ঐগী নুংশিরবা ইরৈচাশিং, খুরুমজরি।

ঐখোয় অমুক হন্না মন কি বাত্তা উনরে। ঙসিগী তাঙ্কক অসি ঐগী ওইনা পুক্নিং য়াম্না নুংশিবা অমনি। তাঙ্কক অসিদা  হৌখ্রবা থৌদোক কয়ানা ঐঙোন্দা পীক থল্লে। মসিগী মরমদি ঐখোয়গী মন কি বাতকী খোঙচৎ চহি ১০ মপুংফারে। চহি ১০গী মমাঙদা ওক্তোবর ৩আ বিজয়াদস্মী নুমিত্তা মন কি বাত হৌখি। অঙকপা চপ মান্নবা থৌদোক অমা ওইনা, চহি অসিগী ওক্তোবর ৩ দা মন কি বাত চহি ১০ মপুংফারে। নুমিৎ অসি নবরাত্রিগী অহানবা নুমিৎনি। মন কি বাতকী শাংলবা খোঙচৎ অসিদা ঐনা তাঙ্কক কয়া কাউবা ঙমদ্রে। মন কি বাত তারিবা মীওই করোর কয়া খোঙচৎ অসিদা ঐখোয়গী খোঙলোয়শিংনি, মখোয়না মখা তানা ঐ শৌগৎলি। মখোয়না লৈবাক অসিগী মফম কয়াদগী ই-পাউ পীরকখি।

মন কি বাত তারিবশিং থৌরম অসিগী অশেংবা মপুশিংনি। মশালা থাক্ত্রবা নত্ত্রগা নাতৈ চাদবা ৱাফমশিং য়াওদ্রিবমখৈ থৌরম অদু পাম্নদে হায়না মীয়াম্না থাজনবা অমা লৈরি। লৈবাক অসিগী মীয়াম্না অফবা পাউ কয়া য়াম্না খৌরাংনা ঙাইরিবগে হায়বা মন কি বাতনা খুদম ওইরে। মীয়াম্না নুংঙাইবা ৱারিশিং, পুক্নিং থৌগৎপা খুদমশিং অমসুং ইথিল পীবা ৱারিশিং য়াম্না পাম্মী। নোংগী ঈশিং খক্তা থকপা চাকোর কৌবা উচেক অমা লৈ। মন কি বাত্তা ঐখোয়না চাকোর উচেকগুম্বা উরে, লৈবাক অসিগী মাইপাকপশিং, মীয়ামগী অপুনবা মাইপাকপশিং চাউথোকচবগা লোয়ননা মীয়াম্না তারি। মন কি বাতকী চহি ১০গী খোঙচৎ অসিদা মখল কয়াগী লৈশিংগী লৈপরেং অমা লেংলে, তাঙ্কক খুদিংমক অনৌবা যুগশিংনি, অনৌবা রেকোর্দশিংনি; অনৌবা মীওইশিং শরুক য়াহল্লে। ঐখোয়গী খুন্নাইদা পাংথোক্লিবা থবক খুদিংমক অপুনবা ৱাখল্লোন অমগা লোয়ননা, থবক অদু মন কি বাত্তা ইকায়খুম্নবা উৎলে। মন কি বাত্তা থারকপা চিথিশিং ঐনা পাবা মতমদা ঐগী থম্মোয় চাউথোকচখি।

ঐখোয়গী লৈবাক্কী হৈথোই-শিংথোইরবা মীওই কয়া লৈরি… লৈবাক অসিগী অমসুং খুন্নাইগী থবক তৌনবা মখোয়দা পামজবা অসুক্কি মতিক লৈরি। ওইজবা থিদনা মীয়ামগী থবক তৌনবা মখোয়গী পুন্সি চুপ্পা মখোয়না কৎথোক্লি। মখোয়গী মরমদা খঙলকপদা ঐখোয়না থৌনা হেনগৎলকখি। ঐগী ওইনা মন কি বাতকী থৌরম অসি ঈশ্বর খুরুম্নবা মন্দিরদা চৎপগুম্বনি। ঐনা পোৎ খুদিংমক, থৌদোক খুদিংমক অমসুং মন কি বাত্তা মরী লৈনবা চিথি খুদিংমক নিংশিংবা মতমদা, ঐঙোন্দা ঈশ্বরগুম্লবা মীয়াম, জনতা জনারদন দর্শন তৌবনি হায়না করিগুম্বা মতমদা ঐনা খল্লি।

