হেন্না শেমগৎনবগীদমক অমসুং অৱাং-নোংপোক লমদমদা ঈশিং ইচাউ লাকশিন্নবা সেতেল্লাইত মেপ্পিং অমসুং তোপোগ্রাফি শীজিন্নরে।

য়ুনিয়ন হোম মিনিস্তরনা হায়খি মোদী সরকারগী মতম মনুংদা, হৌখিবা চহি ১০ অসিদা অৱাং-নোংপোক লমদম চাউখৎনবা থবক কয়া পায়খৎলে। সরকারনা অৱাং-নোংপোক লমদমগী বজেতকী শেনফম হেনগৎহল্লে। ২০১৪-১৫ গা চাংদম্নবদা মোদী সরসকারনা ২০২৪-২৫ দা বজেত চাদা ১৫৩ হেনগৎলে। লম্বী-থোং হেন্না ফগৎনবা, লম্বীশিংগী লুপা করোর ৪১,০০০ অমসুং খুঙ্গংগী লম্বীশিংগীদমক লুপা করোর ৪৭,০০০ চাদিং তৌরে। অৱাং-নোংপোক লমদমগী লম্বীশিং খক্তগী ওইনা মোদী সরকারনা লুপা করোর ৯০,০০০ চাদিং তৌরে। অৱাং-নোংপোক লমদমদা অনৌবা নোংথক্কী লম্বী ৬৪ হৌদোক্লে অমসুং ভাইব্রেন্ত ভিলেজ প্রোগ্রামগী লুপা করোর ৪,৮০০ অমসুং রেলৱেজগী লুপা করোর ১৮,০০০ চাদিং তৌখ্রে।

শ্রী অমিত সাহনা হায়খি ভারতকী খ্বাইদগী চাউবা রেল-কম-রোদ ব্রিজ ব্রাহ্মপুত্রা তুরেল মথক্ত শারে। প্রধান মন্ত্রী মোদীনা হাজারিকা সেতু শারে, অরুনাচল প্রদেসতা গ্রিন ফিল্দ এয়রপোর্ত অমা শারে, রেলৱে নেতৱার্ক চাদা ১০০ ইলেক্ত্রিক ফংহল্লে অমসুং অসামদগী ভুতান ফাওবা অনৌবা রেল লম্বী অমা শেমগৎলে। ২০২৭ ফাওবগী মনুংদা, অৱাং-নোংপোক্ত রাজ্যশিংগী কোনুংশিং ত্রেন, এয়র অমসুং লম্বীনা শম্নরগনি, মোদী সরকারগী মখাদা, অৱাং-নোংপোক্কী অরাপ্পা হন্থহনবগা খক নত্তনা, থম্মোয়শিংগী মরক্ত লৈনরবা অরাপ্পশু হন্থহল্লে। ঐখোয়গী সরকারগী মতম মনুংদা সিক্কিমদা চাদা ১০০ ওর্গনিক ফার্মিংগী থবক পায়খৎপা ঙম্লে। অসামদা লুপা করোর ২৭,০০০ চঙনা শেমগৎলিবা সেমিকন্দক্তর প্লান্ত অসিনা নহারোলশিংদা অনৌবা থবক কয়া পীরগনি। অৱাং-নোংপোক লমদমদা লুপা করোর লাখ ২.৫ গী শেনফম অমা থাদরগনি। মোদী সরকারগী মখাদা হৌখিবা চহি ১০ দা থোনখিবা চাউখৎপগী য়ুম্ফম অসিনা মথং চহি ১০ দা থবক থিনবগীদমক অৱাং-নোংপোক লমদমগী অঙাং অমতগা লৈবাক অসিগী অতোপ্পা মফমশিংদা চৎলরোই, মখোয় মফম অসিদা থবক ফংলগনি।

