খুরুমজরি!

কেন্দ্রগী মন্ত্রীমন্দলদা লৈরিবা ঐহাক্কী মরুপশিং, লৈবাক অসিগী মফম কয়াদগী লাকপা ইকাই খুম্নরবা মীওইশিং অমসুং ঐহাক্কী নহা ওইরিবা মরুপশিং,

ঐহাক ঙরাং নুমিদাং কুৱেত্তগী নুমিদাং থেংনা হল্লকখি। মফম অদুদা ঐহাক্না ভারতকী নহারোলশিং, প্রোফেস্নেলশিংগা লোয়ননা মতম শাংনা ৱারী শাখি। হৌজিক মফম অসিদা লাক্লবা মতুংদা ঐহাক্কী অহানবা প্রোগ্রাম অসি লৈবাক অসিগী নহাশিংগা লোয়ননা পাংথোক্লি। মসি য়াম্না নুংঙাইবা থৌদোক অমনি। ঙসি লৈবাক অসিগী নহা লিশিং কয়াগীদমক, অদোম পুম্নমক্কীদমক, পুন্সিগী অনৌবা তাঙ্কক অমা হৌরি। অদোমগী চহি কয়াগী মঙলান অদু মপুং ফারি, চহি কয়াগী কন্না হোৎনখিবশিং অদু মাই পাক্লে। চৎলিবা চহি 2024 অসিনা অদোম অমসুং অদোমগী ইমুং মনুংগী মীওইশিংবু অনৌবা নুংঙাইবা অমগা লোয়ননা থাদোক্লগনি। নহাশিং অমসুং অদোমগী ইমুং-মনুং পুম্নমকপু ঐহাক্না নুংঙাইবা ফোংদোকচরি।

মরুপশিং,

ভারতকী নহাশিংগী তৌবা ঙম্বশিং অমসুং হৈশিংবশিং মপুং ফানা শীজিন্নবা অসি ঐখোয়গী সরকারগী খ্বাইদগী চাউবা প্রাইওরিতিনি। ঐখোয়না রোজগার মেলাশিংগী খুত্থাংদা মসিগী মাইকৈ অসিদা লেপ্পা লৈতনা থবক তৌরি। হৌখিবা চহি 10 অসিদা সরকারগী থবক পীবগী খোঙজং অসি সরকারগী তোঙান তোঙানবা মন্ত্রালয়শিং, দিপার্তমেন্তশিং অমসুং ইন্সতিত্যুসনশিংদা চত্থদুনা লাক্লি। ঙসি ফাওবদা, নহারোল লিশিং 71 হেনবদা এপ্পোইন্তমেন্ত লেতর পীখ্রে। হৌখিবা চহি অমা মখাই অসিদা, ঐখোয়গী সরকারনা নহারোল লাখ 10 রোমদা পর্মিনেন্ত ওইবা সরকারগী থবক পীখ্রে।  মসি মশামক্কী ওইনা অচৌবা রেকোর্দ অমনি। মমাংগী সরকার অমত্তগী মতমদা, নহারোলশিংনা অসিগুম্বা মিসন মোদতা ভারত সরকারদা পর্মিনেন্ত জোব ফংখিদে। অদুবু ঙসিদি, নহা লাখ কয়ানা লৈবাক অসিদা সরকারগী থবক ফংবতা নত্তনা, থবকশিং অসি মপুং ফানা অচুম্বা অমসুং ত্রান্সপরেন্সী লৈবগা লোয়ননা পীরি। অসিগুম্বা ত্রান্সপরেন্ত ত্রেদিসন অসিদগী লাকপা নহারোলশিংনা মপুং ফানা কত্থোক্তুনা অমসুং পুকচেল শেংনা লৈবাক্কী সেবা তৌরিবা অসিদা ঐহাক নুংঙাইবা ফাওই।