মরুপশিং,

ঙসি ঐনা দুরদর্শন, প্রাসার ভারতি অমসুং ওল ইন্দিয়া রেদিওগা মরী লৈনবা মীওই খুদিংমক থাগৎপা ফোঙদোকচরি। মখোয়না চোকথবা লৈতনা হোৎনবদগী, মন কি বাত মসিগী খুমাঙচাউশিনবা অসি য়ৌরকপনি। থৌরম অসি লেপ্তনা শন্দোক্লিবা তোঙান-তোঙানবা তি.ভি চেন্নেলশিং, রিজনেল তি.ভি চেন্নেলশিং ঐনা থাগৎপা ফোঙদোকচরি। মন কি বাতকী খুৎথাংদা ঐখোয়না পুখৎলকপা ৱাফম কয়াদা মেদিয়া হাওস কয়ানা কেম্পেনশিং পাংথোক্লি। থৌরম অসি য়ুমথোং খুদিংদা য়ৌহনবগীদমক ঐনা প্রিন্ত মেদিয়াশু থাগৎপা ফোঙদোকচরি। মন কি বাতকী মতাংদা থৌরম কয়া পুথোক্লিবা য়ুতুবরশিংশু ঐনা থাগৎচরি। থৌরম অসি মপান লৈবাকশিংগী লোল ১২গী মথক্তা লৈবাক অসিগী লোল ২২ দা তাবা ফংগনি। মখোয়গী লমগী লোলদা মন কি বাত তাবা ফংলে হায়না মীয়াম্না ঙাংনবা তাবদা ঐ য়াম্না হরাওই। মন কি বাত থৌরমদা য়ুম্ফম ওইবা কুইজ চাংদম্নবা অমা পাংথোক্লি হায়বা অদোম্না খঙলমগনি, মসিদা মীওই অমনা হেক্তা শরুক য়াবা য়াগনি। MyGov.in দা চঙলগা শরুক য়াবা য়াগনি অমসুং মনা কয়াশু ফংগনি। ঙসি, মরুওইবা তাঞ্জা  অসিদা, ঐনা অমুক হন্না অদোমগী থৌজাল নিজরি-থম্মোয় শেংনা অমসুং কৎথোকপগা লোয়ননা- ভারতকী মীয়ামগী মতিক মগুনগী  ঈশৈ ঐনা মখা তানা শকপা য়াগদরা… লৈবাক অসিগী অপুনবা থৌনা ঐনা মখা তানা হরাওবা ফোঙদোকপা য়াগদরা… মসি ঐনা ঈশ্বরদা থৌনিজবনি, মসি ঐনা মীয়ামদা হায়জবনি।

ঐগী নুংশিরবা ইরৈচাশিং,

হৌখিবা চয়োল খরগী মমাঙদগী লৈবাক অসিগী তোঙান-তোঙানবা মফমশিংদা অকনবা নোং চুরক্লি। ঈশিং তুংশিনবা অসি কয়া য়াম্না মরুওইবগে হায়বা হন্দক্কী নোংজু থা অসিনা ঐখোয়না নিংশিংহল্লে।

নোং চুরিঙৈ নুমিৎশিংদা ঈশিং লোকশিনহৌবা অসিনা ঈশিং তাংলকপা থাশিংদা চাউনা মতেং পাংই অমসুং মরম অদুনা ‘নোংগী ঈশিং তুংশিনশি’ হায়বা খোঙজংশিং পায়খৎলিবনি। ঈশিং তুংশিন্নবা মীওই কয়ানা অনৌবা থবক কয়া পায়খৎলকপদা ঐ হরাওই। অসিগুম্বা অনৌবা থবক অমা উত্তর প্রদেসকী ঝান্সিদা উবা ফংলে।

বুন্দেলখন্দগী ঝান্সি অসি ঈশিং য়াম্না তাংনা ফংবগীদমক অদোম্না খঙলিবদুনি। ঝান্সিদা, নুপী খরনা গুরারি তুরেলদা অনৌবা মপোক অমা পীরে। নুপীশিং অসি সেল্ফ হেল্প গ্রুপশিংদা থবক তৌবনি অমসুং মখোয় মশামক ‘জল সাহেলি’ ওইদুনা খোঙজং অসি লুচিংখি। নুপীশিং অসিনা শিরবা তুরেল গুরারি কনগনি হায়বা কনাগুম্বা মীওই অমতা খনখিদে। জল সাহেলিশিং অসিনা বোরাশিংদা লৈঙোই হাঞ্জিন্দুনা চেক দাম অমা শেমগৎখি অমসুং মাংখিগদৌরিবা নোংগী ঈশিং থিংখি অমসুং তুরেল অদু অরুবা ঈশিংনা পীক থনখি। ঈশিং তুংশিন্দুনা থম্নবা মফম চা কয়া শেমগৎপা অমসুং অমসুং মখোয় অমুক হন্না হিঙ্গৎহনবদা হায়রিবা নুপীশিং অসিনা থৱায় য়াওনা শরুক য়াখি। মসিনা মফম অসিগী মীয়ামগী ঈশিংগী অৱাবা কোকহনবা খক নত্তনা, মখোয়গী মাইথোংদা অমুক হন্না হরাওবগী মমি তারে।

