ಮುಂಬರುವ ವೇವ್ಸ್ (ವರ್ಲ್ಡ್ ಆಡಿಯೋ ವಿಷುಯಲ್ ಅಂಡ್ ಎಂಟರ್ಟೈನ್ಮೆಂಟ್ ಸಮ್ಮಿಟ್) ಭಾರತದ ಸೃಜನಶೀಲ ಸಾಮರ್ಥ್ಯಕ್ಕೆ ಹೊಸ ಜಾಗತಿಕ ಗುರುತನ್ನು ನೀಡುತ್ತದೆ ಎಂದು ಭಾರತದ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಹೇಳಿದರು. ಭುವನೇಶ್ವರದಲ್ಲಿ ಉತ್ಕರ್ಷ್ ಒಡಿಶಾ – ಮೇಕ್ ಇನ್ ಒಡಿಶಾ ಕಾನ್ಕ್ಲೇವ್‌ ಉದ್ದೇಶಿಸಿ ಮಾತನಾಡಿದ ಅವರು, ವೇವ್ಸ್‌ ನಂತಹ ಪ್ರಮುಖ ಕಾರ್ಯಕ್ರಮಗಳು ಗಮನಾರ್ಹ ಆದಾಯವನ್ನು ಗಳಿಸುವುದು ಮಾತ್ರವಲ್ಲದೆ ಗ್ರಹಿಕೆಗಳನ್ನು ಸೃಷ್ಟಿಸುತ್ತವೆ ಮತ್ತು ಆರ್ಥಿಕತೆಯನ್ನು ಹೆಚ್ಚಿಸುತ್ತವೆ ಎಂದು ಹೇಳಿದರು. ಭಾರತದ ಬೃಹತ್ ಸೃಜನಶೀಲ ಪ್ರತಿಭೆಯನ್ನು ಬಳಸಿಕೊಳ್ಳಲು ಮತ್ತು ಮಾಧ್ಯಮ ಮತ್ತು ಮನರಂಜನಾ ವಲಯದಲ್ಲಿ ರಾಷ್ಟ್ರವನ್ನು ಜಾಗತಿಕ ನಾಯಕನಾಗಿ ಇರಿಸಲು ಇಂತಹ ಉಪಕ್ರಮಗಳ ಅಪಾರ ಸಾಮರ್ಥ್ಯವನ್ನು ಅವರು ಒತ್ತಿ ಹೇಳಿದರು.

ವೇವ್ಸ್ 2025: ಸಮಕಾಲೀನ ಸೃಜನಶೀಲತೆಯೊಂದಿಗೆ ಭಾರತದ ಕಾಲಾತೀತ ಸಂಪ್ರದಾಯಗಳನ್ನು ಸಂಪರ್ಕಿಸುವುದು

ವೇವ್ಸ್ 2025 ಭಾರತದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆ ಮತ್ತು ಆಧುನಿಕ ಸೃಜನಶೀಲತೆಯ ಅನನ್ಯ ಸಂಗಮವನ್ನು ಪ್ರಸ್ತುತಪಡಿಸುತ್ತದೆ, ಶಾಸ್ತ್ರೀಯ ಮತ್ತು ಅರೆ-ಶಾಸ್ತ್ರೀಯ ಸಂಗೀತದ ಸೃಷ್ಟಿಕರ್ತರಿಂದ ಹಿಡಿದು ಇಡಿಎಂನ ಆಧುನಿಕ ಸಂಗೀತದ ರಚನೆಕಾರರು ಮತ್ತು ಖಾದಿಯ ನವೀನ ಜಾಹೀರಾತು ವೃತ್ತಿಪರರು, ವಿನ್ಯಾಸಕರು ಮತ್ತು ರಚನೆಕಾರರಿಗೆ ವೇದಿಕೆಗಳನ್ನು ಒದಗಿಸುತ್ತದೆ.