মরুপশিং,

লৈবাক অমা হেক্তগী চাউখৎ-থৌরাং অসি মাগী নহারোলশিংগী লেবর, কেপাসিতী অমসুং লুচিংবদা য়ুম্ফম ওই। ভারতনা 2047 ফাওবদা চাউখৎলবা ভারত অমা শেম্নবা ৱারেপ লৌরে। ঐখোয়না মসিগী ৱারেপ অসিদা থাজবা থম্লি, ঐখোয়না মসিগী পান্দম অসি ফংলগনি হায়না থাজবা থম্লি। মরমদি ভারতকী থৌনা ফরবা নহারোলশিং অসি ভারতকী পোলিসী খুদিংমক্কী, ৱারেপ খুদিংমক্কী মরু ওইনা লৌখি। করিগুম্বা অদোম্না হৌখিবা দিকেদকী পোলিসীশিং, মেক ইন ইন্দিয়া, আত্মানির্ভর ভারত অভিয়ান, স্তার্ত-অপ ইন্দিয়া, স্তেন্দ অপ ইন্দিয়া, দিজিতেল ইন্দিয়া য়েংলবদি, অসিগুম্বা স্কিম খুদিংমক নহাশিংবু মরু ওইনা লৌদুনা শেমখি। ভারতনা মাগী স্পেস সেক্তরদা পোলিসীশিং হোংদোকখি, ভারতনা মাগী দিফেন্স সেক্তরদা মেন্যুফেকচরিংবু প্রমোৎ তৌখি অমসুং ভারতকী নহারোলশিংনা মসিগী খ্বাইদগী কান্নবা ফংখি। ঙসি, ভারতকী নহারোলশিং অসি অনৌবা থাজবগা লোয়ননা মপুং ফাহল্লে। মখোয়না সেক্তর খুদিংমক্তা মখোয়গী ফ্লেগশিং পাইহল্লি। ঙসিদি ঐখোয়না মালেমগী খ্বাইদগী চাউবা 5শুবা ইকনোমী ওইরে। ভারত অসি মালেমগী খ্বাইদগী চাউবা স্তার্তঅপ ইকো-সিস্তেমগী অহুমশুবা মফমদা লৈরে। ঙসিদি, নহা অমনা মশাগী স্তার্ত অপ অমা হৌনবা ৱারেপ লৌরকপা মতমদা, মহাকপু মতেং পাংনবা ইকোসিস্তেম অমা ফংই। ঙসিদি, নহা অমনা শান্ন-খোৎনবদা কেরিয়র অমা শেম্বা মতমদা, মহাক্না মাইপাক্কনি হায়না থাজবা থম্লি। ঙসিদি, নহারোলশিংগীদমক্তা খোঙথাং খুদিংমক্তা, ত্রেনিংদগী হৌরগা শান্ন-খোৎনবগী লমদা তোর্নামেন্ত ফাওবদা অনৌবা থৌরাংশিং পায়খৎলি। ঙসিদি ঐখোয়না সেক্তর কয়াদা মপুং ফানা অহোংবা অমা উবা ফংলি। ঙসিদি ভারত অসি মোবাইল মেন্যুফেকচরিংদা মালেমগী অনিশুবা খ্বাইদগী চাউবা লৈবাক ওইরে। ঙসি, রিন্যুএবল ইনর্জীদগীনা ওর্গানিক ফার্মিং ফাওবা, স্পেস সেক্তরদগীনা দিফেন্স সেক্তর ফাওবা, তুরিজমদগীনা ৱেলনেস ফাওবা, লৈবাক অসিনা সেক্তর খুদিংমক্তা অনৌবা থাক্তা চঙশিল্লি, অনৌবা খুদোংচাবশিং শেমগৎলি।