মরুপশিং,

মফম খরদা নুপীশিংগী থৌনানা ঈশিং ফংবা হেনগৎহল্লে অমসুং মফম খরদা ঈশিংগী শক্তিনা নুপীশিংগী থৌনা হেনগৎহল্লে। মধ্য প্রদেসকী পুক্নিং থৌগৎনিঙাই ওইবা ৱারি অনি ঐ তারে। দিন্দোরিগী রাইপুরা খুঙ্গংদা, অচৌবা পুখ্রি অমা তৌবদগী লৈনুংগী ঈশিংগী অঙকপা ফংনা হেনগৎহল্লে। খুঙ্গং অসিগী নুপীশিং মসিগী কান্নবা ফংলে। ‘সারাদা অজিবিকা সেল্ফ হেল্প গ্রুপ’কী নুপীশিং ঙা য়োকপগী অনৌবা শীনফম অমা পায়রে। নুপীশিং অসিনা ঙাগী দুকান অমা হাংদোকপগী ঙা য়োনবদগী মখোয়গী শেন্থোকশু হেনগৎলে । মধ্য প্রদেসকী ছাতারপুরগী নুপীশিংগী থবকশিং অসিশু থাগৎনিঙাইনি। খোম্প খুঙ্গংগী অচৌবা পুখ্রি অমা কংবা হৌরকপদা, নুপীশিংনা পুখ্রি অদু অমুক হন্না শেমজিনখি। হরি বাগিয়া সেল্ফ হেল্প গ্রুপকী নুপীশিংনা পুখ্রি অদুদগী য়াম্লবা লৈখোম-লৈনাং লৌথোকখি… পুখ্রিদগী লৌখৎলকপা লৈনাং অদু লমহাংদা হৈকোল অমা শেমগৎনবা মখোয়না শীজিন্নখি।

নুপীশিং অসিনা কন্না হোৎনবদগী, পুখ্রি অসি ঈশিংনা পীক থনবা খক নত্তনা, মহৈ-মরোংগী পোৎথোকশু হেনগৎলে। লৈবাক্কী খুদিংমক্তা অসিগুম্বা ঈশিং য়োকশিনবগী থবক অসি পায়খৎলবদি ঈশিংগী অৱাবা কোকহনবদা মতেং পাংগনি। অদোমগী অকোয়বদা অসিগুম্বা থবকশিং পাংথোকপা মতমদা অদোমশু শরুক য়াগনি হায়বগী থাজবা ঐনা থম্লি।

ঐগী নুংশিরবা ইরৈচাশিং,

উত্তরখন্দগী উত্তরকাসিদা ‘ঝালা’ কৌবা ঙমখৈগী খুঙ্গং অমা লৈ। মখোয়গী খুঙ্গং লু-নান্না থম্নবা মফম অদুগী নহারোলশিংনা অখন্নবা থবক অমা হৌদোক্লে। মখোয়গী খুঙ্গংদা নহারোলশিং অদুনা ‘ধন্যবাদ প্রকৃতি’ নত্ত্রগা ‘থাগৎচরি মহৌশা’ কৌবা খোঙজং অমা পাংথোক্লি। থৌরম অসিগী শরুক অমা ওইনা, নুমিৎ খুদিংগী পুং ২ খুঙ্গং অসি শেংদোকই। খুঙ্গংগী লম্বীদগী অমোৎপশিং খোমজিল্লি অমসুং খুঙ্গংগী ৱাংমদা অকক্নবা মফম অমদা অমোৎপশিং থমখি। থবক অসিনা মরম ওইদুনা, ঝালা খুঙ্গং লু-নানলে অমসুং মীয়ামশু ৱাখল তারে। খন্দুনা য়েংউ, করিগুম্বা খুঙ্গং খুদিংমক, লম্বী খুদিংমক, অদোমগী লৈকায় খুদিংমক্তা ‘থাগৎচরি মহৌশা’গা মান্নবা খোঙজং অমা হৌদোক্লবদি, কয়া য়াম্না অওনবা পুরকপা ঙমগনি।

মরুপশিং,

পুদুচেরিগী সমুদ্র খোঙবালদা লু-নানবগী অকনবা খোঙজং অমা পায়খৎলে। মফম অদুদা, রাময়া জি কৌবী নুপী অমনা মাহে ম্যুনিসিপালিতি অমসুং মসিগা নক্নবা মফমশিংগী নহারোলশিং লুচিংলি। কাংবু অসিগী মীওইশিংনা মাহে অমসুং মসিগা নক্নবা সমুদ্র মপানগী শরুকশিং শেংদোকখি।

মরুপশিং,

ঐনা মফম অসিদা থবক অনি খক খন্নরি। করিগুম্বা ঐখোয়না কোইনা য়েংলবদি, মসিগা মান্নবা লু-নানবগ মরী লৈনবা থবকশিং ঐখোয়না লৈবাক অসিগী মফম খুদিংমক্তা উবা ফংগনি। নুমিৎ খরগী মতুংদা, ওক্তর ২ দা, শ্বাছ ভারত মিসন চহি ১০ মপুংফারগনি। মসি ভারতকী পুৱারিদা মিসন অসি অচৌবা ইহৌ অমা ওইহনখিবা মীওইশিং থাগৎনবা নুমিৎ অমনি। লু-নানবগীদমক মহাক্কী পুন্সি কৎথোকখিবা মহাত্মা গান্ধী ইকায়খুম্নবা উৎনবা নুমিৎ অমনি।

