​কুৱেতকী অমির সৈখ মেসাল অল-অহমদ অল-জাবর অল-সাবাহনা চেবাউ পীরকপদগী, দিশেম্বর ২১-২২,২০২৪ দা প্রধান মন্ত্রী শ্রী নরেন্দ্র মোদী কুৱেত্ত সরকারগী ওইবা খোঙচৎ অমা পাংথোকখ্রে। মসি মহাক্কী অহানবা কুৱেত খোঙচৎনি। প্রধান মন্ত্রী শ্রী নরেন্দ্র মোদীনা দিশেম্বর ২১,২০২৪ দা কুৱেত্ত ২৬শুবা অরাবিয়ান গল্ফ কপ হৌদোকপগী থৌরম অমির সৈখ মেসাল অল-অহমদ অল-জাবর অল-সাবাহগী গেস্ত ওফ ওনর ওইনা শরুক য়াখি।

কুৱেতকী অমির সৈখ মেসাল অল-অহমদ অল-জাবর অল-সাবাহ অমসুং কুৱেতকী ক্রাউন প্রিন্স সৈখ সাবাহ অল-খালিদ অল-হামদ অল-মুবারক অল-সাবাহনা বায়ান কোনুংদা দিশেম্বর ২২,২০২৪ দা প্রধান মন্ত্রী শ্রী নরেন্দ্র মোদী তরাম্না ওকখি। মঙোন্দা কুৱেতকী খ্বাইদগী চাউবা মনা ‘দ ওর্দর ওফ মুবারক অল কাবির’ পীবদা প্রধান মন্ত্রী শ্রী নরেন্দ্র মোদীনা কুৱেতকী অমরি সৈখ মেসাল অল-অহমদ অল-জাবর অল-সাবাহ থাগৎপা ফোঙদোকখি। লুচিংবশিংনা লৈবাক অনিগী, মালেমগী, লমদম লমদমগী অমসুং নাকল অনিমক্না দরকার ওইবা ৱাফমশিং খন্নখি।

লৈবাক অনিগী মমাংঙৈদগী লৈরক্লবা, অচেৎপা অমসুং মরুপ-মপাং ওইবা মরীশিং য়েংলদুনা অমসুং হিরম কয়াদা মতেং পাংনবা হেনগৎহন্নবগী অপাম্বা লৈদুনা, ভারত অমসুং কুৱেতকী মরক্ত লৈনরিবা মরীশিং ‘স্ত্রাতেজিক পার্তনরশিপ’ অমগী থাক্ত পুখৎপদা লুচিংবশিংনা য়ানরে। মসি লৈবাক অনিগী অপাম্বশিং অমসুং লৈবাক অনিগী মীয়াম য়াইফনবনি হায়না লুচিংবশিংনা ফোঙদোকখ্রে। লৈবাক অনিগী মরক্ত স্ত্রাতেজিক পার্তনরশিপ অমা শেমগৎপা অসিনা ঐখোয়না মতম কয়াগী মমাঙদগী লৈরক্লবা পুৱারি ওইরবা মরীশিং হেন্না পাকথোক-চাউথোকহনগনি অমসুং চেৎশীনহনগনি।

প্রধান মন্ত্রী শ্রী নরেন্দ্র মোদীনা কুৱেতকী প্রধান মন্ত্রী সৈখ অহমদ অবদুল্লাহ অল-অহমদ অল-জাবর অল-মুবারক অল-সাবাহগা লৈবাক অনিগী ওইবা ৱারি শানখ্রে। নৌনা শেমগৎপা স্ত্রাতেজিক পার্তনরশিপকী য়েংদুনা, রাজনিতি, ললোন-ইতিক, শেন থাদবা, দিফেন্স, সেকুরিতি, ইনর্জি, নাত, লাইরিক-লাইশু, তেক্নোলোজি অমসুং মীগা মীগা লৈনবা মরীশিং য়াওনা মরুওইবা হিরমশিংদা অপুনবা থৌরাংশিংগী খুৎথাংদা নাকল অনি মতেং পাংনবা হেনগৎহন্নবা লুচিংবশিংনা অমুক হন্না মখোয়গী থাজবা পীনখ্রে।

