ঙসি প্রধান মন্ত্রী শ্রী নরেন্দ্র মোদীনা ইনভেস্তমেন্ত ফন্দশিং, ইনফ্রাস্ত্রকচর, মেনুফেকচরিং, ইনর্জি, স্তেনেবিলিতি অমসুং লোজিস্তিক্স য়াওনা তোঙান-তোঙানবা হিরমশিংগী শিঙ্গাপুরগী সি.ই.ও কাংবু অমগা ৱারি শান্নখ্রে। থৌরম অদুদা শিঙ্গাপুরগী দিপুতি প্রাইম মিনিস্তর গান কিম য়োং অমসুং হোম এফেয়ার্স অমসুং লো মিনিস্তর কে সানমুগাম শরুক য়াখি।
 

মখোয়না ভারত্তা শেন থাদবদা থাগৎপা ফোঙদোক্লদুনা, লৈবাক অনিগী মরী ফগৎনবা অমসুং ভারত অমসুং শিঙ্গাপুরগী মরক্তা শেন-থুমগী মতেং পাংনবা হেনগৎহন্নবা শিঙ্গাপুরগী উদ্যোগকী লুচিংবশিংনা লৌরিবা থৌদাং প্রধান মন্ত্রীনা ইকায়খুম্নবা উৎখি। শিঙ্গাপুরদা ইনভেস্ত ইন্দিয়া ওফিস অমা হাংদোক্লগনি হায়না প্রধান মন্ত্রীনা লাউথোকখি। মহাক্না মখা তানা হায়খি ভারত-শিঙ্গাপুর মরীশিং কমপ্রেহেন্সিপ স্ত্রাতেজিক পার্তনরশিপ অমদা পুখৎলকপা অসিনা লৈবাক অনিগী শেন-থুমগী মরীশিংদা অচৌবা ইনোৎ অমা পীরগনি।
 

প্রধান মন্ত্রীনা হায়খি হৌখিবা চহি ১০ দা ভারত্তা অফবা অওনবা কয়া লাক্লে অমসুং মখা তানা অফবা অওনবা পুরকপা অসিনা লৈবাক অসিগী রাজনিতিগী তংদু-লৈতাবা, মাঙজৌননা খঙবা ঙম্বা থৌশিল, ললোন-ইতিক পাংথোকপা নুংঙাইহনবা অমসুং লৈবাক অসিগী শেন-থুমগী অওনবা পুরকপা ঙম্লে। মথং চহি খরদা ভারত মালেমদা অহুমশুবা খ্বাইদগী চাউবা ইকোনোমি ওইরগনি। লৈবাক অসিগী মশিং য়াম্লবা হৈথোই-শিংথোইবা মীওইশিং অমসুং পাক-চাউরবা কৈথেলশিং লৈবনা ভারত চাউখৎলকপনি অমসুং মালেমগী শেন-থুম চাউখৎলকপদা ভারতনা চাদা ১৭ মতেং পাংলি।

প্রধান মন্ত্রীনা হায়খি প্রদক্সন লিঙ্ক ইন্সেন্তিপ স্কিম, ইন্দিয়া সেমিকন্দক্তর মিসনগুম্বা থবকশিংগী মখাদা মালেমগী ভেলু চেনশিংদা ভারত শরুক য়াবা হেনগৎহন্নবা তোঙান-তোঙানবা মতেং পীরে অমসুং অনৌবা ইন্দস্ত্রিএল স্মার্দ সিতি ১২ লিংখৎলে। স্কিল দিবলপমেন্তগী লমদা ভারত্তা লৈরিবা খুদোংচাবশিং য়েংনবা মহাক্না ললোন-ইতিক্কী লুচিংবশিংদা খঙহনখি। খুদোংচাদবা মায়োক্নবা ঙম্বা সপ্লাই চেনশিংগী মতাংদা প্রধান মন্ত্রীনা হায়খি ভারত অসি খ্বাইদগী ফবা অতোপ্পা পাম্বৈ অমনি। মহাক্কী অহুমশুবা তার্মদা ভারত্তা ইনফ্রাস্ত্রকচর চাউখৎপগী খোঙজেল অমসুং পাক-চাউবা হেনগৎলগনি অমসুং রেলৱেজ, লম্বীশিং, হিথাংফমশিং, সিবিল এভিএসন, ইন্দস্ত্রিএল পার্কশিং অমসুং দিজিতেল কন্নেক্তিবিতিগী হিরমশিংদা অনৌবা খুদোংচাবশিং থিরকপগীদমক সি.ই.ওশিং থাগৎপা ফোঙদোকখি।

ভারত্তা শেন থাদনবা খুদোংচাবশিং য়েংনবা অমসুং লৈবাক অসিদা মখোয় শরুক য়াবা হেনগৎনবা প্রধান মন্ত্রীনা শিঙ্গাপুরগী ললোন-ইতিক্কী লুচিংবশিংদা চেবাউ পীখি।

ব্যুজিনেস রাউন্দতেবলদা মখাগী ললোন-ইতিক্কী লুচিংবশিং শরুক য়াখি:

***