মরুপশিং,

ঙসি শ্বাছ ভারত মিসন মাইপাকপগা লোয়ননা অমোৎপদগী শেন ওন্থোক্নবা লাইৱা অসি মীয়াম মরক্তা য়াম্না পাম্নরে। মখোয়গী খুদমশিং পীবগা লোয়ননা, মীয়াম্না রিদক্স, রিয়ুজ অমসুং রিসাইকলগী মরমদা ঙাংনবা হৌরে। কেরলাগী কোজিকোদতা পাংথোকপা অঙকপা থবক অমগী মরমদা ঐ খঙলে। মফম অদুদা, চহি ৭৪ শুরবা সুব্রমনিয়ান জিনা চৌক্রি লিশিং ২৩ হেন্না অমুক হন্না শেমজিনখি অমসুং মসিনা চৌক্রিশিং অদু অমুক হন্না শীজিন্নবা য়াহল্লে। মীয়াম্না মহাক রিদক্স, রিয়ুজ অমসুং রিসাইকল, হায়বদি আর.আর.আর(আর ৩) চেম্পিয়ন হায়না খঙনৈ। মহাক্কী অঙকপা থবকশিং অসি কোজিকোদ সিবিল স্তেসন, পি.দব্লিউ.দি অমসুং এল.আই.সি ওফিসশিংদা উবা ফংলে।

মরুপশিং,

হৌজিক পায়খৎলিবা লু-নানবগী খোঙজং অসিদা ঐখোয়না মীওই কয়া শরুক য়াহনগদবনি। মসি নোংম খক্তগী নত্ত্রগা চহি অমগী খোঙজং নত্তে; মসি চহি কয়া লেপ্তনা চৎথগদবা খোঙজং অমনি। মসি লু-নানবা হায়বসি ঐখোয়গী হৈনবী অমা ওইদ্রি ফাওবা  পাংথোক্কবা থবক্নি। অদোমগী ইমুং-মনুং, মরুপশিং, য়ুম্লোন্নবশিংগা লোয়ননা লু-নানবগী খোঙজং অসি শরুক য়ানবা ঐনা অদোমগী মফমদা হায়জরি। শ্বাছ ভারত মিসন মাইপাকপগীদমক ঐনা অমুক হন্না অদোম থাগৎপা ফোঙদোকচরি।

ঐগী নুংশিরবা ইরৈচাশিং,

ঐখোয়গী ইপা-ইপুশিংনা থম্বীরম্বা নাতকী অরিবা পোৎলমশিং অমসুং চৎনবীশিংগীদমক ঐখোয়না চাউথোকচরি। ঐনা মতম পুম্নমক্তা চাউখৎ-থৌরাং অমসুং হেরিতেচগী মরমদা হায়রি। মরম অদুনা হন্দক ঐনা য়ু.এস.এদা চৎলুবগী ৱাফম অমগী মতাংদা ঐনা মেসেজ কয়া ফংলে। অমুক হন্না, ঐখোয়গী অরিবা কলাগী পোৎলমশিং অমুক পুরকপগী মতাংদা ৱাফম কয়া খন্নরে। মসিগী মতাংদা অদোমগী ৱাখল্লোনশিং ঐ খঙলে অমসুং মসিগী মরমদা মন কি বাত তারিবশিংদা ৱাফম খর হায়বা ঐ পাম্মী।

মরুপশিং,

ঐগী য়ু.এস খোঙচৎ মনুংদা, য়ু.এস সরকারনা চাউরাক্না অরিবা কলাগী পোৎলম ৩০০ রোম ভারত্তা অমুক হন্না পীরক্লে। য়ু.এসগী রাস্ত্রপতি বাইদেন্না দিলৱায়রদা লৈবা মহাক্কী লনাই য়ুমদা হায়রিবা অরিবা পোৎলমশিংগী মনুংদা খর ঐঙোন্দা উৎখি। অমুক পুরক্লবা কলাগী পোৎলমশিং অদু তেরাকোত্তা, নুঙ, শামু ময়া, উ, কোরি অমসুং শেঞ্জেংনা শাবনি। ১৯শুবা চহিচাগী য়াওনা চহি ৪০০ মমাঙগী কলাগী পোৎলমশিং য়ু.এসনা পীরক্লে।