মান্নবা পুৱারি অমসুং নাত নক্নবগী চহিচা কয়া শুরবা পুৱারি ওইরবা মরীশিং নাকল অনিনা অমুক হন্না নিংশিংখি। মখল কয়াগী লৈবাক অনিগী মতেং পাংনবা অসিগী খোঙজেল য়াংনা লৈহন্নবা তোঙান-তোঙানবা থাকশিংদা চাংনাইনা উনবদা মখোয়না অপেনবা ফোঙদোকখ্রে। মিনিস্তর অমসুং অৱাংবা থাক্কী ওফিসিএলশিংগী থাক্তশিংদা লৈবাক অনি চাংনাইনা উনবদা নাকল অনিনা অপেনবা ফোঙদোকখ্রে।

হন্দক ভারত অমসুং কুৱেতকী মরক্ত জোইন্ত কম্মিসন ওন কোওপরেসন (জে সি সি) অমা লিংখৎপদা লৈবাক অনিনা তরাম্না ওকখ্রে। জে.সি.সি অসিনা লৈবাক অনিগী মরক্ত লৈনরিবা মরীশিং হন্না য়েংশিন্নবা অমসুং মোনিতর তৌনবা মেকানিজম অমা ওইগনি অমসুং লৈবাক অনিমক্কী ফোরন মিনিস্তরশিংনা লুচিংগনি। হৌজিক হকশেল, মেনপৱার অমসুং হায়দ্রোকার্বোনশিংগী জোইন্ত ৱার্কিং গ্রুপশিংগী মথক্ত ললোন-ইতিক, শেন থাদবা, লাইরিক-লাইশু, তেক্নোলোজি, লৌউ-শিংউ, সেকুরিতি অমসুং নাতকী হিরমশিংদা অনৌবা জোইন্ত ৱার্কিং গ্রুপশিং লিংখৎপা অসিনা তোঙান-তোঙানবা হিরমশিংদা ঐখোয়গী লৈবাক অনি মতেং পাংনবা মখা তানা পাকথোক-চাউথোকহনগনি। অথুবা মতমদা জে.সি.সি অমসুং জে.দব্লিউ.জিশিংগী মীফমশিং পাংথোক্নবা নাকল অনিনা তকশিনখ্রে।

ললোন-ইতিক অসি লৈবাক অনিগী মরক্ত লৈনবা মতম কুইরবা মরী অমনি হায়না নাকল অনিনা ফোঙদোকখি অমসুং নাকল অনিগী ললোন-ইতিক মখা তানা চাউখৎহন্নবা অমসুং মখল কয়া থোক্না পাংথোক্নবা খন্নখ্রে। ললোন-ইতিক্কী মীহুৎ কাংবুশিং চৎথোক-চৎশিন পুক্নিং থৌগৎপা অমসুং ইন্সতিতুসনশিং মরী লৈনবা হেনগৎহনবগী দরকার ওইবা অদু মখোয়না খন্নখি।

য়াম্না য়াংনা চাউখৎলক্লিবা অচৌবা ইকোনোমিশিংগী মনুংদা ভারতকী ইকোনোমি অমনি হায়বা খঙবগা লোয়ননা অমসুং শেন থাদবদা কুৱেতকী মরুওইবা অদু খঙবগা লোয়ননা, নাকল অনিনা ভারত্ত শেন থাদনবগী তোঙান-তোঙানবা খুদোংচাবশিং খন্নখ্রে। ফোরেন দাইরেক্ত ইনভেস্তমেন্তশিং অমসুং ফোরেন ইন্সতিতুসনেল ইনভেস্তমেন্তশিংগীদমক অফবা ফিবম অমা শেমগৎনবা ভারতনা পায়খৎলিবা থবকশিংনা কুৱেতনা তরাম্না ওকখ্রে অমসুং তেক্নোলোজি, তুরিজম, অনা-লায়েং, ফুদ-সেকুরিতি, লোজিস্তিক্স অমসুং অতোপ্পশিং য়াওনা তোঙান-তোঙানবা হিরমশিংদা শেন থাদনবা খুদোংচাবশিং খঙদোক্নবা অপাম্বা ফোঙদোকখি। কুৱেতকী ইনভেস্তমেন্ত ওথোরিতিশিংগা ভারতকী ইন্সতিতুসনশিং, কম্পেনিশিং অমসুং ফন্দশিংগী মরক্ত হেন্না নকশিন্ননা থবক তৌমিন্নবগী দরকার ওইবা অদু মখোয়না ফোঙদোকখি। লৈবাক অনিমক্কী কম্পেনিশিং ইনফ্রাস্ত্রকচর প্রোজেকশিং শেন থাদনবা অমসুং শরুক য়ানবা মখোয়না পুক্নিং থৌগৎখি। বাইলেতরেল ইনভেস্তমেন্ত ত্রিতিগী হৌজিক ৱারি শানরিবা অসি লোইশিন্নবা মখোয়না লৈবাক অনিমক্কী মরী লৈনবা ওথোরিতিশিংদা তকশিনখ্রে।

