ભારતીય આંકડાકીય સેવા (ISS) પ્રોબેશનર્સ (2024 બેચ) ના એક ગ્રુપે આજે (14 જાન્યુઆરી, 2025) રાષ્ટ્રપતિ ભવનમાં ભારતના રાષ્ટ્રપતિ શ્રીમતી દ્રૌપદી મુર્મુને સાથે મુલાકાત કરી હતી.

પ્રોબેશનરોને સંબોધતા રાષ્ટ્રપતિએ કહ્યું કે આંકડાકીય સાધનો અને માત્રાત્મક તકનીકો નીતિગત નિર્ણયો માટે અનુભવ આધારિત પાયો પૂરો પાડીને અસરકારક શાસનમાં મહત્વપૂર્ણ ભૂમિકા ભજવે છે. સરકાર આરોગ્ય, શિક્ષણ, વસ્તીનું કદ અને રોજગાર સહિત અન્ય બાબતો પર ડેટા એકત્રિત કરવા માટે રાષ્ટ્રીય આંકડાકીય પ્રણાલીઓ પર આધાર રાખે છે, જે નીતિનિર્માણનો આધાર બનાવે છે. આંકડાકીય વિશ્લેષણ એ શાસનમાં પારદર્શિતા અને જવાબદારી લાવવાનું એક સાધન છે. આંકડા માત્ર કાર્યક્ષમ શાસનનો આધાર નથી પણ સામાજિક-આર્થિક વિકાસ માટેનું સાધન પણ છે.

રાષ્ટ્રપતિએ કહ્યું કે સરકારને નીતિઓ ઘડવા, અમલમાં મૂકવા અને દેખરેખ રાખવા તેમજ નીતિ સમીક્ષા અને અસર મૂલ્યાંકન માટે ડેટાની જરૂર છે. નાગરિકોને સરકારી યોજનાઓ અને કાર્યક્રમોની નિષ્પક્ષ સમજણ અને મૂલ્યાંકન માટે ડેટાની જરૂર છે. ISS અધિકારીઓના કામ માટે આંકડાકીય પદ્ધતિઓમાં ઉચ્ચ કુશળતાની જરૂર છે, જેનો ઉપયોગ તેઓ દેશની ડેટા અને માહિતી જરૂરિયાતોના ઉકેલો પૂરા પાડવા માટે કરશે. તેમણે ISS અધિકારીઓને ડેટા એકત્રિત કરતી વખતે સામાન્ય લોકોની જરૂરિયાતો પ્રત્યે સંવેદનશીલ રહેવાનો આગ્રહ કર્યો. તેમણે કહ્યું કે તેઓ જે પણ ડેટા એકત્રિત કરે છે તેની પ્રક્રિયા, વિશ્લેષણ અને આખરે લોકોની જરૂરિયાતોને સંબોધવા અને તેમના સપનાઓને પ્રાપ્ત કરવામાં મદદ કરવા માટે ઉપયોગમાં લેવામાં આવશે.

રાષ્ટ્રપતિએ કહ્યું કે જેમ જેમ ભારત સમાવિષ્ટ અને સતત વિકાસ પ્રાપ્ત કરવા તરફ આગળ વધી રહ્યું છે, તેમ તેમ આંકડાકીય સંશોધન પર્યાવરણીય અસરો અને જળવાયુ પરિવર્તન પર દેખરેખ રાખવામાં મોટી ભૂમિકા ભજવશે. ઊર્જા વપરાશ અને કાર્બન ઉત્સર્જન સંબંધિત સૂચકાંકોને ટ્રેક કરવા માટે ISS અધિકારીઓ દ્વારા હાથ ધરવામાં આવેલા સંશોધન, ભારતને સતત વિકાસ અને પર્યાવરણીય સંરક્ષણ માટે ડેટા-આધારિત વ્યૂહરચનાઓ બનાવવા સક્ષમ બનાવી શકે છે. આ વ્યૂહરચનાઓ ભારતને સંયુક્ત રાષ્ટ્રના ટકાઉ વિકાસ લક્ષ્યો (SDGs) ને પૂર્ણ કરવામાં વધુ મદદ કરશે.

રાષ્ટ્રપતિનું ભાષણ જોવા માટે કૃપા કરીને અહીં ક્લિક કરો-

AP/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com