অমুক পীরক্লবা পোৎলমশিংগী মনুংদা ভেজশিং, লাইরেম্বা অমসুং লাইরেম্বীশিংগী তেরাকোত্তা প্লেগশিং, জেন তির্থানকারাসশিং, ভাগবান বুদ্ধা অমসুং ভাগবান শ্রী কৃষ্ণগী মীতমশিং য়াওরি। অমুক হন্না পুরক্লবা কলাগী পোৎলমশিং অদুগী মনুংদা তোঙান-তোঙানবা শাশিংগী মীতমশিং য়াওরি। জম্মু অমসুং কাস্মিরদগী, নুপা অমসুং নুপীগী শক্তমশিংগী তেরাকোত্তা তাইলশিং য়াম্না ফজৈ। পোৎলমশিং অসিগী মনুংদা খা ভারত্তগী ভাগবান গনেসকী শেঞ্জেংগী মীতমশিং য়াওরি। কলাগী পোৎলমশিংগী মনুংদা ভাগবান বিষ্ণুগী শক্তমশিং য়াওরি। মখোয় অয়াম্বা অৱাং ভারত অমসুং খা ভারত্তগী ঙাক্তনি।

হায়রিবা আর্তিফেক্তশিং অসি উবদা, ঐখোয়গী ইপা-ইপুশিংনা কয়া য়াম্না কুপ্না হোৎনরম্বগে হায়বা কনাগুম্বনা খঙবা ঙমগনি। মখোয়না কলা মমুৎ তানা খঙখি। নারোন্দা অমসুং আইন্না য়াদবা অতোপ্পা পাম্বৈশিংগী খুৎথাংদা হায়রিবা কলাগী পোৎলমশিং অসি লৈবাক অসিদগী পুখিবনি-মসি অচৌবা ক্রাইম অমনি… মওং অমদা মসিনা ঐখোয়গী হেরিতেচ মাঙহল্লে, হৌখিবা চহি ১০ অসিদা, অসিগুম্বা কলাগী পোৎলম কয়া অমসুং ঐখোয়গী হেরিতেচগী অরিবা পোৎলম কয়া লৈবাক অসিদা অমুক হন্না পুরকপদা ঐ য়াম্না হরাওই। ঙসি, ভারতনা হিরম অসিদা লৈবাক কয়াগা ৱারি শান্নরি। ঐখোয়না ঐখোয়গী হেরিতেচগী চাউথোকচবা মতমদা, মালেমনশু মসি ইকায়খুম্নৈ অমসুং মসিগী ফল ওইনা ঐখোয়গী লৈবাক্তগী পুখিবা অসিগুম্বা কলাগী পোৎলমশিং ঙসিদি মালেমগী লৈবাকশিংনা ঐখোয়দা অমুক হন্না পীরক্লে।

ঐগী নুংশিরবা মরুপশিং,

অঙাং অমনা করম্বা লোল য়াম্না লাইনা অমসুং য়াংনা খঙবা ঙম্বগে হায়না করিগুম্বা ঐনা অদোমদা হংলবদি, অদোমগী পাউখুম অদু ‘মমালোল’ ওইগনি। ঐখোয়গী লৈবাক্তা লোল লিশিং ২২ ঙাংনরি অমসুং লোল অমমম অসি কনাগুম্বা অমগী নত্ত্রগা অতোপ্পা অমগী মমালোল অমা শোইদনা ওইগনি। মীওই য়াম্না ঙাংনবদা লোল খরশু লৈরি, হায়রিবা লোলশিং অদু ঙাক-শেন্নবা ঙসি তোপ-তোপ্পা থবকশিং পায়খৎলে হায়বা খঙবদা অদোম হরাওগনি। অসিগুম্বা লোল অমদি ঐখোয়গী ‘শন্থালি’ লোল অসিনি। দিজিতেলগী অনৌবা থবকশিংগা লোয়ননা শন্থালিগী অনৌবা মশক অমা তাক্নবা খোঙজং অমা হৌরে। শন্থালি লোল অসি ঐখোয়গী লৈবাক্কী রাজ্য কয়াদা লৈরিবা শন্থাল ত্রাইবশিংনা ঙাংনবা লোল অমনি।

ভারতকী মথক্তা, শন্থালি লোল ঙাংবা ত্রাইবশিং হৌজিক বাংলাদেস, নেপাল অমসুং ভুতান্দা লৈরি। শন্থালি লোলগী ওনলাইনগী মশক অমা তাক্নবা উরিসাগী ময়ুরভঞ্জদা লৈবা শ্রীমান রামজিত তুদুনা খোঙজং অমা চৎথরি। শন্থালি লোলগা মরী লৈনবা সাহিত্য শন্থালি লোলদা পাবা অমসুং ইবা ঙম্নবা রামজিত জিনা দিজিতেল প্লেতফোর্ম অমা শেমগৎলে। চহি খরগী মমাঙদা রামজিত জিনা মোবাইল ফোন শীজিন্নবা হৌরকপদা, মহাক্কী মমালোলদা মেসেজ থাবা য়াদে হায়বা মহাক খঙখি। তুংদা মহাক্না শন্থালি লোলগী ময়েক ‘ওল চিকি’ তাইপ তৌবা য়ানবা থবকশিং পায়খৎপা হৌখি। মহাক্কী মরুপ খরগী মতেংগা লোয়ননা, মহাক্না ‘ওল চিকি’ তাইপ তৌনবা তেক্নিক পুথোকখি। ঙসিদি, মহাক্কী থবকশিংদগী, শন্থালি লোলদা ইবা আর্তিকল কয়া মীওই মিল্লিয়ন কয়াদা য়ৌরে।