মরুপশিং,

লৈবাক অসিবু মাংলোমদা পুখৎনবা ঐখোয়না নহা ওইরিবা তেলেন্তশিংবু চাউখৎহনগদবনি। মসিগী থৌদাং অসি লৈবাক অসিগী এজুকেসন সিস্তেমদা লৈ। মরম অসিনা, অনৌবা ভারত অমা শেমগৎনবগীদমক, লৈবাক অসিনা চহি তরাগী খুজিং কয়াদগী মোদর্ন এজুকেসন সিস্তেম অমগী তঙাইফদবা অদু ফাওদুনা লাক্লি। নেস্নেল এজুকেসন পোলিসীগী খুত্থাংদা লৈবাক অসিনা মসিগী মাইকৈ অসিদা চংশিল্লি। মমাংদা অথিংবা লৈবনা মরম ওইদুনা মহৈরোয়শিংদা চৈথেং পীরম্বা এজুকেসন সিস্তেম অসিনা হৌজিক মহৈরোয়শিংদা অনৌবা ওপ্সনশিং পীরি। অতল তিঙ্করিং লেবশিং অমসুং মোদর্ন পি.এম.-শ্রী স্কুলশিংগী খুত্থাংদা অঙাং ওইরিঙৈদগী হৌনা ইন্নোভেতিব ওইবা ৱাখল্লোনশিং শেমগৎলি। মমাংদা, লোল অসি খুঙ্গংগী নহাশিং, দলিতশিং, শোত্থরবা কাংলুপ, ত্রাইবেল সোসাইতীগী নহাশিংগীদমক অচৌবা পল অমা ওইরম্মি। ঐখোয়না ইমা লোলদা মহৈ তম্বা অমসুং একজামিনেসন পাংথোকপগী পোলিসী অমা শেম্লে। ঙসি ঐখোয়গী সরকারনা নহাশিংদা লোন 13দা রিক্রুতমেন্ত একজামিনেসন তৌবগী ওপ্সন পীরি। ঙমখৈদা লৈবা জিলাশিংগী নহারোলশিংদা খুদোংচাবা হেন্না পীনবগীদমক, ঐখোয়না মখোয়গী কোতা হেনগৎহল্লে। ঙসি, ঙমখৈগী লমদমশিংগী নহারোলশিংদা লেপ্পা লৈতনা সরকারগী থবক পীনবগীদমক অখন্নবা রিক্রুতমেন্ত রেলীশিং পাংথোক্লি। ঙসিদি, নহা লিশিং 50 হেনবনা সেন্ত্রেল আর্মদ পুলিস ফোর্সতা রিক্রুত তৌনবগীদমক এপ্পোইন্তমেন্ত লেতর ফংখ্রে। ঐহাক্না নহাশিং অসিবু ঐহাক্কী অখন্নবা য়াইফ-মঙ্গোল পীজরি।

মরুপশিং,

ঙসি অসি চৌধরী চরন সিংহজীগী মপোক কুমওনসুনি। চহি অসিদা ভারত রত্ন পীদুনা চৌধরী সাহাববু ইকায় খুম্নবা উৎপগী খুদোংচাবা ফংখিবা অসি ঐখোয়গী সরকারগী লাইবক ফবা অমনি। ঐহাক্না মহাকপু ইকায় খুম্নবা উৎচরি। ঐখোয়না নুমিৎ অসিবু কিসান দিবস হায়না পাংথোকই। মসিগী থৌরম অসিদা, ঐহাক্না লৈবাক অসিগী লৌমী পুম্নমকপু, অন্নাদাতাশিংদা ইকায় খুম্নবা উৎচরি।

