ভারত মাতা কি জয় !

ভারত মাতা কি জয় !

অমরাবতি অমসুং ৱার্ধাগী য়াওনা মহারাস্ত্রাগী মীয়ামগী মফমদা য়াইফ-পাউজেল পীজরি!

নুমিৎ নীনিগী মমাঙদা ঐখোয়না বিশ্বকর্মা পুজা পাংথোকখ্রে। ঙসি, ৱার্ধাগী শেংলবা লমদমদা, ঐখোয়না পি.এম বিশ্বকর্মা য়োজনা মাইপাকপগী থৌরম পাংথোক্লি। ১৯৩২ গী নুমিৎ অসিদা শোক্নবা য়াদবগী মায়োক্তা মহাত্মা গান্ধীনা মহাক্কী খোঙজং হৌখিবনা মরম ওইদুনা ঙসি অসি অখন্নবা নুমিৎ অমনি। বিনোবা ভাবে জিগী সাধনাগী মফম, মহাত্মা গান্ধীগী কর্মাভুমি, চাউখৎলবা ভারত অমগী ঐখোয়গী ৱাশকশিংদা অনৌবা থৌনা অমা পীরিবা, মাইপাকপা অমসুং ইথিলগী ইতিলফম ওইরিবা, ৱার্ধাগী লমদম অসিদা, অসিগুম্বা মওং অমদা, পি.এম বিশ্বকর্মা য়োজনা চহি অমা মপুংফারকপগী থৌরম পাংথোক্লি। বিশ্বকর্মা য়োজনাগী মখাদা, স্কিল দিবলপমেন্ত অমসুং থবক কন্না শুদুনা অফবা তুংলমচৎ অমা শেমগৎনবা সরকারনা ৱারেপ লৌরে অমসুং মসি থবক ওইনা পাংথোকপদা মহাত্মা গান্ধীগী ফিদমশিংনা পাম্বৈ অমা ওইরগনি। পি.এম বিশ্বকর্মা য়োজনাগা মরী লৈনবা মীওই খুদিংমক ঙসিগী থৌরম অসিদা থাগৎপা ফোঙদোকচরি।

মরুপশিং,

ঙসি অমরাবতিদা পি.এম মিত্রা পার্ক শানবা উরেপ-উয়ুংশু তম্লে। লৈবাক অসিগী তেক্সতাইল ইন্দস্ত্রি মালেমগী কৈথেলদা মকোক থোংনবা ঙসিগী ভারতনা থবক পায়খৎলি। চহি লিশিং কয়া মপান ফনা লৈরম্বা ভারতকী তেক্সতাইল সেক্তর অমুক হিঙ্গৎহনবা হায়বসি লৈবাক অসিগী পান্দমনি। অমরাবতিগী পি.এম মিত্রা পার্ক অসি মাইকৈ অসিদা থাংজিনবা অতোপ্পা অচৌবা খোঙথাং অমনি। মসিগী মাইপাকপা অসিগীদমক ঐনা মীয়াম পুম্নমক য়াইফ-পাউজেল পীজরি।

