প্রধান মন্ত্রী, শ্রী নরেন্দ্র মোদীনা ঙসি স্বচ ভারত অভিয়ান চহি ১০ মপুং ফারকপগী থৌরমদা দিল্লীদা স্কুলগী অঙাংশিংগা লোয়ননা শিৎ-শেংবগী থৌরম অমদা শরুক য়াখ্রে‍।

প্রধান মন্ত্রীনা লু-নানবগী কান্নবশিং হংবদা, মহৈরোয়শিং অদুনা লায়না কয়াদগী ঙাকথোকপা অমসুং হেন্না লু-নান্বা অমসুং মশা মউ ফবা ভারত অমগী মরমদা মীয়ামদা পাক শন্না খঙহন্বগী মীৎয়েঙশিং ফোঙদোক্নরকখি‍। মহৈরোয় অমনা খোঙহাম খুৎহাম্ফম ৱাৎপনা মরম ওইরগা লায়না শন্দোরকপা হেনগৎলকপগী মতাঙদসু পনখি‍। শ্রী মোদীনা মমাঙদদি মী অয়াম্বা লমহাঙদা খোঙহাম্বা তারম্মি, মদুনা লায়না মখল মখা কয়া শন্দোরকহল্লি, অমদি নুপীশিংনা য়াম্না খুদোংচাদবা ফীভম মায়োক্নরম্মি হায়খি‍। প্রধান মন্ত্রীনা স্বচ ভারত অভিয়ানগা লোয়ননা অহানবা খোঙথাঙ ওইনা মহৈশঙশিংদা নুপীমচাশিংগী ওইবা তোঙানবা তোইলেতশিং শাবা হৌখি, মদুনা নুপীমচাশিং মহৈ তম্বা তোকপগী চাং মশক থোক্না হন্থহনখি হায়খি‍।

প্রধান মন্ত্রীনা মখা তানা ঙসি মহাত্মা গান্ধী জী অমসুং লাল বহাদুর সাস্ত্রী জীগী মপোক কুমওন থৌরমগী মতাঙদা খন্নখি‍। শ্রী মোদীনা য়োগগী লমদা নহা মশিং য়াম্না শরুক য়াশিল্লকপা হেনগৎলকপদা অপেন্বা ফোঙদোকখি অমসুং আসনগী কান্নবশিংসু ফোঙদোকখি‍। অঙাং খরনা প্রধান মন্ত্রীগী মফমদা আসন খরা উত্তুনা মীয়াম্না থাগৎনখি‍। মহাক্না অফবা মচি ওইবা চীঞ্জাক চাবগী মথৌ তাবশিংসু ফোঙদোকখি‍। প্রধান মন্ত্রীনা পি.এম.-সুকন্যা য়োজনাগী মরমদা হংবা মতমদা, মহৈরোয় অমনা স্কীমগী মরমদা শন্দোক্না হায়খি অমসুং মসিনা নুপীমচাশিংবু মখোয়না অহল ওইরক্লবা মতমদা শেল-থুমগী লমদা মতেঙ ওইনবগীদমক বেঙ্ক একাউন্ত হাংদোকপা য়াহল্লি হায়খি‍। প্রধান মন্ত্রীনা পি.এম. সুকন্যা য়োজনা অসি নুপীমচাশিংনা মখোয়না হেক পোকপগা হাংবা য়াই হায়খি অমসুং চহি খুদিংগী লুপা ১০০০ হাপচিন্বনা তুংগী মখোয়গী পুন্সিদা মহৈ মশিং তম্বা অমসুং ময়ুম মকৈ পান্বদা শীজিন্নবা য়াই হায়খি‍। অসুম্না শেল থমজিন্বনা চহি ১৮দা শেন্দোয় লুপা ৩২,০০০ দগী লুপা ৩৫,০০০ ফাওবা ফংদুনা পুন্না লুপা ৫০,০০০ ফাওবা য়ৌরক্কনি হায়না মহাক্না পাউদমখি‍। নুপীমচাশিংনা চাদা ৮.২ ফাওবগী শেন্দোয় ফংলি হায়না পি.এম. মোদীনা হায়খি‍।