ಹಿಂದಿನ ಮತ್ತು ವರ್ತಮಾನದ ಈ ಕ್ರಿಯಾತ್ಮಕ ಮಿಶ್ರಣವು ಭಾರತದ ಸಾಂಪ್ರದಾಯಿಕ ಸಂಗೀತ ಪರಂಪರೆಯನ್ನು ಆಚರಿಸುವ ವಾಹ್ ಉಸ್ತಾದ್, ಆಧುನಿಕ ಜಾಗತಿಕ ಸಂಗೀತದ ಪ್ರವೃತ್ತಿಯನ್ನು ಅನುರಣಿಸುವ ಇಡಿಎಂ ಚಾಲೆಂಜ್ ಮತ್ತು ಮೇಕ್ ದಿ ವರ್ಲ್ಡ್ ವೇರ್ ಖಾದಿ ಮುಂತಾದ ಸವಾಲುಗಳು ಉದಾಹರಣೆಯಾಗಿವೆ. ಇದು ಭಾರತದ ಐಕಾನಿಕ್‌ ಫ್ಯಾಬ್ರಿಕ್‌ ಅನ್ನು ಸುಸ್ಥಿರ ಫ್ಯಾಷನ್‌ ನ ಜಾಗತಿಕ ಸಂಕೇತವಾಗಿ ಮರುರೂಪಿಸಲು ಪ್ರಯತ್ನಿಸುತ್ತದೆ. ಈ ಮೂರು ಸವಾಲುಗಳನ್ನು ಶ್ರೀ ಅಶ್ವಿನಿ ವೈಷ್ಣವ್ ಅವರು ಜನವರಿ 27, 2025 ರಂದು ವೇವ್ಸ್ ಬಜಾರ್ ಮತ್ತು ವೇವ್ಸ್ ಅವಾರ್ಡ್‌ ಗಳ ಜೊತೆಗೆ ಪ್ರಾರಂಭಿಸಿದರು, ಅಲ್ಲಿ ಅವರು ಕಂಟೆಂಟ್‌ ರಚನೆಯಲ್ಲಿ ಭಾರತವು ಜಾಗತಿಕ ರಾಜಧಾನಿಯಾಗಲು ಸಹಾಯ ಮಾಡುವಂತೆ ರಚನೆಕಾರರನ್ನು ಒತ್ತಾಯಿಸಿದರು.

ಜನವರಿ 27, 2025 ರಂದು 'ವಾಹ್ ಉಸ್ತಾದ್' ಮತ್ತು ವೇವ್ಸ್ ಅವಾರ್ಡ್ಸ್ ಸೇರಿದಂತೆ ವೇವ್ಸ್ ಬಜಾರ್-ಗ್ಲೋಬಲ್-ಇ-ಮಾರ್ಕೆಟ್‌‌ ಪ್ಲೇಸ್ ವೇವ್ಸ್ ಸಿಐಸಿ ಚಾಲೆಂಜ್ ಬಿಡುಗಡೆ ಸಮಾರಂಭದಲ್ಲಿ ಶ್ರೀ ಅಶ್ವಿನಿ ವೈಷ್ಣವ್ ಸಭಿಕರನ್ನು ಉದ್ದೇಶಿಸಿ ಮಾತನಾಡಿದರು

