প্ৰধানমন্ত্ৰী শ্ৰী নৰেন্দ্ৰ মোদীয়ে আজি ছিংগাপুৰৰ বিনিয়োগ পুঁজি, আন্তঃগাঁথনি, নিৰ্মাণ, শক্তি, দীৰ্ঘস্থায়িত্ব আৰু লজিষ্টিককে ধৰি বিভিন্ন খণ্ডৰ আগশাৰীৰ চিইঅ’ৰ এটা দলৰ সৈতে মত বিনিময় কৰে। এই কাৰ্যসূচীত ছিংগাপুৰৰ উপ-প্ৰধানমন্ত্ৰী শ্ৰী গণ কিম ইয়ং আৰু গৃহ পৰিক্ৰমা আৰু আইন মন্ত্ৰী শ্ৰী কে শ্বানমুগামে অংশগ্ৰহণ কৰে।

ভাৰতত তেওঁলোকৰ ক্ৰমবৰ্ধমান বিনিয়োগৰ শলাগ লৈ, প্ৰধানমন্ত্ৰীয়ে ভাৰত আৰু ছিংগাপুৰৰ মাজত দ্বিপাক্ষিক সম্পৰ্ক সুদৃঢ় কৰাৰ লগতে অৰ্থনৈতিক সহযোগিতাৰ প্ৰসাৰৰ ক্ষেত্ৰত ছিংগাপুৰৰ ব্যৱসায়িক নেতাসকলে গ্ৰহণ কৰা ভূমিকাৰ কথা উল্লেখ কৰে। প্ৰধানমন্ত্ৰীয়ে ভাৰতৰ সৈতে তেওঁলোকৰ সহযোগিতা অধিক সুবিধাজনক কৰি তুলিবলৈ, ছিংগাপুৰত এটা ইনভেষ্ট ইণ্ডিয়া অফিচ স্থাপনৰ কথা ঘোষণা কৰে। প্ৰধানমন্ত্ৰীয়ে লগতে কয় যে ভাৰত-ছিংগাপুৰৰ সম্পৰ্কক এক ব্যাপক কৌশলগত অংশীদাৰিত্বলৈ ৰূপান্তৰিত কৰিলে দ্বিপাক্ষিক অৰ্থনৈতিক সম্পৰ্কত এক বৃহৎ উত্থান ঘটিব।

প্ৰধানমন্ত্ৰীয়ে কয় যে ভাৰতে বিগত দহ বছৰত পৰিৱৰ্তনশীল অগ্ৰগতি লাভ কৰিছে আৰু ৰাজনৈতিক স্থিতিশীলতা, নীতিৰ ভৱিষ্যদ্বাণীযোগ্যতা, ব্যৱসায় কৰাত সহজতা আৰু সংস্কাৰমুখী অৰ্থনৈতিক এজেণ্ডাত ভাৰতৰ শক্তিৰ প্ৰতি লক্ষ্য ৰাখি একে পথতে আগবাঢ়ি যাব। আগন্তুক কেইবছৰমানৰ ভিতৰত ভাৰত বিশ্বৰ তৃতীয় বৃহত্তম অৰ্থনীতি হিচাপে পৰিগণিত হ’বলৈ গৈ আছে। ভাৰতৰ আকৰ্ষণীয় বিকাশৰ কাহিনী, ইয়াৰ দক্ষ প্ৰতিভাৰ পুল আৰু সম্প্ৰসাৰিত বজাৰৰ সৈতে জড়িত অসংখ্য সুযোগৰ বিষয়ে আলোচনা কৰি, তেওঁ আলোকপাত কৰে যে ভাৰতে বিশ্ব অৰ্থনৈতিক বিকাশত ১৭ শতাংশ অৰিহণা যোগাইছে। প্ৰধানমন্ত্ৰীয়ে প্ৰডাকচন লিংকড ইনচেন্টিভ আঁচনি, ভাৰত অৰ্ধপৰিবাহী মিছন আৰু ১২খন নতুন উদ্যোগিক স্মাৰ্ট চিটি স্থাপনৰ দৰে কাৰ্যসূচীৰ জৰিয়তে বিশ্ব মূল্য শৃংখলত ভাৰতৰ অংশগ্ৰহণ বৃদ্ধিৰ বাবে বিভিন্ন পদক্ষেপৰ বিষয়ে আলোচনা কৰে। তেওঁ ব্যৱসায়িক নেতাসকলক দক্ষতা বিকাশৰ ক্ষেত্ৰত ভাৰতত থকা সুযোগসমূহ অন্বেষণ কৰিবলৈ আহ্বান জনায়। নমনীয় যোগান শৃংখলৰ সন্ধানত থকা ব্যৱসায়ীসকলৰ বাবে প্ৰধানমন্ত্ৰীয়ে কয় যে ভাৰতৰ নিজৰ শক্তিক বিবেচনা কৰি এয়াই সৰ্বোত্তম বিকল্প। প্ৰধানমন্ত্ৰীয়ে তেওঁৰ তৃতীয় কাৰ্যকালত আন্তঃগাঁথনি উন্নয়নৰ গতি আৰু পৰিসৰ বৃদ্ধি কৰিব বুলি আশ্বাস দিয়ে। তদুপৰি, ৰে’লৱে, পথ, বন্দৰ, অসামৰিক বিমান পৰিবহণ, ঔদ্যোগিক উদ্যান আৰু ডিজিটেল সংযোগৰ ক্ষেত্ৰত নতুন সুযোগৰ বিষয়ে মুখ্য কাৰ্যবাহী বিষয়াসকলক অৱগত কৰা হয়।

প্ৰধানমন্ত্ৰীয়ে ছিংগাপুৰৰ ব্যৱসায়িক নেতাসকলক ভাৰতত বিনিয়োগৰ সুযোগ বিচাৰি উলিয়াবলৈ আৰু দেশত নিজৰ উপস্থিতি বৃদ্ধি কৰিবলৈ আমন্ত্ৰণ জনায়।

ব্যৱসায়িক ঘূৰণীয়া মেজমেলত নিম্নোল্লিখিত ব্যৱসায়িক নেতাসকলে অংশগ্ৰহণ কৰে:

**********

MJPS/SR