ভারতকী রাস্ত্রপতি শ্রীমতী দ্রৌপদি মুর্মুনা ঙসি (২০২৪গী নবেম্বর ৪) রাস্ত্রপতি ভবনদা ইন্দিয়ন এভিয়েসন সেক্তরদা মায় পাক্লবা নুপীশিংগী কাংলুপ অমগা ৱারী শাখ্রে। মীফম অসি মীয়ামগা লোয়ননা অচেৎপা মরী থম্নবা অমসুং মখোয়গী থৌদাং থৌগৎনবা পান্দম থম্লিবা “দি প্রসিদেন্ত ৱিথ দি পিপল” ইনিসিয়েতিবকী মখাদা পাংথোকপনি।

থৌরম অদুদা ৱা ঙাংলদুনা রাস্ত্রপতিনা হায়খি মদুদি ভারতকী সিভিল এভিয়েসন সেক্তরদা তোঙান তোঙানবা ওপরেস্নেল অমসুং তেক্ননিকেলগী ওইবা লমশিংদা নুপীশিংনা মরুওইবা থৌদাং লৌরি। মহাক্না ফোংদোকখি মদুদি এয়র ত্রেফিক কন্ত্রোলরগী চাদা ১৫দি নুপীনি, ফ্লাইত দিস্পেচরগী চাদা ১১দি নুপীনি, অমসুং এরোস্পেস ইঞ্জিনীয়রগী চাদা ৯দি নুপীনি। মহাক্না মসিমসু ফোংদোকখি মদুদি মমাং চহিদা কমর্সিয়েল লাইসেন্স ফংখিবা পাইলোতশিংগী মনুংদা চাদা ১৮দি নুপীনি। মহাক্না ইনোবেতিব ওইবা ৱাখল্লোন চেনবা অমসুং অনৌবা লম্বীদা খোংদাবগী থৌনা লৈবী মায় পাক্লবী নুপীশিংবু থাগৎপা ফোংদোকখি।

রাস্ত্রপতিনা হায়খি মদুদি ভারত সরকারগী হোৎনরিবশিং অদুনা সিভিল এভিয়েসন সেক্তরদা নুপীশিংগী প্রোগ্রেসতা ইনোৎ অমা পীরি। হৌজিক নুপা কয়া অমনা এভিয়েসন সেক্তরবু মখোয়গী কেরিয়র ওইনা খল্লি। মহাক্না হায়খি মদুদি এভিয়েসন ইন্দস্ত্রীদা নুপীশিংনা শরুক য়াবা হেনগৎলকপগা লোয়ননা লম অসিদা মাংলোমদা চংশিন্নবদা চপ মান্নবা খুদোংচাবসু মথৌ তাই।

রাস্ত্রপতিনা হায়খি মদুদি এজুকেসন অমসুং মতিক চাবা ত্রেনিং খক্তা নত্তনা ইমুং-মনুংগী সপোর্তসু মরু ওই। মসি তোইনা উবা ফংই মদুদি নুপী কয়ানা অৱাংবা থাক্কী এদুকেসন ফংলবসু ইমুং-মনুংদগী সপোর্ত ফংদবনা মরম ওইদুনা মখোয়গী মংলানশিং মংফাওহনবা ঙমদে। মহাক্না মায় পাক্লবা নুপীশিংদা অতোপ্পা নুপীশিংবু লমজিংনবা অমসুং মখোয়গী কেরিয়র খনবদা মখোয়বু পুক্নিং থৌগৎনবা অমসুং মখোয়গী মংলান মংফাওনহন্নবা তকশিনখি।

***