য়ুনিয়ন হোম মিনিস্তরনা হায়খি মদুদি অজাদি কা অমৃত মহোৎসব মনুংদা, ২০৪৭ ফাওবগী মনুংদা ভারত চাউখৎলবা লৈবাক অমা ওইহন্নবা অমসুং হিরম খুদিংমক্ত মালেমগী লুচিংবা অমা ওইনবা ঐখোয়না ৱাশকখি। ২০৪৭ ফাওবগী মনুংদা ইমা ভারত মহাক্কী থৌনাগা লোয়ননা মালেমগী মমাঙদা লেপকনি। হিরম খুদিংমক্ত ভারতনা মালেমগী মাঙজিল থাগনি; মহার্ষি অর্বিন্দো অমসুং শ্বামী বিবেকানন্দগী মঙলান হৌজিক মঙফাওনবা হৌরক্লগনি। থবক অসিদা নহারোলশিং শরুক য়ানবা ঐখোয়গী সরকারনা থবক কয়া পায়খৎলে। প্রধান মন্ত্রী মোদীনা অহানবা ওইনা অনৌবা ইজুকেসন পোলিসি হৌদোক্লে, মসিদা মমালোলশিংদা অকনবা মীৎয়েং থম্লে। অনৌবা থৌশিল অসিগী মখাদা, ঐখোয়গী লাইরিক তম্বীবগী থবক অসি লমদম অসিগী অমসুং মালেমগী অনিমক ওইগনি, নহারোলশিংদা খুদোংচাবা কয়া পীগনি। 

য়ুনিয়ন হোম মিনিস্তরনা হায়খি মদুদি প্রধান মন্ত্রী নরেন্দ্র মোদী অমসুং ভারত সরকারগা অৱাং-নোংপোক লমদমগা থম্মোয়গী ওইবা অচেৎপা মরী অমা লৈনরি। প্রধান মন্ত্রী মোদীনা লুচিংবা ভারত সরকারনা বজেতকী শেনফম কাইথোকপা খক নত্তনা অৱাং-নোংপোক্কী চাউখৎ-থৌরাং, অপুনবা অমসুং শান্তিগীদমকশু মীৎয়েং চঙলি।

শ্রী অমিত সাহনা হায়খি মদুদি মহৈরোয়শিংগী সংসদ অসি থাগৎনিঙাই ওইবা থৌরম অমনি অমসুং মসি তোখাইবা থৌরম অমা ওইহল্লোইদবনি। মহৈরোয়শিংগী সংসদ অসিগা অতোপ্পা লুপশিং অমসুং বিদ্যারথি পরিষদগা শম্ননবাথবক অমা পায়খৎকদবনি, মসিনা লৈবাক অসি চাউখৎনবা নহারোলশিংগী লুপশিংনা মতেং পাংবা ঙমগনি। বিদ্যারথি পরিষদনা নহারোলশিংদা অচুম্বা মাইকৈ তাকপা খক নত্তনা মখোয়গী লমচৎ-শাজৎ শেম্বদশু মতেং পাংলি। মালেমদা খ্বাইদগী চাউবা মহৈরোয়শিংগী লুপ অসিনা মতম পুম্নমক্ত প্রোজেক খুদিংমক্ত লৈবাক অসি মরুওইনা লৌরি, মসিনা অমাং-অতা নত্ত্রগা লৈবাক্কী অৱাবা তারকপদা মতেং পাংলি।

য়ুনিয়ন হোম মিনিস্তরনা হায়খি ষ্টুদেন্ত এক্সপেরিয়েন্স ইন ইন্তর-ষ্টেৎ লিভিং (সৈল) না লৈবাক অসিগী অতৈ মফমশিংগা থম্মোয়গী মরী অমা শেমগৎলে অমসুং মসিগীদমক থাগৎপা ফোঙদোকচরি। ঙসি লৈবাক শীনবা থুংনা ইমুং ৪০০০ হেনবনা সৈলগী খুৎথাংদা অৱাং-নোংপোক্কী অঙাংশিং লৈফম পীরি। কৎথোকপগী ৱাখল্লোন অমগা লোয়ননা বিদ্যারথি পরিষদনা অমসুং ষ্টুদেন্ত এক্সপেরিয়েন্স ইন ইন্তর-ষ্টেৎ লিভিং (সৈল) গী থবকশিংনা মখা তানা চহি মাইপাকপা পুরকপা ঙমগনি।

****