ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

খুরুমজরি US! হৌজিক ঐখোয়গী 'নমস্তে' অসি ফাওবা মল্তিনেস্নেল ওইরে, লোকেলদগী গ্লোবেলদা ওন্থোক্লে, অমসুং মসি অদোম্না ওইহনখিবনি। ভারতপু থম্মোয়দা চেৎনা থম্বা ভারত মচা খুদিংমক্না মসি ওইথোকহনখি।

মরুপশিং,

অদোম্না মফমসিদা অরাপ-অরাপ্পা মফমশিংদগী লাক্লি। মীওই খরদি মশক খঙই, অদুগা অতোপ্পশিংদি অনৌবা ঙাক্তনি। অদোমগী নুংশিবা অসি ঐহাক্কীদমক্তা য়াম্না চাউবা ইকায়খুম্নবা অমনি। ঐহাক্না প্রধান মন্ত্রী ওইদ্রিঙৈ, মুখ্য মন্ত্রী ওইদ্রিঙৈ, লুচিংবা অমত্তা ওইদ্রিঙৈগী মতমশিং অদু ঐহাক্না নীংশিংলি। মতমদুদা, ঐহাক্না মফম অসিদা খংনীংগনবা ত্রেবেলর অমা ওইনা, লমদম অসি উনীংবা অমসুং খঙনীংবনা খৌরাংদুনা ৱাখলদা ৱাহং কয়াগা লোয়ননা মফম অসিদা লাকখি। ঐহাক্না ওফিসিএল পোজিসন অমত্তা পায়দ্রিঙৈদসু, ঐহাক্না অমেরিকাগী স্তেৎ 29 রোম চৎখ্রে। তুংদা, ঐহাক সি.এম. ওইরকপা মতমদা, ঐহাক্না তেক্নোলোজীগী খুত্থাংদা অদোমগা মখা তানা শম্নখি। প্রধান মন্ত্রী অমা ওইনা, ঐহাক্না অদোমদগী মীনুংশিবা ফংজখি। 2014দা মেদিসন স্ক্বার; 2015দা সেম জোস; 2019দা হোস্তন; 2023দা ৱাশিংতন; অমসুং হৌজিক 2024দা ন্যু য়োর্ক, অমসুং মতম খুদিংদা, অদোম্না হান্নগী রেকোর্দ থুগাইরি।

মরুপশিং,

ঐহাক্না মতম পুম্নমক্তা ভারত মচাশিংগী মপাঙ্গলবু মশক খঙজখি। ঐহাক্না ওফিসিএল ওইবা পোস্ত অমত্তা পায়দ্রিঙৈদসু, ঐহাক্না মসি খঙখি, অমসুং ঙসিসু খঙলি। অদোম্না মতম পুম্নমক্তা ঐগীদমক ভারতকী খ্বাইদগী মপাঙ্গল কনবা ব্রান্দ এম্বেসেদরশিং ওইখি। মরম অদুনা ঐনা অদোমবু রাস্ত্রাদুত (জাতিগী ইমিসরীশিং) হায়না কৌই। অদোম্না অমেরিকাবু ভারতকা অমসুং ভারতপু অমেরিকাগা শম্নহল্লে। অদোমগী হৈশিংবা, তেলেন্ত অমসুং কম্মিৎমেন্ত অসি লম্বা লৈতে। অদোমনা সুমদ্র তরেৎ লান্দুনা চৎলবসু অদোমবু ভারত অসিদগী তোখাইহনবা ঙমগদবা অচৌবা সমুদ্র অমত্তা লৈতে। ইমা ভারতীনা ঐখোয়দা তাকপীরম্বশিং অদু ঐখোয়না কৈদৌঙৈদসু কাউরোইদবনি। ঐখোয়না চৎপা মফম খুদিংমক্তা, ঐখোয়না মীপুম খুদিংমকপু ইমুং মনুংগুম্না লৌই। মখল-মখা কয়াবু খুরুমজবা, হিংবা, অমসুং ঐখোয়গী পুন্সিদা পুনশিনবা - মসি ঐখোয়গী মগুনশিংনি, ঐখোয়গী পুন্সিগী শরুক অমনি। ঐখোয় লোল অমসুং দাইলেক্ত চামা লৈবা, ধর্ম অমসুং কাঙলুপ খুদিংমক্কী য়ুম্ফম ওইবা লৈবাক্তগীনি। অদুম ওইনমক, ঐখোয়না অমত্তা ওইনা অমসুং পুন্না মাংলোমদা চংশিল্লি। হায়রিবা হোল অসিদা, মীওই খরনা তামিল, অতোপ্পশিংনা তেলুগু, মালায়ালম, কন্নরা, পঞ্জাবি, মরাথি, নৎত্রগা গুজরাতি ঙাংই। ঐখোয়গী লোলশিং অসি খেন্নবসু য়াই, অদুবু ঐখোয়গী ৱাখল্লোন অসি অমখক্তনি: ভারত ইমানা য়াইফরে, ভারতকী ওইবা ৱাখল্লোন। মসি মালেমগা শম্নবদা ঐখোয়গী খ্বাইদগী চাউবা পাঙ্গলনি। হায়রিবা ভেল্যুশিং অসিনা ঐখোয়বু মহৌশানা বিশ্ব বন্ধু (গ্লোবেল ফ্রেন্দ) ওইহল্লি। ঐখোয়গী লাইরিকশিংনা হায়রিবগুম্না, तेन त्यक्तेन भुंजीथा: হায়বদি কৎথোক্লিবশিং অসি তশেংনা নুংঙাইবা ফংলবশিংনি। ঐখোয়না অতোপ্পদা অফবা তৌদুনা অমসুং ইশাগীদমক্তা কত্থোক্তুনা নুংঙাইবা ফংগনি। ঐখোয়না মফম অমদা লৈরবসু মসিগী ৱাখল্লোন অসি হোংবা লৈতে। ঐখোয়না হিংলিবা খুন্নাই অসিদা ঐখোয়না খ্বাইদগী হেন্না কান্নবা পীরি। দোক্তরশিং, রিসর্চরশিং, তেক্নোলোজীগী প্রোফেস্নেলশিং, সাইন্তিস্তশিং, নৎত্রগা অতোপ্পা শিনফমশিংদগী ওইরবসু, অদোম্না অমেরিকাদা অৱাংবা থাক্তা চংশিল্লি, অমসুং মালেমনা অদোমগী মফমদা উবা ফংলি। মতম খরগী মমাংদা মফম অসিদা T-20 ক্রিকেৎ ৱর্ল্দ কপ পাংথোকখি অমসুং USAগী তীম্না শীংথানীংঙাই ওইনা শান্নখিবা অসি য়াম্না নুংঙাইবা অমনি। অমসুং মালেম অসিনা মফম অসিদা লৈরিবা ভারত মচাশিংনা শরুক তম্লিবা অদুসু উবা ফংলে।

