Ka jingbei tyngka ha ka kor kaba lai jong ka roi ka par ka kynthup ka jingbei tyngka ha ki briew, ka jingbei tyngka ha ka ioh ka kot bad ka jingbei tyngka ha ka jingsaindur thymmai, la ong ka Myntri Sorkar Pdeng ba dei khmih ia ka Tnad Kam Pla Tyngka, Nirmala Sitharaman ha ka jingwanrah ia ka Mang Tyngka 2025-26 jong ka sorkar pdeng ha iing dorbar thawain Parliament mynta ka sngi.

Kum shi bynta ka jingbei tyngka ha ki briew, ka Mang Tyngka 2025-26 jong ka sorkar pdeng ka tyrwa ban kyntiew ia ki kyndon jingpynlut pisa na ka bynta ka jingkyrshan ia ka bam kaba tei hapoh ka Saksham Anganwadi bad ka Poshan 2.0 programme. Ka prokram ka ai jingkyrshan na ka bynta ka bam kaba tei ia palat 8 klur ki khynnah, 1 klur ki longkmie kiba armet bad kiba longkmie kiba dang ai buin ha kylleng ka ri, bad kumba 20 lak ki khynnah kynthei kiba dang khie samla ha ki aspirational distrik bad ka thain shatei lammihngi.

Ka Myntri Kam Pla Tyngka jong ka sorkar pdeng, ha ka jingai jingkren jong ka halor ka Mang Tyngka, ka la pynbna ban plie ia ki Day Care Cancer Centre ha baroh ki hospital ha ki distrik ha ki 3 snem ban wan. 200 tylli ki Centre yn plie ha u 2025-26. Ka mang tyngka ka la ban jur ruh ba ha u snem ban wan, yn bynrap shuh shuh sa 10,000 tylli ki seat ha ki medical college bad hospital, na ka bynta ka thong ban wanrah sa 75,000 tylli ki seat ha ki 5 snem ban wan.

Ka Myntri Kam Pla Tyngka ka la pyntip ba yn kyntiew Medical Tourism bad ka Heal in India ha ka jingiatreilang bad ki kynhun shimet ryngkat ka jingtbit treikam bad ki kyndon ba suk ban ioh visa.

Ka jingpyllait khajna halor ka jingwanrah ia ki dawai

Ban iarap ia ki nongpang, khamtam kito kiba pang cancer, ki jingpang ba kham niar bad kiwei kiwei ki jingpang kiba iaineh, ka Myntri Sorkar pdeng ka la tyrwa ban bynrap 36 tylli ki dawai ba kongsan bad ki dawai ha ka thup jong ki dawai ba lait na ka Basic Customs Duty (BCD).

Ka Myntri Kam Pla Tyngka ka la tyrwa ruh ban bynrap 6 tylli ki dawai ba kongsan ha ka thup kaba ioh ia ka jingpynduna ia ka customs duty kaba 5%. Ka jingpyllait pura bad ka jingpynduna bai duty kan treikam ia ki dawai ba donkam ban shna ia kine halor.

Ka Mang Tyngka ka la ban jur ruh ba ki dawai hapoh ka Patient Assistance Programmes ba pyniaid da ki kompani shna dawai ki lait pura na ka BCD, lada ki dawai kidei kiba la pynpoi ei sha ki nongpang. Ka Mang Tyngka ka la tyrwa ban bynrap sa 37 tylli ki dawai ryngkat bad 13 tylli ki prokram ba thymmai ba ai jingiarap ia ki nongpang.

****