U Myntri Kam Pohiing bad Cooperation jong ka sorkar pdeng, Amit Shah u la iashim bynta kum u kongsan ha ka North-East Students’ & Youth Parliament ha New Delhi mynta ka sngi. Ia kane ka prokram la pynlong da ka Student Experience in Inter-State Living (SEIL).

U Myntri Kam Pohiing jong ka sorkar pdeng, Amit Shah u la khot ia ka thain shatei lammihngi u mawlynnai jong ka deiriti jong ka ri, kaba riewspah ha ka hiar pateng kaba kyntiew ia ka deiriti jong ka ri. U la kren shaphang ki lad ba bun jong ka thain ban khring ia ki ri ka pyrthei, khamtam ha ka liang ka kam jngoh kai. U la iaroh ruh ia ki samla jong ka thain shatei lammihngi kiba stad tam ha India bad ong ba ka thain kadei kaba don ia ki jaitbynriew riewlum kiba trei shitom bha. U Shah u la ban jur ba ka thain shatei lammihngi kadei ka jaka kaba iar, bad ka don palat 220 tylli ki kynhun riewlum, 160 ki jaitbynriew riewlum, 200 tylli ki ktien, 50 tylli ki tamasa ba kyrpang bad palat 30 ki rukom shad ba pawnam ha ka pyrthei.

U Amit Shah u la mynjur ba hapdeng ki jinglong ba kyrpang jong ka, ka thain shatei lammihngi ka sahdien ha ka roi ka par namar ki kam pyntriem bad ki jingiakhih ki dei namar ki jingbatai bakla bad ki jingiakajia. U la ong ba ki kam iaumsnam, ki jingpakhang shnong, ki drok, ki jingkhang ia ki surok bad ka jingsngew pher ki phiah ia ka thain, ka wanrah ia ka jingsngewiapher tm tang hapdeng ka thain shatei lammihngi bad ka ri baroh kawei hynrei hapdeng ki jylla ruh hapoh ka thain. Kumta, ka thain shatei lammihngi ka mad 40 snem ka jingslem ka roi ka par, ha kaba ki kam pyntriem bad ki kynhun ba iakhih kilong ki mawjingthut ha kane ka por.

U Myntri Kam Pohiing Amit Shah u la ong haba ka party jong u ka wan ha ka bor, ka phaikhmat kyrpang sha ka thain shatei lammihngi. U la ong ba mynshuwa, kam don la ka jong ka tnad na ka bynta kane ka thain ka bym pat kiew, hynrei la seng ia ka ha ka por jong ka sorkar ba ialam da u Atal ji. Hapoh ka jingialam u Myntri Rangbah duh Narendra Modi, ka thain shatei lammihngi ka la long ka jingphaikhmat ha man ka prokram jong ka sorkar pdeng. U Shah u la ban jur ba ka jingjop ba khraw jong ka sorkar Modi kadei ka jingpynduna ia ka jingjngai hapdeng ka thain shatei lammihngi bad ka ri baroh kawei. U la pynbna ba shuwa u 2027, yn pyniasoh ia baroh ki nongbah ha ka thain shatei lammihngi lyngba ki rel, liengsuin bad surok. U la bynrap ba u Myntri Rangbah duh Modi ym tangba u kyntiew ia ka jingpyniasoh hapdeng ka thain shatei lammihngi bad ka ri baroh kawei hynrei u trei ruh ban weng ia ka jingsngewiapher hapdeng ki briew. U Shah u la ong ba ka sorkar Modi ka buh ia ka thain shatei lammihngi ha ka bynta kaba kongsan jong man ka kam, ka pynlong ia ki jingiakren bad man ki kynhun kieng atiar, sngewthuh ia ki jingsngewkhia jong ki, bad trei ban wanrah ia ki sha ka imlang sahlang lyngba ki jingiakut.