মরুপশিং,

চৌধরী সাহেবনা হায়নরম্মি মদুদি ভারতকী খুঙ্গংগী লমশিং চাউখৎলকপা মতমদা খক্তদা ভারত চাউখৎলগনি। ঙসিদি, ঐখোয়গী সরকারগী পোলিসীশিং অমসুং ৱারেপশিং অসিনা মরম ওইদুনা, ভারতকী খুঙ্গংদা অনৌবা থবক ফংবগী অমসুং মশাগী থবক ফংবগী খুদোংচাবশিং শেমগৎলক্লি। লৌউ-শিংউগী সেক্তরদা নহারোল কয়া অমা থবক ফংলি, মখোয়না পামজবা থবক তৌবগী খুদোংচাবা ফংলি। সরকারনা গোবর্ধন য়োজনাগী মখাদা লৈবাক অসিদা বাইওগ্যাস প্লান্ত চাম্মরোম শারকপা মতমদা, মসিনা মৈ পুথোকপতা নত্তনা নহারোল লিশিং কয়াদা থবক পীখি। সরকারনা লৈবাক অসিগী লৌউ-শিংউগী কৈথেল চা কয়াবু ই-নাম য়োজনাগা শম্নহন্নবা থবক পায়খৎপা হৌরকপা মতমদা, মসিনা নহারোলশিংগীদমক থবক ফংবগী অনৌবা খুদোংচাবা কয়া অমসু লৈহনখি। সরকারনা ইথানোল মিক্স তৌবগী চাং চাদা 20 হেনগৎনবা ৱারেপ লৌখিবনা লৌমীশিংদা মতেং পাংবতা নত্তনা চিনিগী সেক্তরদা থবক ফংহন্নবা অনৌবা খুদোংচাবশিংসু পীরি। ঐখোয়না লৌমীশিংগী পোত্থোক পুথোকপা ওর্গনাইজেসন, FPO 9,000 রোম শেমখিবা মতমদা, মসিনা লৌমীশিংদা অনৌবা কৈথেল অমা শেমগৎপদা মতেং পাংখি অমসুং খুঙ্গংগী লমশিংদা থবক ফংহনখি। ঙসিদি সরকারনা মালেমদা খ্বাইদগী চাউবা স্কিম অমা পায়খৎলি। মসিদা চিঞ্জাক থম্নবগীদমক্তা গুদাম লিশিং কয়া অমা শাগৎলি। হায়রিবা দুকানশিং অসি শাবনা থবক শুবা অমসুং মশানা মশাবু থবক পীবগী খুদোংচাবা কয়া অমসু ফংহল্লগনি। নুমিৎ খরনিগী মমাংদা সরকারনা বিমা সখী য়োজনা হৌদোকখ্রে। সরকারগী পান্দমদি লৈবাক অসিগী মীপুম খুদিংমকপু ইন্সুরেন্স প্রোতেক্সনগা শম্নহনবনি। মসিনা খুঙ্গংগী মফমশিংদা থবক ফংহন্নবগী খুদোংচাবা কয়া অমসু লৈহল্লগনি। দ্রোন দিদি অভিয়ান ওইগেরা, লাখপতী দিদি অভিয়ান ওইগেরা, বেঙ্ক সখী য়োজনা ওইগেরা, মসিগী খোঙথাং পুম্নমক, মসিগী কেম্পেন পুম্নমক অসিনা ঐখোয়গী লৌউ-শিংউগী সেক্তরদা, ঐখোয়গী খুঙ্গংগী লমশিংদা থবক ফংহন্নবা অনৌবা খুদোংচাবা কয়া অমা পীরি।