ইনর্জিগী হিরমদা লৈনরিবা লৈবাক অনিগী মরী ফগৎহন্নবা লম্বীশিং লুচিংবশিংনা খন্নখ্রে। লৈবাক অনিগী ইনর্জিগী ললোন-ইতিক্ত অপেনবা ফোঙদোকপগা লোয়ননা, হৌজিক লৈরিবা খুদোংচাবশিং অসি মখা তানা ফগৎহনবা হায়না মখোয়না য়ানরে। লৈবা-য়োনবগী মরী অমদা মতেং পাংনরিবা অসি অপস্ত্রিম অমসুং দাউনস্ত্রিম সেক্তরশিংদা হেন্না মতেং পাংনদুনা কমপ্রেহেন্সিপ পার্তনরশিপ অমদা পুখৎনবা ৱাফমশিং মখোয়না খন্নখ্রে। থাউ অমসুং গ্যা থিবা অমসুং পুথোকপা, রিফাইন তৌবা, ইঞ্জিনিয়ারিংগী থবকশিং, পেত্রোকেমিকেল ইন্দস্ত্রিশিং, অনৌবা অমসুং রিন্যুএল ইনর্জিগী লমদা মতেং পাংনবা হেনগৎনবা লৈবাক অনিগী কম্পেনশিং শৌগৎনবগী অপাম্বা মখোয়না ফোঙদোকখ্রে। ভারতকী পেত্রোলিয়ম রিজার্ব প্রোগ্রামগী খন্ন-নৈনবদা কুৱেত শরুক য়াবদা নাকল অনিমক্না অয়াবা পীরে। দিফেন্স অসি ভারত অমসুং কুৱেতকী মরক্ত লৈনরিবা স্ত্রাতেজিক পার্তনরশিপগী মরুওইবা শরুক অমনি হায়বা লৈবাক অনিনা য়ানরে। দিফেন্সকী লমদা এম.ও.য়ু খুৎয়েক পীনবা নাকল অনিনা য়ানরে অমসুং মসিনা অপুনবা ওইনা লাল তম্বা, লান্মীশিং ত্রেনিং পীবা, সমুদ্র মপান ঙাক-শেনবা, মেরিতাইম সেফতি, পুন্না ঙাক-শেনগী খুৎলায়শিং পুথোকপা য়াওনা লৈবাক অনিগী ঙাক-শেনগী মরীশিং মখা তানা ফগৎহন্নবা দরকার ওইনা ঙাক্লৌ পীগনি।

