0 3

Ka bynta kaba 4 jong ka Creative Minds of Tomorrow (CMOT) ka dei kaba la plié paidbah mynta ka sngi ha ka bynta kaba 55 jong ka International Film Festival of India (IFFI), kaba long kum u mawmer ha ka jingiaid lynti ka India sha ka jingsumar bad ka jingpynkupbor ia ki pateng ban wan jong ki nongshna phlim. Ka sienjam CMOT kaba la sdang hapoh ka Azadi Ka Amrit Mahotsav da ka tnad Information and Broadcasting, ka dei kaba dang ioh shuh shuh ka jingithuh kum kawei na ki rynsan ba biang tam ha ka ri na ka bynta ki samla ba don sap ha ki kam media bad ki kam pynbyrnia.

Ha ka jingai jingkren, u Sanjay Jaju, Secretary, ka tnad Information and Broadcasting, u la kdew sha ka jingiar ka kam jong ka CMOT mynta u snem, ha kaba la jied 100 ngut ki samla ba don sap ha 13 jait ki kam kiba iadei bad ka jingshna phlim kaba la kiew na ki 75 ngut kiba la shah jied hapoh 10 jait ki kam ha u snem ba la dep. “Mynta u snem, ka CMOT ka ai ka lad kaba kyrpang ia ki nongsaindur ba dang samla ba kin pyni is ki sap jong ki bad iatrei lang ha ki kam bapher bapher. Ka long kum ka lad sha ka Film Bazaar, ka ban plié ki lad kiba thymmai na ka bynta ka jingiatreilang ha kylleng ka pyrthei bad ka jingkiew shaphrang,” u la ong.

U la kren ruh shaphang ka World Audio Visual & Entertainment Summit (WAVES), ka ban long ha u Rymphang 2025, kaba thmu ban pynkhlain ia ka kyrdan jong ka India ha ki kam media jong ka pyrthei. “Nga pynshlur ia phi ban iashim bynta ha ka Create in India Challenge - Season 1 (CIC), ka ban long kaba plié lad ban ioh jingithuh ha kylleng ka pyrthei."

Ka Neerja Sekhar, Special Secretary, ka tnad Information and Broadcasting, ka la ong ba ka sngew sarong ban iohi ia ka jingkiew shaphrang jong ka CMOT. “Ha kine ki saw snem ba la dep, ka CMOT ka la kylla na ka rynsan na ka bynta ki jingthrang jong ki nongshna phlim ba dang samla. Mynta u snem, ngi sngew sarong ban kyntiew 13 jait ki kam, kaba long ka dak jong ka jingiar kane ka prokram bad ka jingkiew ka jingthrang ki samla jong ka India ban trei ha ki kam kiba iadei bad ka jingsaindur,” ka la ong da kaba ban jur halor ka bynta kaba kongsan jong kane ka sienjam ha ka jingkyntiew ia ka ioh ka kot bad ka jingsaindur thymmai ha ka ri.

U Apurva Chandra, Secretary ba rim jong ka Information and Broadcasting, u la kren shaphang ka jingdonkam ia ka jingiakhun shna phlim kaba 48 kynta, ka bynta kaba heh jong ka CMOT. “Kane ka jingiakhun ka dei ka jingpeit ia ka bor saindur jong phi bad ka jingpeit ia ka jinglah jong phi ban iatrei kum ka kynhun. Ka jingjop ha kane ka kam kam shong tang ha ka sap, ka shong ruh ha ka jinglah pyniaid iew ia ki jingmut jong phi,” u la ong. U la kdew ruh sha ka jingkiew ka jingioh jingithuh ki kynhun kum ka SRFTI bad FTII, kiba don ka bynta kaba kongsan ha ka jingtei ia ki samla ba don sap jong ka India ha ki kam saindur.

