مرکزی وزیر داخلہ اور تعاون کے وزیر جناب امت شاہ نے آج گجرات میں احمد آباد میونسپل کارپوریشن (اے ایم سی) کے مختلف ترقیاتی کاموں سمیت 919 کروڑ روپے کے پروجیکٹوں کا افتتاح اور سنگ بنیاد رکھا۔ اس موقع پر گجرات کے وزیر اعلیٰ بھوپیندر پٹیل اور کئی دیگر معززین بھی موجود تھے۔

نوراتری کی مبارکباد کے ساتھ اپنے خطاب کا آغاز کرتے ہوئے جناب امت شاہ نے کہا کہ آج 919 کروڑ روپے کے ترقیاتی پروجیکٹوں کا افتتاح کیا گیا ہے اور ان کا سنگ بنیاد رکھا گیا ہے، جن میں صحت، تعلیم، لائبریری، پارکس، اور گلیوں کے چھوٹے دکانداروں سے متعلق کام شامل ہیں۔ انہوں نے کہا کہ ان میں سب سے اہم میونسپل نگر پراتھمک شکشا سمیتی کے ذریعہ جدید اسکولوں کی تعمیر ہے۔ جناب شاہ نے احمد آباد میونسپل کارپوریشن کے تئیں اظہار تشکر کرتے ہوئے کہا کہ کارپوریشن کی کوششوں کی وجہ سے ان کے پارلیمانی حلقہ میں تمام میونسپل پرائمری اسکول کامیابی کے ساتھ ماڈل اسکولوں میں تبدیل ہوگئے ہیں۔

مرکزی وزیر داخلہ اور تعاون کے وزیر نے کہا کہ اگر بچے پرائمری ایجوکیشن کمیٹی کے اقدامات سے صحیح طریقے سے فائدہ اٹھاتے ہیں تو اس میں کوئی شک نہیں رہے گا کہ ہندوستان کا مستقبل روشن ہے۔ انہوں نے مزید کہا کہ جب ہم غریب گھرانوں کے بچوں کو سائنس، آرٹ، موسیقی اور بہت سے دوسرے مضامین میں دلچسپی لیتے دیکھتے ہیں تو زندگی کی تمام مایوسی ختم ہو جاتی ہے، اور ہمیں یقین ہوتا ہے کہ ہندوستان کا مستقبل روشن ہے۔

جناب امت شاہ نے کہا کہ آج گاندھی نگر لوک سبھا حلقہ میں تقریباً 472 کروڑ روپے کے ترقیاتی پروجیکٹوں کا افتتاح کیا گیا ہے اور ان کا سنگ بنیاد رکھا گیا ہے۔ مزید برآں،  رکن پارلیمنٹ جناب ہسمکھ بھائی پٹیل کے احمد آباد مشرقی لوک سبھا حلقہ میں اور ایم پی شری دنیش بھائی مکوانا کے احمد آباد مغربی لوک سبھا حلقہ میں تقریباً 446 کروڑ روپے کے ترقیاتی پروجیکٹوں کا افتتاح اور آغاز کیا گیا ہے۔ انہوں نے کہا کہ یہ تمام ترقیاتی منصوبے احمد آباد شہر کے  لوگوں  کے لیے سہولیات میں اضافہ کریں گے۔

جناب شاہ نے مزید کہا کہ گجرات کے وزیر اعلیٰ بھوپیندر پٹیل نے پچھلے کچھ سالوں میں احمد آباد شہر، کالول اور سانند تعلقہ، احمد آباد شہر کے کچھ علاقوں اور گاندھی نگر لوک سبھا حلقہ میں 23,951 کروڑ روپے کے پروجیکٹوں کو منظوری دی ہے۔ مزید برآں، وزیر اعظم جناب نریندر مودی نے بھی تقریباً 14,000 کروڑ روپے کے ترقیاتی پروجیکٹوں کا افتتاح کیا ہے۔ انہوں نے مزید کہا کہ پچھلے پانچ سالوں میں، صرف ایک لوک سبھا حلقہ میں کل 37,000 کروڑ روپے کے ترقیاتی پروجیکٹ کئے گئے ہیں۔

مرکزی وزیر داخلہ اور تعاون کے وزیر نے کہا کہ احمد آباد کے سات اسمبلی حلقوں میں متعدد ترقیاتی اقدامات کئے گئے ہیں۔ ان میں بچوں کی غذائیت، ورزش کی سہولیات، نوعمروں کے علم میں اضافے کے لیے لائبریریاں، پانی جمع کرنے کے تالاب، ایک سال میں 40 لاکھ پودے لگانا، سڑکوں کی تعمیر، اوور برج، اسٹریٹ لائٹس، اسپتال، بنیادی صحت کے مراکز اور پرائمری اسکول سے متعلق کوششیں شامل ہیں۔

جناب امت شاہ نے کہا کہ اے ایم سی نے احمد آباد کو صفائی مہم کے مقابلے میں سب سے آگے لانے کا فیصلہ کیا ہے۔ انہوں نے اس بات پر زور دیا کہ آئندہ صفائی سروے میں احمد آباد کو سرفہرست لانے کی کوشش کی جانی چاہئے۔ جناب شاہ نے تسلیم کیا کہ اس بار پہلی پوزیشن حاصل کرنا ممکن نہیں ہے، لیکن ہمیں ایک نئی شروعات کرنے کا ہدف طے کرنا چاہئے اور ایک احمد آباد بنانے کی سمت کام کرنا چاہئے جو اگلے سال تک ہندوستان کی تمام میونسپل کارپوریشنوں میں صفائی میں سرفہرست مقام پر پہنچ جائے۔

مرکزی وزیر داخلہ نے کہا کہ مہاتما گاندھی کے بعد وزیر اعظم جناب نریندر مودی واحد قومی لیڈر ہیں جنہوں نے صفائی مہم کو عوامی تحریک میں بدل دیا۔ وزیر اعظم مودی نے تصور کیا کہ ملک کے ہر گھر میں بیت الخلا کی سہولت ہونی چاہیے۔ آزادی کے 70 سال بعد، وزیر اعظم جناب نریندر مودی نے اس مہم کی شروعات کی۔ اس کا مقصد اس بات کو یقینی بنانا تھا کہ ہر گھر میں پینے کا صاف پانی دستیاب ہو، اور یہ کہ ہمارے گھر، معاشرے، گلیاں، شہر اور گاؤں صاف ستھرا ہوں، شہریوں میں صفائی کے کلچر کو فروغ دینا۔ مرکزی وزیر داخلہ نے ذکر کیا کہ جناب نریندر مودی واحد وزیر اعظم ہیں جنہوں نے لال قلعہ کی فصیل سے بیت الخلاء کی تعمیر کی بات کی ہے۔

جناب امت شاہ نے کہا کہ وزیر اعظم جناب نریندر مودی نے ناگالینڈ سے کیرالہ اور اتر پردیش سے آسام تک پورے ملک میں صفائی مہم اور اس کی اقدار کو فروغ دینے کے لیے کام کیا ہے۔

****

ش ح۔ ف خ

U.No:807