பிரதமர் திரு நரேந்திர மோடி செப்டம்பர் 26 அன்று மகாராஷ்டிர மாநிலம் புனே செல்கிறார். மாலை 6 மணியளவில், மாவட்ட நீதிமன்ற மெட்ரோ நிலையத்தில் நடைபெறும் நிகழ்ச்சியில்,  மாவட்ட நீதிமன்றத்திலிருந்து புனேவின் ஸ்வர்கேட் வரை இயக்கப்படும் மெட்ரோ ரயிலை அவர் கொடியசைத்து தொடங்கி வைக்கிறார். அதன்பிறகு, மாலை 6:30 மணியளவில், ரூ.22,600 கோடி மதிப்பிலான பல்வேறு திட்டங்களை தொடங்கி வைத்து, அடிக்கல் நாட்டி, நாட்டுக்கு அர்ப்பணிக்கிறார்.

மாவட்ட நீதிமன்றம் முதல் ஸ்வர்கேட் வரையிலான புனே மெட்ரோ பிரிவின் தொடக்கம், புனே மெட்ரோ ரயில் திட்டம் (கட்டம்-1) நிறைவடைந்ததைக் குறிக்கும். மாவட்ட நீதிமன்றம் முதல் ஸ்வர்கேட் வரையிலான நிலத்தடி பிரிவின் செலவினம் சுமார் ரூ .1,810 கோடி.

மேலும், ரூ.2,950 கோடி செலவில் உருவாக்கப்படவுள்ள புனே மெட்ரோ முதல் கட்டத்தின் ஸ்வர்கேட்-கத்ராஜ் விரிவாக்கப் பணிக்கும் பிரதமர் அடிக்கல் நாட்டுகிறார். சுமார் 5.46 கி.மீ நீளமுள்ள இந்த தெற்கு நீட்டிப்பு மார்க்கெட் யார்டு, பத்மாவதி மற்றும் கத்ராஜ் ஆகிய மூன்று நிலையங்களுடன் முற்றிலும் நிலத்தடி வழித்தடமாக உள்ளது.

பிடேவாடாவில், கிராந்திஜோதி சாவித்ரிபாய் பூலேவின் முதல் பெண்கள் பள்ளி நினைவுச் சின்னத்திற்கு பிரதமர் அடிக்கல் நாட்ட உள்ளார்.

சூப்பர் கம்ப்யூட்டிங் தொழில்நுட்பத் துறையில், இந்தியாவை தற்சார்புடையதாக மாற்றுவது என்ற அவரது உறுதிப்பாட்டுக்கு ஏற்ப, தேசிய சூப்பர் கம்ப்யூட்டிங் இயக்கத்தின் கீழ் உள்நாட்டிலேயே உருவாக்கப்பட்ட ரூ.130 கோடி மதிப்பிலான மூன்று பரம் ருத்ரா சூப்பர் கம்ப்யூட்டர்களை, பிரதமர் நாட்டுக்கு அர்ப்பணிப்பார். இந்த சூப்பர் கம்ப்யூட்டர்கள் புனே, தில்லி மற்றும் கொல்கத்தாவில் முன்னோடி அறிவியல் ஆராய்ச்சிக்கு உதவுவதற்காக நிறுவப்பட்டுள்ளன. புனேவில் உள்ள ராட்சத மீட்டர் ரேடியோ தொலைநோக்கி (ஜிஎம்ஆர்டி), வேகமான ரேடியோ வெடிப்புகள் (எஃப்.ஆர்.பி) மற்றும் பிற வானியல் நிகழ்வுகளை ஆராய சூப்பர் கம்ப்யூட்டரைப் பயன்படுத்தும். தில்லியில் உள்ள இன்டர் யுனிவர்சிட்டி ஆக்சிலரேட்டர் சென்டர் (IUAC) சாதனை அறிவியல் மற்றும் அணு இயற்பியல் போன்ற துறைகளில் ஆராய்ச்சியை மேம்படுத்தும். கொல்கத்தாவில் உள்ள எஸ்.என்.போஸ் மையம் இயற்பியல், அண்டவியல் மற்றும் புவி அறிவியல் போன்ற துறைகளில் மேம்பட்ட ஆராய்ச்சியை மேற்கொள்ளும்.