Ka Mahima Kaul, Director ka Public Policy ha Netflix, ka la kdew sha ka jingkyrshan ka Netflix ia ka CMOT, da kaba kren shaphang ka jingiahap jong kane ka sienjam bad ka jingkut jingmut jong kane ka rynsan streaming ban kyntiew ia ki samla ba don sap. “Ngi sngew sarong ban iatrei lang bad ka CMOT ban ai jinghikai ia ki voice-over artist na kylleng ka India hapoh ka sienjam Voicebox. Palat 50% kiba iashim bynta ki dei ki kynthei, kaba pyni ia ka thong jong ngi ban pynkupbor ia ki sur bapher bapher. Shuh shuh, kito kiba leh bha ha ka CMOT kin iadon bynta ha ka projek ba kyrpang jong ka Netflix, ka Azaadi Ki Amrit Kahaniyan, ha kaba kin iathuh ia ki khana kiba iadei bd ka jingiakhih na ka bynta ka jinglaitluid ka India”, la ong ka Mahima.

Ha ka jingai jingkren, u Prasoon Joshi, u nongthoh bad u Chairman jong ka Central Board of Film Certification (CBFC), u la kren shaphang ka jingdonkam ban sumar ia ki samla ba don sap ha kylleng ka India. “Ki khana bad ki sap ki long kiba bun ha ka ri jong ngi, hynrei ngi dei ban weng ia ka jingartatien shaphang ka rukom pynmih prokram ka long kaba donkam ban pynbiang ia ka rynsan kaba biang ia ki sur ba dang samla. Lada ngi pynsahkut ia ka kam iathuh khana ha tang ki nongbah, ngi duh ban iohi ia ka jingiar ka deiriti jong ka ri jong ngi. Ka CMOT ka iarap ban jam ia kane da kaba ai rynsan ia ki nongsaindur na baroh ki bynta ka India,” la ong u Joshi.

U Carter Pilcher, Founder bad CEO jong ka Shorts International, u la ban jur halor ka lawei kaba phyrnai jong ka kam shna phlim ha India. “Ki nongiashim bynta ha ka CMOT ki dei kiba la shah jied napdeng ki hajar ngut ki nongai application, bad kine ki 48 kynta ban wan kin wanrah ia ka jingiatreilang, ka jingsaindur bad ka jingshan ia ki phlim kiba itynnad. Kane ka dei ka dak jong ka bor saindur jong ki samla jong ka India,” la ong u Pilcher haba u la pynbna ba ki san tylli ki kynhun ki la kloi ban sdang ia kane ka jingiakhun.

Ban rakhe ia ka jingjop jong ki bynta kiba la dep, san ngut ki lahduh CMOT na ki snem kiba la dep ki la shah pynkup burom na ka bynta ki jingnoh synniang jong ki ha kane ka kam. Kine kin ialam lynti ia ki kynhun jong ki nongiashim bynta ha kine ki 48 kynta ka jingiakhun shna phlim, ha kaba kin ai kin jingmut bad ki jingshem jong ki ban iarap ia kine ki pateng ba thymmai jong ki nongsaindur.

Shaphang ka Creative Minds of Tomorrow (CMOT):

Ka sienjam Creative Minds of Tomorrow (CMOT) ka dei ka sianjam ba kyrpang jong ka tnad Information and Broadcasting, kaba la saindur ban lap, sumar bad kyntiew ia ki samla ba tbit tam jong ka India ha ka kam shna phlim. Naduh ba la sdang ia ka, ka CMOT ka la kylla sha ka rynsan kaba heh tam na ka bynta kito kiba kwah ban don bynta ha ka kam shna phlim ha India kaba wanrah ia ka jingiatreilang, ka jingkyntiew ia ki sap bad ka jingialam lynti. Ka bynta 2024 jong ka CMOT ka dei kaba pynlong ha ka bynta kaba 55 jong ka International Film Festival of India (IFFI) ha Goa naduh ka 20 haduh 28 tarik u Naiwieng.

Lyngba ka jingkyrshan jong ki kynhun kum ka Netflix bad Pearl Academy, ka CMOT ka thmu ban tei ia ka lawei ha kaba ka kam shna phlim jong ka India ka lah ban paw bha ha ka pyrthei.

Ban ioh jingtip shuh shuh, sngewbha leit ha ka: https://pib.gov.in/PressReleaseIframePage.aspx?PRID=2073892

* * *