প্ৰধানমন্ত্ৰী শ্ৰী নৰেন্দ্ৰ মোদীৰ অধ্যক্ষতাত কেন্দ্ৰীয় কেবিনেটে ভেনাছ অৰ্বিটাৰ মিছন (VOM)ৰ বিকাশক অনুমোদন জনাইছে, যিটো চন্দ্ৰ আৰু মংগল গ্ৰহৰ বাহিৰত শুক্ৰ গ্ৰহৰ অন্বেষণ আৰু অধ্যয়নৰ চৰকাৰৰ দৃষ্টিভংগীৰ দিশত এক গুৰুত্বপূৰ্ণ পদক্ষেপ হ’ব। শুক্ৰ পৃথিৱীৰ আটাইতকৈ ওচৰৰ গ্ৰহ আৰু পৃথিৱীৰ দৰেই একে পৰিস্থিতিত গঠন হোৱা বুলি বিশ্বাস কৰা হয়, ই এই কথা বুজিবলৈ এক অনন্য সুযোগ প্ৰদান কৰে যে গ্ৰহবিলাকৰ বায়ুমণ্ডল কেনেকৈ একেবাৰে বেলেগ ধৰণে বিকশিত হ’ব পাৰে।

মহাকাশ বিভাগে সম্পূৰ্ণ কৰিবলগীয়া ‘ভেনাছ অৰ্বিটাৰ মিছন’ৰ জৰিয়তে শুক্ৰ গ্ৰহৰ চাৰিওফালে কক্ষপথত এখন বৈজ্ঞানিক মহাকাশযান স্থাপন কৰাৰ পৰিকল্পনা কৰা হৈছে, যাতে ভেনাছৰ পৃষ্ঠ আৰু উপপৃষ্ঠ, বায়ুমণ্ডলীয় প্ৰক্ৰিয়া আৰু শুক্ৰৰ বায়ুমণ্ডলত সূৰ্যৰ প্ৰভাৱৰ বিষয়ে ভালদৰে অধ্যয়ন কৰিব পৰা যায়। শুক্ৰ, যাৰ বিষয়ে ধাৰণা কৰা হয় যে ই এসময়ত বাসযোগ্য আছিল আৰু বহুলাংশে পৃথিৱীৰ সৈতে মিল আছিল, এনে অৱস্থাত শুক্ৰৰ পৰিৱৰ্তনৰ অন্তৰ্নিহিত কাৰণসমূহ অধ্যয়ন কৰাটো শুক্ৰ আৰু পৃথিৱী, দুয়োটা ভগ্নী গ্ৰহৰ বিৱৰ্তন বুজিবলৈ গুৰুত্বপূৰ্ণ হ’ব।

ইছৰো এই মহাকাশযানখনৰ বিকাশ আৰু উৎক্ষেপণৰ বাবে দায়বদ্ধ হ’ব। এই পৰিকল্পনাৰ পৰিচালনা আৰু নিৰীক্ষণ ইছৰোত প্ৰতিষ্ঠিত প্ৰচলিত পদ্ধতিৰ জৰিয়তে ফলপ্ৰসূভাৱে কৰা হ’ব। এই অভিযানৰ পৰা সৃষ্টি হোৱা তথ্যসমূহ বৰ্তমানৰ ব্যৱস্থাৰ জৰিয়তে বৈজ্ঞানিক সমাজলৈ প্ৰচাৰ কৰা হ’ব।

এই অভিযান ২০২৮ চনৰ মাৰ্চ মাহৰ ভিতৰত উপলব্ধ সুযোগত সম্পূৰ্ণ হোৱাৰ সম্ভাৱনা আছে। ভাৰতীয় শুক্ৰ অভিযানে কিছুমান অমীমাংসিত বৈজ্ঞানিক প্ৰশ্নৰ উত্তৰ দিয়াৰ সম্ভাৱনা আছে, যাৰ ফলত বিভিন্ন বৈজ্ঞানিক ফলাফল পোৱা যাব। বিভিন্ন উদ্যোগৰ জৰিয়তে মহাকাশযান আৰু উৎক্ষেপণ বাহন নিৰ্মাণ কৰা হৈছে আৰু ইয়াৰ দ্বাৰা বৃহৎ সংখ্যক কৰ্মসংস্থাপনৰ সুযোগ সৃষ্টি হোৱাৰ লগতে অৰ্থনীতিৰ অন্যান্য খণ্ডলৈও এই প্ৰযুক্তি বিয়পিব বুলি অনুমান কৰা হৈছে।

“ভেনাছ অৰ্বিটাৰ মিছন” (VOM)ৰ বাবে অনুমোদিত মুঠ ধন ১২৩৬ কোটি টকা, ইয়াৰে ৮২৪.০০ কোটি টকা মহাকাশযানখনৰ বাবে ব্যয় কৰা হ’ব। এই খৰচৰ ভিতৰত মহাকাশযানখনৰ বিকাশ আৰু অধিগ্ৰহণ, ইয়াৰ নিৰ্দিষ্ট পেলোড আৰু প্ৰযুক্তিগত উপাদানসমূহ, নেভিগেচন আৰু নেটৱৰ্কৰ বাবে বিশ্বব্যাপী গ্ৰাউণ্ড ষ্টেচন সমৰ্থনৰ খৰচ, আৰু উৎক্ষেপণ বাহনৰ খৰচ আদি অন্তৰ্ভুক্ত।

শুক্ৰলৈ যাত্ৰা

এই অভিযানে ভাৰতক বৃহত্তম পেলোড, অনুকূলিত কক্ষপথ সন্নিৱিষ্ট পদ্ধতিকে ধৰি ভৱিষ্যতে গ্ৰহ অভিযান সম্পন্ন কৰিবলৈ সক্ষম কৰিব। মহাকাশযান আৰু উৎক্ষেপণ যান নিৰ্মাণৰ সময়ত ভাৰতীয় উদ্যোগৰ যথেষ্ট অংশগ্ৰহণ থাকিব। প্ৰি-লঞ্চ পৰ্যায়ত – ডিজাইন, ডেভেলপমেণ্ট, পৰীক্ষণ, টেষ্ট ডেটা ৰিডাকচন, মানাংকন আদিকে ধৰি – বিভিন্ন শৈক্ষিক প্ৰতিষ্ঠানৰ অংশগ্ৰহণ আৰু ছাত্ৰ-ছাত্ৰীৰ প্ৰশিক্ষণৰ কথাও কল্পনা কৰা হৈছে। ইয়াৰ অনন্য যন্ত্ৰৰ জৰিয়তে এই মিছনে ভাৰতীয় বিজ্ঞান সম্প্ৰদায়ক নতুন আৰু গুৰুত্বপূৰ্ণ বিজ্ঞানৰ তথ্য প্ৰদান কৰে আৰু এইদৰে উদীয়মান আৰু উদ্ভাৱনীমূলক সুযোগ প্ৰদান কৰে।

**********

MJPS/BM/SKS