মরুপশিং,  

ঐখোয়গী অপুনবা ৱারেপ অমসুং অপুনবা থবকশিং পুনশিনবা মতমদা, মসিনা খুন্নাই শীনবা থুংনা অঙকপা ফলশিং পুরক্কনি। মসিগী ময়েক লারবা খুদমদি ‘এক পের মা কে নাম’ অসিনা ওইগনি- মসি অঙকপা কেম্পেন অমনি; মীয়াম্না শরুক য়াবগী অসিগুম্বা খুদম অসি তশেংনা পুক্নিং থৌগৎনিঙাই ওই। লৈবাক অসিগী মফম কয়াদা মীয়াম্না খোঙজং অসি শরুক য়ারে অমসুং মহৌশাগী অকোয়বগী ফিবম ঙাক-শেনবগী থবক পায়খৎপা হৌরে। পান্দম থমখিবদগী মশিং হেন্না উ পাম্বীশিং থাদুনা উত্তর প্রদেস, গুজরাত, মধ্য প্রদেস, রাজস্থান অমসুং তেলঙ্গানানা অনৌবা রেকোর্দশিং থম্লে। খোঙজং অসিগী মখাদা, উত্তর প্রদেসতা উ চারা করোর ২৬ হেন্না থারে। গুজরাতকী মীয়াম্না উ চারা করোর ১৫ হেন্না থাখ্রে। ওগস্ত থা খক্তদা রাজস্থান্দা উ চারা করোর ৬ হেন্না থাখ্রে। লৈবাক অসিগী স্কুল লিশিং কয়া খোঙজং অসি থৱায় য়াওনা শরুক য়ারি।

মরুপশিং,

উ থাবগী খোঙজংগা মরী লৈনবা খুদম কয়া ঐখোয়গী লৈবাক অসিদা উবা ফংলে। অসিগুম্বা খুদম অমদি তেলঙ্গানাগী কে.এন রাজাসেখর জিনি।  উ থানবা মহাক্না পাংথোক্লিবা থবক অসিনা ঐখোয় খুদিংমক অঙকপা ফাওহল্লে। চহি মরিগী মমাঙদা, মহাক্না উ থাবগী খোঙজং অমা হৌদোকখি। নুমিৎ খুদিংগী উ পাম্বী অমা শোইদনা থানবা মহাক্না ৱারেপ লৌখি।

অচেৎপা ৱাশক অমগুম মহাক্না খোঙজং অসি পাংথোকখি। মহাক্না উ চারা ১৫০০ হেন্না থাখ্রে। পনবা য়াবা অমনা, চহি অসিদা খুদোংথিবা অমা থেংনরবা মতুংদা, মহাক্না মহাক্কী ৱাশক ঙাকখি। অসিগুম্বা থবক অসি ঐনা থম্মোয় শেংনা থাগৎচরি। এক পের মা কে নাম খোঙজং অসি শরুক য়ানবা ঐনা অদোমগী মফমদা হায়জরি।

ঐগী নুংশিরবা মরুপশিং,

অদোম শোইদনা উরম্লগনি… খুদোংথিবা থেংনবা মতমদা অৱাবা খাঙবা ঙম্বা মীওই খর ঐখোয়গী ইরক্তা লৈরি, মখোয়না অৱাবা অদুদগী পারা তমখি। সুভাশ্রী অসি, অসিগুম্বা নুপীনি, মহাক্কী থবকশিংনা, অতাংবা লৈশিং অমসুং কান্নরবা পাম্বীশিংগী অঙকপা লৈকোল অমা শেমগৎখি। মহাক তামিল নাদুগী মদুরাইদগীনি। মহাক ওজাগী শীনফমদা লৈজরবশু, মহাক্না হিদাক ওইনা শীজিন্নবা য়াবা পাম্বীশিং য়াম্না পামজৈ। মহাক্কী মপা লিন অমনা চিকপদগী ১৯৮০গী মতমদগী মহাক্না হিদাক ওইনা শীজিন্নবা য়াবা পাম্বীশিং থিজিনবা হৌরকখি। মতম অদুদা, থায়নগী পাম্বীশিংনা মহাক্কী অপোকপা মপা ফগৎলকপদা মতেং পাংখি। থৌদোক অসিগী মতুংদগী, মহাক্না থায়নগী হিদাক-লাংথকশিং অমসুং পাম্বীশিং থিবা হৌরকখি। ঙসিদি, অতাংবা হিদাক ওইনা শীজিন্নবা পাম্বী ৫০০ হেন্না হৌরবা মহাক্কী অখন্নবা হার্বেল গার্দেন অমা মদুরাইগী ভেরিচিয়ুর খুঙ্গংদা লৈরে। পাম্বী অমমম থিনবা মহাক্না লম থাপ্না চৎতুনা অমসুং ই-পাউ খোমজিন্দুনা অমসুং অতোপ্পা মীওইশিংদা কয়ারক হংদুনা লৈকোল অসি শেমগৎনবা মহাক্না য়াম্না কন্না হোৎনখি। কোবিদ মনুংদা মহাক্না মীয়ামদা লায়নাদগী ঙাকথোকপা ঙম্বগী শক্তি হেনগৎনবা পাম্বীশিং ফংহনখি। হিদাক ওইনা শীজিন্নবা পাম্বীশিং অমসুং মখোয়গী শীজিন্নফমগী মতাংদা মীওইশিং খুদিংমক্তা মহাক্না খঙহনখি। চহি লিশিং কয়া ঐখোয়গী চৎনবীগী শরুক অমা ওইদুনা লাক্লবা ঐখোয়গী অরিবা চৎনবী অসি সুভাশ্রীনা মাঙলোমদা পুখৎলি। মহাক্কী লৈকোল অদুনা ঐখোয়গী হৌখ্রবা মতমগা তুংলমচৎকা শম্নহল্লে। মহাক্কীদমক ঐখোয়না য়াইফ-পাউজেল পীজরি।

