Ka Mang Tyngka 2025-26 jong ka sorkar pdeng ka la ithuh ia ka kam jngoh kai kum ka kam na ka bynta ka roi ka par kaba wan na ka jingioh kam. Ha ka jingwanrah ia ka Mang Tyngka ha iing dorbar thawain Parliament mynta ka sngi, ka Myntri Kam Pla Tyngka Nirmala Sitharaman ka la ong ba ka jingplie lad ia ka roi ka par kaba wan na ka jingioh kam ka kynthup ka jingpynlong ia ki prokram kyntiew ia ki sap treikam na ka bynta ki samla ha ka kam ba iadei bad ki jaka sah briew, ki jingioh ram MUDRA na ka bynta ki homestay, kyntiew ka jingsuk ka leit ka wan bad jingpyniasoh ia ki jaka jngoh kai, ka jingsdang ia ki e-visa bad ka jingai jingsiew katkum ka jinglah treikam sha ki jylla.

Ka la ong yn kyntiew ia 50 tylli ki jaka jngoh kai ba hakhmat jong ka ri ha ka jingiatreilang bad ki jylla lyngba ka jingiakhun. Ka Mang tyngka ka la bynrap ba ka jaka ban shna ia ki jingdon jingem ba kongsan ba kynthup ki hotel yn hap ban pynbiang da ki jylla bad ki hotel ha kito ki jaka yn kynthup ha ki jingdon jingem HML. Ka Myntri ka la ong ba yn phaikhmat kyrpang ha ki jaka kiba kongsan ha ka jingngeit bad ka niam bad kan don ka jingphaikhmat kyrpang ha ki jaka ba iadei bad ka jingim bad ki por jong u Blei Buddha. Ha ka jingai jingkren jong ka, ka Nirmala Sitharaman ka la ong ba yn kyntiew ia ka kam jngoh kai kaba iadei bad ka jingsumar bad ka Heal in India ha ka jingiatreilang bad ki kynhun shimet ryngkat ka jingtbit treikam bad ki kyndon ba suk ban ioh visa.

Ka Gyan Bharatam Mission

Ka Myntri Kam Pla Tyngka ka la ong ba ka jinglum bad pynneh pynsah ia ki jingthoh barim jong ngi bad ki jaka pule, ki museum, ki library bad ki kynhun shimet kiba lum yn sdang ban kynthup palat 1 klur ki jingthoh barim. Ka la bynrap ba ka sorkar kan plie ia ka National Digital Repository of India na ka bynta ka jingsam jingtip.

*****