ঙমখৈ লান্না চৎথবা তেরোরিজম য়াওনা মখল খুদিংমক্কী তেরোরিজম লৈবাক অনিনা য়ানিংদবা ফোঙদোকখ্রে অমসুং তেরোরিজমগী শেন থাদনবা নেতৱার্কশিং অমসুং মখোয় চঙজফম পীবা অমসুং তেরর ইনফ্রাস্ত্রকচরশিং থুগায়নবা খঙহনখ্রে। সেকুরিতিগী লমদা হৌজিক লৈবাক অনি মতেং পাংনরিবা অসি থাগৎপা ফোঙদোক্লদুনা, তেরোরিজম থেংন্নবা থবকশিং, ই-পাউ অমসুং ইন্তিলিজেন্স শরুক য়ামিন্নবা, অখঙবশিং, খ্বাইদগী ফবা থবকশিং, তেক্নোলোজিশিং অমসুং কেপাসিতি বিল্দিং পীথোক-পীশিন তৌনবা অমসুং লো চৎনহনবা, মনি লাউন্দিরিং, দ্রগ ললোনবা অমসুং অতোপ্পা লৈবাক লান্না পাংথোকপা ক্রাইমশিংগী লমদা মতেং পাংনবা হেনগৎহন্নবা লৈবাক অনিনা য়ানরে। তেরোরিজম, রেদিকেলাইজেসন অমসুং খুন্নাইগী নুংশিংননা হিংমিন্নবদা অপনবা পীনবা সাইবরস্পেস শীজিন্নবা থিংবা য়াওনা সাইবরসেকুরিতিদা মতেং পাংনবা হেনগৎহন্নবা লম্বীশিং লৈবাক অনিনা খন্নখ্রে। তেরোরিজম থেংন্নবা অমসুং বোর্দর সেকুরিতিগী মতিক চাবা থবকশিং শেমগৎনবা মালেমগী মতেং পাংনবা হেনগৎনবা কুৱেতনা শীন্দুনা নবেম্বর ৪-৫,২০২৪ দা পাংথোকখিবা মরিশুবা অৱাংবা থাক্কী মীফমগী ফলশিং ভারতনা থাগৎপা ফোঙদোকখ্রে।

হকশেলগী মতেং পাংনবা অসি লৈবাক অনি মতেং পীনবগী মরুওইবা য়ুম্বীশিংগী মনুংদা অমনি হায়বা নাকল অনিনা য়ানরে অমসুং মরুওইবা হিরম অসিদা মতেং পাংনবা মখা তানা হেনগৎহন্নবা মখোয়গী থাজবা পীনখ্রে। কোবিদ-১০ লাইচৎ মনুংদা লৈবাক অনি মতেং পাংনখিবা অদু লৈবাক অনিনা থাগৎপা ফোঙদোকখ্রে। কুৱেত্ত ভারতকী ফার্মাসিউতিকেল মেনুফেকচরিং প্লান্তশিং লিংখৎনবগী ওইথোকপশিং খন্নখ্রে। দ্রগ রিগুলেতোরি ওথোরিতিশিংগী মরক্ত এম.ও.য়ু অমা লৈনবা হৌজিক খন্ন-নৈনবা পাংথোক্লিবা অসিদা মেদিকেলগী পোৎথোকশিংগী চৎন-কাংলোনশিংগী মতাংদা মতেং পাংনবা হেনগৎহন্নবা মখোয়গী অপাম্বা লৈবাক অনিনা ফোঙদোকখ্রে।

নৌনা থোক্লক্লিবা তেক্নোলোজিশিং, সেমিকন্দক্তরশিং অমসুং আর্তিফিসিএল ইন্তিলিজেন্স য়াওনা তেক্নোলোজিগী লমদা হেন্না মতেং পাংন্নবগী অপাম্বা লৈবাক অনিনা ফোঙদোকখ্রে। ইলেক্ত্রোনিক্স অমসুং আই.তিগী লমদা লৈবাক অনিমক্কী ইন্দস্ত্রিশিং/কম্পেনিশিংগী খ্বাইদগী ফবা থবকশিং শরুক য়ামিন্ননবা অমসুং বি২বি মতেং পাংন্নবা, ই-গভর্নান্সকী খুদোংচাবশিং খঙদোক্নবা মখোয়না খন্নখ্রে।

লৈবাক অসিগী চীঞ্জাক ৱাৎহন্দনবা ভারতকা মতেং পাংনবগী অপাম্বা কুৱেতনা ফোঙদোকখ্রে। ভারতকী ফুদ পার্কশিংদা কুৱেতকী কম্পেনিশিংনা শেন থাদবা য়াওনা পুন্না থবক তৌমিন্নবগী তোঙান-তোঙানবা খুদোংচাবশিং নাকল অনিনা খন্নখ্রে।