ಒಟ್ಟಾರೆ, ಈ ಉಪಕ್ರಮಗಳು ಕಂಟೆಂಟ್ ರಚನೆಕಾರರಿಗೆ ತಮ್ಮ ಪ್ರತಿಭೆ, ಸಂಪ್ರದಾಯ ಮತ್ತು ನಾವೀನ್ಯತೆಯನ್ನು ಪ್ರದರ್ಶಿಸಲು ಮತ್ತು ಭಾರತದ ಸಾಂಸ್ಕೃತಿಕ ಮತ್ತು ಸೃಜನಾತ್ಮಕ ಪುನರುಜ್ಜೀವನಕ್ಕೆ ಕೊಡುಗೆ ನೀಡಿ ಮನ್ನಣೆಯನ್ನು ಪಡೆಯಲು ಸಾಟಿಯಿಲ್ಲದ ಅವಕಾಶಗಳನ್ನು ಒದಗಿಸುತ್ತವೆ. ಈ ಸವಾಲುಗಳು ಒಟ್ಟು 31 ಕ್ರಿಯೇಟ್ ಇನ್ ಇಂಡಿಯಾ ಸವಾಲುಗಳ ವೈವಿಧ್ಯಮಯ ಶ್ರೇಣಿಯನ್ನು ಹೊಂದಿವೆ, ವಿವಿಧ ಪ್ರಕಾರಗಳಲ್ಲಿ ಕಂಟೆಂಟ್ ರಚನೆಕಾರರಿಗೆ ತಮ್ಮ ಪ್ರತಿಭೆಯನ್ನು ಪ್ರದರ್ಶಿಸಲು ವೇದಿಕೆಯನ್ನು ಒದಗಿಸುತ್ತವೆ.

ಹೊಸ ಸವಾಲುಗಳ ಬಗ್ಗೆ

ವಾಹ್ ಉಸ್ತಾದ್: ಭಾರತದ ಗುಪ್ತ ಸಂಗೀತ ರತ್ನಗಳನ್ನು ಅನ್ವೇಷಿಸುವ ರಿಯಾಲಿಟಿ ಶೋ

ವಾರ್ತಾ ಮತ್ತು ಪ್ರಸಾರ ಸಚಿವಾಲಯವು, ಸಂಸ್ಕೃತಿ ಸಚಿವಾಲಯ ಮತ್ತು ದೂರದರ್ಶನದ ಸಹಯೋಗದೊಂದಿಗೆ, ವೇವ್ಸ್ 2025 ರ ಪ್ರಮುಖ ಉಪಕ್ರಮವಾದ ಕ್ರಿಯೇಟ್ ಇನ್ ಇಂಡಿಯಾ ಚಾಲೆಂಜಸ್ ಅಡಿಯಲ್ಲಿ ವಾಹ್ ಉಸ್ತಾದ್ ಎಂಬ ಅಸಾಮಾನ್ಯ ಶಾಸ್ತ್ರೀಯ ಮತ್ತು ಅರೆ-ಶಾಸ್ತ್ರೀಯ ಸಂಗೀತ ಪ್ರತಿಭೆ ಹುಡುಕಾಟವನ್ನು ಪ್ರಾರಂಭಿಸಿದೆ. ಹಿಂದೂಸ್ತಾನಿ, ಕರ್ನಾಟಕ ಮತ್ತು ಭಾವಪೂರ್ಣ ಸೂಫಿ ಸಂಗೀತದ ಅಸಾಧಾರಣ ಪ್ರತಿಭೆಯನ್ನು ಪೋಷಿಸುವುದು ಮತ್ತು ಭಾರತದ ಶ್ರೀಮಂತ ಸಂಗೀತ ಪರಂಪರೆಯನ್ನು ಸಂರಕ್ಷಿಸುವುದು ಮತ್ತು ಉತ್ತೇಜಿಸುವುದು ಇದರ ಉದ್ದೇಶವಾಗಿದೆ.

ಪ್ರತಿಷ್ಠಿತ "ದಿಲ್ಲಿ ಘರಾನಾ" ದ ಪರಿಣತಿಯೊಂದಿಗೆ ರೂಪಿಸಲಾದ ವಾಹ್ ಉಸ್ತಾದ್ 18 ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಯುವ, ಶಾಸ್ತ್ರೀಯ ತರಬೇತಿ ಪಡೆದ ಗಾಯಕರಿಗೆ ವೇದಿಕೆಯಾಗಿದೆ. ಜಾಗತಿಕ ಭಾಗವಹಿಸುವಿಕೆಗೆ ಮುಕ್ತವಾಗಿರುವ ಈ ಕಾರ್ಯಕ್ರಮವು ಹಿಂದೂಸ್ತಾನಿ ಅಥವಾ ಕರ್ನಾಟಕ ಸಂಗೀತ, ಸೂಫಿ ಗಾಯನ ಮತ್ತು ಅರೆ-ಶಾಸ್ತ್ರೀಯ ಶೈಲಿಗಳಲ್ಲಿ ಉತ್ಸಾಹವನ್ನು ಹೊಂದಿರುವ ಪ್ರತಿಭಾವಂತ ವ್ಯಕ್ತಿಗಳಿಂದ ಅರ್ಜಿಗಳನ್ನು ಆಹ್ವಾನಿಸುತ್ತದೆ.