মরুপশিং,

মালেমগী ওইনা, AI হায়বসিনা আর্তিফিসিএল ইন্তেলিজেন্স হায়বনি, অদুবু ঐহাক্না থাজৈ মদুদি AI হায়বসিনা অমেরিকা-ইন্দিয়া হায়বদুনি, মসিনা ভারত-অমেরিকাগী ৱাখল্লোন অসি অনৌবা মালেমগী AI গী শক্তিনি, মসিনা ভারত-অমেরিকাগী মরীশিং হেনগৎহল্লি। ঐহাক্না ময়াম পুম্নমকপু, ইন্দিয়ন দাইস্পোরা পুম্নমকপু খুরুমজরি।

মরুপশিং,

মালেমগী মফম খুদিংমক্তা ঐহাক চৎলুবা মফম খুদিংমক্তা, ঐহাক্না লুচিংবা খুদিংমক্তগী ইন্দিয়ন দাইস্পোরাগীদমক থাগৎপা ফোংদোকপদা নত্তনা করিসু তাখিদে। ঙরাং, রাস্ত্রপতি বাইদেননা ঐবু দেলাৱরদা লৈবা মহাক্কী য়ুমদা লাক্নবা কৌখি। মহাক্কী মীনুংশিং  অমসুং মীয়োক মীচান ফবা মতৌনা ঐঙোন্দা য়াম্না নুংঙাইবা পোকহল্লি। মসিগী ইকায় খুম্নবা অসি ভারত মচা করোর 140গীদমক, অদোমগী হোৎনবা কনবা, মফম অসিদা লৈরিবা ভারত মচা মিলিয়ন কয়াগীদমকনি। রাস্ত্রপতি বাইদেন অমসুং ময়াম পুম্নমক্তা ঐহাক্না ঐহাক্কী থাগৎপা ফোংদোকচরি।

মরুপশিং,

2024 অসি মালেমগী ওইনা য়াম্না মরু ওই। নাকল অমরোমদা, ঐখোয়না লৈবাকশিংগী মরক্তা চয়েৎনবা অমসুং অৱাবা কয়া উবা ফংলি, অদুগা অতোপ্পা নাকল অমদা, লৈবাক খরনা দেমোক্রেসীগী থৌরম পাংথোক্লি। ভারত অমসুং অমেরিকা অসি দেমোক্রেসীগী থৌরম অসিদা অমত্তা ওইনা লৈরি। USতা মীখল পাঙথোক্কদৌএ, অদুগা ভারতনা মীখল পাঙথোকখ্রে। ভারতকী মীখল অসি মীওইবগী পুৱারীদা খ্বাইদগী চাউবা মীখলনি। অদোম্না খল্লু: USকী অপুনবা মীশিংদগী ভোতর মশিং শরুক অনি হেনখ্রে, অমসুং য়ুরোপকী অপুনবা মীশিংদগী ভোতর মশিংনা হেনখ্রে! ভারত্তা মীওই কয়ানা মখোয়গী ভোৎ থাদখি। ঐখোয়না ভারতকী দেমোক্রেসীগী পাক চাউবা অসি উবদা ঐখোয় চাউথোকচবা ফাওই। থা অহুম শাংবা পোল্লিং প্রোসেস, পোল্লিং স্তাফ মিলিয়ন 15, পোল্লিং স্তেসন মিলিয়ন অমা, পোলিতিকেল পার্তী 2,500 হেন্না, কেন্দিদেৎ 8,000 হেন্না, তোঙান-তোঙানবা লোলশিংদা পাউচে লিশিং কয়া, রেদিও স্তেসন চা কয়া, তি.ভি. ন্যুজ চেনেলশিং, সোসিএল মীদিয়া একাউন্ত মিলিয়ন কয়া, সোসিএল মীদিয়া চেনেল লাখ কয়া অসিনা ভারতকী দেমোক্রেসীবু মঙাল থোকহল্লি। মসি ফ্রীদম ওফ এক্সপ্রেসন হেনগৎলক্লিবা মতম অমনি, অমসুং ঐখোয়গী ইলেক্তোরেল প্রোসেস অসি হায়রিবা থাক অসিদা চেকশিন্না য়েংশিল্লি।

অমসুং মরুপশিং,

হায়রিবা মতম শাংনা চত্থরকখিবা মীখলগী থৌওং অসিনা ভারত্তা মমাংদা অমুক্তা ওইখিদ্রিবা মওং অমদা পুরক্লে। করি থোকখি? করি থোকখি? করি থোকখি? ‘অবকী বার –’ (হৌজিক অমুক-), ‘অবকী বার-‘ (হৌজিক অমুক-), ‘অবকী বার-’ (হৌজিক অমুক- )!