মরুপশিং,

বিশ্বকর্মা য়োজনা অসি শুপ্নগী সরকারগী থৌরম অমা খক নত্তবদগী, বিশ্বকর্মা য়োজনাগী অহানবা মপোক কুমওন পাংথোক্নবা ঐখোয়না মহারাস্ত্রা খনখিবনি, ঐখোয়না শেংলবা ৱার্ধা খনখিবনি। চাউখৎলবা ভারত অমগীদমক চহি লিশিং কয়া কুইরবা ভারতকী লৌশিং শীজিন্ননবা লম্বী অমা শেম্নবা মসিনা থৌরাং তৌরি। পুৱারিদা ভারতনা নুংঙাই-য়াইফনা পানখিবগী পন্দুব কয়া ঐখোয়না থেংনখ্রে। মসিগী নুংঙাই-য়াইফবা অসি করিদগী ওইখিবনো? মসি ঐখোয়গী মমাংঙৈগী লৌশিং কয়া অদুনা ওইহনখিবনি। মতম অদুদা, ঐখোয়গী ক্রাফ লৈখি, ঐখোয়গী ইঞ্জিনিয়ারিং লৈখি, ঐখোয়গী সাইন্স লৈখি। ঐখোয় মালেমদা খ্বাইদগী চাউবা ফিরোল পুথোকপা লৈবাক ওইখি। ঐখোয়গী ধাতুগী থবকশিং মালেমদা লাম্বা লৈরমদে। চফু শাবদগী হৌরগা য়ুম-কৈ শানবা দিজাইন তৌবদা ঐখোয়গী লাম্বা লৈরমদে। মসিগী লৌশিং অসি য়ুম অমদগী য়ুম অমদা কনানা য়ৌহনখিবগে?  উশুবশিং, য়োৎশুবশিং, সনাশাবশিং, চফুশাবশিং, খোঙউপশাবশিং, চেকশুবশিং অমসুং অসিগুম্বা শীনফমশিংগী মীওইশিংনা ভারত নুংঙাই-য়াইফবগী য়ুম্ফমনি অমসুং মসিগী লৌশিং অমসুং সাইন্স অসি য়ুমথোং খুদিংদা য়ৌহনখি। লোয়লম লৈঙাক মনুংদা, মসিগী অরিবা লৌশিং কয়া অসি মুৎথৎনবা বৃতিসমচাশিংনা কয়ারক লৌতুনখি। মরম অদুনা গান্ধীজিনা ৱার্ধাদগী খুঙ্গংগী উদ্যোগ অসি য়োকখৎলকপনি।

মরুপশিং,

অদুবু নিংতম্লবা মতুংগী সরকারশিংনা মসিগী খুৎ-শা হৈবগী লৌশিং অসি ইকায়খুম্নবীদবা অসি লৈবাক অসিগী ওইনা লাইবক থিবনি। মমাঙগী সরকারশিংনা বিশ্বকর্মা খুন্নাই মীরাইখি। ঐখোয়না মসিগী লৌশিং কয়া অসি মীরাইবা অমসুং বিশ্বকর্মা কাংলুপ অসি মীরাইবদগী, চাউখৎপগী লমদা ভারত মনিংদা লৈহৌখি।

নিংতম্লবা চহি ৭০ গী মতুংদা, মসিগী খুৎ-শা হৈবগী লৌশিং অসি অমুক হিঙ্গৎহন্নবা ঐখোয়গী সরকারনা ৱারেপ লৌরে। ৱাশক অসি থবক ওইনা পাংথোক্নবা পি.এম বিশ্বকর্মা কৌবা য়োজনা অমা ঐখোয়না হৌদোক্লে। বিশ্বকর্মা য়োজনাগী মরুওইবা পান্দমদি- ইকায়খুম্নবা, শক্তি পীবা অমসুং নুংঙাই-য়াইফবনি। মসিনা মমাংঙৈগী খুৎ-শা হৈবগী লৌশিং কয়া ইকায়খুম্নগনি। খুৎহৈবশিংগী ফিবম ফগৎহনগনি। অমসুং বিশ্বকর্মা ইচিন-ইনাওশিং নুংঙাইনা হিংহনবা হায়বসি ঐখোয়গী পান্দমনি।