ಭಾಗವಹಿಸುವವರ ಪ್ರಯಾಣವು ಈಗಾಗಲೇ ದಿಲ್ಲಿ ದರ್ಬಾರ್ ಪೋರ್ಟಲ್ ಮೂಲಕ ಆನ್‌ಲೈನ್ ನೋಂದಣಿಗಳೊಂದಿಗೆ ಪ್ರಾರಂಭವಾಗಿದೆ. ಇದು ಪ್ರಾದೇಶಿಕ ಆಡಿಷನ್‌ ಗಳು, ವಿಷಯಾಧಾರಿತ ಸಂಚಿಕೆಗಳು ಮತ್ತು ಅಂತಿಮವಾಗಿ ಮುಂಬೈನಲ್ಲಿ ವೇವ್ಸ್ 2025 ರಲ್ಲಿ ಗ್ರಾಂಡ್ ಫಿನಾಲೆಯಲ್ಲಿ ಕೊನೆಗೊಳ್ಳುತ್ತದೆ. ಅಗ್ರ ಐದು ಅಂತಿಮ ಸ್ಪರ್ಧಿಗಳು ಪ್ರತಿಷ್ಠಿತ ಪ್ರಶಸ್ತಿಗಾಗಿ ಸ್ಪರ್ಧಿಸುತ್ತಾರೆ, ವಿಜೇತರು ನಗದು ಬಹುಮಾನ, ಮಾರ್ಗದರ್ಶನ ಅವಕಾಶಗಳು, ರೆಕಾರ್ಡಿಂಗ್ ಒಪ್ಪಂದಗಳು ಮತ್ತು ರಾಷ್ಟ್ರವ್ಯಾಪಿ ಮನ್ನಣೆಯನ್ನು ಪಡೆಯುತ್ತಾರೆ.

ದೂರದರ್ಶನದಲ್ಲಿ 26 ಸಂಚಿಕೆಗಳು ಪ್ರಸಾರವಾಗಲಿದ್ದು, ವಾಹ್ ಉಸ್ತಾದ್ ಭಾರತದ ಸಾಂಸ್ಕೃತಿಕ ಪರಂಪರೆಯನ್ನು ಆಚರಿಸುವ ಜೊತೆಗೆ ಮುಂದಿನ ಪೀಳಿಗೆಯ ಸಂಗೀತಗಾರರಿಗೆ ಸ್ಫೂರ್ತಿ ನೀಡಲಿವೆ. ಆಧುನಿಕ ತಂತ್ರಜ್ಞಾನದೊಂದಿಗೆ ಸಾಂಪ್ರದಾಯಿಕ ಪರಿಣತಿಯನ್ನು ಸಂಯೋಜಿಸುವ ಕಾರ್ಯಕ್ರಮವು ಶಾಸ್ತ್ರೀಯ ಸಂಗೀತದ ಭಾವಪೂರ್ಣ ಮೋಡಿ ಮತ್ತು ಇಂದಿನ ಜಗತ್ತಿನಲ್ಲಿ ಅದರ ಪ್ರಸ್ತುತತೆಯನ್ನು ಎತ್ತಿ ತೋರಿಸುತ್ತದೆ.