মরুপশিং,

ঐখোয়গী সরকার অসি অহুমশুবা ওইনা অমুক হন্না কাখ্রে। অসিগুম্বা থৌদোক অসি ভারত্তা হৌখিবা চহি 60 অসিদা থোকখিদ্রি। ভারতকী মীয়াম্না ঐখোয়দা পীখিবা মেন্দেৎ অসি য়াম্না চাউই অমসুং মরু ওই। অহুমশুবা তর্ম অসিদা, ঐখোয়না হেন্না চাউবা পান্দমশিং ফংনবা হোৎনগনি। ঐখোয়না মপাঙ্গল শরুক অহুম অমসুং খোঙজেল শরুক অহুম হেনগৎতুনা মাংলোমদা চংশিনবা তাই। অদোম্না ৱাহৈ অমা নীংশিংগনি: PUSHP (লৈ)।  হোয়, মসি থম্বালনি হায়না লৌবিয়ু, ঐহাক্কী ওবজেক্সন লৈতে। PUSHP অমসুং ঐহাক্না মসিগী PUSHP  অসি P না প্রোগ্রেসিব ভারত, U না অনস্তোপেবল ভারত, Sনা স্পিরিচুএল ভরত, Hনা হ্যুমেনিতী ফার্স্ত ভারত অমসুং Pনা প্রোস্পেরস ভারত। পুন্না, PUSHPগী ইথিল মঙা অসিনা 'ভিক্সিত ভারত' (চাউখৎলবা ভারত) অমা শেমগনি।

মরুপশিং,

ঐহাক ভারতকী নিংতম্লবা মতুংদা পোকখিবা অহানবা প্রধান মন্ত্রীনি। নীংতম লানগী মতমদা, ভারতকী মীওই মিলিয়ন কয়ানা স্বরাজ (মশা-মশানা লৈঙাকপা) গীদমক মখোয়গী পুন্সি কৎথোকখি। মখোয়না মখোয়গী লন্নাইগী কান্নবশিং নৎত্রগা কম্ফর্ত জোনশিং অদু খল্লমদে; মখোয়না পুম্নমক কাওথোকখি অমসুং ব্রিতিশকী মায়োক্তা লান্থেংখি। খরনা ফাসি তৌখি, খরা নোংমৈনা কাপখি, খরা মীওৎ-মীনৈ কয়া মায়োক্নখি, অমসুং কয়া অমনা মখোয়গী নহা ওইরিঙৈ মতম জেলদা লৈখি।

মরুপশিং,

ঐখোয়না ঐখোয়গী লৈবাক্কীদমক শিবা ঙম্লোই, অদুবু ঐখোয়না মসিগীদমক হিংবা ঙমগনি। শিবা হায়বসি ঐখোয়গী ইথৌদাং নত্তে, অদুবু হিংবা হায়বসিদি ঐখোয়গী ইথৌদাংনি। অহানবা নুমিৎতগী, ঐগী ৱাখল অমসুং মিসন অসি ময়েক শেংলে। ঐহাক্না স্বরাজ (মনিংতম্বা) গীদমক ঐহাক্কী পুন্সি কৎথোকপা ঙমখিদে, অদুবু ঐহাক্না স্বরাজ (অচুম্বা লৈঙাক) অমসুং সমৃদ্ধ ভারতকীদমক ঐহাক্কী পুন্সি কৎথোক্নবা ৱারেপ লৌখি। ঐহাক্কী পুন্সিগী শরুক কয়া অমা লৈবাক অসিগী মফম কয়াদা চত্থোক চৎশিন তৌদুনা লৈখি। ঐনা চানবা ফংবা মফমদা ঐনা চানখি; ঐনা লৈফম ফংবা মফমদা ঐনা লৈখি। সমুদ্রগী তুরেলদগী হৌরগা চীংদোং ফাওবা, মরুভুমিদগী হৌরগা উন্না কুপশিনবা চীংদোং ফাওবা, ঐনা মফম খুদিংমক্কী মীওইশিংগা উনখি, মখোয়শিংবু খঙনখি। ঐহাক্না ঐগী লৈবাক্কী পুন্সি, মসিগী চৎনবী অমসুং মসিগী অৱাবা কয়াগী মতাংদা হকথেংননা খঙবা ফংখি। ঐহাক্কী লম্বী অসি তোঙানবা ওইরবসু, তশেংবদি ঐহাকপু রাজনীতিদা পুরকখি। ঐহাক্না মুখ্য মন্ত্রী অমা ওইগনি হায়না কল্পনা তৌখিদ্রি, অদুবু ঐহাক গুজরাতকী খ্বাইদগী শাংবা মতমগী ওইনা চহি 13 সি.এম. ওইখি। ঐহাক চহি 13 গুজরাতকী মুখ্য মন্ত্রী ওইখি অমসুং তুংদা মীয়াম্না ঐহাকপু প্রধান মন্ত্রী ওইহনখি। অদুবু লৈবাক অসিগী মফম কয়াদা চৎতুনা ঐনা তম্লকখিবা মহৈশিং অদুনা রাজ্য অমসুং কেন্দ্র অনিমক্কী থাক্তা ঐগী লৈঙাকপগী মোদেল শেমগৎলে। হৌখিবা চহি 10 অসিদা, মসিগী গবর্নান্স মোদেল অসিনা মায় পাক্লকপা অসি অদোম অমসুং মালেম পুম্বনা উবা ফংলে। হৌজিক ভারতকী মীয়াম্না ঐঙোন্দা থাজবা থমদুনা অহুমশুবা তর্ম অমা পীখ্রে। ঐহাক্না মসিগী অহুমশুবা তাঙ্কক অসিদা থৌদাং লৌবগী ৱাখল্লোন শরুক অহুম হেনগৎপগা লোয়ননা চৎলি।