মরুপশিং,

বিশ্বকর্মা য়োজনাগী অতোপ্পা শক্তম অমনা মমাঙদা অমুক্তা ওইখিদ্রিবা মওং অমদা তোঙান-তোঙানবা বিভাগশিং য়োজনা অসিদা শরুক য়াবা অসিনি। লৈবাক অসিগী জিলা ৭০০ হেনবা, লৈবাক অসিগী গ্রাম পঞ্চায়ত লাখ ২.৫ হেন্না, লৈবাক অসিগী অর্বান লোকেল বোদি লিশিং ৫ হেন্না, ইহৌ অসি হেন্না য়াংশিন্নবা পুন্না থবক তৌমিন্নরে। চহি অসিদা য়োজনা অসিদা তোঙান-তোঙানবা শীনফমশিংগী মীওই লাখ ২০ হেন্না শরুক য়ারে। চহি অমা খক্তদা খুৎহৈবা অমসুং ক্রাফমেন লাখ ৮ হেন্না স্কিল ত্রেনিং অমসুং স্কিল হেনগৎহন্নবগী ত্রেনিং ফংখ্রে। মহারাস্ত্রা খক্তদা মীওই লিশিং ৬০ হেন্না ত্রেনিং ফংখ্রে। ত্রেনিং অসিদা, খুৎহৈবশিংদা অনৌবা তেক্নোলোজিশিং, মতমগী অনৌবা মেছিনশিং অমসুং দিজিতেলগী খুৎলায়শিংগী মরমদা তাকপীরে। হৌজিক ফাওবদা বিশ্বকর্মা ইচিন-ইনাও লাখ ৬.৫ হেনবদা অনৌবা খুৎলায়শিং য়েন্থোকখ্রে। মসিগী মখোয়গী পোৎথোকশিংগী মগুন হেনগৎহল্লে অমসুং মখোয়গী পোৎথোক হেনগৎলে। মসি খক নত্তনা, বেনিফিসরি খুদিংমক, লুপা লিশিং ১৫গী ই-ভোচর অমা পীরে। মখোয়গী ললোন-ইতিক্কী থবক পাকথোক-চাউথোক্নবা গরেন্তি য়াওদনা লুপা লাখ ৩ ফাওবগী লোন পীরে। চহি অমগী মনুংদা বিশ্বকর্মা ইনাওশিং অমসুং ইচলশিংদা লুপা করোর ১৪০০গী লোন পীখিবদা ঐ হরাওই। বিশ্বকর্মা য়োজনানা হিরম খুদিংমক্তা খুদোংচাবা পীরে। মরম অদুনা, য়োজনা অসি মাইপাকপনি অমসুং মসি মীয়াম্না পাম্নবনি। হৌজিক ঐনা ঐখোয়গী জিতন রাম মনঝি জি একজিবিসনগী মরমদা ফোঙদোকচরি। ঐ একজিবিসন অদু য়েংবা চৎখি। মফম অদুদা মীয়াম্না অঙকপা ফংলবা মমাংঙৈগী থবকশিং পাংথোকপা অদু ঐ উখি। মখোয়না অনৌবা তেক্নোলোজিগী খুৎলায়শিং ফংলবা, ত্রেনিং ফংলবনা, মখোয়গী থবক পাকথোক-চাউথোক্নবা শেন্থং ফংলবদি, মখোয়না কয়া য়াম্না চাউনা থবক তৌগদগে হায়বা ঐ খঙই। হায়রিবা একজিবিসন অসি য়েংনবা ঐনা অদোমগী মফমদা হায়জরি। অচৌবা অওনবা অমা লাকপদা অদোম কয়াগী মতিক চাউথোকচগনি।

মরুপশিং,

মমাংঙৈগী খুৎ-শা হৈবগী লৌশিং কয়াদা এস.সি. এস.তি অমসুং ও.বি.সি কাংলুপকী মীওইশিং মশিং য়াম্না শরুক য়ারি। করিগুম্বা মমাংগী সরকারশিংনা বিশ্বকর্মা ইচিন-ইনাওশিংগী য়াইনবা থবক পায়খৎলম্লবদি, মদুনা খুন্নাই অসিদা অচৌবা থবক অমা ওইগনি। অদুবু, কংগ্রেস অমসুং মসিগী মরুপশিংনা অতম্ননা এস.সি, এস.তি অমসুং ও.বি.সি চাউখৎহনখিদে। দলিতগী মায়োক্তা লৈবা, তোল্লবশিংগী মায়োক্তা লৈবা কংগ্রেসকী ৱাখল্লোন লৈঙাক অসিদগী ঐখোয়না মুৎথৎলে। হৌখিবা চহিগী মশিং য়েংনবদা ঙসিদি এস.তি. এস.সি অমসুং ও.বি.সি কাংলুপশিংনা বিশ্বকর্মা য়োজনাগী কান্নবা খ্বাইদগী য়াম্না লৌরে। হায়রিবা মমাংঙৈগী থবকশিং অসি খুৎহৈবা বিশ্বকর্মাশিংনা পাংথোক্লি।  হায়রিবা খুৎহৈবশিং অসি ওন্ত্রেপ্রেনিউয়রশিং, ললোনবশিং ওইরকপা ঐনা পাম্মী, মসিগীদমক বিশ্বকর্মা ইনাওশিং অমসুং ইচলশিংগী থবক অসি ঐখোয়না এম.এস.এম.ইগী থাক্তা পুখৎলে। জিলা অমসুং পোৎথোক অমা অমসুং এক্তা মোলগুম্বা থবকশিংগী খুৎথাংদা মমাংঙৈগী পোৎথোকশিং য়োল্লে। ঐখোয়গী পান্দমদি হায়রিবা মীওইশিং অসিগী ললোন-ইতিক্কী থবকশিং চাউখৎহনবনি। হায়রিবা মীওইশিং অসি অচৌবা কম্পেনিশিংগী সপ্লাই চেনগী শরুক অমা ওইহনবনি।

