ശുഭ സായാഹ്നം!

സ്റ്റുട്ട്ഗാർട്ട് ന്യൂസ്9 ഗ്ലോബൽ ഉച്ചകോടിയിൽ പങ്കെടുക്കുന്ന എല്ലാവർക്കും നമസ്കാരം!

മന്ത്രി വിൻഫ്രൈഡ്, മന്ത്രിസഭയിലെ എന്റെ സഹപ്രവർത്തകൻ ജ്യോതിരാദിത്യ സിന്ധ്യ, ഈ ഉച്ചകോടിയിൽ സന്നിഹിതരായ എല്ലാ വിശിഷ്ടരായ മഹതികളേ മാന്യരേ!

ഇന്ന്, ഇൻഡോ-ജർമ്മൻ പങ്കാളിത്തത്തിൽ ഒരു പുതിയ അധ്യായം കൂട്ടിച്ചേർക്കപ്പെടുകയാണ്. ഇന്ത്യയുടെ ടിവി-9 ജർമ്മനിയിലെ വിഎഫ്ബി സ്റ്റുട്ട്ഗാർട്ടുമായും ബാഡൻ- വൂട്ടൻബേർഗുമായി സഹകരിച്ചാണ് ഈ ഉച്ചകോടി സംഘടിപ്പിച്ചത്. ഈ വിവര യുഗത്തിൽ ജർമ്മനിയുമായും അവിടുത്തെ ജനങ്ങളുമായും ബന്ധപ്പെടാൻ ഒരു ഇന്ത്യൻ മാധ്യമ സംഘം ശ്രമിക്കുന്നതിൽ എനിക്ക് സന്തോഷമുണ്ട്. ഭാരതത്തിലെയും ജർമ്മനിയിലെയും ജനങ്ങൾക്കിടയിൽ പരസ്പര ധാരണയ്ക്കുള്ള ഒരു വേദി ഈ സംരംഭം നൽകും. ന്യൂസ്-9 എന്ന ഇംഗ്ലീഷ് വാർത്താ ചാനലിന് തുടക്കം കുറിക്കുന്നതിലും ഞാൻ സന്തുഷ്ടനാണ്.

സുഹൃത്തുക്കളേ,

ഈ ഉച്ചകോടിയുടെ പ്രമേയം "ഇന്ത്യ-ജർമ്മനി: സുസ്ഥിര വളർച്ചയ്ക്കുള്ള ഒരു മാർഗരേഖ" എന്നതാണ്. ഇരു രാജ്യങ്ങളും തമ്മിലുള്ള ഉത്തരവാദിത്ത പങ്കാളിത്തത്തെ ഈ പ്രമേയം പ്രതീകപ്പെടുത്തുന്നു. കഴിഞ്ഞ രണ്ട് ദിവസമായി, സാമ്പത്തിക വിഷയങ്ങളിൽ മാത്രമല്ല, കായിക വിനോദവുമായി ബന്ധപ്പെട്ട വിഷയങ്ങളിലും നിങ്ങൾ വളരെ മാതൃകാപരമായ ചർച്ചകളിൽ ഏർപ്പെട്ടിട്ടുണ്ട്.

സുഹൃത്തുക്കളേ,

ഭൗമരാഷ്ട്രീയ ബന്ധങ്ങളുടെയും വ്യാപാരത്തിന്റെയും നിക്ഷേപത്തിന്റെയും വീക്ഷണകോണിൽ നിന്ന് യൂറോപ്പ് ഭാരതത്തിന് നിർണായകമായ ഒരു തന്ത്രപ്രധാന മേഖലയാണ്. ജർമ്മനി നമ്മുടെ ഏറ്റവും പ്രധാനപ്പെട്ട പങ്കാളികളിൽ ഒന്നാണ്. 2024 ൽ ഇൻഡോ-ജർമ്മൻ തന്ത്രപരമായ പങ്കാളിത്തം 25 വർഷം തികയുന്നു, ഇത് ഈ വർഷത്തിൽ പങ്കാളിത്തത്തിൻ്റെ ചരിത്രപരവും സവിശേഷവുമായ ഒരു നാഴികക്കല്ലാക്കി മാറ്റി. കഴിഞ്ഞ മാസം, ചാൻസലർ ഷോൾസ് മൂന്നാം തവണയും ഭാരതം സന്ദർശിച്ചു. 12 വർഷത്തിനിടെ ആദ്യമായി, ജർമ്മൻ വ്യവസായങ്ങളുടെ ഏഷ്യ-പസഫിക് സമ്മേളനം ന്യൂഡൽഹിയിൽ നടന്നു. ഈ സമ്മേളനത്തിനിടെ, ജർമ്മനി ഫോക്കസ് ഓൺ ഇന്ത്യ രേഖയും ഇന്ത്യയ്‌ക്കായുള്ള നൈപുണ്യ തൊഴിൽ തന്ത്രവും പുറത്തിറക്കി. ജർമ്മനി ഒരു  നിർദ്ദിഷ്ട രാജ്യത്തിനായി വികസിപ്പിച്ചെടുത്ത ആദ്യത്തെ തന്ത്രമാണിത്.

സുഹൃത്തുക്കളേ,

ഇന്ത്യ-ജർമ്മനി തന്ത്രപരമായ പങ്കാളിത്തത്തിന് 25 വർഷം പഴക്കമുണ്ടെങ്കിലും, നമ്മുടെ സാംസ്കാരികവും ബൗദ്ധികവുമായ ബന്ധങ്ങൾ നൂറ്റാണ്ടുകൾ പഴക്കമുള്ളതാണ്. യൂറോപ്പിലെ ആദ്യത്തെ സംസ്കൃത വ്യാകരണ പുസ്തകം ഒരു ജർമ്മൻകാരൻ എഴുതിയതാണ്. തമിഴിലും തെലുങ്കിലും പുസ്തകങ്ങൾ പ്രസിദ്ധീകരിച്ച ആദ്യത്തെ യൂറോപ്യൻ രാജ്യമായി ജർമ്മനി മാറി, അതിന് രണ്ട് ജർമ്മൻ വ്യാപാരികൾക്ക് നന്ദി. ഇന്ന്, ഏകദേശം 300,000 ഇന്ത്യക്കാർ ജർമ്മനിയിൽ താമസിക്കുന്നു. ഏകദേശം 50,000 ഇന്ത്യൻ വിദ്യാർത്ഥികൾ ജർമ്മൻ സർവകലാശാലകളിൽ ചേരുന്നു, ഇത് അവരെ ഇവിടുത്തെ ഏറ്റവും വലിയ വിദേശ വിദ്യാർത്ഥികളുടെ സംഘമായി മാറ്റുന്നു. ഭാരത്-ജർമ്മനി ബന്ധത്തിന്റെ മറ്റൊരു വശം ഭാരതത്തിൽ കാണാം. കഴിഞ്ഞ മൂന്നോ നാലോ വർഷത്തിനിടെ ഏകദേശം 15 ബില്യൺ ഡോളർ നിക്ഷേപിച്ച് 1,800-ലധികം ജർമ്മൻ കമ്പനികൾ ഭാരതത്തിൽ പ്രവർത്തിക്കുന്നു. ഇരു രാജ്യങ്ങളും തമ്മിലുള്ള ഉഭയകക്ഷി വ്യാപാരം ഏകദേശം 34 ബില്യൺ ഡോളറാണ്, വരും വർഷങ്ങളിൽ ഇത് വളരുമെന്ന് എനിക്ക് ഉറപ്പുണ്ട്. സമീപ വർഷങ്ങളിൽ ഭാരതവും ജർമ്മനിയും തമ്മിലുള്ള സ്ഥിരമായി ശക്തിപ്പെടുന്ന പങ്കാളിത്തത്തിൽ നിന്നാണ് ഈ വിശ്വാസം ഉടലെടുത്തത്.