মরুপশিং,

ঙসি ভারত অসি মালেমগী খ্বাইদগী নহা ওইরিবা লৈবাকশিংগী মনুংদা অমনি। ভারত অসি ইনর্জী অমসুং মঙলানশিংনা থল্লি। নুমিৎ খুদিংগী, অনৌবা রেকোর্দশিং শেমগৎলি। নুমিৎ খুদিংগী, অনৌবা পাউ। ঙসি ঐখোয়না চাউথোকচনীংঙাই ওইবা পাউ অমা ফংজখি: ভারতনা শান্নরোই নুপা অমসুং নুপী অনিমক্তা শান্নরিবা চেস ওলিম্পিয়াদতা সনাগী তকমান ফংখ্রে। অদুম ওইনমক ঐহাক্না অমুক্কা হেন্না থাগৎপা ফোংদোক্কদবা ৱাফম অমা অদোমদা হায়জরি। চহি 100 রোম অসিদা অহানবা ওইনা, মসি থোকখ্রে! লৈবাক শীনবা থুংনা অমসুং ভারত মচা খুদিংমক্না ঐখোয়গী শান্নরোয়শিংদা চাউথোকচরি। ভারতপু লমজিংলিবা অতোপ্পা AI অমা লৈরি। অমসুং মদু করি ওইগনি? মসি Aনা এস্পিরেস্নেল অমসুং Iনা ভারতনি: এস্পিরেস্নেল ভারত। মসি ঐখোয়গী অনৌবা ইনর্জীনি। ভারত মচা করোর কয়াগী অপাম্বনা ভারতকী চাউখৎপা পুরক্লি। এস্পিরেসন খুদিংমক্না অনৌবা এচিবমেন্তশিং পুরক্লি, অমসুং এচিবমেন্ত খুদিংমক্না অনৌবা এস্পিরেসনশিং ফংহল্লি। চহি তরাগী মনুংদা ভারতনা খ্বাইদগী চাউবা ইকনোমীগী 10শুবা মফমদগী 5শুবা মফমদা হায়গৎখ্রে। হৌজিক ভারত অসি অথুবা মতমদা খ্বাইদগী চাউবা অহুমশুবা শেন্মিৎলোন ওইরকপা হায়বসি ভারত মচা খুদিংমক্না পাম্মি। ঙসি ভারতকী মীশিং য়াম্লবা শরুক অমনা মখোয়গী তঙাইফদবা পোৎলমশিং ফংহল্লে। হৌখিবা চহি 10 অসিদা, মীওই করোর কয়া অমা ক্লিন কুকিং গ্যাস, পাইপকী ঈশিং, ইলেক্ত্রিসিতী অমসুং তোইলেৎকী খুদোংচাবা ফংলে। হৌজিক মীওই করোর অমা হেন্না মীওইশিংনা অফবা পুন্সি মহিং অমগীদমক হোৎনরি।

মরুপশিং,

হৌজিক ভারতকী মীয়াম্না লম্বী খক্তমক পামদে, মখোয়না অফবা এক্সপ্রেসৱেজসু পাম্মি। হৌজিক ভারতকী মীয়াম্না রেল কনেক্তিবিতী খক্তমক পামদে, মখোয়না হাই স্পীদ ত্রেনসু পাম্মি। ভারতকী শহর খুদিংমক্না মেত্রো সর্বিস লৈবা পাম্মি, অমসুং শহর খুদিংমক্না মশাগী এয়রপোর্ত অমা লৈবা পাম্মি। খুঙ্গং নৎত্রগা সহরগী নাগরিক খুদিংমক্না মালেমগী থাক্কী ফেসিলিতীশিং পাম্মি, অমসুং ঐখোয়না মসিগী এস্পিরেসনশিং অসিগী মহৈ অদু উবা ফংলি। 2014দা ভারতকী শহর 5 খক্তদা মেত্রো সর্বিস লৈরম্মি; ঙসি শহর 23দা মেত্রো লৈরে। ভারত্তা হৌজিক মালেমগী অনিশুবা খ্বাইদগী চাউবা মেত্রো নেৎৱার্ক লৈরে, অমসুং মসি নুমিৎ খুদিংগী পাকথোক চাউথোক্লি।

মরুপশিং,

2014দা ভারতকী শহর 70 খক্তদা এয়রপোর্ত লৈরম্মি। ঙসিদি শহর 140 হেনবদা এয়রপোর্ত লৈরে। 2014দা গ্রাম পঞ্চায়ৎ 100গী মখাদা ব্রোদবেন্দ কনেক্তিবিতী লৈরম্মি। ঙসিদি মসি পঞ্চায়ৎ 200,000 হেন্না লৈরে। 2014দা ভারত্তা LPG গী কঞ্জুমর মিলিয়ন 140 লৈরম্মি। ঙসিদি মশিং অসি মিলিয়ন 310 হেনখ্রে। হান্ননা চহী কয়া চঙবা থবকশিং হৌজিক থা খরা খক্তদা লোইশিনবা ঙম্লে। ভারতকী মীয়ামদা অনৌবা থাজবা অমা লৈরে, মখোয়গী পান্দমশিং ফংবা ঙম্নবা হোৎনরি। ভারতকী চাউখৎ-থৌরাং অসি মীয়ামগী খোংজং অমা ওইরক্লি, অমসুং ভারত মচা খুদিংমক চাউখৎ-থৌরাংগী খোংজং অসিদা চপ মান্নবা শরুক য়ারি। মখোয়না ভারতকী মায়পাকপা অমসুং মসিগী এচিবমেন্তশিংদা থাজবা থম্লি।

মরুপশিং,

ঙসি ভারত অসি খুদোংচাবশিংগী লমনি। ভারতনা খুদোংচাবগীদমক ঙাইদুনা লৈতে, ভারতনা খুদোংচাবশিং শেম্মী। হৌখিবা চহি 10 অসিদা, ভারতনা সেক্তর খুদিংমক্তা খুদোংচাবশিং ফংহন্নবগীদমক অনৌবা হৌদোকফম অমা শেমগৎলে। মসি য়েংবীয়ু - হৌখিবা চহী তরা অসিদা, অমসুং মসিনা অদোমবু চাউথোকচবা পোকহনগনি, মীওই করোর 25না লায়রবদগী থোরকপা ঙমখ্রে। মসি করম্না থোকখিবগে? ঐখোয়না হান্নগী ৱাখল্লোন অমসুং থৌওং হোংখিবনা মরম ওইদুনা মসি ওইরকখি। ঐখোয়না লায়রবশিংদা শক্তি পীনবদা মীৎয়েং থমখি। ঐখোয়না মীওই মিলিয়ন 500 হেন্না বেঙ্কিং সিস্তেমগা শম্নহল্লে, মীওই মিলিয়ন 550 হেন্না লুপা 500,000 ফাওবগী ওইবা মেদিকেল ত্রিৎমেন্ত লেম্না ফংহল্লে, ইমুং মিলিয়ন 40 হেনবদা মতিক চাবা য়ুম ফংহল্লে, অমসুং কোলেতরেল য়াওদবা লোনগী খুত্থাংদা ঐখোয়না মীওই মিলিয়ন কয়াদা ক্রেদিৎকী খুদোংচাবা ফংহল্লে। অসিগুম্বা খোঙথাং কয়া অমনা মীয়াম্বু লায়রবা মওংদা লৈহন্দনবা মতেং পাংলি অমসুং লায়রনা হৌরকপশিংনা ঙসি নিও-মিদ্দল ক্লাস অমা শেম্লে, মসিনা ভারতকী চাউখৎ থৌরাংবু খোঙজেল য়াংনা মাংলোমদা চংশিল্লি।

