ଆନ୍ଧ୍ରପ୍ରଦେଶର ବିଜୟୱାଡ଼ାଠାରେ ଜାତୀୟ ବିପର୍ଯ୍ୟୟ ମୁକାବିଲା ବାହିନୀ (ଏନଡିଆରଏଫ)ର ୨୦ତମ ପ୍ରତିଷ୍ଠା ଦିବସ ସମାରୋହରେ ମୁଖ୍ୟ ଅତିଥି ଭାବେ ଯୋଗ ଦେଇ କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଯୋଗ ଦେଇଥିଲେ । ଏହି ଅବସରରେ ଶ୍ରୀ ଅମିତ ଶାହ ଅନେକ ପ୍ରକଳ୍ପର ଉଦଘାଟନ କରିବା ସହ ପ୍ରାୟ ୨୨୦ କୋଟି ଟଙ୍କାର କେତେକ ପ୍ରକଳ୍ପର ଶିଳାନ୍ୟାସ କରିଥିଲେ । ଏଥିରେ ନ୍ୟାସନାଲ ସାଉଥ୍ କ୍ୟାମ୍ପସ ଅଫ୍ ଇନ୍ ଷ୍ଟିଚ୍ୟୁଟ୍ ଅଫ୍ ଡିଜାଷ୍ଟର ମ୍ୟାନେଜମେଣ୍ଟ (ଏନ୍ଆଇଡିଏମ୍), ଏନଡିଆରଏଫର ଦଶମ ବାଟାଲିୟନ ଏବଂ ସୁପୌଲ କ୍ୟାମ୍ପସରେ ଥିବା ଆଞ୍ଚଳିକ ପ୍ରତିକ୍ରିୟା କେନ୍ଦ୍ର ଅନ୍ତର୍ଭୁକ୍ତ। ଗୃହମନ୍ତ୍ରୀ ହାଇଦ୍ରାବାଦର ଜାତୀୟ ପୋଲିସ ଏକାଡେମୀରେ ନୂତନ 'ଇଣ୍ଟିଗ୍ରେଟେଡ୍ ସୁଟିଂ ରେଞ୍ଜ'ର ଶିଳାନ୍ୟାସ କରିବା ସହ ତିରୁପତିରେ ଆଞ୍ଚଳିକ ଫରେନସିକ୍ ସାଇନ୍ସ ଲାବୋରେଟୋରି କୋଠାକୁ ଉଦଘାଟନ କରିଛନ୍ତି। ଏହି ଅବସରରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଶ୍ରୀ ଚନ୍ଦ୍ରବାବୁ ନାଇଡୁ, କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ଶ୍ରୀ କେ ରାମମୋହନ ନାଇଡୁ, କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଶ୍ରୀ ବଣ୍ଡି ସଞ୍ଜୟ କୁମାର, ଗୃହ ସଚିବ ଶ୍ରୀ ଗୋବିନ୍ଦ ମୋହନ ଏବଂ ଏନଡିଆରଏଫ ମହାନିର୍ଦ୍ଦେଶକ ଶ୍ରୀ ପୀୟୂଷ ଆନନ୍ଦଙ୍କ ସମେତ ଅନେକ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ ।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ତାଙ୍କ ଅଭିଭାଷଣରେ କହିଛନ୍ତି ଯେ ପ୍ରାକୃତିକ ବିପର୍ଯ୍ୟୟ ଆସିଲେ ଏନଡିଆରଏଫ ଉଦ୍ଧାର ପାଇଁ ଆସେ ଏବଂ ଯେତେବେଳେ ମନୁଷ୍ୟକୃତ ବିପର୍ଯ୍ୟୟ ହୁଏ, ସେତେବେଳେ ନରେନ୍ଦ୍ର ମୋଦୀ ସରକାର ସାହାଯ୍ୟ କରିବାକୁ ଆସନ୍ତି । ଶ୍ରୀ ଶାହ କହିଛନ୍ତି ଯେ ୨୦୧୪ରୁ ୨୦୧୯ ପର୍ଯ୍ୟନ୍ତ ପାଞ୍ଚ ବର୍ଷ ମଧ୍ୟରେ ଆନ୍ଧ୍ରପ୍ରଦେଶ ଏହି ମାନବ ସୃଷ୍ଟ ବିପର୍ଯ୍ୟୟ କାରଣରୁ ଗୁରୁତ୍ୱପୂର୍ଣ୍ଣ ବିପର୍ଯ୍ୟୟର ସମ୍ମୁଖୀନ ହୋଇଛି, ଯାହା ରାଜ୍ୟର ବିପୁଳ ସମ୍ଭାବନାକୁ ପ୍ରଭାବିତ କରିଛି। ସେ କହିଛନ୍ତି ଯେ ଏହି ସମୟ ମଧ୍ୟରେ ବିକାଶମୂଳକ କ୍ଷତିଭରଣା କରିବା ପାଇଁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏବଂ ମୁଖ୍ୟମନ୍ତ୍ରୀ ଶ୍ରୀ ଏନ ଚନ୍ଦ୍ରବାବୁ ନାଇଡୁ ଆନ୍ଧ୍ରପ୍ରଦେଶର ଅଭିବୃଦ୍ଧିକୁ ତିନି ଗୁଣ ବେଗରେ ଆଗେଇ ନେଉଛନ୍ତି । ଶ୍ରୀ ଅମିତ ଶାହ ଶ୍ରୀ ଚନ୍ଦ୍ରବାବୁ ନାଇଡୁଙ୍କୁ ସୁଦୃଢ଼ ପ୍ରଶାସନିକ, ଆର୍ଥିକ ଏବଂ ବିକାଶମୂଳକ ରଣନୀତି ମାଧ୍ୟମରେ ରାଜ୍ୟକୁ ଆଗକୁ ବଢ଼ାଇବା ପାଇଁ ପ୍ରଶଂସା କରିଥିବା ବେଳେ ପ୍ରଧାନମନ୍ତ୍ରୀ ମୋଦୀ ଗତ ଛଅ ମାସ ମଧ୍ୟରେ ଆନ୍ଧ୍ରପ୍ରଦେଶ ପାଇଁ ୩ ଲକ୍ଷ କୋଟି ଟଙ୍କାରୁ ଅଧିକ ପୁଞ୍ଜିନିବେଶ ଏବଂ ସହାୟତା ପ୍ରଦାନ କରିଛନ୍ତି ବୋଲି ଉଲ୍ଲେଖ କରିଥିଲେ । ବିଶାଖାପାଟଣା ଇସ୍ପାତ କାରଖାନା ପାଇଁ ନିକଟରେ କେନ୍ଦ୍ର କ୍ୟାବିନେଟ ୧୧,୦୦୦ କୋଟି ଟଙ୍କାର ଅନୁମୋଦନ ଉପରେ ଶ୍ରୀ ଶାହ ଆଲୋକପାତ କରିଥିଲେ, ଯାହା ଏହି କାରଖାନାର ଦୀର୍ଘକାଳୀନ କାର୍ଯ୍ୟକ୍ଷମତାକୁ ସୁରକ୍ଷିତ ରଖିବା ଏବଂ ଆନ୍ଧ୍ରପ୍ରଦେଶ ପାଇଁ ଗୌରବର ପ୍ରତୀକ ଭାବରେ ଏହାର ମାନ୍ୟତା ବଜାୟ ରଖିବା ଉଦ୍ଦେଶ୍ୟରେ ନିଆଯାଇଥିବା ପଦକ୍ଷେପ । ଶ୍ରୀ ଚନ୍ଦ୍ରବାବୁ ନାଇଡୁଙ୍କ ଦ୍ୱାରା ପରିକଳ୍ପିତ ଏବଂ ପ୍ରଧାନମନ୍ତ୍ରୀ ମୋଦୀଙ୍କ ଦ୍ୱାରା ଶିଳାନ୍ୟାସ ସମାରୋହ (ଭୂମି ପୂଜନ) ସହିତ ଉଦଘାଟିତ ହୋଇଥିବା ଅମରାବତୀକୁ ରାଜ୍ୟ ରାଜଧାନୀ ଭାବରେ ଦେଖିବାର ସ୍ୱପ୍ନକୁ ମଧ୍ୟ ସେ ମନେ ପକାଇଥିଲେ । ତେବେ ଏହି ମହତ୍ତ୍ବାକାଂକ୍ଷୀ ପ୍ରକଳ୍ପକୁ ଅବହେଳା କରିଥିବାରୁ ସେ ପୂର୍ବ ସରକାରଙ୍କୁ ସମାଲୋଚନା କରିଥିଲେ।

ଶ୍ରୀ ଅମିତ ଶାହ କହିଥିଲେ ଯେ ଗତ ଛଅ ମାସ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହୁଡକୋ ଏବଂ ବିଶ୍ୱବ୍ୟାଙ୍କ ମାଧ୍ୟମରେ ଅମରାବତୀ ପ୍ରକଳ୍ପ ପାଇଁ ୨୭,୦୦୦ କୋଟି ଟଙ୍କା ଆବଣ୍ଟନ କରି ଶ୍ରୀ ଚନ୍ଦ୍ରବାବୁ ନାଇଡୁଙ୍କ ଅମରାବତୀକୁ ରାଜ୍ୟ ରାଜଧାନୀ ଭାବରେ ସାକାର କରିବା ପାଇଁ ପ୍ରୟାସକୁ ତ୍ୱରାନ୍ୱିତ କରିଛନ୍ତି । ନୂଆ ରେଳ ଜୋନର ଶିଳାନ୍ୟାସ ହୋଇଛି ଏବଂ ଆନ୍ଧ୍ରପ୍ରଦେଶର ଲାଇଫ ଲାଇନ କୁହାଯାଉଥିବା ପୋଲାଭରମର ପାଣି ୨୦୨୮ ସୁଦ୍ଧା ରାଜ୍ୟର କୋଣ ଅନୁକୋଣରେ ପହଞ୍ଚିବ ବୋଲି ସେ ଆଲୋକପାତ କରିଥିଲେ। ଶ୍ରୀ ଶାହା ୧୬୦୦ କୋଟି ଟଙ୍କା ବ୍ୟୟରେ ଏମସ୍‍ ହସ୍ପିଟାଲ ପ୍ରକଳ୍ପ ର ଶୁଭାରମ୍ଭ ବିଷୟରେ ଉଲ୍ଲେଖ କରିଥିଲେ ଏବଂ ବିଶାଖାପାଟଣାକୁ ସବୁଜ ହାଇଡ୍ରୋଜେନର କେନ୍ଦ୍ରରେ ପରିଣତ କରିବା ପାଇଁ ୨ ଲକ୍ଷ କୋଟି ଟଙ୍କା ବିନିଯୋଗ କରିବାର ଯୋଜନା ବିଷୟରେ ମଧ୍ୟ ଉଲ୍ଲେଖ କରିଥିଲେ । କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଉଲ୍ଲେଖ କରିଛନ୍ତି ଯେ ଗତ ଛଅ ମାସ ମଧ୍ୟରେ ଆନ୍ଧ୍ରପ୍ରଦେଶ ପାଇଁ ପାଖାପାଖି ୧.