মরুপশিং,

ঙসিদি, নুপীমচা লিশিং কয়াদা মফম অসিদা এপ্পোইন্তমেন্ত লেতর পীখ্রে। নহাক্কী মায় পাকপা অসিনা অতোপ্পা নুপীশিংদা ইথিল পীরগনি। ঐখোয়গী হোৎনরিবশিং অসি লম খুদিংমক্তা নুপীশিংবু মশা মথন্তা লেপচবা ওইহন্নবা হোৎনবনি। ঐখোয়না নুপী মীরোনবশিংদা চয়োল 26কী ছুতি পীবগী ৱারেপ লৌখিবনা নুপীমচা লাখ কয়াগী কেরিয়র কনবা ঙমখ্রে, মখোয়গী মঙলানশিং মাংহন্দনা থম্লে। ঐখোয়গী সরকারনা নুপীশিংবু মাংলোমদা চংশিনবদা অথিংবা থম্লিবা খুদোংচাদবা খুদিংমক লৌথোক্নবা হোৎনরি। নীংতম্লবা মতুং চহি কয়াগী মতুংদা, নুপীমচা মহৈরোয় কয়া অমনা স্কুলশিংদা তোখাইবা তোইলেৎ লৈতবনা মরম ওইদুনা মহৈ তম্বা তোকখি। স্বচ্ছ ভারত অভিয়ানগী খুত্থাংদা ঐখোয়না মসিগী সমস্যা অসি কোকহল্লে। সুকন্যা সমৃদ্ধি য়োজনানা নুপীমচাশিংনা মখোয়গী মহৈ তম্বদা শেলগী অৱাবা মায়োক্নদনবা হোৎনখি। ঐখোয়গী সরকারনা নুপী করোর 30গী জন ধন একাউন্ত হাংদোক্লে। মসিগী মতুং ইন্না মখোয়না সরকারগী স্কিমশিংগী হকথেংননা কান্নবা ফংবা হৌরে। মুদ্রা য়োজনাগী খুত্থাংদা নুপীশিংনা গেরেন্তী য়াওদনা লোন ফংলকপা হৌরকখি। নুপীশিংনা য়ুম পুম্নমক য়েংশিনবা চৎনরম্মি, অদুবু লম অদু মখোয়গী মিংদা লৈরমদে। ঙসিদি প্রধান মন্ত্রী অৱাস য়োজনাগী মখাদা ফংলিবা য়ুম অয়াম্বদি নুপীশিংগী মিংদা লৈরে। পোশন অভিয়ান, সুরক্ষিৎ মাতৃত্ব অভিয়ান অমসুং আয়ুশ্মান ভারতকী খুত্থাংদা নুপীশিংনা হেন্না ফবা হকশেলগী খুদোংচাবশিং ফংলি। ঐখোয়গী সরকারদা, নুপীশিংনা বিধান সভা অমসুং লোক সভাদা রিজার্বেসন ফংলে। ঙসি ঐখোয়গী খুন্নাই, ঐখোয়গী লৈবাক অসি নুপীশিংনা লুচিংবা চাউখৎপগী মায়কৈদা খোঙজেল য়াংনা চংশিল্লি।

মরুপশিং,

ঙসি এপ্লোইন্তমেন্ত লেত্তর ফংলবা নহা ওইরিবা ইচিল-ইনাওশিং অসি অনৌবা মখলগী লৈঙাক্কী পথাপ অমগী শরুক অমা ওইগদৌরি। সরকারগী ওফিসশিং অমসুং সরকারগী থবকশিংগী অরিবা ইমেজ অসি হৌখিবা চহি 10দা হোংখ্রে। ঙসিদি, সরকারগী এমপ্লোয়ীশিংগী মরক্তা হেন্না ইফিসিএন্সি অমসুং প্রদক্তিবিতী উবা ফংলে। সরকারগী এমপ্লোয়ীশিংনা মখোয়গী দেদিকেসন অমসুং কন্না হোৎনবনা মরম ওইদুনা মসিগী মাইপাকপা অসি ফংলে। নখোয়না তমজবা পাম্বা অমসুং মাংলোমদা চংশিনবা পাম্বা মরম্না মসিগী থাক অসি য়ৌরকপনি। অদোম্না অদোমগী তুংগী পুন্সিদসু চপ মান্নবা এপ্রোচ অসিবু ঙাক্না চৎকদবনি। iGOT কর্ময়োগীনা অদোমবু মখা তানা তম্বদা য়াম্না মতেং পাংগনি। iGOTদা অদোমগীদমক্তা তোঙান তোঙানবা মখলগী কোর্স 1600 হেন্না ফংলি। মসিগী খুত্থাংদা, অদোম্না তোঙান তোঙানবা হীরমশিংদা কোর্সশিং অসি য়াম্না অতেনবা মতমগী মনুংদা, ইফেক্তিব ওইবা মওংদা মপুং ফাহনবা ঙমগনি। নখোয় নহা ওইরি, নহাক্না লৈবাক অসিগী শক্তি ওইরি। অমসুং, ঐখোয়গী নহারোলশিংনা ফংবা ঙমদবা পান্দম অমত্তা লৈতে। নহাক্না অনৌবা ইনর্জীগা লোয়ননা অনৌবা তাঙ্কক অমা শেমগদবনি। ঙসি এপ্পোইন্তমেন্ত লেত্তর ফংখ্রবা নহাশিংবু ঐনা অমুক্কা হন্না নুংঙাইবা ফোংদোকচরি। নখোয়গী অফবা তুংলমচৎকীদমক য়াইফ মঙ্গোল পীজরি।

হন্না-হন্না থাগৎচরি।

***