মরুপশিং,

ঐখোয়না নুপীশিংগী য়াইফ-থৌরাংগা লোয়ননা নুপীশিংনা লুচিংবা চাউখৎপদা মরু ওইবা মীৎয়েং চংলি। সরকারনা শাবা য়ুম করোর কয়া অসি নুপীশিংগী মিংদা রেজিস্তর তৌখ্রে। বেঙ্ক একাউন্ত করোর কয়া হাংদোকখিবা অদুগী তংখাইদগী হেন্না নুপীশিংগী মিংদা ওইরি। হৌখিবা দিকেদ অমদা, ভারতকী নুপী করোর 10না মাইক্রো এন্ত্রিপ্রেন্যুওরশিপ স্কিমদা য়াওখি। ঐহাক্না অদোমদা অতোপ্পা খুদম অমা পীজগে। ভারত্তা লৌউ-শিংউবু তেক্নোলোজীগা পুনশিন্নবা ঐখোয়না হোৎনরি। ঙসিদি লৌউ-শিংউদা দ্রোনশিং পাক-শন্না শীজিন্নরি। দ্রোনশিং অসি নহাক্না হান্নদগী খঙলবা ওইরবসু, মসিদা নহাকপু অঙকপা পোকহনবা য়াই: মখোয়শিং অসিগীদমক থৌদাং অসি কনানা লৌবগে হায়বসি নহাক্না খঙব্রা? মসি খুঙ্গংগী নুপীশিংনি। ঐখোয়না নুপী লিশিং কয়াবু দ্রোন পাইলোৎশিং ওইনবা ত্রেনিং পীরি, অমসুং লৌউ-শিংউগী লমদা চাউখৎপা তেক্নোলোজীগী অহোংবা অসি খুঙ্গংগী নুপীশিংনা লমজিংলি।

মরুপশিং,

হান্ননা মীৎয়েং চংলমদবা লমশিং অসি হৌজিক্তি নেস্নেল প্রাইওরিতী ওইরে। ঙসি ভারত অসি মমাংদগী হেন্না শম্নরে। ভারতকী 5G  কৈথেলগী হৌজিক লৈরিবা পাক চাউবা অসি খঙবদা অদোম্না অঙকপা ফাওগনি। ঐহাক্না অদোমদা হায়রবদি অদোম্না নুংঙাইতবা পোক্কদ্রা? ঙসি ভারতকী 5G কৈথেল অসি য়ুনাইতেদ স্তেৎসকী কৈথেলদগী হেন্না চাউই অমসুং মসি চহি অনিগী মনুংদা ফংলে। হৌজিক ভারতনা মেদ-ইন-ইন্দিয়া 6G দা থবক তৌরি। মসি করম্না থোকখিবগে? ঐখোয়না সেক্তর অসিবু খুমাং চাউশিলহন্নবা পোলিসীশিং শেমখিবনা মরম ওইদুনা মসি থোক্লকখি। ঐখোয়না মেদ-ইন-ইন্দিয়া তেক্নোলোজী, মমল হোংবা দেতা অমসুং মোবাইল ফোন পুথোকপদা শেল থাদখি। ঙসিদি মালেমগী মরুওইবা মোবাইল ব্রান্দ খুদিংমক মেদ ইন ইন্দিয়া ওইরে। ভারত অসি হৌজিক মালেমগী ওইনা খ্বাইদগী চাউবা অনিশুবা মোবাইল মেন্যুফেকচরর ওইরে। ঐহাক্কী মতমগী মমাংদা, ঐখোয়না মোবাইল ফোনশিং পুশিল্লকপা মতম অমা লৈরম্মি। ঙসিদি ঐখোয়না মখোয়শিং থাদোক্লি।

মরুপশিং, ভারত অসি মখা তানা মাংলোমদা চংশিল্লরোই। হৌজিক, ভারতনা অনৌবা সিস্তেমশিং শেমগৎলি অমসুং লমজিংলি। ভারতনা মালেমদা দিজিতেল পব্লিক ইনফ্রাস্ত্রকচর (DPI) গী অনৌবা ৱাখল্লোন অমা হৌদোকখ্রে। DPIনা ইক্বেলাইজমেন্ত প্রমোৎ তৌখি অমসুং মসিদা শেঞ্জা-থুমজা হন্থহনবদা শক্তি লৈবা খুৎলাই অমা ওইখি। ভারতকী UPIনা হৌজিক মালেমগী মীৎয়েং চংলি। অদোমগী পোকেৎতা ৱাল্লেত অমা য়াওরম্বা য়াই, ভারত্তা, মীশিংনা ফিজিকেল ৱাল্লেত অমসুং মখোয়গী ফোনদা ই-ৱাল্লেত অনিমক য়াওরি। ভারত মচা কয়ানা হৌজিক দিজি-লোকর শীজিন্নদুনা ফিজিকেল দোক্যুমেন্তশিং পুদুনা চৎনদ্রে। এয়রপোর্তশিংদা চৎপা মতমদা, মখোয়না দিজি-যাত্রা শিজিন্নৈ। মসি দিজিতেল পব্লিক ইনফ্রাস্ত্রকচর, ইন্নোভেসন, থবক পীবা অমসুং মসিগা মরী লৈনবা তেক্নোলোজী পুম্নমক্কী হৌদোকফম ওইরে।