U Amit Shah u la ong ba ka thain shatei lammihngi mynta ka mad ia ka shongsuk shongsain. Hapdeng u snem 2004 bad 2014, ki don 11,000 tylli ki jingjia iaumsnam ha ka thain, bad naduh u snem 2014 haduh 2024, kane ka la duna jan 70%, ka la hiar sha ka 3,428. U la ong ba ka don ka jingduna 70% ha ka jingiap ki kynhun shipai bad 89% ka jingduna ha ka jingiap ki riewpaidbah. U Shah u la ong ba ka sorkar Modi ka la iasoi ia ki jingiakut bad baroh ki kynhun kieng atiar, kaba la pynlong ia palat 10,500 ngut ki riewkieng atiar ban wan pyndem ia ki tiar ialeh jong ki bad pyniasoh bad ka imlang sahlang. U la ban jur ba ha ki 10 snem ba la leit, la iasoi 12 tylli ki jingiakut ba kongsan bad ki kynhun kieng atiar. Hapoh ka sienjam Ek Bharat, Shreshtha Bharat, ka sorkar ka la burom bad pynneh pynsah ia ki ktien, ki deiriti, ka riam ka beit, ki jingshad tynrai, bad ki rukom saindur jong ka thain shatei lammihngi, bad kyntiew ia ka shongsuk shongsain ha kylleng ka thain da kaba pynshlur ia ka jingwan pyndem ia ki tiar ialeh da palat 10,000 ngut ki briew.

U Amit Shah u la ong ba ka roi ka par jong kano kano ka thain kam lah ban long khlem ka shongsuk shongsain, namar ka shongsuk shongsain kadei ka jingdonkam na ka bynta ka jingkiew shaphrang. U la ban jur ba ka sorkar Modi ka phaikhmat kyrpang ban wanrah ia ka shongsuk shongsain ha ka thain shatei lammihngi. U Shah u la kren shaphang ki jingmyntoi ba kongsan ba ka thain shatei lammihngi ka la ioh na ka space technology hapoh ka sorkar Modi, ha kaba la pyntreikam kumba 110 tylli ki skhim lyngba ka North Eastern Space Applications Centre (NESAC). U la ong shuh shuh ban iada na ka jingshlei um ha ka thain shatei lammihngi, la pyndonkam ia ka satellite mapping bad topography ban pynkhreh ka jingshna palat 300 tylli ki pung ha ka thain, ka ban pynthikna ka jingiada pura na ka jingshlei um ha ki por ban wan.

U Myntri Kam Pohiing bad Cooperation jong ka sorkar pdeng u la ong ha ka samoi jong ka sorkar Modi, la shim ia ki sienjam bapher bapher na ka bynta ka roi ka par jong ka thain ha ki 10 snem ba la leit. Ka sorkar ka la kyntiew ia ki kyndon mang tyngka na ka bynta ka thain. U la ong, haba ianujor bad u snem 2014-15, u Myntri Rangbah duh Narendra Modi u la kyntiew ia ka mang tyngka da 153 per cent na ka bynta u snem 2024-25. U la ong ruh ba na ka bynta ka jingpyniasoh kaba kham bha, la pynlut T. 41,000 klur ha ki surok, bad T. 47,000 klur la pynlut la ka jong na ka bynta ki surok ha ki jaka nongkyndong. U la ong, ka sorkar Modi ka la pynlut T. 90,000 klur ha ka thain shatei lammihngi, kyrpang na ka bynta ki surok. U Shah u la ong ba la sdang 64 tylli ki jingpynher liengsuin na ka bynta ka jingpyniasoh lyngba ki liengsuin, T. 4,800 klur la pynlut ha ka prokram Vibrant Village, katba T. 18,000 klur la mang na ka bynta ki kam ba iadei bad ki rel.

U Amit Shah u la ong ba mynta, ka jingkieng rel bad surok kaba heh tam ha ka ri la shna halor ka wah Brahmaputra. U la ong ba u Myntri Rangbah duh Modi u la shna ia ka Bhupen Hazarika Setu, la pynioh kad liengsuin ia ka Arunachal Pradesh, pyndep 100 per cent ka jingpynpoi bording ha ka rynsan rel, bad la shna ia ka lynti rel ba thymmai na Assam sha Bhutan. U Shah u la bynrap ba shuwa u snem 2027, yn pyniasoh ia ki nongbah jong baroh ki jylla ka thain shatei lammihngi lyngba ki rel, liengsuin bad surok. Hapoh ka sorkar Modi, ym tang ka jingjngai jong ka thain shatei lammihngi la pynduna, hynrei ka jingsngew iapher hapdeng  ki briew ruh kadei kaba la kham pynduna. U la ong ruh ba la lah ban kot sha ka thong kaba 100 per cent ka jingrep organic ha Sikkim ha ka samoi jong ka sorkar jong ngi. U la ong ba mynta, ka jaka shna semiconductor kaba T. 27,000 klur kan don ha Assam, ka ban plie lad ioh kam ia ki samla. U Shah u la ong ba ka jingbei tyngka kaba T. 2.5 lak klur kan long ha ka thain shatei lammihngi. U la ong ba ka nongrim na ka bynta kane la buh ha ki 10 snem ba la leit hapoh ka sorkar Modi, bad ha ki 10 snem ban wan, yn nym don ki khun na ka thain shatei lammihngi ban leit sha kawei ka bynta jong ka ri ban leit trei, hynrei kin ioh kam ha kane ka thain hi.

