مرکزی وزیر داخلہ اور تعاون جناب امت شاہ نے آج اترا کھنڈ کے ہلدوانی میں منعقدہ 38ویں قومی کھیلوں کی اختتامی تقریب سے بطور مہمان خصوصی خطاب کیا۔ اس موقع پر نوجوانوں کے امور اور کھیلوں کے مرکزی وزیر جناب من سکھ مانڈویہ، اتراکھنڈ کے وزیر اعلیٰ پشکر سنگھ دھامی، میگھالیہ کے وزیر اعلیٰ کونراڈ سنگما اور مرکزی وزیر مملکت جناب اجے ٹمٹا سمیت کئی معززین موجود تھے۔

اپنے خطاب میں مرکزی وزیر داخلہ نے کہا کہ اتراکھنڈ کے ہر ضلع میں کھیلوں کا بنیادی ڈھانچہ فراہم کر کے اور 38ویں قومی کھیلوں کا کامیابی سے انعقاد کر کے وزیر اعلیٰ پشکر سنگھ دھامی جی نے دیو بھومی کو بھی کھیلوں کی زمین بنا دیا ہے۔ انہوں نے کہا کہ دھامی جی کی کوششوں سے دیو بھومی ملک کے کھیلوں کے نقشے پر 21ویں پوزیشن سے 7ویں نمبر پر پہنچ گئی ہے۔ قومی کھیلوں میں بڑی تعداد میں تمغے جیتنے والے اتراکھنڈ کے کھلاڑیوں کو مبارکباد دیتے ہوئے جناب  شاہ نے کہا کہ وہ وہی ہیں جنہوں نے دیو بھومی کو کھیلوں کی سرزمین بنایا ہے۔

وزیر داخلہ اور تعاون نے 38ویں قومی کھیلوں کی آرگنائزنگ کمیٹی اور کھیلوں کی انجمنوں کی تعریف کی اور کہا کہ ان کی کوششوں کی وجہ سے ہی ایک چھوٹی ریاست نے اتنی بلندی پر ان کھیلوں کا کامیابی سے انعقاد کیا۔ انہوں نے کہا کہ اس نیشنل گیمز میں 16 ہزار کھلاڑیوں نے تقریباً 435 کھیلوں کے مقابلوں میں حصہ لیا جن میں کچھ جیتے اور کچھ ہارے۔ جناب شاہ نے کہا کہ کھیلوں کا پیغام جیتنے اور ہار سے مایوس نہ ہونے کا جذبہ ہے۔ انہوں نے کہا کہ ان کھلاڑیوں کیلئے میگھالیہ میں ہونے والے اگلے نیشنل گیمز میں تمغے جیتنے کا ایک اور موقع ہے۔

جناب امت شاہ نے کہا کہ 38ویں قومی کھیلوں میں ماحول دوست طرز عمل سے لے کر ماحول دوست گیم تک سب کچھ لاگو کیا گیا تھا۔ ان کھیلوں میں ویٹ لفٹنگ، شوٹنگ، ایتھلیٹکس سمیت کئی کھیلوں میں قومی ریکارڈز بنائے گئے جس سے بین الاقوامی کھیلوں میں بھی تمغوں کی امیدیں بڑھ گئی ہیں۔ انہوں نے کہا کہ میگھالیہ میں منعقد ہونے والے اگلے قومی کھیلوں کے دوران شمال مشرق کی دیگر ریاستوں میں بھی کچھ کھیلوں کا انعقاد کیا جائے گا تاکہ پورے شمال مشرق میں قومی کھیلوں کی گونج اٹھے۔ انہوں نے کہا کہ اتراکھنڈ اور میگھالیہ جیسی چھوٹی ریاستوں میں کھیلوں کے مقابلوں کا انعقاد کھیلوں کے تئیں ریاستوں کی لگن کو ظاہر کرتا ہے۔

مرکزی وزیر داخلہ اور تعاون نے کہا کہ وزیر اعظم جناب نریندر مودی کے اقدامات کی وجہ سے ملک میں کھیلوں کے ماحول میں کافی تبدیلی آئی ہے۔ مودی جی نے گجرات کے وزیر اعلیٰ کی حیثیت سے ریاست میں 'کھیلو گجرات' مقابلہ شروع کیا تھا اور اس کے بعد سے کھیلوں کے شعبے میں کافی ترقی ہوئی ہے۔ انہوں نے کہا کہ ملک کے کئی اضلاع میں کھیلوں کا بنیادی ڈھانچہ تیار ہوا، کھلاڑیوں اور کوچوں کی حوصلہ افزائی ہوئی اور انتخاب کے عمل میں شفافیت آئی، جس سے دنیا میں ہندوستانی کھیلوں کی ساکھ میں اضافہ ہوا ہے۔