মরুপশিং,

মতম হোংলকপগা লোয়ননা, থবক শুবগী মওংশু হোংলে অমসুং অনৌবা হিরমশিং থোক্লক্লে, হায়বসি গেমিং, এনিমেসন, রিল নম্বা, ফিল্ম নম্বা নত্ত্রগা পোস্তর য়েকপা অসিনচিংবা। হায়রিবা থবকশিং অসিদা অদোম্না ফজনা থবক তৌরবদি, অদোমগী হৈথোই-শিংথোইবা অদুগী অচৌবা মফম অমা ফংগনি, করিগুম্বা অদোম্না ব্রান্দ অমগী থবক তৌরবা নত্ত্রগা কম্মুনিতি রেদিও অমগী থবক তৌরবদি, মসিদা অদোমগীদমক য়াম্বা খুদোংচাবা অমা লৈরি।

অদোমগী হৈথোই-শিংথোইবা অমসুং অনৌবা থবক য়োকখৎনবা, ‘ক্রিয়েত ইন ইন্দিয়া’ থিমগী মখাদা ভারত সরকারগী ইনফোর্মেসন অমসুং ব্রোদকাস্তিং মিনিস্ত্রিনা চেলেঞ্জ ২৫ পাংথোকপা হৌরে। হায়রিবা নুংঙাইরবা চেলেঞ্জশিং অসি অদোম শোইদনা শরুক য়াগনি হায়না খল্লি। চেলেঞ্জ খরদি ঈশৈ, লাইরিক-লাইশু তম্বা অমসুং এন্তি-পাইরেসিদা মীৎয়েং থম্লে। মসিদা প্রোফেসনেল ওর্গনাইজেসন কয়া শরুক য়ারি অমসুং হায়রিবা চেলেঞ্জশিং অসিদা মতেং পাংলি। শরুক য়ানবগীদমক অদোম্না wavesindia.org দা চঙবীয়ু। লৈবাক অসিগী ক্রিয়েতরশিং শোইনা শরুক য়ানবা অমসুং মখোয়গী অনৌবা থবকশিং মীয়ামদা উৎনবা ঐনা হায়জরি।