வானிலை மற்றும் பருவநிலை ஆராய்ச்சிக்கு உகந்த உயர் செயல்திறன் கொண்ட கணினி (HPC) அமைப்பையும் பிரதமர் தொடங்கி வைப்பார். இந்தத் திட்டம் ரூ.850 கோடி முதலீட்டைக் குறிக்கிறது, இது வானிலை பயன்பாடுகளுக்கான இந்தியாவின் கணக்கீட்டு திறன்களில் குறிப்பிடத்தக்க முன்னேற்றத்தைக் குறிக்கிறது.  புனேவில் உள்ள இந்திய வெப்பமண்டல வானிலை ஆய்வு நிறுவனம் (ஐ.ஐ.டி.எம்) மற்றும் நொய்டாவில் உள்ள நடுத்தர தொலைவு வானிலை முன்னறிவிப்புகளுக்கான தேசிய மையம் (என்.சி.எம்.ஆர்.டபிள்யூ.எஃப்) ஆகிய இரண்டு முக்கிய தளங்களில் அமைந்துள்ள இந்த எச்.பி.சி அமைப்பு, அசாதாரண கணினி சக்தியைக் கொண்டுள்ளது. புதிய HPC அமைப்புகளுக்கு 'அர்கா' மற்றும் 'அருணிகா' என்று பெயரிடப்பட்டுள்ளது, இது சூரியனுடனான அவற்றின் தொடர்பை பிரதிபலிக்கிறது. இந்த உயர்-தெளிவுத்திறன் மாதிரிகள் வெப்பமண்டல சூறாவளிகள், அதிக மழைப்பொழிவு, இடியுடன் கூடிய மழை, ஆலங்கட்டி மழை, வெப்ப அலைகள், வறட்சி மற்றும் பிற முக்கியமான வானிலை நிகழ்வுகள் தொடர்பான கணிப்புகளின் துல்லியம் மற்றும் முன்னணி நேரத்தை கணிசமாக மேம்படுத்தும்.

பெட்ரோலியம் மற்றும் இயற்கை எரிவாயுத் துறையில் ரூ.10,400 கோடி மதிப்பிலான பல்வேறு திட்டங்களை பிரதமர் தொடங்கி வைத்து நாட்டுக்கு அர்ப்பணிக்கிறார். இந்த முன்முயற்சிகள் எரிசக்தி, உள்கட்டமைப்பு, டிரக் மற்றும் கேப் ஓட்டுநர்களின் பாதுகாப்பு மற்றும் வசதி, தூய்மையான இயக்கம் மற்றும் நிலையான எதிர்காலம் ஆகியவற்றில் கவனம் செலுத்தும்.

வாகனம் ஓட்டுவதை எளிமையாக்க, மகாராஷ்டிரா மாநிலம் சத்ரபதி சம்பாஜிநகரில் சரக்கு ஊர்தி ஓட்டுநர்களுக்கான சாலையோர வசதிகளை பிரதமர் தொடங்கி வைக்கிறார். சத்ரபதி சாம்பாஜி நகர், மகாராஷ்டிரா ஃபதேஹ்கர் சாஹிப், பஞ்சாப்; சோங்கத், குஜராத்; பெலகாவி மற்றும் பெங்களூர் கிராமப்புறம், கர்நாடகா. லாரி ஓட்டுநர்கள் மற்றும் வாடகை வண்டி ஓட்டுநர்களின் நீண்ட பயணங்களின் தேவைகளைப் பூர்த்தி செய்யும் வகையில் வடிவமைக்கப்பட்ட வசதியான பயணத்திற்கான நவீன வசதிகளை ஒரே இடத்தில் உருவாக்கும் நோக்கத்துடன், வாங்கத்தக்க விலையில் உணவு மற்றும் தங்குமிட வசதிகள், சுத்தமான கழிப்பறைகள், பாதுகாப்பான வாகன நிறுத்துமிடம், சமையல் பகுதி, வைஃபை, உடற்பயிற்சி கூடம் போன்ற சாலையோர வசதிகள் சுமார் 2,170 கோடி ரூபாய் செலவில் 1,000 சில்லறை விற்பனை நிலையங்களில் உருவாக்கப்பட்டு வருகின்றன.