মরুপশিং,

ভারত অসি হৌজিক লেপ্লরোই, হন্থররোই। ভারতনা মালেমগী দিভাইস কয়া অমা মেদ-ইন-ইন্দিয়া চিপশিংদা মথৌ তৌবা তুংলমচৎ অমা উরি। ঐখোয়না সেমিকন্দক্তর সেক্তরবু ভারতকী অওনবা পুরকপগী য়ুম্ফম ওইহল্লে। মমাং চহিগী জুন থাদা, ভারতনা সেমিকন্দক্তর ইন্দস্ত্রীগীদমক ইন্সেন্তিবশিং লাউথোকখি, অমসুং থা খরগী মতুংদা, মাইক্রোনগী অহানবা সেমিকন্দক্তর য়ুনিৎকীদমক উরেপ উয়ুংসু তমখি। ঙসি ফাওবদা ভারত্তা অসিগুম্বা য়ুনিৎ মঙাগী অয়াবা পীখ্রে। অদোম্না ভারত্তগী পুথোকপা চিপশিং অসি অমেরিকাদসু উবা ফংলগদবা নুমিৎ অদু অরাপ্পা নত্তে। অপীকপা চিপ অসিনা ভারতকী চাউখৎপগী খোঙচৎ অসি মমাংদা অমুক্তা ওইখিদ্রিবা থাক্তা পুখৎকনি। মসি মোদীগী ৱাশক অদুনি।

মরুপশিং,

ঙসি ভারত্তা রিফোর্মশিংগী মায়কৈদা অচেৎপা ফিরেপ অমসুং থৌনা অসি মমাংদা অমুক্তা ওইখিদ্রি। ঐখোয়গী গ্রীন ইনর্জী ত্রাঞ্জিসন প্রোগ্রাম অসি মসিগী অচৌবা খুদম অমনি। মালেমগী মীশিং চাদা 17 ওইজরবসু, মালেমগী কার্বন থাদোকপদা ভারতকী শরুক অসি চাদা 4 খক্তনি। ঐখোয়না গ্রহ অসিবু শোকহনবদা থৌদাং লৌখিদে। তশেংনমক, মালেমগী অতৈ মফমশিংগা চাংদম্নবদা, ঐখোয়গী ইথিল অসি য়াম্নমক পীকই। ঐখোয়নাসু কার্বন থাদোকপদা থাজদুনা ঐখোয়গী গ্রোথপু মপাঙ্গল কনখৎহনবা ঙম্মি, অদুবু ঐখোয়না মহৌশাগীদমক ঐখোয়গী অচেৎপা ইকাই খুম্নবা অসিনা লমজিংদুনা গ্রীন ত্রাঞ্জিসনগী লম্বী অদু খল্লে। মসিনা মরম ওইদুনা, ঐখোয়না সোলার, ৱিন্দ, হায়দ্রো, গ্রীন হায়দ্রোজেন অমসুং ন্যুক্লিয়র ইনর্জীদা শেন য়াম্না থাদরি। G20দা পেরিস ক্লাইমেৎ গোলশিং ফংখিবা ভারতনা অহানবা লৈবাক ওইখি। 2014দগী হৌনা ঐখোয়গী সোলর ইনর্জী কেপাসিতী অসি শরুক 30 হেনগৎলে। ঐখোয়না লৈবাক অসিগী য়ুমথোং খুদিংমক সোলর পাৱর য়ুম অমা ওইহন্নবা হোৎনরি। মসিবু ফংনবগীদমক, ঐখোয়না পাক-শন্না রুফতোপ সোলর মিসন অমা হৌদোক্লে। ঙসিদি ঐখোয়গী রেলৱে স্তেসনশিং অমসুং এয়রপোর্তশিংসু সোলর ইনর্জীদা ওন্থোক্লি। য়ুমদগী হৌরগা লম্বীদা, ভারতনা ইনর্জী ইফিসিএন্ত লাইৎকী মায়কৈদা খোঙচৎ অমা চংশিল্লি। হায়রিবা হোৎনরিবশিং অসিনা ভারত্তা গ্রীন জব কয়া অমা পুথোক্লি।

মরুপশিং,

21শুবা চহিচাগী ভারত অসি এজুকেসন, স্কিল, রিসর্স অমসুং ইন্নোভেসনগী থোংদা মাংলোমদা চংশিল্লি। নহাক পুম্নমক্না নালন্দা য়ুনিভর্সিতীগী মমিং অসি খঙনরক্কনি। মতম খরগী মমাংদা, ভারতকী অরিবা নালন্দা য়ুনিভর্সিতী অসি অনৌবা মওংদা অমুক হন্না হৌদোকখি। ঙসিদি, য়ুনিভর্সিতী অসিখক্তমক নত্তনা নালন্দাগী স্পিরিত অসিসু নৌনা হিংগৎহনখি। মালেম পুম্বগী মহৈরোইশিং ভারত্তা লাক্নবা অমসুং মহৈ তম্বা লাক্নবা পুক্নিং চিংশিনবা ঙম্বা মোদর্ন এজুকেস্নেল ইকোসিস্তেম অমা ঐখোয়না শেমগৎলি। হৌখিবা চহি 10 অসিদা ভারত্তা অঙকপা অমা থোকখ্রে। হায়রিবা মতম অসিদা ভারত্তা চয়োল খুদিংগী অনৌবা য়ুনিভর্সিতী অমা শেমগৎলি, নুমিৎ খুদিংগী অনৌবা কোলেজ অনি লিংখৎলি, নুমিৎ খুদিংগী অনৌবা ITI অমা হাংদোক্লি। চহি তরাগী মনুংদা, IIITশিংগী মশিং অসি 9দগী 25দা, IIMশিং 13দগী 21দা, অমসুং AIIMS মেদিকেল কোলেজশিংগী মশীংসু চপ মান্নবা মতম অসিদা শরুক অনি হেনগৎলক্লি। ঙসিদি মালেমগী খ্বাইদগী ফবা য়ুনিভর্সিতীশিং ফাওবা ভারত্তা লাক্লি। ভারত অসি হৌজিক শক্নাইরবা ওইরে। মালেম অসিনা মতম কুইনদগী ভারতকী দিজাইনরশিংগী শক্তি অদু উরক্লি। হৌজিক মালেম অসিনা 'দিজাইন ইন ইন্দিয়া'গী মগুন অদু উবা ফংলগনি।

