"திருவிழாக்களின் திருவிழா" என்ற பெயரில் நாகாலாந்தில் கொண்டாடப்படும் 25-வது ஹார்ன்பில் திருவிழா, இந்த ஆண்டு பூஜ்ஜிய கழிவுகள் அற்ற முறையிலும் ஒருமுறை பயன்படுத்தப்படும் பிளாஸ்டிக் இல்லாத வகையிலும் கொண்டாடப்பட்டது. இது சுற்றுச் சூழலுக்கு ஏற்ற நிலைத்தன்மையை நோக்கிய ஒரு குறிப்பிடத்தக்க படியாகும். நாகாலாந்தின் வளமான கலாச்சாரம், இசை, மரபுகளைக் கொண்ட இந்த திருவிழாவில் சுற்றுச்சூழல் பாதுகாப்பு  ஒரு சிறந்த முன்மாதிரியை அமைத்துள்ளது. தினசரி 2 லட்சம் பார்வையாளர்கள் வருகை தரும் இந்த விழாவில், சுற்றுச்சூழல் பாதுகாப்பும் நிலையான நடைமுறைகளும் ஒரு குறிப்பிடத்தக்க மைல்கல்லாக அமைந்துள்ளன.

இந்த ஆண்டு, ஹார்ன்பில் திருவிழாவை நாகாலாந்து முதலமைச்சர் திரு நெய்பியூ ரியோ தொடங்கி வைத்தார்.  கடுமையான கழிவு மேலாண்மை நடைமுறைகளை செயல்படுத்துவதன் மூலமும், அதில் சமூகத்தை ஈடுபடுத்துவதன் மூலமும், கலாச்சார கொண்டாட்டங்களைச் சுற்றுச்சூழல் பாதுகாப்புடன் எவ்வாறு இணைக்கலாம் என்பதற்கு இது ஒரு எடுத்துக்காட்டாக அமைந்தது.

இந்த விழாவை பூஜ்ஜிய கழிவு நிகழ்வாகவும், ஒற்றை பயன்பாட்டு பிளாஸ்டிக் (SUP) இல்லாத நிகழ்வாகவும் மாற்ற, பல பயனுள்ள நடவடிக்கைகள் மேற்கொள்ளப்பட்டன. விழாவில் அனைத்து ஒற்றை பயன்பாட்டு பிளாஸ்டிக் பொருட்களும் தடை செய்யப்பட்டன. இந்த முயற்சியை ஆதரிக்க, விற்பனையாளர்கள் மூங்கில் வைக்கோல்கள், மக்கும் கட்லரிகள், இலை அடிப்படையிலான தட்டுகள், காகித பைகள் போன்ற சூழலுக்கு ஏற்ற மாற்றுப் பொருட்களைப் பயன்படுத்தினர். இவை சுற்றுச்சூழல் ஏற்றவை என்பதுடன் உரமாக மாற்றக் கூடியவை. இந்த மாற்றுகள் கழிவுகளைக் குறைக்கவும், பசுமையான, தூய்மையான சூழலை மேம்படுத்தவும் உதவியது. இந்த முயற்சியின் வெற்றியை உறுதி செய்ய, அர்ப்பணிப்புள்ள அமலாக்கக் குழுக்களும் தன்னார்வலர்களும் தீவிரமாக கண்காணித்தனர். அவர்கள் விற்பனையாளர்களுடன் உரையாடி, வழிகாட்டுதலை வழங்கினர். அங்கீகரிக்கப்பட்ட பொருட்கள் மட்டுமே பயன்படுத்தப்படுகின்றனவா என்பதை உறுதிப்படுத்த வழக்கமான சோதனைகளையும் நடத்தினர்.  பார்வையாளர்கள் மத்தியில் விழிப்புணர்வு பிரச்சாரங்களும் மேற்கொள்ளப்பட்டன. இது நிலைத்தன்மைக்கான உறுதிப்பாட்டை மேலும் வலுப்படுத்தியது.

ஒரு விரிவான கழிவு மேலாண்மை அமைப்பும் நிறுவப்பட்டது. ஈரமான, உலர்ந்த, மறுசுழற்சி செய்யக்கூடிய கழிவுகளுக்கான தொட்டிகள் திருவிழா இடம் முழுவதும் வைக்கப்பட்டன. மறுசுழற்சி செய்யக்கூடியவை அங்கீகரிக்கப்பட்ட மையங்களுக்கு அனுப்பப்படுகின்றன. ஈரமான கழிவுகள் உரம் அலகுகளைப் பயன்படுத்தி தளத்தில் பதப்படுத்தப்பட்டன. இதன் மூலம் உள்ளூர் வயல்கள், சமூக தோட்டங்களுக்குப் பயனளிக்கும் உரத்தை உற்பத்தி செய்து, ஒரு சுழற்சிக் கழிவு மேலாண்மை மாதிரி உருவாக்கப்பட்டுள்ளது.

இது தவிர ஹார்ன்பில் திருவிழாவில் 42 கழிப்பறைகள் நிறுவப்பட்டன. இந்த கழிப்பறைகள் தவறாமல் சுத்தம் செய்யப்பட்டு பராமரிக்கப்பட்டன.

திருவிழாவில் நிலையான செயல்பாடுகளை ஊக்குவிப்பதில் தகவல், கல்வி, தொடர்பு பிரச்சாரங்கள் முக்கிய பங்கு வகித்தன.

ஹார்ன்பில் திருவிழாவின் பூஜ்ஜிய கழிவு அணுகுமுறை சுற்றுச்சூழல் பாதுகாப்புக்கு வழிவகுத்தது. மறுசுழற்சியை ஊக்குவிப்பதன் மூலம் திருவிழா ஒரு சுழற்சிப் பொருளாதாரத்தை ஊக்குவித்தது. நாகாலாந்தில் ஹார்ன்பில் திருவிழாவின் பூஜ்ஜிய கழிவு முயற்சியின் வெற்றி உலக அளவில் பெரிய அளவிலான நிகழ்வுகளுக்கு ஒரு முன்மாதிரியாக செயல்பட முடியும்.

----

PLM/KPG/DL