ঐগী নুংশিরবা ইরৈচাশিং,

চৎলিবা থা অসিদা অতোপ্পা মরুওইবা অভিয়ান অমা চহি ১০ মপুংফারে। অভিয়ান অসি মাইপাকপদা লৈবাক অসিগী অচৌবা উদ্যোগশিং অমসুং অপীকপা দুকান মপুশিং ফাওবনা শরুক য়াখি। ঐনা মেক ইন ইন্দিয়াগী মরমদা হায়রি। ঙসি, অভিয়ান অসিগী কান্নবা কয়া লায়রবা, মিদল ক্লাস অমসুং এম.এস.এম.ইশিংনা ফংবা উবদা ঐ য়াম্না হরাওই। কাংলুপ খুদিংমক্কী মীওই মখোয়গী হৈথোই-শিংথোইবা উৎথোক্নবগী খুদোংচাবা অমা অভিয়ান অসিনা পীরে। ঙসিদি, ভারত মেনুফেকচরিংগী পৱারহাওস অমা ওইরে অমসুং লৈবাক অসিগী নহারোলশিংগী শক্তিনা ওইহনবনি অমসুং অমসুং মালেম শীনবা থুংবগী লৈবাকশিংনা ঐখোয়দা য়েংবা হৌরক্লে। ওতোমোবাইলশিং ওইগেরা, তেক্সতাইলশিং ওইগেরা, এভিএসন, ইলেক্ত্রোনিক্স নত্ত্রগা দিফেন্স ওইগেরা…হিরম খুদিংমক্তা লৈবাক অসিনা মপান লৈবাকশিংদা থাদোকপা লেপ্তনা হেনখৎলক্লি। মেক ইন ইন্দিয়া মাইপাকপদগী লৈবাক অসিদা মখা তানা এফ.দি.আই হেনগৎলকপনি। হৌজিক ঐখোয়না থবক অনিদা মীৎয়েং চঙলি… অহানবা অসিনা ‘মগুন লৈহনবা’, হায়বদি ঐখোয়গী লৈবাক্কী শাবা পোৎলমশিং মালেমগী থাকশিং য়ৌহনবা… অমসুং অতোপ্পা অমনা লমদম অসিদা শাজবা পোৎথোকশিং শীজিন্নবা হায়বনি। হায়বদি লমদম অসিগী পোৎথোকশিং খ্বাইদগী য়াম্না য়োকখৎপা হায়বনি। মন কি বাত্তা ঐখোয়না #MyProductMyPride গী মরমদশু খন্নরে। খুদম অমা পীদুনা খঙহন্দুনা লমদম অসিগী পোৎথোকশিং য়োকখৎপদা কমদৌনা লৈবাক অসিগী মীয়ামদা কান্নবা পীগদগে।

মহারাস্ত্রাগী ভান্দারা জিলাদা, ‘ভান্দারা তুসার সিল্ক হেন্দলুম’গী অরিবা তেক্সতাইলগী চৎনবী অমা লৈরি। মসিগী মচু, দিজাইন অমসুং মপাঙ্গলগীদমক তুসার সিল্ক মমিং চৎলি। ভান্দারাগী শরুক খরদা, সেল্ফ হেল্প গ্রুপ ৫০ হেন্না মসি য়োকখৎনবা থবক তৌরি। মসিদা নুপীশিং মশিং য়াম্না শরুক য়ারি। মসিগী মুগা অসি য়াম্না পাম্নরে অমসুং লমদম অদুগী মীওইশিংগী ফিবম ফগৎহল্লে… অমসুং মসি মেক ইন ইন্দিয়াগী ৱাখল্লোন্নি।

মরুপশিং,

কুহ্মৈ-হরাওগী মতম লাকপা অসিদা অমুক হন্না অদোমগী অরিবা ৱাশকশিং নিংশিংহল্লে। অদোম্না লৈবা পোৎলম খুদিংমক, মেক ইন ইন্দিয়া ওইগদবনি… অদোমগী খুদোলপোৎ খুদিংমক মেদ ইন ইন্দিয়া ওইগদবনি। ইচম চম্বা লৈবাক্না শাবা থাউমৈশিং লৈবনা লমদম অসিগী পোৎথোকশিং লৈবনি হায়বা য়ারোই। অদোমগী লৈকায়দা পুথোকপা পোৎলশিং অদোম্ন য়োকখৎকদবনি। অসিগুম্বা ভারতকী খুৎহৈবশিংগী হুমাংনা পুথোকপা পোৎথোক অমা হেক্তা, ভারতকী লৈহাওদা পুথোকপা, মসি ঐখোয়গী চাউথোকচবনি, মসিগী চাউথোকচবা অসি মতম পুম্নমক্তা ঐখোয়গী মাইপাকপনি।

মরুপশিং,

হন্দক্কী মন কি বাত অসিদা অদোমগা উনবদা ঐ অসুক্কী মতিক হরাওরে। থৌরম অসিগা মরী লৈনবা অদোমগী পাউতাকশিং অমসুং পাউজেলশিং ঐখোয়দা থাবীরকউ। অদোমগী চিথিশিং অমসুং পাউজলশিংগীদমক ঐনা ঙাইরি। নুমিৎ খরগী মতুংদা, হরাও-কুহ্মৈগী মতম হৌরগনি। মসি নবরাত্রিনা হৌদোক্লগনি অমসুং মথংগী থা অনি চুপ্না, ইরাৎ-থৌনি, চারা হেনবা, কুহ্মৈশিং, হরাওবা অমসুং নুংঙাইবনা পীক থল্লগনি। লাক্লিবা কুহ্মৈশিং অসিগীদমক অদোমগী মফমদা ঐগী য়াইফ-পাউজেলশিং পীজরি। অদোমগী ইমুং-মনুং অমসুং অদোম্না নুংশিজবা মীওইশিংগা লোয়ননা কুহ্মৈশিং হরাওনা শরুক য়াবীয়ু অমসুং অদোমগী হরাওবদা অতোপ্পশিং য়াওহনবীয়ু। মথং থাগী মন কি বাত্তা অনৌবা হিরম খরগা লোয়ননা অদোমগা অমুক উনরসি। ঐনা অদোম থাগৎপা ফোঙদোকচরি।

*****