جناب امت شاہ نے کہا کہ ہندوستان میں کھیلوں کا مستقبل روشن ہے۔ انہوں نے کہا کہ مودی جی نے 'فٹ انڈیا' اور 'کھیلو انڈیا' جیسے اقدامات کے ذریعے نوجوانوں کی کھیلوں کی طرف حوصلہ افزائی کی۔ انہوں نے کہا کہ جیتنے کا جذبہ رکھنا، ہار سے مایوس نہ ہونا اور ہار کر بھی اگلے ہی لمحے جیتنے کا جذبہ رکھنے کا نام ہی کھیل ہے۔

مرکزی وزیر داخلہ اور تعاون نے کہا کہ وزیر اعظم جناب نریندر مودی نے ملک کے نوجوانوں میں کھیلوں کے جذبے، کھیلوں سے محبت اور کھیلنے کے جوش کو مضبوط کرنے کے لیے بہت سے اقدامات کیے ہیں۔ انہوں نے کہا کہ مودی جی کی کھیلوں کے تئیں لگن ایسی ہے کہ کھلاڑی انہیں 'کھیل دوست' کہتے ہیں۔

جناب امت شاہ نے کہا کہ جب مودی جی نے 2014 میں ملک کی باگ ڈور سنبھالی تو ملک کا کھیلوں کا بجٹ 800 کروڑ روپے تھا جو 2025-26 میں کھیلوں کا بجٹ بڑھ کر 3800 کروڑ روپے ہو گیا ہے۔ 2014 میں کامن ویلتھ گیمز میں 15 میڈلز ملے تھے، اب ان کی تعداد 26 ہو گئی ہے۔ اسی طرح 2014 میں ایشین گیمز میں 57 میڈلز جیتے تھے جو اب بڑھ کر 107 ہو گئے ہیں۔ اس سے قبل پیرا ایشین گیمز میں 33 تمغہ جیتے تھے جو اب بڑھ کر 111 ہو گئے ہیں۔

مرکزی وزیر داخلہ اور تعاون نے کہا کہ ملک کے کھلاڑیوں نے بین الاقوامی مقابلوں میں ترنگے کا نام روشن کیا ہے۔ انہوں نے کہا کہ اولمپکس اور پیرا اولمپکس میں بھی ہمارے کھلاڑیوں نے کئی گنا زیادہ تمغے جیتے ہیں جس سے ظاہر ہوتا ہے کہ ملک میں کھیلوں کے انفراسٹرکچر، کھیلوں کے ماحول اور جیت کی بھوک میں بہت زیادہ اضافہ ہوا ہے۔

جناب امت شاہ نے کہا کہ آج اتراکھنڈ جیسی پہاڑی ریاست نے اتنی بڑی تقریب کا کامیابی سے انعقاد کیا ہے، جس سے ظاہر ہوتا ہے کہ ہندوستان کی ہر ریاست نہ صرف کھیلنے کے لیے تیار ہے بلکہ اپنے کھیلوں کے بنیادی ڈھانچے کو مضبوط کرنے کے لیے بھی تیار ہے۔ انہوں نے کہا کہ ٹاپس (ٹارگٹ اولمپک پوڈیم اسکیم) کا استعمال کرتے ہوئے ہمارے بہت سے کھلاڑی اولمپکس، ایشین گیمز اور کامن ویلتھ گیمز میں شاندار کامیابی کے لیے تیاری کر رہے ہیں۔ مسٹر شاہ نے کہا کہ ہندوستان- 2036 میں اولمپکس کی میزبانی کے لیے تیار ہے۔ ہم نے اولمپکس کی میزبانی کے لیے اپنا دعویٰ پیش کیا ہے اور ہمیں یقین ہے کہ جب 2036 میں ہندوستان میں اولمپکس منعقد ہوں گے تو اتراکھنڈ میں ہونے والے ان کھیلوں کے میگا ایونٹ میں حصہ لینے والے کھلاڑی تمغے جیت کر ترنگے اور قومی ترانے کی شان بلند کریں گے۔

سال 2019 میں آج کے دن جموں و کشمیر کے پلوامہ میں دہشت گردانہ حملے میں شہید ہونے والے 40 فوجیوں کو خراج عقیدت پیش کرتے ہوئے مرکزی وزیر داخلہ نے کہا کہ ان فوجیوں کی شہادت نے نہ صرف ملک کو محفوظ بنایا بلکہ ان کی شہادت کے بعد مودی جی نے سرحد پار ہوائی حملے کرکے دہشت گردوں کو منہ توڑ جواب دیا۔ انہوں نے کہا کہ اس کی وجہ سے ہندوستان کی طرف دنیا کا نظریہ بدل گیا ہے اور دنیا کے دہشت گردوں کو پیغام گیا ہے کہ کوئی ہندوستان کی سرحدوں اور فوج کے ساتھ گڑبڑ نہیں کرسکتا۔

*******

ش ح۔ ظ ا

UR No.7225