സുഹൃത്തുക്കളേ,

ഇന്ന്, ലോകത്തിലെ ഏറ്റവും വേഗത്തിൽ വളരുന്ന വലിയ സമ്പദ്‌വ്യവസ്ഥയാണ് ഭാരതം. ഓരോ രാഷ്ട്രവും ഭാരതത്തിന്റെ വളർച്ചയ്ക്കായി പങ്കാളികളാകാൻ ആഗ്രഹിക്കുന്നു. ജർമ്മനിയുടെ 'ഇന്ത്യയിൽ ശ്രദ്ധ കേന്ദ്രീകരിക്കുക' എന്ന രേഖ ഇതിന് ഒരു പ്രധാന ഉദാഹരണമാണ്. ഭാരതത്തിന്റെ തന്ത്രപരമായ പ്രാധാന്യം ലോകം മുഴുവൻ എങ്ങനെ അംഗീകരിക്കുന്നുവെന്ന് ഈ രേഖ പ്രതിഫലിപ്പിക്കുന്നു. കഴിഞ്ഞ ദശകത്തിൽ ഭാരതം പിന്തുടർന്ന പരിഷ്കരണം, പ്രകടനം, പരിവർത്തനം എന്നീ മന്ത്രത്തിന്റെ ഫലമാണ് ഈ ധാരണയിലെ മാറ്റം. 21-ാം നൂറ്റാണ്ടിലെ ദ്രുതഗതിയിലുള്ള വളർച്ചയ്ക്ക് തയ്യാറെടുക്കുന്നതിനായി ഭാരതം എല്ലാ മേഖലകളിലും പുതിയ നയങ്ങൾ നടപ്പിലാക്കിയിട്ടുണ്ട്. ഞങ്ങൾ ചുവപ്പുനാട ഒഴിവാക്കി, വ്യാപാരം ചെയ്യുന്നത് സു​ഗമമാക്കുന്നത് മെച്ചപ്പെടുത്തി, 30,000-ത്തിലധികം ചട്ടങ്ങൾ കുറച്ചു. വികസനത്തിന് താങ്ങാനാവുന്നതും സമയബന്ധിതവുമായ മൂലധനം നൽകുന്നതിന് ഭാരത് ബാങ്കിംഗ് സംവിധാനത്തെ ശക്തിപ്പെടുത്തി. കാര്യക്ഷമമായ ഒരു ജിഎസ്ടി ചട്ടക്കൂട് ഉപയോഗിച്ച് ഞങ്ങൾ നികുതി സംവിധാനം ലളിതമാക്കി, വ്യവസായ വളർച്ചയെ പ്രോത്സാഹിപ്പിക്കുന്നതിനായി പുരോഗമനപരവും സ്ഥിരതയുള്ളതുമായ ഒരു നയരൂപീകരണ അന്തരീക്ഷം സൃഷ്ടിച്ചു. ഇന്ന്, 'വികസിത ഭാരതം' (വികസിത ഇന്ത്യ) എന്ന മഹത്തായ കെട്ടിടം നിർമ്മിക്കപ്പെടുന്ന ഒരു ഉറച്ച അടിത്തറയാണ് ഭാരതം സ്ഥാപിച്ചിരിക്കുന്നത്, ഈ യാത്രയിൽ ജർമ്മനി ഒരു വിശ്വസനീയ പങ്കാളിയായി തുടരും.