ಅನುರಣನ: ಇಡಿಎಂ ಚಾಲೆಂಜ್

ಎಲೆಕ್ಟ್ರಾನಿಕ್ ಸಂಗೀತದ ಈ ರೀತಿಯ ಮೊದಲ ಜಾಗತಿಕ ಆಚರಣೆಯಲ್ಲಿ, ಅನುರಣನ: ಇಡಿಎಂ ಚಾಲೆಂಜ್ ವಿಶ್ವ ಆಡಿಯೋ ವಿಷುಯಲ್ ಮತ್ತು ಎಂಟರ್‌ಟೈನ್‌ಮೆಂಟ್ ಶೃಂಗಸಭೆಯ (ವೇವ್ಸ್) ಉದ್ಘಾಟನಾ ಸಮಾರಂಭದಲ್ಲಿ ಕೇಂದ್ರ ಸ್ಥಾನವನ್ನು ತೆಗೆದುಕೊಳ್ಳುತ್ತದೆ. ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಸಹಯೋಗದೊಂದಿಗೆ ಇಂಡಿಯನ್ ಮ್ಯೂಸಿಕ್ ಇಂಡಸ್ಟ್ರಿ (ಐಎಂಐ) ಆಯೋಜಿಸಿರುವ ಈ ಚಾಂಲೆಂಜ್‌ ಫ್ಯೂಷನ್‌ ಸಂಗೀತ, ಎಲೆಕ್ಟ್ರಾನಿಕ್ ಸಂಗೀತ ಮತ್ತು ಡಿಜೆಂಗ್‌ ನ ರೋಮಾಂಚಕ ಕಲೆಯ ಜಾಗತಿಕ ಕೇಂದ್ರವಾಗಿ ಭಾರತದ ಸ್ಥಾನವನ್ನು ಬಲಪಡಿಸುವ ಗುರಿಯನ್ನು  ಹೊಂದಿದೆ.

ನೀವು ಡಿಜಿಟಲ್ ಅಥವಾ ಎಲೆಕ್ಟ್ರಾನಿಕ್ ಸಂಗೀತವನ್ನು ರಚಿಸುವಲ್ಲಿ ಪರಿಣತರಾಗಿದ್ದರೆ ಮತ್ತು DJing ನಲ್ಲಿ ಆಸಕ್ತಿಯನ್ನು ಹೊಂದಿದ್ದರೆ, ನೀವು ವೇವ್ಸ್ 2025ರಲ್ಲಿ ಮಿಂಚಲು ಅನುರಣನ: ಇಡಿಎಂ ಚಾಲೆಂಜ್ ಒಂದು ಪರಿಪೂರ್ಣ ವೇದಿಕೆಯಾಗಿದೆ. ಈ ಅನನ್ಯ ಸ್ಪರ್ಧೆಯು ಪ್ರಪಂಚದಾದ್ಯಂತದ ಪ್ರತಿಭಾವಂತ ವ್ಯಕ್ತಿಗಳನ್ನು ಸಂಗೀತ ನಿರ್ಮಾಣ ಮತ್ತು ಲೈವ್ ಪ್ರದರ್ಶನದಲ್ಲಿ ತಮ್ಮ ಕೌಶಲ್ಯಗಳನ್ನು ಪ್ರದರ್ಶಿಸಲು ಆಹ್ವಾನಿಸುತ್ತದೆ, ಡಿಜೆ ಮಾಸ್ಟರ್ ಆಗಲು ಅನನ್ಯ ಅವಕಾಶವನ್ನು ಒದಗಿಸುತ್ತದೆ. ಅತ್ಯಾಕರ್ಷಕ ಬಹುಮಾನಗಳು ಮತ್ತು ಉದ್ಯಮದ ತಜ್ಞರು ಮತ್ತು ಜಾಗತಿಕ ಪ್ರೇಕ್ಷಕರ ಮುಂದೆ ಪ್ರದರ್ಶನ ನೀಡಲು ವೇದಿಕೆಯೊಂದಿಗೆ, ಎಲೆಕ್ಟ್ರಾನಿಕ್ ಸಂಗೀತದ ಮೇಲಿನ ನಿಮ್ಮ ಉತ್ಸಾಹವನ್ನು ಅಂತರರಾಷ್ಟ್ರೀಯ ಮನ್ನಣೆಯನ್ನಾಗಿ ಪರಿವರ್ತಿಸಲು ಈ ಚಾಲೆಂಜ್‌ ನಿಮಗೊಂದು ಅವಕಾಶವಾಗಿದೆ.

