#IFFIWood, 23 नोव्‍हेंबर 2024

भारताच्या 55व्या आंतरराष्ट्रीय चित्रपट महोत्सवांत गाला प्रीमियरचो एक भाग म्हूण स्नो फ्लॉवरान आपली सुवात मेळयली आनी प्रशंसीत दिग्दर्शक गजेंद्र विठ्ठल अहिरे, छाया कदम, वैभव मंगले आनी सरफराज आलम साफू सयत ह्या सिनेमाच्या कलाकारांनी आनी तंत्रज्ञांनी काल गोंयांत पत्रकार परिशद घेतली.

हो मराठी भाशेचो चित्रपट एक मार्मिक, क्रॉस-कंट्री कथा सांगता जी दोन वेगवेगळ्या संस्कृतायांक — रशिया आनी कोंकण — एकठांय हाडटा. बर्फाळ सायबेरिया आनी पाचव्याचार  कोंकणाच्या फाटभूंयेर तयार केल्लो हो चित्रपट भारतांत रावपी आजी आनी रशियेंत रावपी नात हांचे मदलें ‘अंतर’ सोदून काडटा.

दिग्दर्शक गजेंद्र विठ्ठल अहिरे, हांणी स्नो फ्लॉवर फाटल्यान आशिल्ल्या सृजनशील प्रक्रिये विशीं विस्तरान म्हायती दिली. अशा अत्यंत कठीण परिस्थितींत चित्रीकरण करपाच्या आव्हानांचेरूय अहिरे हांणी भर दिलो. सायबेरियांतल्या खांटी-मानसियस्क हांगा तापमान शून्या सकयल १४अंश मेरेन देंवल्ल्यान ल्हान तंत्रज्ञांक  कठीण परिस्थितींत काम करचें पडलें. हीं आव्हानां आसून लेगीत ह्या कामगारांच्या समर्पण आनी घटमूट संघटनात्मक वावराक लागून तांकां काणयेची भावनीक खोलाय धरपी चित्रपट तयार करप शक्य जाले.

आमी रशियेंत पावले तेन्ना माइनस 14 अंश तापमान आशिल्लें अशें अहिरे हांणी सांगलें. "तांणी आमची काळजी घेतली-जोतीं, कपडे, जॅकेट, शाबू आनी शॅम्पू लेगीत दिलो. तांच्या आदारान आमी बरें काम करुंक आनी चित्रपटाक न्याय दिवंक पावले." भाशेची आडमेळीं आसून लेगीत-कोणच इंग्लीश उलयनाशिल्लो, आनी रशियनाक हिंदी कळनाशिल्ली -फिल्म निर्मितीचे सार्वत्रिक भाशेचेर आनी परस्पर आदराचेर आदारून हो पंगड प्रभावीपणान संवाद सादपाक येसस्वी जालो अशें ताणें नोंद केलें. “आमच्या संस्कृतायेचो एक भाग म्हूण आमी दर दिसा सकाळीं पयल्या शॉटा पयलीं गणपती आरती करताले. रशियेंतल्यान आयिल्ल्या खलाशीन पयले दोन दीस हें निरिक्षण केलें आनी तिसऱ्या दिसा सावन तांणी आरती  करपाक सुरवात केली. तांणी म्हणलें आमकां समजना पूण करपाक बरें दिसता,” 

रशियेची सुवात म्हूण निवड जाल्ली, फकत ताच्या भूगोला खातीर न्हय तर कोंकणा कडेन आशिल्ल्या संस्कृतीक विपरीतताये खातीर अशें वैभव मांगले हांणी स्पश्ट केलें. सायबेरियाच्या बर्फान भरिल्ल्या दृश्टीकोनांनी कथेतल्या भावनीक आनी भौगोलिक विभाजनाची एक परिपूर्ण फाटभूंय मेळ्ळी, जी काणयेच्या ल्हान ल्हान, उश्ण कटिबंधीय कोंकण वाठारांतल्या विपरीत विशयांक  प्रतिबिंबीत करता.

ह्या सिनेमांतली एक नामनेची अभिनेत्री छाया कदम हिणें दोनूय देशांतल्या विपरीततायेचें चित्रण करपाचो आपलो अणभव सांगलो. "हांव गजेंद्राचे  व्हडले फॅन, आनी ताचे वांगडा काम केल्ल्यान रशिया आनी भारतांतले खर संस्कृतीक फरक दाखोवपाची संद मेळ्ळी" अशें तिणें स्पश्ट केलें.

ह्या सिनेमांतलो मुखेल अभिनेतो सरफराज आलम साफू हाणें सेटांत आपल्याक मेळपी सहकार्याच्या भावनाचेर आनीक भर दिलो. मॉस्कोंत रावपी साफू हांणी ल्हान खलाश्यांची उण्यांत उणी उपकरणां आनी मुळाव्या साधनसुविधांचो वापर करपाची तांकीची तोखणाय केली. "मर्यादीत साधनसुविधांनी लेगीत आमी शूटिंग करपाक येसस्वी जाले. दिग्दर्शक गजेंद्रान म्हाका आपली अभिव्यक्ती करपाची संद  दिली, आनी हांवें कलाकार आनी क्रू कडल्यान खूप शिकलो" अशें साफू हांणी सांगलें. तशेंच ह्या सिनेमाचो प्रेक्षकां वयल्यान कितलो भावनीक परिणाम जालो ताचेर ताणें भर दिलो, इफ्फीचे प्रतिनिधी म्हणून हांगा आशिल्ले जायते रशियन प्रेक्षक प्रदर्शना वेळार दुकां व्हांवोपाक लागले. दोनूय देशांचो संबंद वाडत आसा अशें तांणी नदरेक हाडलें. ह्या सिनेमांतल्यान रशियन आनी भारतीय फिल्म निर्मात्यां मदीं आनीक सहकार्याची प्रेरणा मेळटली अशी आस्त बाळगता अशें साफू हांणी सांगलें.

कोंकणांतल्या सुंदर दर्यादेगे सावन सायबेरियाच्या गोठण, बर्फान भरिल्ल्या दृश्यां मेरेन ह्या चित्रपटांत पात्रांच्या भावनिक अस्थिरतायेचें प्रतिबिंबीत करपी एक खर दृश्य दाखयला.

पत्रकार परिशदे वेळार फिल्म निर्मात्यांनी प्रसार माध्यमांक आनी प्रेक्षकांक प्रादेशिक सिनेमाक आदार दिवचो असो उलो मारलो. हो प्रादेशिक चित्रपट दरेका भारतीयान पळोवपाक जाय  अशें अहिरे हांणी सांगलें. "हें फकत दोन संस्कृताये मदीं सांपडिल्ल्या चलयेची काणी न्हय, कुटूम, मोग आनी वांटेकारपण ह्या सार्वत्रिक विशयांचेर." सुश्री निकिता जोशी हांणी पत्रकार परिशदेचें संचालन केलें.

तुमी हांगा पत्रकार परिशद पळोवंक शकतात:

* * *

PIB IFFI CAST AND CREW | Subhash/Manali/Darshana | IFFI 55