୨ ଲକ୍ଷ କୋଟି ଟଙ୍କାର ରାଜପଥ ଏବଂ ଭିତ୍ତିଭୂମି ପ୍ରକଳ୍ପକୁ ଅନୁମୋଦନ କରାଯାଇଛି। ଆନ୍ଧ୍ରପ୍ରଦେଶର ଦ୍ରୁତ ବିକାଶ ସୁନିଶ୍ଚିତ କରିବା ପାଇଁ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ଶ୍ରୀ ଚନ୍ଦ୍ରବାବୁ ନାଇଡୁଙ୍କ ସହ ଦୃଢ଼ତାର ସହ ଠିଆ ହୋଇଛନ୍ତି ବୋଲି ଶ୍ରୀ ଶାହା ଦୃଢ଼ୋକ୍ତି ପ୍ରକାଶ କରିଥିଲେ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଗତ ଏକ ଦଶନ୍ଧି ମଧ୍ୟରେ ଜାତୀୟ ବିପର୍ଯ୍ୟୟ ପରିଚାଳନା ପ୍ରତିଷ୍ଠାନ (ଏନଆଇଡିଏମ) ମାଧ୍ୟମରେ ବିପର୍ଯ୍ୟୟ ପରିଚାଳନାରେ ଉଲ୍ଲେଖନୀୟ ଅଗ୍ରଗତି ହୋଇଛି ବୋଲି କେନ୍ଦ୍ର ଗୃହମନ୍ତ୍ରୀ ଆଲୋକପାତ କରିଥିଲେ। କ୍ଷେତ୍ରସ୍ତରରେ ଫଳପ୍ରଦ ବିପର୍ଯ୍ୟୟ ପରିଚାଳନା ସୁନିଶ୍ଚିତ କରିବା ପାଇଁ ଗ୍ରାମ ପଞ୍ଚାୟତ, ଥାନା, ଏନସିସି ଏବଂ ସ୍କାଉଟ୍ କ୍ୟାଡେଟମାନଙ୍କ ଠାରୁ ଆରମ୍ଭ କରି ଭାରତ ସରକାରଙ୍କ ମଧ୍ୟରେ ନିରବଚ୍ଛିନ୍ନ ସମନ୍ୱୟ ଉପରେ ସେ ଗୁରୁତ୍ୱାରୋପ କରିଥିଲେ । ବିପର୍ଯ୍ୟୟ ପରିଚାଳନାର ଆଭିମୁଖ୍ୟ, ପଦ୍ଧତି ଏବଂ ଉଦ୍ଦେଶ୍ୟରେ ବୈପ୍ଳବିକ ପରିବର୍ତ୍ତନ ଆଣିବା ପାଇଁ ଶ୍ରୀ ଶାହ ପ୍ରଧାନମନ୍ତ୍ରୀ ମୋଦୀଙ୍କୁ ଶ୍ରେୟ ଦେଇଥିଲେ । ସେ ଉଲ୍ଲେଖ କରିଛନ୍ତି ଯେ ପୂର୍ବ ସମୟର ରିଲିଫ-କେନ୍ଦ୍ରୀତ ଆଭିମୁଖ୍ୟ ବଦଳରେ ଏକ ଉଦ୍ଧାର-କେନ୍ଦ୍ରୀତ ଆଭିମୁଖ୍ୟ ରଖାଯାଇଛି, ଯାହା କି ୨୦୧୪ ମସିହାଠାରୁ ଏକ ବ୍ୟାପକ ପରିବର୍ତ୍ତନ, ଯେଉଁଦିନ ମୋଦୀଜୀ ପ୍ରଧାନମନ୍ତ୍ରୀ ହୋଇଥିଲେ। ଏହି ପରିବର୍ତ୍ତନ ପ୍ରତିକ୍ରିୟାଶୀଳରୁ ସକ୍ରିୟ ରଣନୀତିକୁ ମଧ୍ୟ ଗତି କରିଛି, ଯେଉଁଥିରେ କ୍ଷୟକ୍ଷତି କୁ ହ୍ରାସ କରିବା ବ୍ୟତୀତ ବିପର୍ଯ୍ୟୟ ସମୟରେ ଶୂନ୍ୟ କ୍ଷୟକ୍ଷତି ହାସଲ କରିବାର ସ୍ପଷ୍ଟ ଲକ୍ଷ୍ୟ ରହିଛି । ଏହି