ಈ ಚಾಲೆಂಜ್‌ ವೈಯಕ್ತಿಕ ಕಲಾವಿದರು ಮತ್ತು ಸೃಜನಾತ್ಮಕ ತಂಡಗಳಿಗೆ ಮುಕ್ತವಾಗಿದೆ, ಉದಯೋನ್ಮುಖ ಮತ್ತು ಅನುಭವಿ ಸಂಗೀತಗಾರರಿಗೆ ಎರಡು ರೋಮಾಂಚಕ ಹಂತಗಳಲ್ಲಿ ಸ್ಪರ್ಧಿಸಲು ವೇದಿಕೆಯನ್ನು ಒದಗಿಸುತ್ತದೆ:

• ಪ್ರಾಥಮಿಕ ಸುತ್ತು: ಭಾಗವಹಿಸುವವರು ತಮ್ಮ ಮೂಲ ಇಡಿಎಂ ಟ್ರ್ಯಾಕ್‌ ಗಳನ್ನು ಆನ್‌ಲೈನ್‌ ನಲ್ಲಿ ಸಲ್ಲಿಸುತ್ತಾರೆ, ಟಾಪ್ 10 ನಮೂದುಗಳನ್ನು ಶಾರ್ಟ್‌ಲಿಸ್ಟ್ ಮಾಡಲು ಉದ್ಯಮದ ತಜ್ಞರ ಸಮಿತಿಯಿಂದ ಮೌಲ್ಯಮಾಪನ ಮಾಡಲಾಗುತ್ತದೆ.
• ಗ್ರ್ಯಾಂಡ್ ಫಿನಾಲೆ: ಫೈನಲಿಸ್ಟ್‌ ಗಳು ವೇವ್ಸ್ 2025 ರಲ್ಲಿ ನೇರ ಪ್ರದರ್ಶನ ನೀಡುತ್ತಾರೆ, ವಿಶೇಷ ತೀರ್ಪುಗಾರರ ಮುಂದೆ ಮತ್ತು ಜಾಗತಿಕ ಪ್ರೇಕ್ಷಕರ ಮುಂದೆ ಉನ್ನತ ಗೌರವಕ್ಕಾಗಿ ಸ್ಪರ್ಧಿಸುತ್ತಾರೆ.‌

ವಿಜೇತರು ಗಣನೀಯ ನಗದು ಬಹುಮಾನವನ್ನು (ಮುಖ್ಯ ಬಹುಮಾನ ವಿಜೇತರು ರೂ 2,00,000 ಮತ್ತು ರನ್ನರ್ ಅಪ್‌ ರೂ 50,000) ಸ್ವೀಕರಿಸುತ್ತಾರೆ, ಜೊತೆಗೆ ಪ್ರಚಾರ ಸಾಮಗ್ರಿಗಳಲ್ಲಿ ಕಾಣಿಸಿಕೊಳ್ಳುವ, ಅಂತರರಾಷ್ಟ್ರೀಯ ಮನ್ನಣೆಯನ್ನು ಪಡೆಯುವ ಮತ್ತು ಜಾಗತಿಕ ವೇದಿಕೆಯಲ್ಲಿ ಪ್ರದರ್ಶನ ನೀಡುವ ಅವಕಾಶ ಪಡೆಯುತ್ತಾರೆ.