U Myntri kam pohiing jong ka sorkar pdeng u la ong ba ha ka ‘Azadi Ka Amrit Mahotsav’, ngi la bam smai ba shuwa u 2047, ka India kan long ka ri kaba la kiew shaphrang bad kan long ka nongialam ha ka pyrthei ha man ki kam. U la ong ba shuwa u 2047, ka India kan ieng hakhmat ka pyrthei da ka bor ba pura. U la bynrap ba ha man ka kam, ka India kadei ban ialam ia ka pyrthei; kane ka jingangnud jong u Maharshi Aurobindo bad Swami Vivekananda mynta ka sdang ban urlong. U Shah u la ong ban kynthup ia ki samla ha kane ka kam, ka sorkar jong ngi ka la shim bun ki sienjam. U la ong ba u Myntri Rangbah duh Modi udei uba nyngkong ban wanrah ia ka New Education Policy, ha kaba ngi ban jur ban pynneh pynsah ia ki ktien jong ngi bad phaikhmat kyrpang ia ki ktien tynrai. U la bynrap ba lyngba ka New Education Policy, ka jinglong ka pule puthi jong ngi kan dei kaba peit ia ki kam hapoh ka ri bad shabar ka ri, kan plie ki lad ba bun ia ki samla.

U Myntri Kam Pohiing bad Cooperation jong ka sorkar pdeng u la ong ba ka thain shatei lammihngi kalong kaba u Myntri Rangbah duh Narendra Modi bad ka sorkar India ki niewkor bha. U la ong ba ka sorkar India, hapoh ka jingialam jong u Myntri Rangbah duh Modi, ka kut jingmut ym tang ha ka mang tyngka hynrei ruh ha ka roi ka par, ka jingiatylli, bad shongsuk shongsain ha ka thain shatei lammihngi.

U Amit Shah u la ong katba ka Student Parliament kadei ka prokram kaba dei ban ai jingiaroh, kam dei ban long kaba jia tang shisien. Hynrei dei ban wanrah ia ka lad ban pyniadei ia ka Student Parliament bad kiwei kiwei ki kynhun bad ka Vidyarthi Prishad, kaba pynthikna ba baroh ki kynhun jong ki samla ki nohsynniang sha ka bor jong ka ri. U la ban jur ba ka Vidyarthi Prishad ym tangba ka ialam lynti ia ki samla ha ka lynti kaba dei hynrei ka don ka bynta ba kongsan ban saindur ia ka jinglong jong ki. U la iaroh shuh shuh ia ka kynhun ki samla pule kaba heh tam ha pyrthei kaba peit bniah ia ka bha ka miat jong ka ri ha man ki kam, la kadei ka jingiatreilang ha ka por lynshop ki bor ka mariang lane ai jingiarap ha ka por ba don ki jingeh ha ka ri.

U Myntri Kam Pohiing u la iaroh ruh ia ka Students' Experience in Inter-State Living (SEIL) na ka bynta ka jingpyniasoh ia ka thain shatei lammihngi bad ka ri baroh kawei. U la ong ba mynta, palat 4,000 tylli ki longiing ha kylleng ka ri ki dang pdiang ia ki khynnah na ka thain shatei lammihngi, bad ki don jingiadei bad ki lyngba ka SEIL, kaba u ong ka dei kaba don ka bor kaba khraw. U Shah u la iaroh ia ka Vidyarthi Prishad ka dei kaba wanrah ia ka jingtrei shitom, kaba la plie lad ia ki sienjam kum ka SEIL ban bteng bun bun snem.

*****