ইন্তরনেসনেল সোলার এল্লাইন্স (আই এস এ)গী মেম্বর অমা ওইনবা কুৱেতকী ৱারেপ ভারতনা তরাম্না ওকখ্রে অমসুং মসি কার্বোন য়াম্না থাদোক্তবা থবকশিং অমসুং তুংকোইনা চৎনবা য়াবা ইনর্জিগী পাম্বৈশিং পুথোকপা অমসুং শীজিন্নবগী লমদা মতেং পাংন্নবা মরুওইবা খোঙথাং অমনি । আই.এস.এগী মনুংদা মালেম শীনবা থুংনা সোলার ইনর্জি শীজিন্নবা হেনগৎহন্নবা নকশিন্ননা থবক তৌমিন্নবা হায়না নাকল অনিনা য়ানরে।

লৈবাক অনিগী সিবিল এভিএসন ওথোরিতিশিংগী মরক্ত হন্দক মীফম পাংথোকখিবা অদু নাকল অনিনা খঙজিনখ্রে। লৈবাক অনিগী ফ্লাইত সিত মশিং হেনগৎহন্নবা অমসুং মরী লৈনবা ৱাফমশিং লৈবাক অনিনা খন্নখ্রে। অথুবা মতমদা নাকল অনিনা য়ানবা পাম্বৈ অমা পুরক্নবা মখা তানা খন্নবা হায়না মখোয়না য়ানরে।

২০২৫-২০২৯ গী কলচরেল একচেঞ্জ প্রোগ্রাম (সি ই পি) অমুক নৌথোকহনবদা থাগৎপা ফোঙদোকখ্রে অমসুং মসিনা কলা, ঈশৈ অমসুং সাহিত্যাগী ফেস্তিবেলশিংদা কলচরেল একচেঞ্জশিং হেন্না খুদোংচাহনগনি, মীগা মীগা উনবা অমসুং কলচরগী মতেং পাংনবা মখা তানা ফগৎহন্নবা লৈবাক অনিনা মখোয়গী থাজবা অমুক হন্না পীনখ্রে।

২০২৫-২০২৮ গীদমক শান্নবগী লমদা মতেং পাংন্নবা থৌরম অমা খুৎয়েক পীনবদা নাকল অনিনা অপেনবা ফোঙদোকখ্রে, মসিনা শান্নরোয়শিং চৎথোক-চৎশিন তৌনবা, ৱার্কশোপশিং, সেমিনারশিং অমসুং মীফমশিং পাংথোকপা, লৈবাক অনিগী মরক্ত শান্নবগী চেফোঙশিং পীথোক-পীশিন তৌনবা য়াওনা শান্নবগী হিরমশিংদা মতেং পাংনবা হেনগৎহনগনি।

মহৈলোয়শঙশিং মরী লৈনবা অমসুং লৈবাক অনিগী অৱাংবা থাক্কী মহৈলোয়শঙশিংগী মরক্ত চৎথোক-চৎশিন তৌনবা ফগৎহনবা য়াওনা লাইরিক-লাইশু অসি মতেং পাংনবগী মরুওইবা শরুক অমনি হায়বা লৈবাক অনিনা ফোঙদোকখ্রে। ইজুকেসনেল তেক্নোলোজি, ওনলাইন লার্নিংগী প্লেতফোর্মশিংগী খুদোংচাবশিং খঙদোকপা অমসুং দিজিতেল লাইব্রেরিশিংগী লমদা মতেং পাংন্নবগী অপাম্বা নাকল অনিনা ফোঙদোকখি।

সৈখ সাউদ অল নাসর অল সাবাহ কুৱেতি দিপ্লোমেতিক ইন্সতিতুৎ অমসুং সু্স্মা শ্বারাজ ইন্সতিতুৎ ওফ ফোরেন সর্বিস (এস এস আই এফ এস)গী মরক্ত লৈনবা এম.ও.য়ুগী থবকশিংগী শরুক অমা ওইনা, কুৱেতকী দিপ্লোমেতশিং অমসুং ওফিসারশিংগী অখন্নবা কোর্স অমা নিউ দিল্লিদা লৈবা এস.এস.আই.এফ.এসতা পাংথোক্নবা পুখৎলকপা ৱাফম নাকল অনিনা তরাম্না ওকখ্রে।