ಮೇಕ್ ದಿ ವರ್ಲ್ಡ್ ವೇರ್ ಖಾದಿ: ಭಾರತದ ಐಕಾನಿಕ್ ಫ್ಯಾಬ್ರಿಕ್ ಅನ್ನು ಉತ್ತೇಜಿಸಲು ಜಾಗತಿಕ ಕರೆ

ಭಾರತದ ಕಾಲಾತೀತ ಉಡುಪು ಖಾದಿ, ವೇವ್ಸ್ 2025 ರಲ್ಲಿ ಕ್ರಿಯೇಟ್ ಇನ್ ಇಂಡಿಯಾ ಉಪಕ್ರಮದ ಅಡಿಯಲ್ಲಿ "ಮೇಕ್ ದಿ ವರ್ಲ್ಡ್ ವೇರ್ ಖಾದಿ" ಚಾಲೆಂಜ್ ಪ್ರಾರಂಭಿಸುವುದರೊಂದಿಗೆ ಜಾಗತಿಕವಾಗಲು ಸಿದ್ಧವಾಗಿದೆ. ಈ ಅನನ್ಯ ಸ್ಪರ್ಧೆಯು ಖಾದಿಯನ್ನು ಜಾಗತಿಕ ಬ್ರಾಂಡ್‌ ನಂತೆ ಇರಿಸುವ ನವೀನ ಅಭಿಯಾನಗಳನ್ನು ರಚಿಸಲು ಪ್ರಪಂಚದಾದ್ಯಂತದ ಜಾಹೀರಾತು ವೃತ್ತಿಪರರು, ಸೃಜನಶೀಲ ಸ್ವತಂತ್ರೋದ್ಯೋಗಿಗಳು ಮತ್ತು ವಿನ್ಯಾಸಕರನ್ನು ಆಹ್ವಾನಿಸುತ್ತದೆ.

ಅಂತಾರಾಷ್ಟ್ರೀಯ ಭಾಗವಹಿಸುವಿಕೆಗೆ ಮುಕ್ತವಾಗಿದೆ, ಡಿಜಿಟಲ್, ಮುದ್ರಣ, ವೀಡಿಯೊ ಮತ್ತು ಅನುಭವದ ಸ್ವರೂಪಗಳಾದ್ಯಂತ ವಿನ್ಯಾಸ ಪರಿಕಲ್ಪನೆಗಳನ್ನು ಅನ್ವೇಷಿಸಲು ಈ ಚಾಲೆಂಜ್ ಭಾಗವಹಿಸುವವರನ್ನು ಪ್ರೋತ್ಸಾಹಿಸುತ್ತದೆ. ಖಾದಿಯ ಬ್ರ್ಯಾಂಡ್ ಇಮೇಜ್ ಅನ್ನು ಉನ್ನತೀಕರಿಸುವುದು, ಗ್ರಾಹಕರ ತೊಡಗಿಸಿಕೊಳ್ಳುವಿಕೆಯನ್ನು ಪ್ರೇರೇಪಿಸುವುದು ಮತ್ತು ಅದನ್ನು ವಿಶ್ವಾದ್ಯಂತ ಸುಸ್ಥಿರ ಫ್ಯಾಷನ್ ಮತ್ತು ಸಾಂಸ್ಕೃತಿಕ ಪರಂಪರೆಯ ಸಂಕೇತವಾಗಿ ಸ್ಥಾಪಿಸುವುದು ಗುರಿಯಾಗಿದೆ. ವಿಜೇತರು ತಮ್ಮ ವೃತ್ತಿಪರ ಪ್ರಯಾಣವನ್ನು ಮುಂದುವರಿಸಲು ಮಾನ್ಯತೆ ಮತ್ತು ಅವಕಾಶಗಳನ್ನು ಪಡೆದುಕೊಳ್ಳುತ್ತಾರೆ ಮತ್ತು ಖಾದಿಯನ್ನು ಅಂತಾರಾಷ್ಟ್ರೀಯವಾಗಿ ಪ್ರಸಿದ್ಧವಾದ ಬ್ರ್ಯಾಂಡ್ ಆಗಿ ಪರಿವರ್ತಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ.‌

