U Myntri Sorkar Pdeng ba dei khmih ia ka tnad Kam Pohiing bad ka tnad Cooperation, Amit Shah u la pyniaid ia ka jingialang jong ka Parliamentary Consultative Committee na ka bynta ka tnad Kam Poh Iing halor ka phang 'Cyber Security and Cyber Crime' ha New Delhi. Ha kane ka jingialang, la wan iashim bynta da u Myntri Khynnah ka tnad Kam Pohiing Nityanand Rai, Bandi Sanjay Kumar, ki dkhot jong ka komiti, u Secretary ka tnd Kam Poh Iing bad ki ophisar na ka tnad Kam Poh Iing. Ka komiti ka la iakren shaphang ki kam bapher bapher kiba iadei bad ka 'Cyber Security and Cyber Crime' ha kane ka jingialang.

Ha ka jingai jingkren, u Myntri ka tnad Kam Pohiing, Amit Shah u la ong ba ha kine ki snem ba la dep, ka la don ka jingkiew jong ki jingdon jingem digital ha India, kaba la ialam sha ka jingkiew ki jingialeh pyrshah lyngba ki lad digital. U la ong ba haba ngi peit ia ka cyberspace, ka wanrah ia ka rynsan kaba bun bynta jong ka ‘software, ki jingai jingshakri bad ki nongpyndonkam’. U la ong ba lada ngim peit ia ka jingtehlakam ia ki kam cyber beain lyngba ka ‘software, ki jingai jingshakri bad ki nongpyndonkam’, yn ym lah ban pynbeit ia ki jingeh ha ka cyberspace. U Shah u al ong ruh ba hapoh ka jingialam jong u Myntri Rangbah Duh Narendra Modi, ka tnad Kam Pohiing ka la shim ia ki sienjam ban pynlong ia ka India kum ka ri kaba shngain ha ki kam cyber.

U Amit Shah u la ong ba ki kam cyber beain kim khein ia u pud u sam. U la ong ba kane ka dei ka kam beain ka bym khein ia u pud u sam. U la ong ruh ba ka India ka la sakhi ia ka jingkylla ha ki kam digital ha kine ki shiphew snem ba la dep. Lada ngim sngewthuh ia ka jingiar jong ka jingkylla ha ki kam digital, ngin ym lah ban pynbeit ia ki jingeh ha ki kam cyber.

U Myntri u la ong ba mynta, 95 % ki shnong ha ka ri ki la iasoh lyngba ki lad digital, bad shi lak tylli ki gram panchayat ki don ia ki Wi-Fi hotspot. Ha kine ki shiphew snem ba la dep, ki briew kiba pyndonkam ia ka internet ki la kiew da 4.5 shah. U la ong ba ha u 2024, 246 tylli ki jingsiew jingdiah kiba kot sha ka T 17.221 lak klur ki dei kiba la pyndep lyngba ka UPI. Ha u 2024, 48% na ki jingsiew lyngba ki lad digital ha ka pyrthei ki dei kiba la leh ha India. Ha u 2023, ka bynta jong ka ioh ka kot digital ha ka Gross Domestic Product (GDP) ka long kumba T 32 lak klur, kaba long 12 % bad la wanrah 15 million tylli ki lad ioh kam.

U Amit Shah u la ong ba mynta ka India ka dei ka ri kaba lai ha ka jingheh ha ka pyrthei ha kaba iadei bad ka kam digital. Ka ioh ka kot na ki kam digital ka don  ka bynta kaba 20% jong baroh ka ioh ka kot jong ka India. U la ong ruh ba ka thong jong ka tnad Kam Poh Iing ka dei ban pynthikna ba ym don ki kam cyber beain bad ki FIR kiba iadei bad kine ki jait kam beain.

U Myntri u la ong ba khnang ban ialeh pyrshah ia ki kam cyber beain, ngi la pdiang ia saw jait ki rukom treikam kiba kynthup ia ka Iasngoh kti lang, Iatrei lang, Iakren bad ka Jingkyntiew ia ka Bor Treikam. La pyntreikam lut ia kine da ka jing thmu kaba shai. U la ong ba la pynkhlain ia ka jingiatreilang hapdeng ki bynta bapher bapher hapoh ka tnad Kam Pohiing, kaba pynthikna ia ki lad iakren ba suk bad ka jingpynbiang ia ka jingai jingtip kaba sted.

U Amit Shah u la ong ba ka jingiasam jingtip hapdeng ka tnad Kam Pohiing, ka tnad Electronics and IT, CERT-IN, I4C, bad ki tnad kum ka Telecom bad Banking ka la plie lad ban ialeh pyrshah ia ki kam cyber beain bapher bapher.

U Myntri u la ban jur halor ka jingdonkam ban ai jingtip ia ki paidbah ban lait na ki kam cyber beain bad u la kyntu ia baroh ki dkhot jong ka komiti ba kin bteng ban kyntiew ia ka I4C helpline number 1930. U la ong ba namar ki kam thok pisa lyngba ki kam cyber, ka '1930' ka ai ia ka lad ban ioh ia ki jingshakri bapher bapher kum ka jing block ia ki card.

U Amit Shah u la ong ba ka kam ka dang iaid shakhmat ban pyndonkam ia ka Artificial Intelligence ban lap ia ki account ba don jingma, ha ka jingiatreilang bad ka Reserve Bank bad baroh ki bank ban wanrah ia ka rukom treikam ban lap ia kine ki account. U la ong ba ngin pynthikna ban khang ia ki account ba don jingma shuwa ban lah ban pyndonkam ia kine. U Myntri u la ong ba ka Sorkar ka la pynthikna ruh ba ki briew ki tip shaphang ka jingong jong u Myntri Rangbah Duh Narendra Modi ban ‘Sangeh – Pyrkhat – Shim Iaki Sienjam’ khnang ba kin kham husiar ia ki kam cyber beain.

U Myntri u la ong la ioh 1 lak 43 hajar tylli ki FIR ha ka rynsan I4C, bad ba palat 19 klur ngut ki briew ki la pyndonkam ia kane ka rynsan. U la ong ba namar ki daw kiba iadei bad ka jingshngain jong ka ri, la block 805 tylli ki app bad 3.266 tylli ki link sha ki website katkum ki jingai jingmut ka I4C. Shuh shuh, 399 tylli ki bank bad ki kynhun kiba iadei bad ka kam pisa ki la iasoh lang bad kane. La ai jingtip shaphang palat 6 lak tylli ki data point kiba artatien, la lap 19 lak tylli ki account ba don jingma bad la tehlakam ia ki jingsiew jingdiah kiba artatien kiba kot sha ka T 2,038 klur.

U Amit Shah u la ong ba la sdang ia ki Cyber Crime Forensic Training Lab ha 33 tylli ki Jylla bad ki Union Territory. Ha ka rynsan 'CyTrain', ka rynsan "Massive Open Online Course (MOOC)" la kyntiew kyrteng ia 101,561 ngut ki ophisar pulit bad la ai palat 78,000 tylli ki syrnot.

Ki dkhot jong ka komiti ki la ai ia ki jingmut jong ki ha ki kam kiba iadei bad ka 'Cyber Security and Cyber Crime' bad ki la iaroh ia ki sienjam ba ka Sorkar ka la shim ban kyntiew ia ka jingshngain ha ka kam cyber.

***