സുഹൃത്തുക്കളേ,

ജർമ്മനിയുടെ വികസന യാത്രയിൽ നിർമ്മാണവും എഞ്ചിനീയറിംഗും നിർണായക പങ്ക് വഹിച്ചിട്ടുണ്ട്. ഭാരതവും ആഗോളതലത്തിൽ ഒരു പ്രധാന നിർമ്മാണ കേന്ദ്രമായി മാറുന്നതിലേക്ക് നീങ്ങുകയാണ്. 'മെയ്ക്ക് ഇൻ ഇന്ത്യ' സംരംഭത്തിൽ ചേരുന്ന നിർമ്മാതാക്കൾക്ക് ഉൽപ്പാദനവുമായി ബന്ധപ്പെട്ട പ്രോത്സാഹനങ്ങൾ നൽകുന്നുണ്ട്. നമ്മുടെ ഉൽപ്പാദന മേഖല ഗണ്യമായി മാറിയിരിക്കുന്നു എന്ന വസ്തുത പങ്കുവെക്കുന്നതിൽ എനിക്ക് സന്തോഷമുണ്ട്. ഇന്ന്, മൊബൈൽ, ഇലക്ട്രോണിക്സ് നിർമ്മാണത്തിൽ മുൻനിര രാജ്യങ്ങളിലൊന്നാണ് ഭാരതം. ഇന്ന്, ഭാരതം ഏറ്റവും വലിയ ഇരുചക്ര വാഹന നിർമ്മാതാക്കളാണ്, സ്റ്റീൽ, സിമൻറ് എന്നിവയിൽ രണ്ടാമത്തെ വലിയ രാജ്യവും, നാല് ചക്ര വാഹന നിർമ്മാണത്തിൽ നാലാമത്തെ വലിയ രാജ്യവുമാണ്. ഭാരതത്തിന്റെ സെമികണ്ടക്ടർ വ്യവസായവും ആഗോളതലത്തിൽ അതിന്റെ വ്യക്തിമുദ്ര പതിപ്പിക്കാൻ ഒരുങ്ങിയിരിക്കുന്നു. അടിസ്ഥാന സൗകര്യ മെച്ചപ്പെടുത്തൽ, ലോജിസ്റ്റിക്സ് ചെലവ് കുറയ്ക്കൽ, വ്യാപാരം ചെയ്യുന്നത് സു​ഗമമാക്കൽ, സ്ഥിരതയുള്ള ഭരണം എന്നിവയിൽ ശ്രദ്ധ കേന്ദ്രീകരിച്ചുള്ള സ്ഥിരതയുള്ള നയങ്ങളും പുതിയ തീരുമാനങ്ങളുമാണ് ഈ പുരോഗതിക്ക് കാരണമായത്. ഒരു രാജ്യത്തിന്റെ ദ്രുതഗതിയിലുള്ള വികസനത്തിന് ഭൗതിക, സാമൂഹിക, ഡിജിറ്റൽ അടിസ്ഥാന സൗകര്യങ്ങളിൽ നിക്ഷേപം ആവശ്യമാണ്, കൂടാതെ ഭാരതം ഈ മേഖലകളിലെല്ലാം മുന്നേറുകയാണ്. ഇന്ന് ലോകം നമ്മുടെ ഡിജിറ്റൽ സാങ്കേതികവിദ്യയിലെ നിക്ഷേപത്തിന്റെയും നൂതനാശയങ്ങളുടെയും സ്വാധീനം കാണുന്നു. ലോകത്തിലെ ഏറ്റവും സവിശേഷമായ ഡിജിറ്റൽ പൊതു അടിസ്ഥാന സൗകര്യങ്ങളുള്ള ഒരു രാജ്യമാണ് ഭാരതം.

സുഹൃത്തുക്കളേ,

ഇന്ന് ഭാരതത്തിൽ നിരവധി ജർമ്മൻ കമ്പനികളുണ്ട്, അവരുടെ നിക്ഷേപം വിപുലീകരിക്കാൻ ഞാൻ അവരെ ക്ഷണിക്കുന്നു. ഇന്ത്യയിൽ ഒരു അടിത്തറ സ്ഥാപിക്കാൻ ഇതുവരെ തയ്യാറായിട്ടില്ലാത്ത ജർമ്മൻ കമ്പനികളെയും ഞാൻ ക്ഷണിക്കുന്നു. ഡൽഹിയിൽ നടന്ന ജർമ്മൻ കമ്പനികളുടെ ഏഷ്യ-പസഫിക് സമ്മേളനത്തിൽ ഞാൻ പരാമർശിച്ചതുപോലെ, ഭാരതവുമായി പങ്കാളിത്തം സ്ഥാപിക്കാൻ ഇതാണ് ശരിയായ സമയം. ഭാരതത്തിന്റെ ചലനാത്മകതയും ജർമ്മനിയുടെ കൃത്യതയും, ജർമ്മനിയുടെ എഞ്ചിനീയറിംഗും ഭാരതത്തിന്റെ നൂതനത്വവും സംയോജിപ്പിച്ചിരിക്കുന്നു - ഈ കൂട്ടായ പ്രവർത്തനം നമ്മുടെ കൂട്ടായ ലക്ഷ്യമായിരിക്കണം. ലോകത്തിലെ പുരാതന സംസ്കാരങ്ങളിൽ ഒന്നായ ഞങ്ങൾ എല്ലായ്പ്പോഴും ലോകമെമ്പാടുമുള്ള ജനങ്ങളെ സ്വാഗതം ചെയ്യുകയും അവരെ ഞങ്ങളുടെ യാത്രയുടെ ഭാഗമാക്കുകയും ചെയ്തിട്ടുണ്ട്. ലോകത്തിന് ഒരു സമ്പന്നമായ ഭാവി കെട്ടിപ്പടുക്കുന്നതിൽ ഞങ്ങളോടൊപ്പം ചേരാൻ ഞാൻ നിങ്ങളെ ക്ഷണിക്കുന്നു.

നന്ദി!

***

NK