চহি চা কয়া শুরবা মীগা মীগা লৈনবা মরীশিং অসিনা পুৱারি ওইরবা ভারত-কুৱেতকী মরীগী মরুওইবা য়ুম্বী অমা ওইরিবা অসি নাকল অনিনা থাগৎপা ফোঙদোকখ্রে। কুৱেত চাউখৎনবা ভারতমচাশিংনা লৌরিবা থৌদাং কুৱেতকী লুচিংবশিংনা থাগৎপা ফোঙদোকখ্রে অমসুং মখোয়গী শান্তি ওইবা অমসুং থবক শুবা-নোম্বা কনবগীদমক কুৱেত্ত লৈবা ভারতমচাশং অৱাংবা থাক্ত ইকায়খুম্নবা অদু ফোঙদোকখি। কুৱেত্ত লৈরিবা মশিং য়াম্লবা ভারতমচাশিংগী য়াইফনবা থবক পায়খৎপগীদমক প্রধান মন্ত্রী মোদীনা কুৱেতকী লুচিংবশিং থাগৎপা ফোঙদোকখি।

শিন্মীশিং অমসুং হৈথোই-শিংথোইবা মীওইশিংগী লমদা মতম শাংনা অমসুং পুৱারি ওইনা লৈনরক্লবা মরীগী মরুওইবা অদু নাকল অনিনা খন্নখি। মরমদম থাদোক্তুনা থবক শুবা লাক্লিবা মীওইশিং, শিন্মীশিং চৎথোক-চৎশিন তৌবা অমসুং নাকল অনিনা দরকার ওইবা হিরমশিংগী খুদোংচাদবশিং কোকহন্নবা কন্সুলার দাইলোগ অমসুং লেবর অমসুং মেনপৱার দাইলোগ চাংনাইনা পাংথোকপা হায়না নাকল অনিনা য়ানরে।

য়ু.এন অমসুং অতোপ্পা মালেমগী লুপশিংদা লৈবাক অনি ফজনা মতেং পীনবদা নাকল অনিনা থাগৎপা ফোঙদোকখ্রে। ২০২৩ দা ভারতনা সংহাই কোওপরেসন ওর্গনাইজেসন (এস সি ও)গী প্রসিদেন্ত ওইরিঙৈ মনুংদা ‘দাইলোগ পার্তনর’ ওইনা কুৱেত শরুক য়াবদা ভারতনা তরাম্না ওকখি।  এসিয়ান কোওপরেসন দাইলোগ (এ সি দি) দা কুৱেতনা মরুওইবা থৌদাং লৌবদা ভারতনা থাগৎপশু ফোঙদোকখ্রে। এ.সি.দি অসি রিজনেল ওর্গনাইজেসন অমা ওনখৎনবা ওইথোকপা য়াবা থিদোক্নবা দরকার ওইবা থবকশিং পায়খৎপগী মরুওইবা অদু কুৱেতনা ফোঙদোকখ্রে।

চহি অসিদা কুৱেতনা জি.সি.সিগী প্রসিদেন্ত ওইবদা প্রধান মন্ত্রী শ্রী নরেন্দ্র মোদীনা অমির থাগৎপা ফোঙদোকখ্রে অমসুং মহাক্কী লুচিংবা মখাদা ভারত-জি.সি.সি মতেং পাংনবা মখা তানা ফগৎলক্কনি হায়বগী থাজবা ফোঙদোকখি। সেপ্তেম্বর ৯,২০২৪ দা রিয়াধতা পাংথোকখিবা ফোরেন মিনিস্তরশিংগী থাক্ত অহানবা হৌদোকপা ভারত-জি.সি.সি জোইন্ত মিনিস্তরিএল মীতিংগী ফলশিং লৈবাক অনিনা তরাম্না ওকখ্রে। হকশেল, ললোন-ইতিক, সেকুরিতি, লৌউ-শিংউ, ফুদ সেকুরিতি, ত্রান্সপোর্তেসন, ইনর্জি, নাত য়াওনা হিরম কয়াদা হন্দক চৎনবা হৌখ্রবা জোইন্ত এক্সন প্লানগী মখাদা ভারত-জি.সি.সি মতেং পাংনবা হেন্না চেৎশিন্নবা হৌজিক জি.সি.সিগী প্রসিদেন্ত ওইনা কুৱেতনা মপুংফানা শৌগৎপা ফোঙদোকখ্রে। ইন্দিয়া-জি.সি.সি ফ্রি ত্রেদ এগ্রিমেন্ত অথুবা মতমদা লোইশিনবগী মরুওইবা অদু নাকল অনিনা ফোঙদোকখ্রে।

