ఒడిషాలోని భువనేశ్వర్ లో 59వ డీజీపీలు/ఐజీపీల సదస్సును కేంద్ర హోంశాఖ, సహకార శాఖ మంత్రి శ్రీ అమిత్ షా శుక్రవారం ప్రారంభించారు. సదస్సు రెండు, మూడో రోజున జరిగే కార్యక్రమాలకు ప్రధానమంత్రి శ్రీ నరేంద్ర మోదీ అధ్యక్షత వహిస్తారు. ఈ సదస్సుకు అన్ని రాష్ట్రాలు/కేంద్ర పాలిత ప్రాంతాల డీజీపీలు/ఐజీపీలు, సీఏపీఎఫ్/ సీపీవోల అధిపతులు భౌతికంగానూ.. అన్ని రాష్ట్రాల నుంచి వివిధ హోదాల్లో ఉన్న అధికారులు వర్చువల్ గానూ హాజరవుతారు. జాతీయ భద్రతా సలహాదారు, హోం శాఖ సహాయ మంత్రి, కేంద్ర హోం శాఖ కార్యదర్శి కూడా చర్చల్లో పాల్గొన్నారు.

ప్రతిభావంతమైన సేవలందించిన ఇంటెలిజెన్స్ బ్యూరో అధికారులకు ఈ సందర్భంగా కేంద్ర హోం శాఖ మంత్రి శ్రీ అమిత్ షా పోలీసు పతకాలు అందించారు. దాంతోపాటు ‘ర్యాంకింగ్ ఆఫ్ పోలీస్ స్టేషన్స్ 2024’పై హోం మంత్రిత్వ శాఖ రూపొందించిన పుస్తకాన్ని విడుదల చేశారు. మూడు అత్యుత్తమ పోలీస్ స్టేషన్లకు ట్రోఫీలను కూడా శ్రీ అమిత్ షా అందించారు.

2024 సార్వత్రిక ఎన్నికలను సజావుగా నిర్వహించడంతోపాటు 3 కొత్త క్రిమినల్ చట్టాలను సజావుగా ముందుకు తీసుకుపోతున్న పోలీసు నాయకత్వాన్ని శ్రీ అమిత్ షా తన ప్రారంభోపన్యాసంలో అభినందించారు.

జమ్మూ-కాశ్మీర్, ఈశాన్య, వామపక్ష తీవ్రవాద ప్రభావిత రాష్ట్రాలలో భద్రత పరిస్థితులు గణనీయంగా మెరుగవడంపై కేంద్ర హోం శాఖ, సహకార శాఖ మంత్రి సంతృప్తి వ్యక్తం చేశారు.

3 కొత్త క్రిమినల్ చట్టాలు దేశంలో నేర న్యాయ వ్యవస్థ స్వభావాన్ని శిక్ష ఆధారితం నుంచి న్యాయ ఆధారితంగా మార్చాయని శ్రీ అమిత్ షా అన్నారు. కొత్త చట్టాల స్ఫూర్తికి మూలాలు భారతీయ సంప్రదాయంలో ఉన్నాయని ఆయన స్పష్టం చేశారు.

2047 నాటికి ‘వికసిత భారత్’ అనే ప్రధానమంత్రి శ్రీ నరేంద్ర మోదీ దార్శనికతను సాధించడంలో, 2027 నాటికి మూడో అతిపెద్ద ఆర్థిక వ్యవస్థగా అవతరించడంలో భద్రతను నెలకొల్పడం ఎంత ఆవశ్యకమైనదో కేంద్ర హోంశాఖ మంత్రి స్పష్టంచేశారు. తూర్పు సరిహద్దులో ఎదురవుతున్న భద్రత సవాళ్లు, వలసలు, పట్టణ పోలీసు వ్యవస్థ ధోరణులపై ప్రత్యేకంగా దృష్టిసారించాలని హోం శాఖ మంత్రి అన్నారు. జీరో టాలరెన్స్ పాలసీని అమలు చేయాలని శ్రీ అమిత్ షా పిలుపునిచ్చారు. ఇందుకోసం పక్కా వ్యూహంతో కూడిన కార్యక్రమాలు, కార్యాచరణ అమలు చేయాలని సూచించారు.

సదస్సులో తర్వాతి రెండు రోజుల్లో.. పోలీసు ఉన్నతాధికారులు ప్రస్తుత, సరికొత్త జాతీయ భద్రత సవాళ్లను ఎదుర్కోవడం కోసం ప్రణాళికను రూపొందిస్తారు. వామపక్ష తీవ్రవాదం, తీర ప్రాంత భద్రత, మత్తు పదార్థాలు, సైబర్ నేరాలు, ఆర్థిక భద్రత సహా పలు అంశాలు ఇందులో ఉన్నాయి. పోలీసు వ్యవస్థలో కొత్త నేర చట్టాలు, కార్యక్రమాలు, అత్యుత్తమ విధానాల అమలులో పురోగతిని కూడా రెండు రోజుల్లో సమీక్షిస్తారు.  

***