মরুপশিং,


ঙসিদি ভারতকী পার্তনরশিপশিং মালেমগী থাক্তা পাকথোক চাউথোক্লি। মমাংদা, ভারতনা ইক্বেল দিস্তেন্সকী পোলিসী অমা চৎনরম্মি, অদুবু হৌজিক্তি ইক্বেল প্রক্সিমিতিগী পোলিসী অমা চৎনহল্লে। ঐখোয়না গ্লোবেল সাউথকী মপাঙ্গল কনবা ৱাঙাং অমা ওইরক্লি। ভারতকী খোঙথাং অমগী মতুং ইন্না অফ্রিকান য়ুনিয়নবু G20 সম্মিৎতা অচেৎপা মেম্বর ওইহনখিবদু অদোম্না উবা ফংলবা য়াই। ঙসিদি, ভারতনা মালেমগী থাক্তা ৱা ঙাংলিবা মতমদা, মালেমনা ঙাংলি। মতম খরগী মমাংদা, ঐহাক্না হায়রকপা মতমদা, "মসিদি লানগী মতম নত্তে", হায়বগী মরুওইবা অদু মালেম শীনবা থুংনা খঙখি।

মরুপশিং,

মালেমগী মফম অমহেক্তদা অৱাবা অমা লাকপা মতমদা, ভারতনা খ্বাইদগী অহানবা ওইনা মতেং পাংলি। কোবিদ-19 লাইচৎ মনুংদা, ঐখোয়না লৈবাক 150 হেনবদা ভেক্সিন অমসুং হিদাক-লাংথকশিং থাগৎখি। য়ুহার হাবা, সাইক্লোন অমা নৎত্রগা সিভিল ৱার অমা থোক্লগসু, ঐখোয়না ইহান হানবা ওইনা মতেং পাংখি। মসি ঐখোয়গী মমা-মপাশিংনা পীখিবা ভেল্যুশিং অমসুং তম্বীরমশিং অদুগী মশক অমনি।

মরুপশিং,

ভারত অসি মালেমগী থাক্তা অনৌবা কেতালাইজর অমা ওইনা থোক্লক্লি, অমসুং মসিগী ইথিল অসি সেক্তর খুদিংমক্তা ফাওরগনি। মালেমগী চাউখৎপা খোংজেল য়াঙখৎহনবদা, মালেমগী শান্তি পুরকপদা, ক্লাইমেৎ এক্সন খোংজেল য়াঙখৎহনবদা, মালেমগী হৈশিংবগী অৱাৎপা কোকহনবদা, ইন্নোভেসন পুরকপদা অমসুং মালেমগী সপ্লাই চেন লেংদনা থম্বদা ভারতকী থৌদাং অসি য়াম্না মরু ওইগনি।

মরুপশিং,

ভারতকীদমক্তদি, শক্তি অমসুং তৌবা ঙম্বগী খুদমদি "জ্ঞানাযদনাযচরক্ষণায"নি, হায়বদি লৌশিং অসি শরুক য়ামিন্নবগীদমক্তনি, শেল-থুম অসি য়েংশিনবগীদমক্তনি, অমসুং শক্তি অসি ঙাক-শেনবগীদমক্তনি। মরম অদুনা, ভারতকী প্রাইওরিতী অসি মাগী দোমিনেন্স থম্বা নত্তে অদুবু মাগী ইথিল হেনগৎহনবনি। ঐখোয়না মৈনা চাকপা অদুগুম্না নত্তে; ঐখোয়না মঙাল পীরিবা নুমিৎকী মঙালগুম্না ওই। ঐখোয়না মালেম অসিবু নিংথৌ ওইহন্নবা হোৎনদে অদুবু মালেম অসিবু চাউখৎহন্নবা হোৎনৈ। য়োগ প্রমোৎ তৌবা, সুপরফুদ মিলেতশিং শৌগৎপা, নৎত্রগা মিসন লাইফ ই ভিজন (লাইফস্তাইল ফোর এনভাইরনমেন্ত) শৌগৎপা ওইরো, ভারতনা GDP সেন্ত্রিক গ্রোথকা লোয়ননা হ্যুমেন সেন্ত্রিক গ্রোথতা মীৎয়েং থম্লি। ঐহাক্না অদোম পুম্নমকপু মিসন লাইফপু মফম অসিদা য়ারিবমখৈ প্রমোৎ তৌনবা হায়জরি। ঐখোয়গী পুন্সি মহিংদা অপীকপা অহোংবা কয়া অমা পীরবদি অকোয়বগী ফিভমদা অচৌবা শাফু অমা পীবা ঙম্মী।

ভারত্তা খোঙজং অমা চঙশিল্লক্লিবা অসিগী মতাংদা অদোম্না খংলম্বা য়াই, অমসুং অদোমগী মরক্তগী খরদি শরুক য়ারম্বা য়াই। লৈবাক শীনবা থুংনা, মীয়াম্না মখোয়গী মমাশিংবু ইকায় খুম্নবা উৎনবা (এক পের মা কে নাম) পাম্বী অমা থারি। করিগুম্বা অদোমগী ইমা অদু হিংলবদি, মহাক্কা লোয়ননা পাম্বী অমা থাবীয়ু। করিগুম্বা মহাক ঐখোয়গী মরক্তা লৈখিদ্রবদি, মহাকপু নিংশিংবগীদমক উ পাম্বী অমা থাবীয়ু - নহাক্না মহাক্কী ফোতো অমগা লোয়ননা উ পাম্বী অমা থাবীয়ু। মসিগী খোঙজং অসি ভারতকী মফম খুদিংমক্তা চত্থরি, অমসুং ঐহাক্না অদোম পুম্নমকপু মফম অসিদা অসিগুম্বা খোঙজং অমা হৌদোকপীনবা পুক্নিং থৌগৎলি। মসিনা ঐখোয়দা পুন্সি পীরম্বা মমাশিংবু ইকায় খুম্নবা উৎপতা নত্তনা ঐখোয়গী পৃথিবী ইমা অসিবুসু ইকায় খুম্নবা উৎলগনি।

