ইকায়খুম্নরবশিং,

অদোম্না পীখিবা অফবা পাউতাকশিং অমসুং অফবা ৱাখল্লোনশিংগীদমক ঐনা তরাম্না ওকচরি। ভারতনা পুখৎলকপা ৱাফমশিং ইকায়খুম্নবা উৎপগা লোয়ননা, ঐগী কাংবুনা অদোমগী মফমদা অকুপ্পা মরোলশিং ফংহনগনি অমসুং অকক্নবা মতম অমগী মনুংদা ঐখোয়না হিরম খুদিংমক থবক ওইনা পাংথোক্কনি।

শক্নাইরবশিং,

ঐখোয়না মমাঙদা পাংথোকমিন্নখিবা থবকশিং, ঐখোয়না শরুক য়ামিন্নরিবা হৌজিক্কী দরকার ওইবশিং অমসুং তুংগীদমক ঐখোয়গী অনিংবশিংদা য়ুম্ফম ওইবা ভারত অমসুং করিকোম লৈবাকশিংগী মরক্তা লৈনবা মরীশিংনি।

হায়রিবা মরীশিং অসি অনৌবা থাকশিংদা পুখৎনবা ভারতনা মপুংফানা থবক ওইনা পায়খৎলে। ঐখোয়গী থবক খুদিংমক্তা, ঐখোয়না গ্লোবেল সাউথ অমসুং মসিগী মরুওইবশিংগী মতাংদা মীৎয়েং চঙলে।

হৌখিবা চহিদা, ভারতনা জি-২০ গী প্রসিদেন্ত ওইখিবা অদুগী মখাদা, লুপ অসি গ্লোবেল সাউথকী খোঞ্জেল অমা ওইরকখি। ঙরাং ঐনা ব্রাজিলদা, গ্লোবেল সাউথকী লৈবাকশিংদা মীৎয়েং চঙনবা ঐনা মালেমগী মীয়ামদা তকশিনখ্রে।

মালেমগী লুপশিং অমুক হন্না শেমদোকপা দরকার ওই হায়না ভারত অমসুং ঐখোয়গী করিকোম মরুপশিংনা য়ানখিবদা ঐ অপেনবা ফাওই।

ঙসিগী মালেম অসিদা অমসুং ঙসিগী খুন্নাই অসিদা মখোয়না মখোয় মশামক শেমজবা দরকার ওই। মসি তঙাইফদবনি। মসি থবক ওইনা পাংথোক্নবা, করিকোমগা নকশিন্ননা থবক তৌমিন্নবা অমসুং করিকোম শৌগৎপা য়াম্না মরুওই।

শক্নাইরবশিং,

ঙসি ঐখোয়গী মীফমদা লৌখিবা ৱারেপশিং অসিনা, হিরম খুদিংমক্ত ঐখোয় মতেং পাংনবদা অনৌবা মশক অমা হাপচিল্লগনি। ৱারেপশিং অসি থবক ওইনা পাংথোকপদা ইন্দিয়া-করিকোম জোইন্ত কম্মিসন অমসুং জোইন্ত ৱার্কিং গ্রুপশিংনা মরুওইবা থৌদাং লৌগনি।

ঐখোয় মতেং পীনবা অসি খুমাঙচাউশিন্নবা, ভারত্তা ৩শুবা করিকোম মীফম পাংথোক্নবা ঐনা হৌদোক্লি।

অমুক হন্না, রাস্ত্রপতি ইরফান অলি, প্রধান মন্ত্রী দিক্কোন মিতচেল, করিকোম সেক্রেতরিয়েত অমসুং ময়ামগী মফমদা ঐনা থম্মোয় শেংনা তৌবীমল খঙবা উৎচরি।

***