মরুপশিং,

ও.এন.দি.সি অমসুং জি.ই.এমগী মখাদা মখোয়গী ললোন-ইতিকশিং চাউখৎনবা খুৎহৈবশিং অমসুং অপীকপা ললোন-ইতিকশিং মতেং পাংনবা ঐখোয়না লম্বীশিং শেমগৎলে। শেন-থুম চাউখৎপগী লমদা তুংদা লৈহৌরবা কাংলুপ অসিনা মালেমদা অহুমশুবা খ্বাইদগী চাউবা ইকোনোমি অমা ওইহন্নবা হোৎনবা অচৌবা থৌদাং লৌরগনি। মসিদা সরকারগী স্কিল ইন্দিয়া মিসন্না শক্তি পীরি। স্কিল দিবলপমেন্ত মিসনগী মখাদা লৈবাক অসিগী নহারোল করোর কয়াদা ঙসিগী দরকার ওইবা স্কিল ত্রেনিং পীরে। ভারতকী স্কিলশিং মালেমদা খঙহন্নবা স্কিল ইন্দিয়াগুম্বা কেম্পেনশিং হৌদোকখিবনি। ঐখোয়গী সরকার শেম্লবা মতুংদা, ঐখোয়না স্কিল মিনিস্ত্রিগী তোখাইবা মিনিস্ত্রি অমা লিংখৎলে অমসুং ঙসি ঐখোয়গী মরুপ জেন চৌধুরিনা স্কিল মিনিস্ত্রিগী থবকশিং য়েংশিল্লে। মহাক্কী লমজিং মখাদা চহি অসিদা, ফ্রান্সতা ৱার্ল্দ স্কিলগী অচৌবা থৌরম অমা পাংথোকখ্রে। ঐখোয়না ওলেম্পিক্সগী মরমদা ৱারি কয়া শান্নরে। অদুবু ফ্রান্সতা অচৌবা থৌরম অমা পাংথোকখ্রে। মদুদা ঐখোয়গী লায়রবা খুৎহৈবশিং অমসুং মখোয়গী স্কিলশিংগা লোয়ননা থাখি। থৌরম অদুদা ভারতনা মনা কয়া ফংলকখি। মসি ঐখোয় খুদিংমক চাউথোকচনবগী থবক অমনি।

মরুপশিং,

তেক্সতাইল ইন্দস্ত্রি অসি মহারাস্ত্রাদা ইন্দস্ত্রিগী খুদোংচাবা য়াম্না লৈবা অমনি। বিদরভা লমদম অসি অফবা মখলগী লশিং পুথোক্নবগী অচৌবা মরুওইবা মফম অমনি। অদুবু চহি কয়া কংগ্রেস অমসুং মহা-অঘাদি সরকারনা করি তৌদুনা লৈবগে? লশিং পুথোকপনা মহারাস্ত্রাগী লৌমীশিংগী ফিবম ফগৎহনবগী মহুত্তা, মখোয়না হায়রিবা লৌমীশিং অদু লায়রনা হিংহনখি। মীওইশিং অসিনা লৌমীশিংগী মিংদা রাজনিতি তৌখি অমসুং শেঞ্জা-থুমজা চৎথখি। ২০১৪ দা দেবেন্দ্র ফদনাবিসগী সরকার লাকপদগী লৌমীশিংনা থেংনরিবা খুদোংচাদবশিং কোকহনখি। অমরাবতিগী নন্দগাউন খান্দেশ্বরদা তেক্সতাইল পার্ক লিংখৎখি। মতম অদুদা মফম অদু করি ওইরমখি? মফম অদুদা উদ্যোগ অমতা লাকউ হায়বা য়াখিদে। অদুবু, হৌজিক হায়রিবা মফম অদু মহারাস্ত্রাগী  উদ্যোগকী অচৌবা মফম অমা ওইরে।