ଲକ୍ଷ୍ୟ ରେ ଏନଡିଆରଏଫ, ଏନଡିଏମଏ ଏବଂ ଏନଆଇଡିଏମ ମଧ୍ୟରେ ସୌହାର୍ଦ୍ଦ୍ୟପୂର୍ଣ୍ଣ ସହଯୋଗ, ଅଧିକ ପ୍ରଭାବଶାଳୀ ବିପର୍ଯ୍ୟୟ ପରିଚାଳନା ଏବଂ ଜୀବନ ସୁରକ୍ଷା ସୁନିଶ୍ଚିତ କରିବା ଦିଗରେ କାର୍ଯ୍ୟ କରିବାକୁ ଶ୍ରୀ ଶାହ ସ୍ୱୀକାର କରିଥିଲେ ।

ଶ୍ରୀ ଅମିତ ଶାହ କହିଥିଲେ ଯେ ଏନଡିଆରଏଫ ଅଳ୍ପ ସମୟ ମଧ୍ୟରେ କେବଳ ଭାରତ ରେ ନୁହେଁ ବରଂ ବିଶ୍ୱସ୍ତରରେ ଏକ ବିଶ୍ୱସନୀୟ ସଂଗଠନ ଭାବରେ ନିଜକୁ ପ୍ରତିଷ୍ଠିତ କରିଛି । ବିପର୍ଯ୍ୟୟ ସମୟରେ ଏନଡିଆରଏଫ ଯବାନ ପହଞ୍ଚିଲେ ଲୋକେ ଏବେ ସୁରକ୍ଷିତ ଅଛନ୍ତି ବୋଲି ନିଶ୍ଚିତ ଅନୁଭବ କରୁଛନ୍ତି । ଗତ ଦୁଇ ବର୍ଷ ମଧ୍ୟରେ ଏନଡିଆରଏଫ ଦୁଇଟି ବଡ଼ ବାତ୍ୟାରେ ଶୂନ୍ୟ ମୃତ୍ୟୁ ଲକ୍ଷ୍ୟ କୁ ସଫଳତାର ସହ ହାସଲ କରିଛି ବୋଲି ସେ ଆଲୋକପାତ କରିଥିଲେ । ଶ୍ରୀ ଶାହ ଉଲ୍ଲେଖ କରିଛନ୍ତି ଯେ ନେପାଳ, ଇଣ୍ଡୋନେସିଆ, ତୁର୍କୀ, ମିଆଁମାର, ଭିଏତନାମ ଏବଂ ଅନ୍ୟାନ୍ୟ ଦେଶରେ ଏନଡିଆରଏଫର ପ୍ରୟାସକୁ ସେମାନଙ୍କର ସମ୍ପୃକ୍ତ ରାଷ୍ଟ୍ରମୁଖ୍ୟମାନେ ବ୍ୟାପକ ସ୍ୱୀକୃତି ଦେଇଛନ୍ତି ଏବଂ ପ୍ରଶଂସା କରିଛନ୍ତି । ଏନଡିଏମଏ ନୀତିର କାର୍ଯ୍ୟକାରିତା ଆଜି ବିପର୍ଯ୍ୟୟ ପରିଚାଳନାରେ ଭାରତକୁ ବିଶ୍ୱସ୍ତରରେ ଅଗ୍ରଣୀ ଭାବେ ଅବସ୍ଥାପିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି ବୋଲି ସେ ଗୁରୁତ୍ୱାରୋପ କରିଥିଲେ ।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ବିପର୍ଯ୍ୟୟ ପରିଚାଳନା ପାଇଁ କେନ୍ଦ୍ର ସରକାରଙ୍କ ପ୍ରତିବଦ୍ଧତା ଏହି ସତ୍ୟରୁ ସ୍ପଷ୍ଟ ଯେ ଦ୍ୱାଦଶ ଅର୍ଥ ଆୟୋଗ ବିପର୍ଯ୍ୟୟ ପରିଚାଳନା ପାଇଁ ୧୨,୫୦୦ କୋଟି ଟଙ୍କା ଆବଣ୍ଟନ କରିଥିଲେ, ଯାହାକୁ ଚତୁର୍ଦ୍ଦଶ ଅର୍ଥ ଆୟୋଗରେ ୬୧,୦୦୦ କୋଟି ଟଙ୍କାକୁ ବୃଦ୍ଧି କରାଯାଇଥିଲା । ପ୍ରଧାନମନ୍ତ୍ରୀ ମୋଦୀଙ୍କ ମାର୍ଗଦର୍ଶନରେ ଭାରତ ବିପର୍ଯ୍ୟୟ ମୁକାବିଲା ଭିତ୍ତିଭୂମି କ୍ଷେତ୍ରରେ ବିଶ୍ୱସ୍ତରରେ ଅଗ୍ରଣୀ ଭୂମିକା ଗ୍ରହଣ କରିଛି ବୋଲି ସେ ଉଲ୍ଲେଖ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ଭାରତ ସିଡିଆରଆଇ (ବିପର୍ଯ୍ୟୟ ମୁକାବିଲା ଭିତ୍ତିଭୂମି ପାଇଁ ମେଣ୍ଟ) ପ୍ରତିଷ୍ଠା କରିଛି ଏବଂ ଆଜି ୪୮ଟି ଦେଶ ଏହାର ସଦସ୍ୟ ଭାବରେ ସିଡିଆରଆଇର ନେତୃତ୍ୱରେ କାର୍ଯ୍ୟ କରୁଛନ୍ତି ।

ଶ୍ରୀ ଅମିତ ଶାହ କହିଛନ୍ତି ଯେ ମୋଦୀ ସରକାର ଅନେକ ଆପ୍, ୱେବସାଇଟ୍ ଏବଂ ପୋର୍ଟାଲ୍ ସୃଷ୍ଟି କରି ବିପର୍ଯ୍ୟୟ ପରିଚାଳନା କ୍ଷେତ୍ରରେ ଜନସଚେତନତା କାର୍ଯ୍ୟ କରିଛନ୍ତି। ସେ କହିଛନ୍ତି ଯେ ସାରା ଦେଶରେ ଲକ୍ଷ ଲକ୍ଷ ଲୋକ ଏହି ଆପଗୁଡ଼ିକ ସହିତ ସଂଯୁକ୍ତ ହୋଇଛନ୍ତି ଏବଂ ଏହି ଆପକୁ ସମସ୍ତ ଭାଷାରେ ଯୋଗାଯୋଗ କରିବାକୁ ସକ୍ଷମ ହେବାକୁ ଉଦ୍ୟମ କରାଯାଉଛି । ସେ ଏହା ମଧ୍ୟ ଦର୍ଶାଇଛନ୍ତି ଯେ ଡାଏଲ୍ ୧୧୨ ଏବଂ କମନ୍ ଆଲର୍ଟ ପ୍ରୋଟୋକଲ୍ ଭଳି ସେବା ଲୋକମାନଙ୍କ ପାଇଁ ବହୁତ ସାହାଯ୍ୟ କରିଛି। ଶ୍ରୀ ଶାହ ଆହୁରି କହିଛନ୍ତି ଯେ, ଏହି ପରିପ୍ରେକ୍ଷୀରେ ଆଜି ଆଉ ଦୁଇଟି ଅନୁଷ୍ଠାନ ଯୋଗଦେବାକୁ ଯାଉଛନ୍ତି। ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ଶ୍ରୀ ଏନ ଚନ୍ଦ୍ରବାବୁ ନାଇଡୁ କେନ୍ଦ୍ରକୁ ବିନା ମୂଲ୍ୟରେ ଜମି ଯୋଗାଇ ଦେଇଛନ୍ତି ଏବଂ ଏନଡିଆରଏଫ୍‍ ର ୧୦ମ ବାଟାଲିୟନ ଏବଂ ଏନଆଇଡିଏମ ର ଦକ୍ଷିଣ ଭାରତ ଶାଖା ପ୍ରତିଷ୍ଠା କରିବାରେ ଏହା ସାହାଯ୍ୟ କରିଛି ।

HS