মরুপশিং,

ঙসি ভারতনা অচৌবা মঙলানশিং উরি অমসুং মঙলানশিং অদু পুক্নিং চিংশিন্দুনা ঙাক্না চৎলি। নুমিৎ খরনিগী মমাংদা পেরিস ওলিম্পিক্স লোইশিনখ্রে, অমসুং মথংগী হোস্ত অসি USA ওইগনি। অথুবা মতমদা, ভারত্তা ওলিম্পিক্স পাংথোকপা অসিসু অদোম্না উবা ফংলগনি। ঐখোয়না 2036কী ওলিম্পিক্স পাংথোক্নবা হোৎনরি। শান্ন-খোৎনবদা ওইরো, ললোন-ইতিক্তা ওইরো ভারত অসি মালেম পুম্বগী পুক্নিং চিংশিনবগী মফম অমা ওইরক্লি। ঙসিদি, IPLকুম্বা ভারতকী লীগশিং অসি মালেমগী মকোক থোংবা লীগশিংগী মরক্তা লৈরে, অমসুং ভারতকী ফিল্মশিং অসি মালেমগী থাক্তা থোইদোক হেন্দোকপা অমা ওইরে। ভারত অসি মালেমগী তুরিজমদসু চাউখৎলক্লি। তোঙান তোঙানবা লৈবাকশিংদা ভারতকী কুমহৈশিং পাংথোকপদা অপেনবা হেনগৎলক্লি। মফম খুদিংমক্কী শহরশিংদা লৈরিবা মীওইশিংনা হৌজিক নবরাত্রিগীদমক গর্বা তম্নবা হোৎনরি হায়বসি ঐহাক্না উবা ফংলি। মসিনা ভারতকীদমক মখোয়গী নুংশিবা অদু উৎলি।

মরুপশিং,

ঙসিদি, লৈবাক খুদিংমক্না ভারতকী মরমদা হেন্না খঙবা পাম্লি। অদোমদা নুংঙাইবা ফাওগদবা করিগুম্বা অমা ঐহাক্না ফোঙদোকচরি। ঙরাংখক্তদা, অমেরিকানা ভারততগী পুখিবা চহি 1500দগী 2000 ফাওবগী মমাংগী অরিবা ইন্সক্রিপ্সন অমসুং মীতম 300 ভারততা হল্লকখি। হৌজিক ফাওবদা, য়ুনাইতেদ স্তেৎসনা অসিগুম্বা আর্তিফেক্ত 500 রোম ভারততা হল্লকখ্রে। মসি পোৎলম খরা হল্লকপদা নত্তে, মসি চহি লিশিং কয়াগী মমাংদগী লৈরক্লবা ঐখোয়গী হেরিতেজ অদুদা ইকায় খুম্নবা অমনি। মসি ভারত অমসুং অদোম পুম্নমক্কীদমক চাউথোকচনীংঙাই ওইবা ৱাফম অমনি। ঐহাক্না US লৈঙাক্কী থৌওং অসিগীদমক্তা থাগৎচরি।

মরুপশিং,

ভারত অমসুং য়ুনাইতেদ স্তেৎসকী মরক্তা লৈরিবা পার্তনরশিপ অসি নোংম-নোংমগী হেন্না মপাঙ্গল কনখৎলক্লি। ঐখোয়গী কোলাবোরেসন অসি মালেমগী কান্নবনি। ঐখোয়না সেক্তর খুদিংমক্তা তেংবাং পীনবা হেনগৎহল্লি, অমসুং অদোমগী খুদোংচাবসু খন্নরে। হৌখিবা চহিদা, ঐহাক্না ঐখোয়গী সরকারনা সিএত্তলদা অনৌবা কন্সুলেত অমা হাংদোক্কনি হায়না লাউথোকখি, মসি হৌজিক থবক হৌরে। ঐহাক্না অতোপ্পা কন্সুলেত অনি হাংদোক্নবগীদমক্তা অদোমগী ৱাখল্লোনশিংসু খন্নখি অমসুং অদোমগী ফীদবেক্কি মতুং ইন্না ভারতনা বোস্তন অমসুং লোস এঞ্জেলিসতা অনৌবা কন্সুলেত অনি হাংদোক্নবা ৱারেপ লৌরে হায়না ঐহাক্না অদোমদা খঙহনবদা নুংঙাইবা ফাওই।

ঐহাক্না হস্তন য়ুনিভর্সিতীদা তমিল স্তদিজকী থিরুভল্লুভর চেয়র লিংখৎপগী ৱাফমসু ফোঙদোকপদা নুংঙাইবা ফাওই। মসিনা তমিলগী মমিং লৈরবা সন্ত, থিরুভল্লুবরগী ফিলোসোফিবু মালেমদা শন্দোকপদা মতেং পাংগনি।

মরুপশিং,

অদোমগী থৌরম অসি তশেংনা শিংথানীংঙাই ওই। মফম অসিদা পাংথোকখিবা কলচরেল প্রোগ্রাম অসি য়াম্না ফজৈ। মীওই লিশিং কয়ানা থৌরম অসিদা শরুক য়াবা পাম্মি হায়না ঐঙোন্দা খংহল্লকখি, অদুবু মফম অসি য়াম্না পিকপা মরম্না শরুক য়াবা ঙমখিদ্রে। ঙসি ঐহাক্না থেংনবা ঙমদবশিংগী মফমদা ঐহাক্না নুংঙাইতবা ফোংদোকচরি। অদোম পুম্নমকপু মথংগী ওইনা, অতোপ্পা মফম অমদা, অতোপ্পা নুমিত্তা উনরসি। অদুম ওইনমক, ঐহাক্না থাজৈ মদুদি থৌনা অদু অদুমক লৈগনি, অমসুং পুক্নিং হন্থরোই। অদোম পুম্নমক্না হকচাং ফনা লৈবিয়ু অমসুং চাউখৎপা ওইরসনু, অমসুং ভারত-USকী মরুপ ওইবগী মরীবু মখা তানা মপাঙ্গল কনখৎহনবা ওইরসনু। য়াইফ-পাউজেলশিং অসিগা লোয়ননা, ঐহাক্না ময়াম পুম্নমকপু থাগৎচরি!

ঐহাক্কা লোয়ননা হায়বীয়ু:

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

হন্না হন্না থাগৎচরি।

খংহনজবা: মসি প্রধান মন্ত্রীগী ৱা ঙাংখিবগী চাউরাকপা ৱহন্থোক্নি। অশেংবা ৱারোল অসি হিন্দীদা পীখি।

*****