প্রধান মন্ত্রীনা লু-নান্বদা য়ুম্ফম ওইবা অঙাংশিংগী থবক থৌওংশিং উৎলিবা একজিবিসনবুসু কোয়না চত্তুনা য়েংখি‍। মহাক্না গুজরাতকী লৈকঙলাগুম্লবা মফম অমদা লৈরম্বা স্কুল অমগী মরমদা মহাক্না থেংনরকপশিং তম্লদুনা মফমদুদা মহৈরোয় খুদিংদা উ পাম্বী অমমম খুৎশিন্নদুনা নুমিৎ খুদিং ঈশিং চাইনবা অমসুং মখোয়গী চাকখুমদগী ঈশিং পুরকহনখি হায়খি‍। মহাক্না মহৈশঙ অদুদা চহি ৫গী মতুংদা চৎলুবা মতমদা থাজরুদবা মওংদা অশং অমান্না থন্বা মফম অমদা ওল্লকখিবা থেংনখি হায়না প্রধান মন্ত্রীনা হায়খি‍। প্রধান মন্ত্রীনা কম্পোস্ত শেম্নবা ফত্ত-হৌদিশিং তোখাইনা থম্বগী কান্নবশিংগী মরমদসু ৱাফম কয়া থমখি অমসুং মহৈরোয়শিংদা ময়ুমদসু থৌওং অসি ইন্নবা পুক্নিং থৌগৎখি‍। মখোয় মখোয়গী মরমদা প্লাস্তিক শীজিন্নবগী মাঙজবশিংগী মরমদা খঙহন্নবা অমসুং ফিগী খাউনা মহুৎ শিন্নবা ৱাফমসু মহাক্না হৌদোকখি‍।

অঙাংশিংগা মখা তানা ৱারী ৱাতায় শানরদুনা, শ্রী মোদীনা দিস্প্লে বোর্দ অমদা য়েক্লিবা গান্ধীজীগী অনোক্তা খুৎ থিল্লদুনা গান্ধীজীনা লু-নান্না লৈরিবরা হায়না কুপ্না শেন্নরিবনি হায়না অঙাংশিংদা হায়খি‍। গান্ধীজীনা মহাক্কী পুন্সি চুপ্পা লু-নান্না লৈনবগীদমক হোৎনরম্মি হায়না মহাক্না হায়খি‍। ফিদমগী ৱারী অমা তম্লদুনা, শ্রী মোদীনা অঙাংশিংগী মফমদা গান্ধীজীদা নীংতম্বা অমসুং লু-নানবগী মরক্তা অমা খন্ননবা হায়বদা গান্ধীজীনা নীংতম্বগী মহুত্তা লু-নান্ববু খনখি মরমদি মহাক্না অতৈ পুম্নমক্তগী লু-নানবনা হেন্না লুম্না লৌখি হায়খি‍। শিৎ-শেংবা হায়বসি থৌরম অমা ওইগদ্রা নৎত্রগা হৈনবী অমা ওইফম থোকপ্রা হায়না হংবা মতমদা, অঙাংশিংনা অমত্তা ওইনা লু-নান্বা অমসুং শিৎ-শেংবা হায়বসি হৈনবী অমা ওইগদবনি হায়না খুম্লকখি‍। মহাক্না অঙাংশিংগী মফমদা লু-নান্বা হায়বসি মীওই অমখক্কী নৎত্রগা ইমুং অমখক্কী থৌদাং নৎত্রগগা অমুকখক তৌগদবা থৌওং নত্তে, মসি মীওই অমনা হেক হিংলিবমখৈ লেপ্পা নাইদনা তৌগদবা থৌওং অমনি হায়বা ৱাফম ফোঙদোকখি‍। মহাক্না মহৈরোয়শিংগী মফমদা “ঐনা ঐগী অকোয়বদা মোৎশিনহল্লোই” হায়বা লাইৱা অসি লৈবাকসিগী মীপুম খুদিংমক্না লৌশিনগদবনি হায়খি‍। প্রধান মন্ত্রীনা অঙাংশিংগী মফমদা লু-নান্বগী ৱাশক শকহনখি‍।

Marking #10YearsOfSwachhBharat with India's Yuva Shakti! Have a look... pic.twitter.com/PYKopNeBoM

— Narendra Modi (@narendramodi) October 2, 2024

*****