U Myntri Rangbah duh jong ka ri, Narendra Modi u la ong ba ka WAVES (World Audio Visual & Entertainment Summit) ka ban wanrah ia ka jingithuh kaba thymmai ia ka bor jong ka India ha ka jingsaindur. Ha ka jingai jingkren ha ka jingialang ha ka Utkarsh Odisha – Make in Odisha Conclave ha Bhubaneswar, u la batai kumno ki prokram ba heh kum ka WAVES ka wanrah ia ka jingkamai kaba heh bad ka wanrah ruh ia ki jingsngewthuh bad kyntiew ia ka ioh ka kot. U la ban jur halor ka lad kaba heh jong kine ki sienjam ban pyndonkam ia ka sap saindur jong ka India bad kyntiew ia ka ri kum ka nongialam jong ka pyrthei ha ka kam media bad ka kam pynbyrnia.

WAVES 2025: Ka jingpyniasoh ia ki rukom ba hyndai jong ka India bad ki rukom saindur mynta

Ka WAVES 2025 ka wanrah ia ka jingpyniasoh ba kyrpang jong ka deiriti kaba riewspah jong ka India bad ka rukom saindur mynta, ha kaba la ai rynsan ia baroh – naduh ki nongthaw ia ki jingrwai classical bad semi-classical haduh ki nongthaw ia ki jingrwai EDM ba mynta bad kito kiba trei ha ki kam ai jingpynbna, ki nongshna bad nongsaindur ia ka Khadi.

Kane ka jingpyniasoh ia ki por ba mynshuwa bad ki por mynta ka paw bha ha ki jingiakop kum ka Wah Ustad, kaba rakhe ia ka jinghiar pateng ki jingrwai hyndai jong ka India, ka Resonate: Ka jingiakop EDM, kaba pdiang ia ki jinglong jingman mynta ha ki jingrwai ha ka pyrthei, bad ka Make The World Wear Khadi, kaba pyrshang ban pynkhat thymmai ia ka jain jong ka India kum ka dak jong ki jain ba iaineh ha ka pyrthei. Kine lai tylli ki jingiakhun ki dei kiba la pyllait paidbah da u Ashwini Vaishnaw ha ryngkat ka WAVES Bazaar bad WAVES Awards, ha ka 27 tarik u Kyllalyngkot, 2025 ha kaba u la kyntu ia ki nongsaindur ba kin iarap ia ka India ban long ka jaka pdeng jong ka pyrthei ha ki kam saindur.

Ashwini Vaishnaw haba u la ai jingkren ia ka jingialang haba la pyllait paidbah ia ka WAVES Bazaar-Global-e-marketplace WAVES CIC Challenge ba kynthup ia ka ‘Wah Ustad’ bad WAVES Awards ha ka 27 tarik u Kyllalyngkot, 2025.

Kine ki sienjam kin ai ka lad kaba heh ia ki nongsaindur ba kin pyni ia ka sap jong ki, pyniasoh ia ka dustur bad ka jingsaindur, bad ioh ia ka jingithuh katba ki noh synniang sha ka jingpynkhlain ka India ha ka deiriti bad ka jingsaindur. Kine ki jingiakhun ki long shi bynta jong 31 tylli ki jingiakhun Create in India, kiba ai ka rynsan ia ki nongsaindur ha ki kam bapher bapher ba kin pyni ia ki sap jong ki.

Shaphang ki jingiakhun ba thymmai

Wah Ustad: Ka prokram Reality Show ban lap ia ki briew jong ka India kiba tbit ha ka put ka tem

Ka tnad Information and Broadcasting, ha ka jingiatreilang bad ka tnad Culture bad Doordarshan, ka la sdang ia ka Wah Ustad, ka jingwad ia kiba tbit ha ki sur jingrwai classical bad semi-classical, hapojh ki Jingiakhun Create in India, ka sienjam kaba kyrpang na ka bynta ka WAVES 2025. Ka thmu ban kyntiew ia kiba don sap ha ki jingrwai Hindustani, Carnatic, bad Sufi ha ryngkat ka jingpynneh bad ka jingkyntiew ia ka kam jong ka India ha ka put ka tem.

Kaba la saindur da ka tnad Information and Broadcasting, ba la lamkhmat da ka "Dilli Gharana" ka Wah Ustad kan long ka rynsan ia ki nongrwai kiba la ioh jinghikai kiba la dap kumno kumno 18 snem ka rta. Ki briew na kiwei kiwei ki ri ki lah ban iashim bynta bad kane ka prokram ka khot ia ki jingkyntiew kyrteng na ki briew ba don sap kiba sngewtynnad ia ki jingrwai Hindustani lane Carnatic, Sufi, bad ki jingrwai semi-classical.

Ka kam ia ki nongiashim bynta ka la sdang lyngba ki jingkyntiew kyrteng online lyngba ka rynsan Dilli Durbar. Kane kan iaid sha ki audition ha ki thain bapher bapher, ki episode katkum ki thup, bad kan kut ha ka grand finale ha ka WAVES 2025 ha Mumbai. Ki san ngut kiba poi sha ka final kin iakhun ban long ki lahduh bad kiba jop kin ioh ia ka song pisa, ki lad ioh jinghikai, ki kontrak ban leh recording bad ka jingithuh ha kylleng ka ri.

Yn don 26 tylli ki episode ha ka Doordarshan bad ka Wah Ustad kan rakhe ia ka jinghiar pateng ki jingrwai tynrai jong ka India bad ai mynsiem ia ki pateng ban wan kiba sngewtynnad ia ka put ka tem. Da kaba pyniasoh ia ki jingnang jingstad tynrai bad ka teknoloji katkum ka juk mynta, kane ka prokram kan pyni ia ka jingsngewtynnad jong ki jingrwai classical bad ka jingiahap jong ki ha kane ka pyrthei mynta.