য়ু.এন অওনবা পুরকপগী মতাংদা, মালেমগী খুদোংচাদবশিং কোকহন্নবা মরুওইবা অমা ওইনা, হৌজিক ওইরিবা অচুম্বা শক্তমশিং য়ু.এনদা মমি তাদুনা, মতিক চাবা মালেমগী থবক তৌবা ঙম্বা সিস্তেম অমা লৈবগী মরুওইবা অদু লুচিংবশিংনা ফোঙদোকখি। য়ু.এনদা হেন্না শরুক য়ানবা, মতিক চানবা অমসুং থবক ফজনা পাংথোক্নবা সেকুরিতি কাউন্সিলগী মেম্বর মশিং হেনগৎহনবা য়াওনা য়ু.এন অওনবা পুরকপগী তঙাইফদবা অদু নাকল অনিনা ফোঙদোকখ্রে।

মখাগী চে-চাংশিং অসি খোঙচৎ মনুংদা খুৎয়েক পীনরে/খুৎশিন্নরে, মসিনা লৈবাক অনিগী মরীশিং মখা তানা ফগৎহল্লগনি অমসুং মতেং পাংন্নবা অনৌবা হিরমশিং হাংদোক্লগনি:

● দিফেন্সকী লমদা মতেং পীন্নবা ভারত অমসুং কুৱেতকী মরক্ত এম.ও.য়ু

● ২০২৫-২০২৯ গী ভারত অমসুং কুৱেতকী মরক্ত কলচরেল একচেঞ্জ প্রোগ্রাম

● ২০২৫-২০২৮গী ওইনা শান্নবগী লমদা মতেং পাংন্নবা ভারত সরকারগী য়ুথ এফেয়ার্স অমসুং স্পোর্তস মিনিস্ত্রি অমসুং কুৱেত সরকারগী পব্লিক ওথোরিতি ফোর য়ুথ এন্দ স্পোর্তসগী মরক্ত ইজুক্যুতিপ প্রোগ্রাম

● ইন্তরনেসনেল সোলার এল্লাইন্স (আই এস এ) দা কুৱেতনা মেম্বর ওইবা

মহাক অমসুং মহাক্কী মীহুৎ কাংবু তরাম্না ওকপগীদমক প্রধান মন্ত্রী শ্রী নরেন্দ্র মোদীনা কুৱেতকী অমির থাগৎপা ফোঙদোকখ্রে। ভারত অমসুং কুৱেতকী মরক্ত অকনবা মরুপ-মপাং অমসুং মতেং পাংনবগী মরীশিং অমুক হন্না খন্নখ্রে। লৈবাক অনিমক্কী মীয়াম কান্নবা পীনবা অমসুং লমদম লমদমগী অমসুং মালেমগী থবকশিংদা মতেং পাংনবা মখোয়গী মরী মখা তানা চাউখৎহনবা হায়না লুচিংবশিংনা থাজবা ফোঙদোকখ্রে। প্রধান মন্ত্রী শ্রী নরেন্দ্র মোদীনা কুৱেতকী অমির সৈখ মেসাল অল-অহমদ অল-জাবর অল-সাবাহ, কুৱেতকী ক্রাউন প্রিন্স সৈখ সাবাহ অল-খালিদ অল-হামদ অল-মুবারক অল-সাবাহ অমসুং কুৱেতকী প্রধান মন্ত্রী সৈখ অহমদ অবদুল্লাহ অল-অহমদ অল-জাবর অল-মুবারক অল-সাবাহ ভারত্ত লাক্নবা চেবাউ পীখ্রে।

*****