মরুপশিং,

ঙসি পি.এম মিত্রা পার্কতা উরিবা থবক্কী খোঙজেল অসিনা দবল ইঞ্জিন সরকার অমগী থৌনা অদু উৎলে। ঐখোয়না মসিগা চপ মান্নবা পি.এম মিত্রা পার্ক ৭ লৈবাক শীনবা থুংনা লিংখৎলে। ঐখোয়গী পান্দমদি-লৌবুক্তগী লশিং , লশিংদগী ফি, ফিদগী ফেসন অমসুং ফেসন্দগী ফোরন য়ৌবা হায়বদি মফম অসিদা ফংলবা বিদরভা লশিংদগী অফবা মখলগী ফি পুথোকপা হায়বনি। মসিগী পুথোকপা ফি অসিদগী ফেসনগা লোয়ননা ফিরোল কয়া পুথোক্কনি। অমসুং মসিগী ফেসন অদু মপান লৈবাকশিংদা থাদোক্কনি। মসিনা লৌমীশিং পোৎথোক পুথোকপদা শেন মাঙবদগী কনবা ঙমগনি। লৌমীশিংনা মখোয়গী পোৎথোকশিংগী চুনবা মমল ফংগনি, মসিদা অহেনবা মগুন হাপচিনগনি। পি.এম মিত্রা পার্কতগী মফম অসিদা লুপা করোর লিশিং ৮-১০ ফাওবা থাদরবা য়ারি। মসিনা মহারাস্ত্রা অমসুং বিদরভাগী নহারোল লাখ ১ হেনবদা অনৌবা থবকশিং ফংনবা খুদোংচাবশিং পীগনি। লমদম অসিদা অতোপ্পা উদ্যোগশিংশু চাউখৎকনি। অনৌবা সপ্লাই চেনশিং শেমগৎকনি। লৈবাক অসিনা মপান্দা থাদোকপা হেনগৎকনি অমসুং শেন্থোক হেনগৎকনি।

মরুপশিং,

মসিগী উদ্যোগকী চাউখৎ-থৌরাং অসিগী দরকার ওইবা অনৌবা মতমগী ইনফ্রাস্ত্রকচর অমসুং লম্বী-থোং শেমগৎনবা মহারাস্ত্রানা থৌরাং তৌরে। অনৌবা হায়ৱেশিং, এক্সপ্রেসৱেশিং, সমরিদ্ধি হায়ৱেশিংগা লোয়ননা অমসুং ঈশিং লম্বী অমসুং নোংথক্কী লম্বী পাংথোক-চাউথোকহন্দুনা, উদ্যোগকী অনৌবা অওনবা অমা পুরক্নবা মহারাস্ত্রানা থৌরাং তৌরে।

মরুপশিং,

ঐনা থাজৈ, করিগুম্বা মহারাস্ত্রা হিরম খুদিংমক্তা চাউখৎনবা অহানবা হিরো অমা লৈরবদি, মদু রাজ্য অসিগী লৌমীশিং ওইগনি। মহারাস্ত্রা অমসুং বিদরভাগী লৌমীশিং হরাওরবা মতমদা, লৈবাক অসিশু হরাওগনি। মরম অদুনা, লৌমীশিংগী য়াইফনবা ঐখোয়গী দবল ইঞ্জিন সরকারনা পুন্না থবক তৌমিন্নরি। পি.এম কিষান সাম্মান নিধিগী মখাদা, লৌমীশিংদা কেন্দ্র সরকারনা লুপা লিশিং ৬ পীরি, মহারাস্ত্রা সরকারনা মসিগী মথক্তা লুপা লিশিং ৬ হাপচিল্লি। হৌজিক মহারাস্ত্রাগী লৌমীশিংনা চহি অমদা লুপা লিশিং ১২ ফংলে। হৌজিক লৌমীশিংনা মহৈ-মরোং মাঙখিবদা শেন তিংলরোই, ঐখোয়না লুপা ১ দা ক্রোপ ইন্সুরেন্সগী খুদোংচাবা ফংহনবা হৌরে। মহারাস্ত্রাগী একনাথ সিন্দে জিগী সরকারনা লৌমীশিংগী ইলেক্ত্রিসিতিগী বিল জিরোদা হন্থহল্লে। লমদম অসিদা ইথৈ ফংদবগী অৱাবশিং কোকহন্নবা ঐখোয়গী সরকার লাকপদগী থবক কয়া পায়খৎলে। অদুবু ঐখোয়গী সরকারগী মরক্তা লাকপা সরকারশিংনা থবক খুদিংমক তপথহল্লে। হন্দক্কী সরকার অসিনা ইথৈ-লৌখোংগা মরী লৈনবা প্রোজেকশিং অমুক হন্না য়াংনা পায়খৎলে। লুপা করোর লিশিং ৮৫ রোম চঙনা পায়খৎকদবা ৱাইনগঙ্গা-নলগঙ্গা রিভর লিঙ্কিং প্রোজেক ইকুই কুইদনা অয়াবা পীখ্রে। মসিনা জিলা ৬ হায়বদি নাগপুর, ৱার্ধা, অমরাবতি, য়াবতমাল, অকোলা অমসুং বুলধানাদা লম হেক্তর লাখ ১০ হেনবদা ইথৈ-লৌখোংগী খুদোংচাবা পীগনি।