Resonate: Ka jingiakhun EDM

Kum ka jingrakhe kaba nyngkong ia ki sur jingrwai electronic ha ka pyrthei, ka Resonate: Ka Jingiakhun EDM kan long ka bynta kaba kongsan jong ka World Audio Visual & Entertainment Summit (WAVES) kaba nyngkong. La pynlong ia ka da ka Indian Music Industry (IMI) ha ka jingiatreilang bad ka tnad Information & Broadcasting (I&B), bad kane ka jingiakhun ka thmu ban pynkhlain ia ka kyrdan jong ka India kum ka jaka pdeng na ka bynta ka jingiakhleh ia ki jait jingrwai, ki jingrwai electronic, bad ka kam DJ.

Lada phi tbit ban shna jingrwai digital bad electronic bad sngewtynnad ia ka kam DJ, ka Resonate: Ka Jingiakhun EDM ha ka WAVES 2025 ka dei ka lad kaba heh ia phi ban pawkhmat. Kane ka jingiakhun ba kyrpang ka khot ia ki briew ba don sap na kylleng ka pyrthei ban pyni ia ki sap jong ki ha ka jingpynmih jingrwai bad ka jingtem live, kaba long ka lad kaba heh ban long ki DJ ba pawnam. Lyngba ki khusnam kiba heh bad ka rynsan ban tem hakhmat ki briew ba la tbit ha kane ka kam bad ki briew na kylleng ka pyrthei, kane ka jingiakhun ka dei ka lad ia phi ban pynkylla ia ka jingsngewtynnad jong phi ia ki jingrwai electronic sha ka jingioh jingithuh na kylleng ka pyrthei.

Ki briew bad ki kynhun ki lah ban iashim bynta ha ka Resonate kaba ai ka rynsan ia ki nongshna jingrwai ba dang sdang kiew bad kiba la tbit ba kin iakhun ha ar tylli ki bynta:

• Preliminary Round: Ki nongiashim bynta kin ai ia ki jingrwai EDM jong ki lyngba ki lad online bad yn peit ia kine da ka kynhun jong ki briew ba la tbit ha kane ka kam bad yn jied 10 ngut na ki nongiashim bynta.
• Grand Finale: Ki finalist kin tem live ha ka WAVES 2025, ha kaba kin iakhun ban long ki lahduh hakhmat ka kynhun ki nongbishar bad ki briew na kylleng ka pyrthei.

Ki nongjop kin ioh ia ka song tyngka kaba beh (T 2,00,000 na ka bynta ki nongjop Grand Prize bad ₹50,000 ia kiba wan ba ar), ha ryngkat ka lad ban mihkhmat ha ki kam, ioh jingithuh ha kiwei kiwei ki ri, bad tem hakhmat ka pyrthei.

Make The World Wear Khadi: Ka jingkhot ia ka pyrthei ban kyntiew ia ka jain jong ka India

Ka jain ba pawnam jong ka India, Khadi, ka la khreh ban paw ha kylleng ka pyrthei lyngba ka jingsdang ia ka jigniakhun "Make The World Wear Khadi" hapoh ka sienjam Create in India ha ka WAVES 2025. Kane ka jingiakhun ba kyrpang ka khot ia kiba la tbit ha ka kam ai jingpynbna, kito kiba trei shimet ha ka kam saindur bad ki nongsaindur na kylleng ka pyrthei ba kin saindur ia ka kam kaba kyntiew ia ka Khadi kum ka brand kaba iaid iew ha kylleng ka pyrthei.

Ki briew na kylleng ka pyrthei ki lah ban iashim bynta ha kane ka jingiakhun kaba pynshlur ia ki nongiashim bynta ba kin wanrah ia ki jingsaindur thymmai ha ki kam digital, print, video, bad experiential. Ka thong ka dei ban kyntiew ia ka Khadi, wanrah ia ka jingiadei bad ki nongthied bad kyntiew ia ka kum ka dak jong ka riam ka beit kaba iaineh bad ka jinghiar pateng ka deiriti ha kylleng ka pyrthei. Ki nongjop kin ioh ia ka jingithuh bad ki lad na kylleng ka pyrthei ban kiew shaphrang ha ka kam jong ki bad don ka bynta kaba heh ha ka jingpynkylla ia ka Khadi kum ka brand kaba pawnam ha kylleng ka pyrthei.

Ki khusnam WAVES

Ki khusnam WAVES kin ai jingithuh ia ki jingnoh synniang ha ka kam saindur ha ka pyrthei ha kaba ka jingai jingtyrwa ia ki kyrteng kan sdang ha ka 15 tarik u Rymphang, 2025. Da kaba ai jingithuh ia ka jingtbit ha ki kam bapher bapher, kine ki khusnam kin don ar tylli ki bynta: ‘Best of the Year’ Global Awards bad Special Selection Awards.

Ka ‘Best of the Year’ Global Awards kan rakhe ia ki jingjop ha ka kam gaming, film, animation, web series, advertising, startup bad digital influence. Ki thup kiba kongsan ki long Game of the Year, Film of the Year, Influencer of the Year, Podcaster of the Year bad Song of the Year ha ryngkat kiwei kiwei.

Ka Special Selection Awards ka ai jingithuh ia ki briew bad ki kam kiba la wanrah jingkylla ba heh. Kane ka kynthup ia ka G.O.A.T. (Greatest of All Time) Lifetime Achievement Award, Businessperson of the Year, Social Impact Award, bad Tech Icon Awards. Ka bynta Stories of Change ka pyni ia ki jingnoh synniang ban wanrah jingkylla ha ka kam Broadcast, Print bad Digital Media.

*****