ஒரே சில்லறை விற்பனை நிலையத்தில் பெட்ரோல், டீசல், சிஎன்ஜி, மின்சாரம், சிபிஜி, எத்தனால் கலந்த பெட்ரோல் (EBP) போன்ற பல்வேறு எரிசக்தித் தேர்வுகளை உருவாக்க, எரிசக்தி நிலையங்களையும் பிரதமர் தொடங்கி வைப்பார். தங்க நாற்கரச் சாலை, கிழக்கு-மேற்கு, வடக்கு-தெற்கு வழித்தடங்கள் மற்றும் இதர முக்கிய நெடுஞ்சாலைகளில் அடுத்த  5 ஆண்டுகளில் சுமார் ரூ.6,000 கோடி செலவில் சுமார் 4,000 எரிசக்தி நிலையங்கள் உருவாக்கப்படும். எரிசக்தியை நாடும் வாடிக்கையாளர்களுக்கு ஒரே கூரையின் கீழ் மாற்று எரிபொருளை வழங்குவதன் மூலம், தடையற்ற போக்குவரத்துக்கு எரிசக்தி நிலையங்கள் உதவும்.

பசுமை எரிசக்தி, கரியமில வாயு குறைப்பு, நிகர பூஜ்ஜிய உமிழ்வு ஆகியவற்றுக்கு சுமூகமாக மாறுவதற்கும், மின்சார வாகன ஓட்டுநர்களின் வரம்பு குறித்த கவலையைக் குறைப்பதற்கும் பிரதமர் 500 மின்சார வாகன சார்ஜிங் வசதிகளை நாட்டுக்கு அர்ப்பணிப்பார். மேலும், 2025 நிதியாண்டுக்குள் 1,500 கோடி ரூபாய் மதிப்பீட்டில் 10,000 EV சார்ஜிங் நிலையங்களை (EVCS) உருவாக்க இலக்கு நிர்ணயிக்கப்பட்டுள்ளது.

மகாராஷ்டிராவில் 3 எரிவாயு நிலையங்கள் உட்பட, நாடு முழுவதும் 20 திரவ இயற்கை எரிவாயு நிலையங்களை பிரதமர் நாட்டுக்கு அர்ப்பணிப்பார். தொலைதூர போக்குவரத்துக்கு திரவ இயற்கை எரிவாயு போன்ற, தூய்மையான எரிபொருளைப் பயன்படுத்துவதை ஊக்குவிப்பதற்காக, எண்ணெய் மற்றும் எரிவாயு நிறுவனங்களால் நாட்டின் பல்வேறு மாநிலங்களில், 50 திரவ இயற்கை எரிவாயு எரிபொருள் நிலையங்கள், சுமார் 500 கோடி ரூபாய் செலவில் உருவாக்கப்படும்.

சுமார் ரூ.225 கோடி மதிப்பிலான 1500 இ-20 (20% எத்தனால் கலந்த) பெட்ரோல் சில்லறை விற்பனை நிலையங்களையும் பிரதமர் நாட்டுக்கு அர்ப்பணிப்பார்.

சோலாப்பூர் விமான நிலையத்தை பிரதமர் திறந்து வைக்கிறார். இந்த விமான நிலையம், சோலாப்பூரை சுற்றுலாப் பயணிகள், வர்த்தகப் பயணிகள் மற்றும் முதலீட்டாளர்கள் எளிதில் அணுகும் வகையில் இணைப்பு வசதியை மேம்படுத்தும். தற்போதுள்ள சோலாப்பூர் முனைய கட்டிடம் ஆண்டுக்கு சுமார் 4.1 லட்சம் பயணிகளுக்கு சேவை செய்யும் வகையில் புதுப்பிக்கப்பட்டுள்ளது.

மகாராஷ்டிராவில், சத்ரபதி சம்பாஜிநகருக்கு தெற்கே 20 கிலோமீட்டர் தொலைவில் அமைந்துள்ள மத்திய அரசின் தேசிய தொழில் பெருவழித்தட மேம்பாட்டுத் திட்டத்தின் கீழ், 7,855 ஏக்கர் நிலப்பரப்பை உள்ளடக்கிய, மாற்றத்துக்கான பிட்கின் தொழிற்பேட்டைப் பகுதியை பிரதமர் நாட்டுக்கு அர்ப்பணிப்பார். தில்லி, மும்பை தொழில் பெருவழித்தடத்தின் கீழ் உருவாக்கப்பட்ட இந்தத் திட்டம், மராத்வாடா பிராந்தியத்தில் ஒரு துடிப்பான பொருளாதார மையமாக அளப்பரிய ஆற்றலைக் கொண்டுள்ளது. ரூ.6,400 கோடிக்கும் அதிகமான திட்ட மதிப்பீட்டிலான இந்த திட்டத்தை, 3 கட்டங்களாக மேம்படுத்த மத்திய அரசு ஒப்புதல் அளித்துள்ளது.

***

(Release ID: 2058558)

MM/KPG/KR