মরুপশিং,

ঐখোয়গী মহারাস্ত্রাগী লৌমীশিংনা পাম্লিবশিং ঐখোয়গী সরকারনা ফংহল্লে। তিলহৌগী এক্সপোর্ত তেক্স চাদা ৪০দগী চাদা ২০ দা হন্থরে। ঐখোয়না মপান্দগী অচাথাউ পুশিল্লকপদা তেক্স চাদা ২০ লৌরে। নুঙহৱাইগী থাউ, নুমিৎলৈগী থাউ অমসুং প্লাম ওইলদা লৌবা কস্তমস দ্যুতি চাদা ১২.৫ ওইরম্বদগী চাদা ৩২.৫ তা হেনগৎলে। মসিনা ঐখোয়গী নুঙহৱাই থাবা লৌমীশিংদা কান্নবা পীগনি। ঐখোয়না অথুবা মতমদা হায়রিবা থবকশিং অসিগী ফল উবা ফংলগনি। অদুবু, ঐখোয়না মসি য়াম্না চেকশিনবা অমগা লোয়ননা পায়খৎকদবনি। কংগ্রেস দল অমসুং মসিগী মরুপশিংনা লৌমীশিং ফিবম অসি ওইহনখিবনি, লৌমীশিং মাঙহনখিবনি, লৌমীশিংদা মখোয়না অতোপ্পা খুদোংচাবা অমা পীখিদে। মরমদি, কংগ্রেস হায়বদি পোৎশক অমা খক্তনি-ওইদবা, নামথাক অমসুং পুকচেল শেংদবা। মীখল মতমদা তেলঙ্গানাদা লৌমীশিংগী লোনশিং কোক্কনি হায়না দল অসিনা ৱাশকখি। অদুবু মখোয়গী সরকার লাক্লবা মতমদা, লোন কোকপীনবা লৌমীশিং কোইচেন চেন্নখি। লৌমীশিংনা হায়বা কনা অমতনা তাবীখিদে। মহারাস্ত্রাদা, ঐখোয়না অসিগুম্বা নমথাক তৌবা অসি লৈহল্লোইদবনি।

মরুপশিং,

ঙসি ঐখোয়না উরিবা কংগ্রেস অসি মহাত্মা গান্ধীগুম্বা অচৌবা মীওইশিংগী কংগ্রেস অদু নত্তে। ঙসিগী কংগ্রেসতা মরৈবাক নুংশিবগী ৱাখল চেন্দ্রে। ঙসিগী কংগ্রেসতা মীবু তাথি-তাওইনা তৌবগী ভুৎ চঙলে। কংগ্রেসকী ৱারোল, মপান লৈবাক্তা মখোয়না লৈবাক্কী মায়োক্তা চৎথিরবা খোঙজং, খুন্নাই কাইনবা হোৎনবা, লৈবাক থুগায়নবা ৱা ঙাংলিবা অসি ঙসি মীয়াম্না উরে অমসুং তারে। দল অসিদা সহরগী নেক্সালশিং থবক তৌরি। ঙসি লৈবাক অসিদা খ্বাইদগী মপুকচেল শেংদবা অমসুং খ্বাইদগী শেঞ্জা-থুমজা তৌবা দল কংগ্রেস দলনি। লৈবাক অসিদা খ্বাইদগী শেঞ্জা-থুমজা তৌবা ইমুং অসি কংগ্রেসকী ইমুংনি।