ವೇವ್ಸ್ ಪ್ರಶಸ್ತಿಗಳು

ವೇವ್ಸ್ ಪ್ರಶಸ್ತಿಗಳು ಜಾಗತಿಕ ಸೃಜನಶೀಲ ಉದ್ಯಮದಲ್ಲಿನ ಅತ್ಯುತ್ತಮ ಕೊಡುಗೆಗಳನ್ನು ಗೌರವಿಸುತ್ತವೆ, ನಾಮನಿರ್ದೇಶನಗಳು ಫೆಬ್ರವರಿ 15, 2025 ರಂದು ಪ್ರಾರಂಭವಾಗುತ್ತವೆ. ವೈವಿಧ್ಯಮಯ ಕ್ಷೇತ್ರಗಳಲ್ಲಿ ಶ್ರೇಷ್ಠತೆಯನ್ನು ಗುರುತಿಸುವ ಪ್ರಶಸ್ತಿಗಳು 'ವರ್ಷದ ಅತ್ಯುತ್ತಮ' ಜಾಗತಿಕ ಪ್ರಶಸ್ತಿಗಳು ಮತ್ತು ವಿಶೇಷ ಆಯ್ಕೆ ಪ್ರಶಸ್ತಿಗಳು ಎಂಬ ಎರಡು ಪ್ರಮುಖ ವಿಭಾಗಗಳನ್ನು ಒಳಗೊಂಡಿವೆ.

'ವರ್ಷದ ಅತ್ಯುತ್ತಮ' ಜಾಗತಿಕ ಪ್ರಶಸ್ತಿಗಳು ಗೇಮಿಂಗ್, ಚಲನಚಿತ್ರ, ಅನಿಮೇಷನ್, ವೆಬ್ ಸರಣಿಗಳು, ಜಾಹೀರಾತುಗಳು, ಸ್ಟಾರ್ಟ್‌ಅಪ್‌ ಗಳು ಮತ್ತು ಡಿಜಿಟಲ್ ಪ್ರಭಾವದಲ್ಲಿನ ಉನ್ನತ ಸಾಧನೆಗಳನ್ನು ಆಚರಿಸುತ್ತವೆ. ಪ್ರಮುಖ ವಿಭಾಗಗಳಲ್ಲಿ ವರ್ಷದ ಆಟ, ವರ್ಷದ ಚಲನಚಿತ್ರ, ವರ್ಷದ ಪ್ರಭಾವಿ, ವರ್ಷದ ಪಾಡ್‌ ಕ್ಯಾಸ್ಟರ್ ಮತ್ತು ವರ್ಷದ ಹಾಡು ಸೇರಿವೆ.

ವಿಶೇಷ ಆಯ್ಕೆ ಪ್ರಶಸ್ತಿಗಳು ಗಮನಾರ್ಹ ಪರಿಣಾಮ ಬೀರಿದ ವ್ಯಕ್ತಿಗಳು ಮತ್ತು ಉಪಕ್ರಮಗಳನ್ನು ಗೌರವಿಸುತ್ತವೆ. ಇದರಲ್ಲಿ ಪ್ರತಿಷ್ಠಿತ G.O.A.T. (ಸಾರ್ವಕಾಲಿಕ ಶ್ರೇಷ್ಠ) ಜೀವಮಾನ ಸಾಧನೆ ಪ್ರಶಸ್ತಿ, ವರ್ಷದ ಉದ್ಯಮಿ, ಸಾಮಾಜಿಕ ಪರಿಣಾಮ ಪ್ರಶಸ್ತಿ ಮತ್ತು ಟೆಕ್ ಐಕಾನ್ ಪ್ರಶಸ್ತಿ ಸೇರಿವೆ. ಸ್ಟೋರೀಸ್ ಆಫ್ ಚೇಂಜ್ ವರ್ಗವು ಪ್ರಸಾರ, ಮುದ್ರಣ ಮತ್ತು ಡಿಜಿಟಲ್ ಮಾಧ್ಯಮದಾದ್ಯಂತ ಪರಿವರ್ತಕ ಕೊಡುಗೆಗಳನ್ನು ಮತ್ತಷ್ಟು ಎತ್ತಿ ತೋರಿಸುತ್ತದೆ.

*****