U Myntri Rangbah Duh, Narendra Modi u la ai jingkren sha ki lad pathai khubor shuwa ban sdang ka samoi mang tyngka jong u snem 2025 ha iingdorbar thawain Parliament mynta ka sngi. Da kaba ai jingsngewnguh ia ka Blei Lakshmi, ka Blei jong ka jingriewspah, u Myntri Rangbah Duh u la ong ba mynta ka sngi, haba sdang ka samoi mang tyngka, ka long ka dustur ban kynmaw ia ka Blei Lakshmi, kaba ai ia ka jingshemphang, ka jingriewspah bad ka bha ka miat. U la duwai ia ka Blei Lakshmi ba kan ai ki jingkyrkhu ba kyrpang jong ka ia kiba duk ba suk bad kiba pdeng ka jingioh ha ka ri.

Da kaba ong ba ka India ka la dap 75 snem kum ka Republic, u Modi u la ong ba kane ka jingjop ka don ka bynta kaba kyrpang ha ka synshar paidbah jong ka pyrthei, namar ka pyni ia ka bor bad ka bynta jong ka India.

U la ai jingsngewnguh ia ki briew jong ka ri kiba la aiti ha u ka jingbahkhlieh ban tei ia ka Sorkar ha ka sien kaba lai, bad u la ong ba kane ka dei ka mang tyngka kaba pura kaba nyngkong jong ka samoi ba lai jong u da kaba bynrap ba u ngeit skhem ba shuwa u snem 2047, haba ka India ka rakhe ia ka jingdap 100 snem ka jingioh jinglaitluid, ka ri kan pynurlong ia ka thong ban long ka ri kaba la kiew shaphrang. U la ban jur ba kane ka samoi mang tyngka kan wanrah ia ka jingskhem jingmut bad ka bor ba thymmai, ka ban pynthikna ba 140 klur ngut ki briew jong ka ri kin iatreilang ban pynurlong ia kane ka jingthmu. U Myntri Rangbah Duh u la ong ba ha ka samoi kaba lai, ka Sorkar ka iaid shakhmat ha ka rukom treikam kaba kyrpang na ka bynta ka roi ka par kaba pura, la ka dei ha ka jaka, ka imlang sahlang ne ka ioh ka kot. U la ong ba ka jingsaindur thymmai, ka jingai bynta lang ia baroh, bad ka jingbei tyngka ki dei ka nongrim jong ka kam jong ka ri kaba iadei bad ka ioh ka kot. U Modi u la ong ba kin don ki jingiakren shaphang katto katne ki bill bad ki jingtyrwa kiba kongsan ha kane ka samoi, ka ban ialam sha ka jingwanrah ia ki ain ki ban pynkhlain ia ka ri. U la kren shaphang ka jingkongsan jong ka jingwanrah biang ia ka burom jong ki longkmie, ka jingpynthikna ia ka hok jong baroh ki longkmie, kiba lait na ki jingiapher namar ka niam ne ka jaitbynriew. U la ong ba yn shim ia ki rai kiba heh ha kane ka samoi ban pynurlong ia kane ka thong. U Myntri Rangbah Duh u la kdew sha ka jingkongsan jong ka jingpynbeit, ka jingtrei bad ka jingpynkylla ban ioh ia ka roi ka par kaba sted. U la ong ba ka Sorkar Pdeng bad ki Sorkar Jylla ki dei ban iatreilang ban pynurlong, bad ba ka jingiashim bynta ki paidbah kan ialam sha ka jingkylla.

Da kaba ban jur ba ka India ka dei ka ri kaba dang samla kaba don ka bor kaba khlain jong ki samla, u Myntri Rangbah Duh u la ong ba ki samla kiba hapdeng 20-25 snem mynta ki dei ki ban ioh bun tam ki jingmyntoi jong ka India kaba la kiew shaphrang haba ki dap 45-50 snem. Kin don ha ki bynta ba kongsan jong ka jingthaw polisi bad kin ialam lynti ia ka India kaba la kiew shaphrang sha ki spah snem ban wan. U Myntri Rangbah Duh u la ong ba ki sienjam ban pynurlong ia ki jingkut jingmut na ka bynta ka India kaba la kiew shaphrang kin long ki jingai sngewbha kiba heh ia ki samla mynta. U la pyniahap ia kane bad ki samla kiba la iakhun na ka bynta ka jinglaitluid ha ki snem 1930 bad 1940, ha kaba ki sienjam jong ki ki la ialam sha ka jingrakhe ia ka jinglaitluid hadien 25 snem. Kumjuh kine ki 25 snem ban wan ki dei ki ban aiti sha ka jingpynurlong ia ka India kaba riewspah bad kaba la kiew shaphrang, u la ong. U Myntri Rangbah Duh u la kyntu ia baroh ki MP ba kin noh synniang ha kane ka samoi mang tyngka mynta sha ka jingpynkhlain ia ka jingthmu ban ioh ia ka India kaba la kiew shaphrang. U la ong ba kane ka dei ka kabu ksiar ia ki MP ba dang samla, namar ka jingiashim bynt jong ki bad ka jingsngewthuh ha ka Iing Dorbar Thaw Ain kan plie lad ia ki ban sakhi ia ki jingmyntoi jong ka India kaba la kiew shaphrang.

U Myntri Rangbah Duh u la ong ba u kyrmen ba kane ka samoi mang tyngka kan pynurlong ia ki jingthrang jong ka ri. U la ong ba phewse kane ka dei ka samoi jong ka Parliament kaba nyngkong naduh u snem 2014 ha kaba ym don ki jingpynthut nabar ka ri shuwa ban sdang ka samoi. U Myntri Rangbah Duh u la ong ba ha kine ki 10 snem ba la dep, ki la don beit ki jingpyrshang ban pynkulmar shwa ban sdang ki samoi bad ba ki bun ki briew kiba kwah ban pynshit shuh shuh. Hynrei, u la ong ba kane ka dei ka samoi kaba nyngkong ha kine ki shiphew snem ba la dep ba ym shym la don kine ki jait jingpynkulmar nabar ka ri.

***