মরুপশিং,

ঐখোয়গী লাইনিং অমসুং চৎনবীদা থাজবা লৈবা দল অমতনা কৈদৌঙৈদা গনপতি পুজাদা য়েৎলোই। অদুবু ঙসিগী কংগ্রেসনা গনপতি পুজাদশু অপনবা পীরে। নিংতম ইহৌ মনুংদা লোকমন্যা তিলক্না লুচিংদুনা লৈবাক অসি অমতা ওইনা পুন্নবা গনপতি উৎসব পাংথোকপা মফম মহারাস্ত্রা ওইখি। খুন্নাই খুদিং, কাংলুপ খুদিংগী মীয়াম গনেস উৎসব পুন্না শরুক য়াখি। মরম অসিনা গনপতি পুজানা কংগ্রেস দল খোইদৌ শাওগৎহল্লিবনি। ঐনা গনেস পুজাগী থৌরম শরুক য়াবা চৎপা মতমদা, মতম অদুদা কংগ্রেসকী অপেনহনবগী ভুৎ মিকপ থোক্লকখি। কংগ্রসনা গনপতি পুজাগী মায়োক্তা লৈবা হৌরকখি। করিগুম্বা অমা হেক্তা পেনহন্নবা কংগ্রেসনা হোৎনরি। অদোম্না কর্নাতকাদা উরে, কংগ্রেস সরকারনা গনপতি বাপ্পা জেলদা থমখি। মীয়াম্না লাৎলিবা ভাগবান গনেসগী মীতম পুলিসকী ভেন্দা থমখি। মহারাস্ত্রাদা ভাগবান গনেস লাৎখি অমসুং কর্নাতকাদা ভাগবান গনেসকী মীতম পুলিসকী ভেন্দা ফাজিনখি।

মরুপশিং,

ভাগবান গনেস ইকায়বা পীবা অসিদা লৈবাক শীনবা থুংনা শাওনরে। থৌদোক অসিদা কংগ্রেসগা চৎমিন্নরিবা দলশিং তুমিন্না লৈশিনখিবা অসিদা ঐ অঙকপা ফাওই। মখোয় কংগ্রেসকী মখাদা লৈবদগী গনেস ইকায়বা পীরবা ফাওবদা থেংন্নবগী থৌনা মখোয়দা লৈত্রে।

মরুপশিং,

ঐখোয় অমতা ওইনা পুনগদবনি অমসুং কংগ্রেসকী পাপশিংগী পাউখুম পীগদবনি। ঐখোয় চৎনবী অমসুং চাউখৎপগীদমক লেপকদবনি। ঐখোয় ইকায়খুম্নবা উৎপা অমসুং চাউখৎ-থৌরাংগী পান্দমগা লোয়ননা লেপকদবনি। ঐখোয়না মহারাস্ত্রাগী মঙলানশিং মঙফাওনহনগদবনি। মসিগী থৌনা অসিগা লোয়ননা, মশিং য়াম্না শরুক য়াদুনা, মরুওইবা স্কিমশিং অসিগী শক্তি অদোম খঙলে। হায়রিবা স্কিমশিং অসিনা বিদরভাগী পুন্সিদা, ভারতকী মীচম মীয়ামগী পুন্সিদা পীবা কান্নবা, অদোম মশিং য়াম্না পুনবা অসিদা ঐ খঙলে। ঐনা অমুক হন্না বিদরভা অমসুং মহারাস্ত্রাগী ইনাওশিং অমসুং ইচলশিং অমুক হন্না থাগৎপা ফোঙদোকচরি।

ঐগা লোয়ননা হায়মিন্নসি

ভারত মাতা কি জয়

অদোমগী খুৎ অনিমক থাঙ্গৎলগা কন্না লাউমিন্নসি-

ভারত মাতা কি জয়

ভারত মাতা কি জয়

অদোম থাগৎচরি।

****