প্রধানমন্ত্রীগী লোইশঙ
রুসিয়াগী রাস্ত্রপতিগা লোয়ননা পাংথোকখিবা লৈবাক অনিগী মীফম মনুংদা প্রধান মন্ত্রীনা ফোঙদোকখিবা হৌদোকপগী ৱারোল (ওক্তোবর ২২,২০২৪)
Posted On:
22 OCT 2024 7:24PM by PIB Imphal
ইকায়খুম্নরবা,
অদোমগী মরুপ-মপাং ওইবগী মরী অমসুং তরাম্না ওকপগীদমক ঐনা থম্মোয় শেংনা ঐগী তৌবীমল খঙবা উৎচরি। ব্রিক্স মীফমগীদমক কাজানগুম্বা ফজরবা সহর অমদা লাকপগী খুদোংচাবা ফংবা অসিদা ঐ অপেনবা ফাওই। সহর অসি ভারতকী পুৱারিগী ওইবা অচেৎপা মরীশিং লৈনরি। কাজান্দা অনৌবা ভারতকী কন্সুলেত অমা হাংদোকপা অসিনা লৈবাক অনিগী মরীশিং হেন্না চেৎশিনহল্লগনি।
ইকায়খুম্নরবা,
ঐখোয় য়াম্না চেৎনা মতেং পাংনবা অমসুং অচেৎপা মরুপ-মপাং ওইবগী মরী অসি হৌখিবা থা অহুম অসিদা ঐগী রুসিয়াগী খোঙচৎ অনি অসিদা মমি তারে। জুলাইদা মোস্কোদা ঐখোয়গী চহিগী মীফম পাংথোকপা অসিনা হিরম খুদিংমক্তা ঐখোয় মতেং পাংনবা অদু হেন্না মপাঙ্গল কনখৎহল্লে।
ইকায়খুম্নরবা,
হৌখিবা চহিদা মাইপাক্না ব্রিক্সকী চিয়ারমেন ওইখিবদা ঐনা অদোম থাগৎপা ফোঙদোকচরি। হৌখিবা চহি ১৫ দা, ব্রিক্সনা মসিগী তোপ-তোপ্পা মশক অমা তাক্লে অমসুং হৌজিক মালেমগী লৈবাক কয়া মসিদা শরুক য়ানিংলে। ব্রিক্স মীফম অসিদা শরুক য়ানবা ঐনা থাজবা থম্লি।
ইকায়খুম্নরবা,
হৌজিক রুসিয়া অমসুং য়ুক্রেনগী মরক্তা মুক্নরিবা অসিগী মতাংদা ঐখোয় চাংনাইনা উনরে। ঐনা মমাঙদা হায়খ্রে মদুদি, শান্তি ওইবা পাম্বৈশিং খক্তনা ৱাথোকশিংগী ৱারোইশিন পুরকপদা ঐখোয়না থাজবা থম্লি। অথুবা মতমদা শান্তি অমসুং তংদু-লৈতাবা পুরকপদা ঐখোয়না মপুংফানা শৌগৎলি। মীওইবা খুন্নাইগী য়াইফনবা থবকশিংদা ঐখোয়না লুম্না লৌরি। তুংদা পাংবা য়াবা মতেং খুদিংমক পাংনবা ভারতনা থৌরাং তৌদুনা লৈরি।
ইকায়খুম্নরবা,
হায়রিবা ৱাফমশিং অসিদা ঐখোয়গী অনিংবশিং শরুক য়ানবগী অতোপ্পা মরুওইবা খুদোংচাবা অমা ঙসি ফংলে। অমুক হন্না, থাগৎচরি।
দিসক্লেমর: মসি প্রধান মন্ত্রীগী ৱারোলগী চাউরাকপা হন্দোকপনি। অশেংবা ৱারোল হিন্দীদা পীখি।
***
(Release ID: 2067166)
Visitor Counter : 70
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam